Ohcejoga gielda lea bargamin prošeavttain, mas čuvvot mo Ohcejohka oidno medias. Juos Ohcejogas lea ruosti buolaš, bahkka, skábma, čuvges idja, guovssahasat dahje luossaságat, de dat beaggá miehtá máilmme.

Guovllu olbmot ellet ja barget dego ovdalge, muhto somáhan dat lea ah´ čállet, oaivvilda ohcejohkalaš Tapio Guttorm.

– Dathan gal lea dieđusge buorre go beaggá dien láhkái ja ráhkaduvvojit ođđasat minge báikkis. Dat hirbmat lea buorre.

Ohcejoga gielddas leat juo mannan čavčča iskan čuovvut sierra dihtorprográmmain mii gielddas muitaluvvo. Sii háliidit diehtit makkár áššiide lea beroštupmi, go dat galget maŋŋá leat báikki fitnodagaide ávkin earet eará márkanfievrredeamis

Gielddahoavda Vuokko Tieva-Niittyvuopio muitala, ahte dihtorprográmma lea dál dán jagi álggus boahtán fásta ádnui.

– Min oanehaš geahččaladdan jo čájehii, ahte das lea hui olu ávki midjiide, ja dat addá midjiide buriid reaidduid ja namalassii dieđu das, maid máilmmis jurddašit min birra ja maid čállet min birra, lohká Tieva-Niittyvuopio.

Sámi biras ja luondu geasuhit

Suopmelaš ruhtamáilmmi bláđi Kauppalehti Optio doaimmaheaddji Paula Nikula lea moadde vahku govven ja čállán ságaid Ohcejogas. Son bođii dohko gáiddusbargui ja lea loaktán bures.

Paula Nikula árvala, ahte luonddu fenomenat ja biras leatge dat áššit, mat eanemusat geasuhit lohkkiid miehtá Suoma.

– Dán jagiáiggis máŋgasat várra smihttet, ahte skábma lea seavdnjat ja váivi. Dathan leamaš baicca issoras fiinna ivdnevásáhus, fiinna iđit- ja eahketruođit, guovssahasat ja buorre dálkkit govvejeaddjái, rábmo Nikula.