Sápmi |

Tuomas Aslak Juuso válljejuvvui Sámedikki ođđa ságadoallin – dákkár lea Sámedikki ođđa stivra

Vuosttaš várreságadoallin válljejuvvui Anni Koivisto ja nubbin várreságadoallin Leo Aikio.

Sámedikki ságadoallit 2020-2023
Govas gurut bealde Sámedikki vuosttaš várreságadoalli Anni Koivisto, ságadoalli Tuomas Aslak Juuso ja nubbi várreságadoalli Leo Aikio. Govva: Tuomas Hautaniemi / Yle

Tuomas Aslak Juuso lea válljejuvvon Sámedikki ođđa ságadoallin badjái 2020–2023.

Eanodatlaš Juuso lea doaibman mannan bajis 2016–2019 Sámedikki nubbin várreságadoallin. 35-jahkásaš Juuso lea leamašan Sámedikki áirrasin maiddái jagiin 2008–2011.

Ođđa ságadoallis jienastedje lihppojienastemiin. Evttohassan ságadoalli báikái leigga Juuso ja Anu Avaskari. Juuso vuittii jienaiguin 16–5.

Juuso lea lohpidan Yle Sámi válgamášenis ovddidit ja doarjut earret sápmelaččaid álgoálbmot- ja ommošrivttiid, árbevirolaš ealáhusaid ja sámekultuvrra ja -gielaid eallinfámu.

Sámedikki vuosttaš várreságadoallin válljejuvvui Anni Koivisto ja nubbin várreságadoallin válljejuvvui Leo Aikio.

Anni Koivisto lea Ohcejoga gielddastivrra ja -ráđđehusa lahttu. Yle Sámi válgamášenis Koivisto lea lohpidan bealuštit sámiid vuoigatvuođaid, geahččalit gávdnat čovdosiid maiddái váttis čuolmmaide, dikšut sámiid oktasaš áššiid nu bures go vejolaš ja vuodjut áššiide dárkilit. Son lea lohpidan maiddái gulahallat olbmuiguin ja juohkit dieđu áššiin, mat leat Sámedikki gieđahallamis. Dát lea Koivisto vuosttas badji Sámedikkis.

Leo Aikio lea anárlaš boazoalmmái ja Muttošjávrri bálgosa várreboazoisit. Yle Sámi válgamášenis Aikio lea lohpidan bealuštit sámiid árbevirolaš ealáhusaid, ovddidit luonddu vuoigatvuođaid ja vuostálastit Jiekŋameara ruovdegeainnu. Aikio lea vuosttas baji sámediggeáirras.

Goit njeallje sámediggeáirasa ledje almmuhan ovdal ortniiduvvančoahkkima, ahte leat beroštuvvan ságadoallibáikki. Sii ledje anárlaččat Anu Avaskari ja Kari Kyrö, eanodatlaš Tuomas Aslak Juuso ja ohcejohkalaš Anni Koivisto.

Eará stivralahtut badjái 2020–2023

Ságadoalliid lassin Sámedikki stivrii válljejedje lahttun Magreta Sara, Anne Nuorgam, Juha-Petteri Alakorva ja Veikko Feodoroff.

Magreta Sara lea eret Anára Lismmás. Son lea badjeolmmoš ja lektor Sámi allaskuvllas. Sara ii leat dahkan válgalohpádusaid Yle Sámi válgamášenii. Sara lea nuppi baji sámediggeáirras.

Anne Nuorgam lea riektediehtagiid kandidáhta ja jurista Ohcejogas. Son lea maiddái Ovttastuvvan Našuvnnaid álgoálbmogiid bissovaš foruma jođiheaddji ja Veahčaka guolástangotti ságadoalli. Yle Sámi válgamášenis son lea lohpidan ovddidit sámeealáhusaid, servodatráfi ja sámesoahpamuša fápmuiboahtima ja ollašuhttima. Nuorgam leamašan Sámedikki lahttu jagi 2000 rájes.

Juha-Petteri Alakorva lea biergočuohppi Vuohčus. Alakorva lea lohpidan buoremus lági mielde leat báikki alde čoahkkimiin. Dát lea su vuosttas badji Sámedikkis.

Veikko Feodoroff lea badjeolmmoš Čeavetjávrris. Son lea nuortalaččaid ovdaolmmoš. Yle Sámi válgamášenis Feodoroff lohpida bargat árbevirolaš ealáhusaid suoji ja doaibmavejolašvuođaid ovdii ja oassálastit aktiivvalaččat Sámedikki ja dan doaibmaorgánaid doibmii. Son deattuha, ahte ii háliid sehkket Sámedikki ja Nuortalaččaid giličoahkkima rollaid baicce ovddidit ovttasbarggu daid gaskka. Feodoroff lea nuppi baji sámediggeáirras.

Varrasamosat: Sápmi

Váldoođđasat

Varrasamosat

Muualla Yle.fi:ssä