Sápmi |

Turisma dálvesesoŋŋa orru ollašuvvamin ovdatestemiiguin – Suoma ráđđehus ložže mátkkoštanráddjehusaid ja Ruoŧasge beassá fas Supmii

Supmii beassá álkibut boahtte vahku lávvordaga rájes dihto eavttuiguin. Fitnodatdoalli árvala, ahte goittotge dálvesesoŋŋa kundarat bohtet eanemustá Suomas.

Hiihtäjiä Saariselällä.
Dálvesesoŋŋa soaitá vel ollašuvvat davvin. Arkiivagovva. Govva: Ritva Tarkki / Yle

Moadde beaivvi ráđđádallamiid maŋŋá Suoma ráđđehus lea mearridan ložžet koronanjoammumiid nu gohčoduvvon rádjeárvvu, man mielde riikii oažžu boahtit.

Dasa lassin barggus johttit ja rádjeservošat sáhttet rasttildit rájá sihke davvin ja Esteeatnama ja Ruoŧa fearja- ja girdijohtolagas testenduođaštusaid ja karantenaid haga, jus guovlluid dávdadilli lea sullii seamma dásis leš dál olles riikka koronanjoammunlohku mii beare.

Boahtte vahku lávvordaga rájes Supmii lea vejolaš boahtit riikkain, gos koronanjoammumat leat leamaš eanemustá 25 olbmos 100 000 olbmo ala guovtti vahku siste. Dán rádjai rádjeárvu leamašan sullii gávcci.

Riikii boahtima ráddjehusat nohket boahtte vahku lávvordaga, 18.9. rájes Islándda, Norgga, Polska, Ruoŧa, Duiskka ja Kyprosa oasil. Dasa lassin Austriália, Kanáda ja Jáhpána riikavuložat ožžot boahtit ruovtturiikkasteaset Supmii.

Testenduođaštusain Supmii beasašii maiddái daid riikkain, gos njoammumat leat olu

Suomas váldojuvvo maid atnui vuogádat, mas mátkkošteaddji galgá oažžut negatiiva koronateastabohtosa ovdal, go vuolgá mátkki ala. Ná sáhttit maiddái rahpat mátkkošteami dálvesesoŋŋa.

Dalle Supmii boađedettiin gáibiduvvo bákkolaš negatiiva teastaboađus olbmuin, geat bohtet riikkain, main koronanjoammumiid rádjeárvu lea badjel 25 ja mátki bistá eanemustá 72 diimmu. Nappo mátkkošteaddji galgá riikii boađedettiin bastit čájehit eiseválddiide duođáštusa das, ahte sus lea váldon koronateasta ja dan boađus leamaš negatiiva.

Jus mátki bistá guhkit áigge go 72 diimmu, dalle ávžžuhit olbmo bissut karantenas ja váldit nuppi teastta.

Guovtti teastta vuogádat goit gáibida láhkanuppástusa ja vuogádaga áigot váldit atnui maŋimustá 23.11. rádjai.

Fitnodatdoalli: "Goassege ii dieđe, mii boahtte vahkus dáhpáhuvvá"

Lappi turismafitnodagain ráđđehusa mearrádusat váldojuvvojit vuostá ruossalaš dovdduiguin: mátkkošteami rahpan ođđa riikkaide dagaha olu buori juovlasesoŋŋa ektui, muhto bákkolaš koronateasttaid árvalit unnidit turistameari.

Visit Levi beaivválaš jođiheaddji Yrjötapio Kivisaari ballá das, ahte bákkolaš teasta dakkár olbmuide, geat bohtet rádjeárvvu rasttildeaddji riikkain, sáhttá váttásmahttit mátkkošteami mearkkašahtti olu.

– Mii áddet testema dehálašvuođa, muhto dubbaltesten vuolgin- ja čuozáhatriikkas ja vejolaš karantena dahje teastabággu geavadis eastáda máŋgga mátkkošteaddji juovlamátkkiid Lappii, čállá Kivisaari Visit Levi dieđáhusas.

Suoma fitnodatdoalliid organisašuvdna Suomen Yrittäjät atná mátkkoštanráddjehusaid ložžema dehálažžan, muhto dat ii sin mielas vel gájo davviguovllu dálvesesoŋŋa. Organisašuvnna mielas eavttuid galggašii vel smiehttat ođđasit.

– Ii leat realisttalaš vuordit, ahte mearrádus gádju davi mátkkoštandálvvi. Erenomážit chartergirdiid oasil báhcet čuolmmat, dego karantena ja nuppi testema gáibádus mátkkiin, mat bistet badjel golbma jándora, dadjá Lappi fitnodatdoalliid Lapin Yrittäjät -organisašuvnna beaivválaš jođiheaddji Pirkka Salo.

Kaisu Nikula
Anára Kultahovi -fitnodaga fitnodatdoalli Kaisu Nikula lea oba duđavaš ráđđehusa mátkkoštanráddjehusaid ložžemiidda, vaikko boahttevuohta ii leatge nu sihkkar. Govva: Kirsti Länsman / Yle

Anárlaš fitnodatdoalli Kaisu Nikula atná buorrin nu gohčoduvvon "teste ja boađe" -málle, mas vuođđun lea negatiiva koronateastaboađus ovdal mátkái vuolgima.

Son goit smiehttá, ahte dákkár vuogádaga sáhttá leat hástaleaddji ordnet.

– Dieđusgehan dat lea buot dehálamos ášši, ahte mii bissut dearvvasin dáppe ja virus ii leava deike, Nikula árvala.

Boahtte dálvvi ektui son lea juo jurddašan, ahte kánske mátkkošteaddjit leat eambbo Suomas.

– Okta ášši, man lean dás oahppan lea, ahte ii dieđe, mii boahtte vahkus dáhpáhuvvá. Mii vuordit ja geahččat, mo geavvá, dadjá Nikula.

Varrasamosat: Sápmi

Váldoođđasat

Varrasamosat

Muualla Yle.fi:ssä