Säämi |

“Tot lii tot anarâškielâ álgám kulluđ meid eres-uv soojijn ko Facebookist” – Jussá Seurujärvi algâttij snáppáđ anarâškielân

Jussá Seurujärvi movtáskij servâđ Snaepmien já snáppáđ ađai rähtiđ Snapchat-siskáldâs anarâškielân.

Jietna: Jussa Seurujarvi já suu puhelin
Jietna
Muáddi ive tassaaš vuáđudui Snaepmie-nommâsâš snapchat-tili, mon ulmen lii lasettiđ sämikielâ kevttim sosiaallâš mediain. Snapchat-tilist lii jyehi oho uđđâ kevttee já tääl kevtten lii vuossâmuu keerdi anarâš.

Anarâškielâ kevttim lii levânâm kuuloold meid sosiaallâš mediaid tego Facebookin já Youtuben. Tääl tot kulluuškuođij meid Snapchattist.

Jussá Seurujärvi lii suu tiäđu mield áinoo anarâš, kii lii snáppám Snaepmie-nommâsii Snapchat-tili vyelni.

– Suotâshân tot lii. Mutâ hoksáám oovtâ homá, ete tot čäällim ij lah innig taggaar nuuvt pyeri, ko tot lii ovdil lamaš. Vuáđuškoovlâst ko peesâi, te ij lah kuussân anarâškielân čáállám nuuvt ennuv. Luhhoost tast lii video, te puáhtá sárnuđ toos, Seurujärvi iätá.

Snaepmie lii muáddi ive tassaaš vuáđudum Snapchat-tili, mast tili kevttee molsosuvá jyehi oho. Vuáđujuurdân lii lamaš lasettiđ sämikielâi kevttim sosiaallâš mediain.

Jussá Seurujärvi movtáskij servâđ Snaepmien já snáppáđ ađai rähtiđ Snapchat-siskáldâs anarâškielân. Mohtâ šoodâi, ko sun huámášij maht muáddi eres-uv aanaarlâš snáppái Snaepmiest.

Uážud iärásijd-uv snáppáđ anarâškielân

Jussá Seurujärvi kiävttá sosiaallâš mediain enâmustáá Instagram já Snapchat. Siskálduv kielâ väljejuvvoo tom mield magarijd ulmuid saavah láá uáivildum.

– Enâmustáá mun kiävtám eŋgâlâškielâ já suomâkielâ, mutâ jis must lii miinii sämikielân äšši, te mun čálám sämikielân tom. Tot lii tot anarâškielâ álgám kulluđ meid eres-uv soojijn, ko Facebookist, sun čielgee.

Sun lii avžuuttâm meid eres anarâšâid servâđ Snaepmien.

Snapchat-saavah iä lah muuneeld meridum

Snaepmie-tili sistuálust lii tuše ohtâ njuolgâdus: saavah kalgeh leđe sämikielân. Jussá Seurujärvi läävee muštâliđ Snapchattist argâpiäiválijd aašijd, mut ij val tađe pyerebeht tieđe magareh saavah šaddeh puátteevuođâst.

– Puásuialmaihân ij tieđe maid tot parga itten, te ij pyevti tiettiđ. Kal mun maidnii tohon keksiim, Seurujärvi arvâl.

Snapchatist puáhtá čuávvuđ kales keččih jieijâs Snapchat-mainâsijd. Jussá Seurujärvi lâi Snaepmie-oho aalgâst huámášâm, et suu My Story -maainâs lijjii keččâm paijeel tuhháát olmožid. Keččeemeeri lii styeres, ko verdid sämmilij já eromâšávt anarâšâi mere.

Varrasamosat: Säämi

Váldoođđasat

Varrasamosat