Sápmi |

Vahku vel áigi dieđihit Sámi Grand Prix -gilvui – gilvvus binná ođastusat ovddit jagiid ektui

Sámi Grand Prix lágiduvvo beassášlávvordaga 16.04.2022 Báktehárjjis Guovdageainnus. Dieđihanáigemearri gilvui nohká skábmamánu 30. beaivve.

Ol Johan Gaup
Sámi Grand Prix -gilvvu buvttadeaddji Ol Johan Gaup muittuha, ahte vel lea vahku áigi dieđihit iežas Sámi Grand Prix -gilvui. Govva: Inga Marie Guttorm / Ávvir

Sámi Grand Prix juoigan- ja lávlungilvvu dieđihanáigemearri nohká skábmamánu 30. beaivve.

Sámi Grand Prix -gilvvu buvttadeaddji Ol Johan Gaup muitala, ahte muhtun lávlagat ja luođit leat jo boahtán gilvui ja sii leat giitevaččat dain.

– Diehttalas sávvat, ahte ollugat vel sáddejit luđiid já lávlagiid ovdal dieđihanáigemeari. Mun sávan, ahte olbmuin lea hállu searvat Sámi Grand Prixai boahtte jagi.

Boahtte giđa Sámi Grand Prix -gilvu lea binná rievdan ovddit jagiid ektui. Dál ii dárbbaš buktit gárvves lávlaga dahje luođi ieš, muhto sáhttá lávlut geannu eará čállán lávlaga. Seamma maid nu gežiid, ahte juos háliida, de oažžu buktit lávlaga dahje luođi man muhtun eará lávlu dahje juoigá gilvvus.

– Mun jáhkán dat šaddá riggodat, ahte mii soaitit oažžut muhtun lávlagiid ja luđiid sisa, mat muđui eai soite leat mielde. Mii gulaskuddat lávlladahkkiin, ahte gean dat livčče háliidit lávlot. Mishan leat muhtin vokalistat maiddái, geat leat dieđihan, ahte sii áinnas lávllošedje, juos gávdnošedje lávlagat.

Sámi Grand Prix -gilvu čájehuvvo boahtte jagi maid NRK 1 -kanálas. Gaup jáhkká das šaddá earenoamáš vásáhus buohkaide, vaikko soaitá leatge eambbo issoras oassálastiide.

Gaup muitala, ahte sis livčče sávaldat válljet oassálastiid ovdal juovllaid dahje maŋimusat ođđajagi bealde.

Gilvui sáhttá almmuhit Sámi Grand Prix neahttasiiddus. Sámi Grand Prix lágiduvvo beassášlávvordaga 16.04.2022 Báktehárjjis Guovdageainnus.

Guktii vuoitán artista Niko Valkeapää jáhkká gilvu lea buorre vásáhus nuorra artisttaide

Artista Niko Valkeapää lea guktii vuoitán Sámi Grand Prix:a lávlunoasi. Sutnje dat vuoitut leamašan movttiidahtti dáhpáhusat.

Son jáhkká Sámi Grand Prix -gilvu šaddá leat buorre vásáhus maid nuorra sámeartisttaide.

– Beassá oaidnit, ahte mot olbmot barget ja gullat, ahte mo dat musihka galgá leat. Dasto maiddái das go bohtet musihkkárat fárrui ja produseanttat, geat leat doppe veahkkin geahččamen, ahte mo dat heivehit daid lávlagiid. Dat lea hui miellagiddevaš proseassa.

Niko Valkeapää
Artista Niko Valkeapää vuordá gelddolašmielain jagi 2022 Sámi Grand Prix -gilvvu. Son lea ieš vuoitán guktii gilvvu lávlunoasi. Govva: Musihka muitu

Su mielas lea álo gelddolaš čuovvut Sámi Grand Prix -gilvvu, vaikko ii ieš livčče mielde gilvvohallamen.

– Dathan lea álo somá gullat ođđa lávlagiid. Maiddái go dat lea ođasmahttojuvvon, nu mot dat boahtá oidnot, makkár váikkuhus das leamašan, dadjá Valkeapää.

Áššis lei sáhka maŋŋebárgga Buorre iđit Sápmi sáddagis. Guldal dás daid ságaid. Jietna: Yle Areena

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä