Sápmi |

Turismasuorggi olbmot vurdet dálvvi iešguđetlágan jurdagiiguin: okta luohttá suopmelaš turismii, nubbi guorahallá steŋget uvssaid dálvái

Turismasuorggi bargi ii dieđe, leago dálvit šat bargu. Fitnodatdoallit vurdet dálvvi gealdagas.

Pirita Portti
Pirita Portti soaitá gártat lupmui. Govva: Pirita Portti

Turismasuorggi olbmot vurdet dál gealdagas, mo geavvá sin bargobáikkiide, jus turisma ii beasa koronaráddjehusaid dihte albmaláhkai johtui.

Dálvesesoŋŋa lea Lappi turismma dehálamos áigi ja dalle bohtetge guossit erenomážit olgoriikkain. Máŋggat turismafitnodagat leatge almmuhan, ahte soitet juobe koŋkánit olgoriikalaš turisttaid haga.

Avvillaš Pirita Portti bargá Wilderness Hotel -fitnodaga hoteallain Njellimis ja Anáris. Su mielde dát geassi lea leamašan turismma ektui imašlaš buorre, juobe buoremus su karriera áigge, muhto dálvvi lahkoneapmi oažžu bivastaga golgat su gállus.

– Golggotmánu rájes measta buot min guossit bohtet olgoriikkain. Njellima hotealla manná dál čakčamánu loahpas muđuige gitta, muhto Anára hotealla galggašii bissut rabas. Soaitá goittotge leat, ahte ii leat vejolaš doallat dan rabas.

Turismasuorgi lea maid okta dehálamos barggu addi Davvi-Suomas. Turismma nohkan sáhttáge dárkkuhit dan, ahte duháhat olbmot, eandalitge nuorat, miehtá Lappi masset bargguset.

Wilderness Hotel -fitnodaga hoteallain barge mannán dálvve oktiibuot sullii 160 bargi. Portti muitala, ahte dál ii leat sihkkar, bastetgo bálkkahit ollenge sesoŋŋabargiid. Jos funet geavvá, maiddái son soaitá gártat lupmui.

Eahpesihkkaris dilis fuolakeahttá Portti ii leat vuos smiehttan bargagoahtit eará suorggis.

– Galhan dat lea nu eahpesihkkar dál, ja galggašii leat dat plan B, muhto mus lea vel doaivva.

Guldal Pirita Portti jearahallama dás. Jietna: Xia Torikka / Yle

Fitnodatdoallit ráhkkanit dalvái iešguđetláhkai

Hotel Kultahovi eaiggát Kaisu Nikula ii bála boahttevuođas. Son árvala, ahte suopmelaš turisttat soitet movttáskit mátkkoštit davás.

– Dán koronaáiggis mii leat oahppan dan, ahte ferte beare vuordit, ahte mii dáhpáhuvvá ja doaibmat dan mielde. Mun jáhkán, ahte jos suopmelaččat eai beasa olgoriikkaide, de dathan bohtet deikke.

Kaisu Nikula
Kaisu Nikula luohttá suopmelaš mátkkošteddjiid gávdnat davás maiddái dálvet. Govva: Kirsti Länsman / Yle

Guldal Kaisu Nikula jearahallama dás. Jietna: Anja Kaarret / Yle

Nikula ii leat plánen hotealla gitta bidjama, go fas fitnodatdoalli Juhani Eiramo lea gárvvis steŋget iežas luopmoguovddáža uvssaid Soađegili Kakslauttanenis, jus dilli ii oro buorráneamen.

– Oktage várrejupmi ii leat dán rádjai boahtán. Orru leamen gal fuones dilli dál olles máilmmis. Fertet eallit beaivvi ain hávil, muhto mii ráhkkanat goittot nu bures go vejolaš.

Juhani Eiramo, Kakslauttanen, Saariselkä
Juhani Eiramo lea ráhkkanan steŋget luopmoguovddáža uvssaid, jus dilli vearrána. Govva: Vesa Toppari / Yle

Eiramo lea huksemin maiddái Ohcejohkii ođđa hotealla. Huksenbarggut joatkašuvvet, vaikko gárttašiige giddet luopmoguovddážis Kakslauttanenis. Hotealla galggašii gárvánit guovvamánus.

– Mii hukset dan gárvvisin ja rahpat dan dalán, go turisttat livčče boahtemin.

Huskygárddi eaiggát lea fuolas turismmas geavahuvvon elliin

Eanodatlaš huskygárddi eaiggát Pasi Ikonen oamasta 252 huskybeatnaga ja su huskygárddis gallededje diibmá 15 000 olbmo. Gallededdjiin sullii 98 proseantta bohte olgoriikkain.

Dálá dilli fuolastuhttá Ikonena erenomážit elliid dihte.

– Mun lea fuolas das, mo geavvá turismmas geavahuvvon elliide, jus dákkár dilli joatkašuvvá. Eallit eai sáhte eará go luohttit, ahte oamasteaddjit fuolahit dain dás duohkoge, muhto dainna gal sihkkarit máŋgasiidda šaddet váttisvuođat.

Hetta Huskies -yrityksen omistaja Pasi Ikonen huskykoiran kanssa
Pasi Ikonena huskygárddis leat 252 huskybeatnaga. Govva: Anna Mc Cormack / Hetta Huskies

Ikonen ii ieš háliidivčče luohpat beatnagiinnis.

– In jáhke, ahte luobašin dain jus ii leat áibbas bággu. Jus nu geavaš, de geahččalivččen ohcat daidda ođđa ruovttuid bearrašiin, lohká Ikonen.

Varrasamosat: Sápmi

Váldoođđasat

Varrasamosat

Muualla Yle.fi:ssä