Säämi |

“Tuáivum, ete Pride-teema siäilu ulmui elimist Pride-oho já mánuppaje maŋa-uv” – Pride-okko lii álgám taan oho vuossaargâ Helsigist

Máren-Elle Länsman tuáivu, ete Pride-oho maŋa ulmuuh iberdiččii pyerebeht maggaar tile Suomâst lii arvetävgi ulmuin.

Sápmi Pride
Sápmi Pride 2017 Govva: Ville-Riiko Fofonoff / Yle

Taan oho vuossaargâ aalgij Helsig Pride-okko já oho stuárráámus tábáhtus lii lávurduv ko ulmuuh väzzih pirrâ Helsig rááiđust. Tijmá tábáhtusân uásálistii 100 000 väzzed.

Kesimáánu lii nomâttum meid Pride-mánuppajan ton tááhust, ko kesimáánust láá maaŋgah Pride-tábáhtusah pirrâ maailm.

Pride-okko addel jienâ suhâpeeli- já seksuaalucceeblovoid já ohhoost peessâp juhlođ täsiáárvu já olmoošvuoigâdvuođâid.

"Tuáivum ete Pride-teema siäilu ulmui elimist Pride-oho já mánuppaje maŋa-uv”

Nillá Piera Ánne-Sire Máren-Elle, Máren-Elle Länsman muštâl, ete Pride-tábáhtus lii sunjin tehálâš äšši. Sun áigu uásálistiđ maŋeláá keessiv Oulu Priden, ko ij pargoi tiet peesâ suomâ stuárráámuu Pride-tábáhtusân Helsigân.

Sust láá maaŋgâlágáneh tobdoh Oulu Pridest.

– Tijmá lâi tuođâi pyeri tábáhtus, te vuárdám ete ličij ain siämmáá pyeri tábáhtus, iätá Länsman.

Máren-Elle Länsman
Máren-Elle Länsman vuárdá šiev mielâin Pride-tábáhtus . Govva: Máren-Elle Länsman / Priivaat

Sun tuáivu, ete Pride-teema siäiluččij ulmui elimist meid Pride-oho já mánuppaje maŋa-uv. Já veikkâ ääših láá puáránâm čuuvtij, te Länsman muštoot, ete vala puávtáččij moonnâđ pyerebeht.

– Pride-tábáhtus lii munjin tehálâš já lii pyeri, ete arvetävgi ulmuuh peessih mediast uáinusân pyereest. Tuáivum meid, ete oho maŋa ulmuuh iberdiččii pyerebeht maggaar tile Suomâst lii ain arvetävgi ulmuin. Seksuaalucceeblovvoin lii pyereeb tile ko veikkâ suhâpeeli ucceeblovvoin, Länsman muštoot.

Länsman lii lamaš pargoost párnái leeirâst já Pride-teema uáinoo meid tobbeen.

– Lávurduv leirâ nohá já talle lii disco já uásálisteeh láá halijdâm, ete disco teeman lii Pride, muštâl Länsman.

Varrasamosat: Säämi

Váldoođđasat

Varrasamosat

Muualla Yle.fi:ssä