Koe uusi yle.fi
Sápmi |

Unna Junná deavdá logi jagi – tv-sáddagiid lassin fállun Binnabánnaš golmma gillii Yle Areenai

Sámegielat mánáid tv-programma Unna Junná ávvuda logi jagi beivviid tv-sáddagiid lassin anáraš- ja nuortalašgielat Binnabánnaš-prográmmaiguin.

Binnabannas
Govva: NRK Sápmi

Unna Junná dahkan álggii Yle Sámi  ja SVT Sámi ovttasbargun jagis 2007. Jagi 2011 rájes Unna Junná šattai ollásit dušše beare Yle Sámi mánáidprogramman, go SVT Sápmi dahkagođii iežas mánáidprogramma.

– Dan maŋŋá mii leat sáhttán váldit anáraš- ja nuortalašgiela eanet mielde Unna Junná -programmaide, muitala Unna Junná buvttadeaddji Ritva Torikka.

Logi jagi historjjás áigge Unna Junná lea johtán sámemánáid máilmmis sihke sámeguovllus ja sámeguovllu olggobealde. Programmain leamašan olu stoahkamat, muitalusat, musihkka ja buđáldeamit ja mánáid mielamiel áššit, nugo eallit. Unna Junná lea johtán meahcis, dutkan šattuid ja muittašan doložiid museas.

– Dat lea hearvái, man olu mii leat geargan dán logi jagis, dat lea illudahtti. Resurssat eai váidalahtti gal leat lassánan ja mii bargat álo dušše jahkebeali, muhto Unna Junná lea ain eallemen ja fámuid alde.

– Sávvamis boahtteáiggis mánáid- ja nuoraidfálaldagaid dahkan boahtá oažžut eanet resurssaid nu, ahte sáhttit dahkat uhcemustá 52 programma jagis ja lasihit fálaldagaid maiddái neahtas, smiehttá Torikka.

Sámemusihkkárat ja Unna Junná

Unna Junnás leamašan lihkku oažžut mielde čeahpes musihkkariid lávlut ja dahkat musihka mánáide, illuda buvttadeaddji Ritva Torikka

– Sámemánát leat beassan návddašit min čeahpes musihkkariid dujiin Unna Junnás.

Musihká ja lávlagiid leamaš dahkamin earet eará Annukka Hirvasvuopio-Laiti, Anna Näkkäläjärvi-Länsman, Heli Huovinen, Ailu Valle, Niillas Holmberg, Anna Lumikivi, Tiina Sanila-Aikio, Heli Aikio ja Hanna-Maaria Kiprianoff.

– Min háhppilis buoidda Unna Junná lea beassan maid ráppet ovttas Ailu Vallein. Soai dagaiga ovttas Unna Junná valaštallanráp. 

Mánát leat liikon hui ollu sámegielat mánáidráp-bihtáin, maid Unna Junnás leat buvttadan jagiid mielde.

– Anárašgielat KumbePasi beana leamašan hui bivnnut, maidda liikojedje sihke mánát ja olles olbmot, boagusta Torikka.

Son sávváge, ahte musihkkarat ja eará čeahpes sámi dáiddárat movttiidit dás duohkoge leat mielde dahkamen Unna Junná ja eará fálaldagaid sámemánáide.

Programmajođiheaddjit leat amadadju olggosguvlui

Unna Junnás leamašan programmaláidesteaddjin dán logi jagi áiggis Suoma bealde Petra Biret Magga-Vars, Irene Länsman, Heli Huovinen, Anna-Katariina Feodoroff, Leena Fofonoff, Anna Näkkäläjärvi-Länsman,  Kirsti Länsman, Niillas Holmberg, Terhi Harju, Sara Wesslin, Niki Rasmus ja Anna Lumikivi.

– Dát joavku lea min amadadju min unna ja stuorat tv-geahččiide. Si lea dat olbmot, geat láidestit unna geahčči ja skihpárin sutnje tv-guoras ja dieđus neahtas maid. Danin sii leat dehálaš olbmot. Mis leamašange duvra fidnet buot dáid sympáhtalaš ja čeahpes programmajođiheaddjiid Unna Junnái, illuda Torikka.

– Mánáid máilbmi lea miellagiddevaš ja midjiide buohkaide livččii dearvvaslaš ainjo duollet dállet guovlalit dan máilbmái, smiehttá son.

Anna Lumikivi meahcis
Govva: Ritva Torikka / Yle
 
Irene Länsman
Govva: Ritva Torikka / Yle

Unna Junná čakča 2017
Heli Huovinen
Govva: Ritva Torikka / Yle

Dán čavčča Unna Junná programmas leat mielde ođđa ja ovdal dahkkon programmaoasit. Programmain leat dutkamen ja buđaldeamen meahcis ja stobus, guovlamen doložiid ja dálážiid, stoahkamen ja lávlumen.

Unna Junná -buoidda dutká earet eará makkár diŋggat  gávdnojit museas ja maid daiguin leat dolin dahkan.

Binnabánnaš anáraš- ja nuortalašgillii

Mannán giđa Unna Junnás lei mánáid movttiidahttimin Binnabánnaš-ráidu. Binnábánnaš lea NRK Sámi buvttadan ráidu, mas Binnabánnaš-miessi ovttas skihpáriinnis Ujujjuin oahpaha ođđa sániid mánáide suohtas vugiin. Ráidu lea dahkkon davvisámegillii. Dál ráidu boahtá maid ánáraš- ja nuortalašgillii.

Unna Junná logi jagi -ávvudeami gudnin Binnabánnažis leat dubbejuvvon anáraš- ja nuortalašgillii mannán giđa Binnabánnaš-oasit, mat leat oktiibuot 15.

Golggotmánu álggus lea Binnabánnaš oaidnimis golmma sámegillii Yle Areenas. Boahttevuođas dat čájehuvvojit maid tv:as.

Bigálusspeallu barggu vuolde

Maŋŋelabbos lea vel boahtimen Yle Pikku Kakkonen vuođu ala dahkkojuvvon bigálusspeallu, mii doaibmá maiddái mobiillas.

– Spealu almmustahttima áigi lea vel rabas, muhto sávvamis dat gárvvásmuvvá maŋimustá boahtte jagi álgogeahčen, sávvá Torikka.

Unna Junná sáddejuvvo vuossárggaid diibmu 8.35 Yle TV2 ja nuppádassii čuovvovaš sotnabeaivve 8.15 Yle Fem -kanálas

Unna Junná álggaha čavčča 2017 tv-programmaid vuossárgga 11.9.

 

Divvojuvvon 6.9.2017 dii 13.41: Unna Junná álggaha čavčča 2017 tv-programmaid vuossárgga 11.9.

Divvojuvvon 6.9.2017 dii 14.20: Bajilčállaga animašuvdna Binnabánnašin

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä