Sápmi |

USA soahteveahka ii atte lobi geassit oljobohcci Standing Rock-reserváhta lahkosii

USA soahteveahka ii dattetge atte lobi geassit Dakota Access-oljobohcci Missouri-deanu vuolil Standing Rock Sioux-reserváhta gránjjás. Dan sadjái guorahallet eará vejolaš linjjá bohccái.

Standing Rock
Maiddái Sámis leat máŋgasat áŋgirdan Standing Rock bealis. Govas Sofia Jannok, Inger Biret Kvernmo Gaup ja Sara Marielle Gaup Beaska, geat čakčat fitne ieža báikki alde čájeheamin doarjaga. Govva: Inger Biret Kvermo Gaup

Soahteveaga dieđáhusa mielde buoremus vuohki gávdnat ođđa báikki bohccái lea guorahallat ollislaččat huksema birasváikkuhusaid ja gulaskuddat ášši maiddái álbmogiin.

Standing Rockas leat vuostálasttán oljobohcci, dasgo čearda ballá dan bilidit sin juhkančáži ja rihkkut sin rivttiid. Báiki, gos oljobohcci áiggošedje bovret Missouri-deanu Oahe-dulvadanáldása vuolil, lea dušše moadde čuohte mehtera eret Standing Rock Sioux-reserváhtas.

-Historjjálaš mearrádus

Standing Rock Sioux njunuš Dave Archambault II dadjá , ahte gáibidii eiseválddiin roahkkatvuođa “njulget historjjá ja dahkat dan, mii lea riekta”.

– Čearda ja riikka eamiolbmot leat agibeaivái giitevaččat presideanta Obama ráđđehussii dán historjjálaš mearrádusas, cealká son.

Archambault maiddái giitii buohkaid geat leat veahkehan áššis. Maŋimuš vahkuid leage miellačájeheaddjiid gohtteguovlu huksenbáikki láhkosiin sakka sturron ja eambbogat birra máilmmi leat áŋgirdan ášši ovdii. Maiddái Sámis leat čájehan miela ja bargan, oažžun dihte davviriikkaid báŋkkuid geassádit ruhtadeamis oljobohcci.

Varrasamosat: Sápmi

Váldoođđasat

Varrasamosat

Muualla Yle.fi:ssä