Sápmi |

Unna Junná ođđa prográmmat álget – giđas lottit, dálvestohkosat ja máidnasat

Unna Junná oidno 18.2. rájes Yle TV2-kanálas vuossárgga beal ovccis iđđedis ja nuppádassii bearjadaga Yle Teema & Fem -kanálas diibmu 7:45.

Essi Kesti joođeet Unna Junná.
Prográmmajođiheaddji Essi Kesti. Govva: Heli Huovinen / Yle

Yle sámegielat mánáidprográmma Unna Junná máhccá tv:ii 18.2. ođđa prográmmaiguin.

Giđa vuosttas sáddagis beassat dalánaga oahpásmuvvat ođđa prográmma láidesteaddji Essi Kestiin. Kesti lea anárlaš duodjeoahppi, guhte jođiha sáddaga anárašgillii.

– Vuosttas geardde kámera ovddas lei gal speanta, muhto dat lei nu hearvái go birra lei hávskes bargojoavku, Kesti muitala.

Vuosttas prográmmas son čájeha govaid, maidda mánát leat sárgon fiidnásamos biktasiid.

Ođđa sáddagat šaddet ovttasbarggus

Unna Junnás bossot dán giđa dievva ođđa biekkat. Ođđa studio ja lágideaddjiid lassin prográmmas leat áibbas ođđa ráiddut.

Dálvesuohttasat-ráiddus beassat stoahkat olgun ovttas Gáregasnjárgga skuvlamánáiguin. Jođiheaddjit Martti Kyrö ja Matias Rasmus čájeheaba mánáide, makkár suohtas áššiid sáhttá dahkat dálvit olgun. Sátta lea dahkkon ovttasbarggus Meahciráđđehusa Davvi-Lappi luonddubálvalusaiguin, ja dat lea govvejuvvon Luopmošjogas.

Dálvesuohttasat.
Adriana Niittyvuopio lea váldooasis vuosttas Dálvesuohttasat-prográmmas. Govva: Heli Huovinen / Yle

Giđđabáji álggus oaidnit maiddái Sámi oahpahusguovddáža medialinjá oahppi ráhkadan animašuvnna.

Vuosttas sáddagis oaidnit Hanna-Mari Hotta animašuvnna guovssahis. Anárašgielat muitaleaddjin lea 2-luohkálaš Arvi Lehmuslehti, Anáris eret.

Kuávská.
Hanna-Mari Hotta animašuvnna guovssat. Govva: Hanna-Mari Hotta / Yle

NRK Sámi buvttadan Binnabánnaš-dohkkáráiddu oaidnit dál vuosttas geardde tv:s nuortalašgillii. Ráidu lea ovdal oidnon Unna Junnás davvisámegillii, muhto dán giđa buot 15 oasi sáddejuvvojit nuortalašgillii. Binnabánnaža jietnan lea Unna Junná -prográmma láidesteaddjin oahpis musihkkár Anna Lumikivi.

Binnabánnaš.
Vuosttas oasis Binnabánnaš stoahkká ráidduin. Govva: NRK Sápmi

Maŋŋelabbos giđđat Unna Junnás oahpásmuvvat dárkilabbot lottiide, livđiide ja vielpáide. Dasa lassin Unna Junná gávdná museas miellagiddevaš gálvvuid, ja oaidnit maiddái mo máidnasis šaddá govva.

Giđa vuosttas Unna Junná sáddejuvvo vuossárgga 18.2 diibmu 8.30 Yle TV2 -kanálas ja nuppádassii bearjadaga 22.2. Yle Teema & Fem -kanálas diibmu 7.45. Buot Yle Sámi prográmmat gávdnojit maiddái Yle Areenas.

Unna Junná dahkkit leat guossin Dearvva sáddagis 15.2.2019. Sátta álgá diibmu 14.30.

Varrasamosat: Sápmi

Váldoođđasat

Varrasamosat

Muualla Yle.fi:ssä