Sápmi |

Uksa lea ain goavkkil Jiekŋameara ruovdegeidnui – Loahpparaporta čájeha, maid ferte váldit vuhtii joatkkaplánain, jus ášši ovddidišgohtet

Sámedikki ságadoalli mielas birra jorbasit čállojuvvon loahpparaporttas leat lihkká olu buorit áššit sápmelaččaid dáfus.

Timo Kievari on liikenne- ja viestintäministeriön yksikönjohtaja.
Govva: Liikenne- ja viestintäministeriö

Jiekŋameara ruovdegeaidnu ii leat ruđalaččat gánnihahtti, čielggai otne almmustuvvan loahpparaporttas. Suoma ja Norgga gaskasaš čielggadanbargojoavkku bargun lei čielggadit Jiekŋameara ruovdegeainnu huksema eavttuid.

Loahpparaporta ii evttot maidige joatkkadoaimmaid ruovdegeainnu ovddideapmái, muhto loahpparaporta lea čallojuvvon nu, ahte dat guođđá uvssa binná goavkkil, oaivvilda sámedikki ságadoalli Tiina Sanila-Aikio.

– Oalle birra jorbasit lei čállojuvvon dat dieđáhus. Das lei vel diená uksa rabas, ahte jus boahttevuođas dát ášši lea áigeguovdil, de sáhttá dasa máhccat, dadjá Sanila-Aikio.

“Hirbmat buorit ákkat manin ruovdegeainnu galggašii sihkkut eret eanangoddelávas”

Vaikko loahpparaportta ii loahpalaččat hávdátge Jiekŋameara ruovdegeainnu, de das leat olu buorit áššit sámiide, muitala Sanila-Aikio.

– Čuovvovaš lávki dán proseassas lea dál gieđahallat dan doppe davimus Suoma eanangoddeláva 2040 -oktavuođas. Mun oainnán dál hirbmat buriid ákkaid, ahte manne Jiekŋameara ruovdegeainnu galggašii sihkkut eret dan eanangoddelávva Davvi-Lappi kárttás eret.

Eanangoddelávva 2040 -proseassa lea dál jođus ja dat lea cealkinláhkai guovvamánu lohppii.

– Gal dat okta vuoitu lea dan oalle guhkes proseassas jo. Beannot jagi mii leat bargan dainna. Dat ákkat, manne dan ruovdegeainnu galggašii vel ovddidit, dat eai šat gávdno. Das mun lean ilus, oaivvilda Sanila-Aikio.

Tiina Sanila-Aikio
Loahpparaporta lea čallojuvvon nu, ahte dat guođđá uvssa binná goavkkil, oaivvilda sámedikki ságadoalli Tiina Sanila-Aikio. Govva: Vesa Toppari / Yle

Ministeriija virgeolmmoš :“Dat mii fidnui dál dáhpáhuvvá, lea gitta mearrádusain, maid dahket sierra”

Loahpparaporttas geavahuvvojit Jiekŋameara ruovdegeainnus čáledettiin jus/go-hámit. Seamma jus-hápmi joatkašuvvá maiddái ministeriija virgeolbmo jearahallamis.

Johtolat- ja diehtojuohkinministeriija ossodathoavda Timo Kievari muitala, ahte dál leat čielggaduvvon Jiekŋameara ruovdegeainnu huksema eavttut, iige bargojoavku evttot makkárge joatkkadoaimmaid.

Loahpparaportta bohtet geavahit ávkin, jus ruovdegeainnu mearridit ovddidit.

– Dat mii fidnui dál dáhpáhuvvá, lea gitta mearrádusain, maid dahket sierra. Dat lea čielggas, ahte jus ná viiddis fidnu plánema álggahit, de sihke Suomas ja Norggas ferte dahkkot politihkalaš mearrádus áššis.

– Dán loahpparaporta vehkiin sáhttet árvvoštallat daid gažaldagaid, maid ferte váldit vuhtii dalle joatkkaplánain, jus ášši vulget doalvut ovddosguvlui. Kievari deattuha vuot sáni "jus".

– Loahpparaporta addá diehtovuođu politihkalaš mearrádusaid doarjjan, dadjá Kievari.

Govva váldojuvvon Jiekŋameara ruovdegeainnu loahpparaporttas.
Govva: Yle Sápmi

Johtolatministtar Anne Berner ii astta kommenteret loahpparaportta ja dan mearkkašumi Yle Sápmái.

Jiekŋameara ruovdegeainnu gánnihahttivuođas ja dan vejolaš ruhtadeamis lea dahkkojuvvon viiddis ekonomalaš čielggadeapmi. Dain boahtá ovdan, ahte Jiekŋameara ruovdegeainnu fidnus leat stuorra hástalusat. Guovddáščuolbma lea, ahte stuorra investeren gánniha hui unnán. Eará hástalusat leat dan birasváikkuhusat ja váikkuhusat sápmelaččaide. Das sáhttet badjánit politihkalaš váikkuhusat ja dat váikkuheš maiddái beaggimii.

Varrasamosat: Sápmi

Váldoođđasat

Varrasamosat

Muualla Yle.fi:ssä