Sápmi |

Uccpárnáá Vuoli Ilmar, Ilmari Mattus vihahuvvo Oulu universitehta gudnedoavttirin

Ilmari Mattus lea áŋgiruššan anárašgiela ealáskahttimiin.

Ilmari Mattus Anarâškielâ seervi ihečuákkimist 21.2.2015.
Govva: Eljas Niskanen / Yle

Uccpárnáá Vuoli Ilmar, Ilmari Mattus, 75, nammaduvvo Oulu universitehta humanisttalaš dieđagotti gudnedoavttirin. Mattus lea giellaaktiiva, girječálli, jorgaleaddji ja dáiddár.

Son lea áŋgiruššan anárašgiela giellaealáskahttimiin ja lea leamaš váikkuheamen dasa, ahte anárašgiella lea šaddan universitehta oahppoávnnasin. Son lea leamaš áššedovdin, diehtoaddin ja dutkanguoibmin iešguđet surggiid dutkiide.

Oulu universitehta čállá dieđáhusastis, ahte Mattus lea addán eará dutkiid geavahussii mearkkašahtti olu alladását dutkanmateriála, maid son lea ieš čohkken. Materiálii gullet ovdamearkka dihtii sullii 20 000 báikenama čoakkáldat ja 1,3 miljon sáni anárašgiela sátnečoakkáldat.

– Son lea njuolga váikkuhan akademalaš dutkamuša lihkostuvvamii ja lokten dan dási sakka, dieđáhusas muitalit.

Oulu universitehta vihaha 21 ođđa gudnedoaktára 22.–24.5. akademalaš promoverendilálašvuođas. Gudnedoavttirin vihaheapmi lea alit fuomášupmi, man universitehta sáhttá mieđihit ovttaskas olbmui.

Varrasamosat: Sápmi

Váldoođđasat

Varrasamosat

Muualla Yle.fi:ssä