Sápmi |

Unna Junná uđđâ ohjelmeh älgih - kiiđâst lodeh, tälvisierah já mainâseh

Unna Junná uáinoo 18.2. rääjist vuossaargâ Yle TV2 -kanavast tijme 8.30 já uđđâsist vástuppeeivi Yle Teema & Fem -kanavast tijme 7.45.

Essi Kesti joođeet Unna Junná.
Ohjelmjođetteijee Essi Kesti. Govva: Heli Huovinen / Yle

Yle sämikielâg párnáiohjelm Unna Junná máccá television vuossaargâ 18.2. uđđâ ohjelmijguin.

Kiiđâ vuosmuu ohjelmist peessâp tállân uápásmuđ uđđâ ohjelmjođetteijee Essi Kestin. Kesti lii aanaarlâš tyejiuáppee já sun joođeet ohjelm anarâškielân.

– Vuosmuš kerdi kamera oovdâst lâi kal jiäráskittee, mutâ tot lâi nuuvt ihana ko pirrâ lâi hitruus pargojuávkku, Kesti muštâl.

Vuosmuu ohjelmist sun čáittá kuuvijd, moid párnááh láá sárgum muččâdumos pihtâsijn.

Uđđâ ohjelmeh šaddeh uápis ohtsâšpargeiguin

Unna Junnást posoh taan kiiđâ uđđâ piegah. Uđđâ studio já ohjelmjođetteijei lasseen ohjelmist láá aaibâs uđđâ rááiđuh.

Dálvesuohttasat -rááiđust peessâp sierâdiđ olgon oovtâst Kärigâsnjaargâ párnáiguin. Stivrejeijeeh Martti KyröMatias Rasmus čäittiv párnáid magarijd suotâs aašijd puáhtá puđâldiđ tälviv olgon. Ohjelm lii rahtum ohtsâšpargoost Meccihaldâttâs Tave-Laapi luándupalvâlusâiguin já tot lii kovvejum Luomâšjuuvâst.

Dálvesuohttasat.
Adriana Niittyvuopio lii váldu-uásist vuosmuu Dálvesuohttasat -ohjelmist. Govva: Heli Huovinen / Yle

Kiđđâpaje aalgâst uáinojeh meiddei Säämi máttááttâskuávdáá medialinjá uáppei ráhtám animaatioh. Vuosmuu ohjelmist uáinip Hanna-Mari Hotta animaatio kuávskást. Anarâškielâg muštâleijen lii 2-luokalâš Arvi Lehmuslehti Anarist.

Kuávská.
Kuávská. Govva: Hanna-Mari Hotta / Yle

NRK Säämi pyevtittâm Binnabánnaš -nukkeráiđu čáittoo tääl vuosmuu keerdi televisiost nuorttâlâškielân. Ovdil Unna Junnást lii oinum rááiđu ohjelmeh pajekielân, mutâ taan kiiđâ puoh 15 uásid puátih nuorttâlâškielân. Binnabánnaš jienân lii Unna Junná ohjelmjođetteijen-uv uápis musikkár Anna Lumikivi.

Binnabánnaš.
Vuosmuu uásist Binnabánnaš sierâd ráiđoin. Govva: NRK Sápmi

Maŋeláá kiđđuv Unna Junnást uápásmup tärhibeht luudijd, liivđijd já viälppáid. Toos lasseen Unna Junná kávná museost mielâkiddiivijd káálvuid, já uáinip vala maht mainâsist šadda kove.

Kiiđâ vuossâmuš Unna Junná uáinoo vuossaargâ 18.2. tijme 18.30 Yle TV2 -kanavast já uđđâsist vástuppeeivi 22.2. tijme 7:45 Yle Teema & Fem -kanavast. Puoh Yle Säämi párnáiohjelmeh kávnojeh Yle Areenast.

Varrasamosat: Sápmi

Váldoođđasat

Varrasamosat

Muualla Yle.fi:ssä