Sápmi |

Váhnen vuordá Njuorggáma skuvlla gárvvásmuvvama: "Dat lea spiehkastatdilli dál, muhto dat ii sáhte guhká bistit dákkárin"

Váhnemat vurdet dál dieđu das, mo huksenfitnodaga koŋkáneapmi váikkuha ođđa skuvla-máŋggadoaimmadálu huksenáigetávvalii.

Njuorggán
Huksenfitnodat gearggai álggahit huksenbargguid ovdalgo koŋkánii. Govva: Kirsti Länsman / Yle

Dán čavčča leat beassan illudit nu Ohcejoga girkosiidda go Gáregasnjárgga ođđa skuvllaid atnui váldima. Njuorggáma gilis ilu gártet vuordit, go huksenfitnodat reastaluvai. Ođđa skuvla-máŋggadoaimmadállu lei galgat gárvvásmuvvat boahtte giđa.

Ođđa skuvlla huksegohte danin, go ovddeš skuvllas ledje sisáibmováttisvuođat.

Njuorggánlaš váhnen Anna Näkkäläjärvi-Länsman vuordá, ahte mánát beasašedje viimmat eallit dábálaš skuvlaárgga eaige dárbbašivčče agibeaivve leat sadjásaš lanjain. Su nieida vázzá vuosttas luohká ja bárdni galggašii álggahit boahtte čavčča ovdaskuvlla. Sávaldat livččii, ahte bárdni goit beasašii álggahit ođđa skuvllas.

– Dieđusge mii váhnemat, goittotge mun, leat dohkkehan dán dili, go lohpádus lei ahte ođđa skuvla lea gárvvis jagi álgomuttus. Dál go bođii dát ođas, de vehá dakkár dovdu ahte mo dasa galggašii reageret ja bastitgo mii bargat maidege, smiehtada Näkkäläjärvi-Länsman.

Skuvla gal ceaggana

Sihke skuvlamánát ja beaivegárdemánát johtet dál gaskaboddosaš sajiin. Go ii leat fásta sadji, de gártet oahpaheaddjit sihke eará skuvlla ja mánáidgárddi bargit rahčat ovdamearkka dihtii áigetávvaliid ovdii. Anna Näkkäläjärvi-Länsman lea fuolas sin veadjimis.

– Dathan dat galget dikšut dan dili doppe. Mun balan ahte dat bargit váibet.

Anna Näkkäläjärvi-Länsman
Anna Näkkäläjärvi-Länsman lea fuolas maiddái das, mo dát moivi váikkuha skuvlla ja mánáidgárddi bargiide. Govva: Susanna Guttorm / Yle

Gieldda bealis dáhkidit, ahte Njuorggámii ceaggana gal ođđa skuvla, dál ferte vuos čielggadit máŋggaid áššiid dán moivvis. Näkkäläjärvi-Länsman sávvá, ahte dát moivi čielggašii jođánamos lági mielde.

– Sávan ahte dat ii maŋŋon bearehaga, vai mánát beasašedje dakkár vuogas skuvlarytmii gitta. Dat lea spiehkastatdilli dál ja dan ferte dohkkehit mii lea, muhto dat ii sáhte guhká bistit dákkárin.

Gielddahoavda: ii leat vuos sihkkarvuohta man olu huksen maŋŋona áigetávvalis

Ohcejoga gielda ja konkursabeasi fuolaheaddji leat dál ráđđádallamin, mo dás ovddosguvlui. Ohcejoga gielddahoavda Vuokko Tieva-Niittyvuopio ii máhte dan muttus vel muitalit ođđa áigetávvalárvalusaid birra.

– Dieđus lea vejolaš, ahte dat maŋŋona nu, ahte huksenbargguiguin besset álgit easkka giđđat eaige dán čavčča nu mo álgoálggus lei plána, Tieva-Niittyvuopio dadjá.

Gielddahoavda Vuokko Tieva-Niittyvuopio
Vuokko Tieva-Niittyvuopio deattuha, ahte skuvlla huksejit vaikko dat jáhkkimis maŋŋonage plánejuvvon áigetávvalis. Govva: Yle Sápmi

– In duostta dál goittotge maidige lohpidit, go in iešge dieđe mo ášši dál ovdána.

Yle Sápmi ii fáhten huksenfitnodat Keco Oy kommenteret ášši.

Loga maid: Njuorggáma ođđa skuvla-máŋggadoaimmadálu huksejeaddji koŋkánan – gielddahoavda jáhkká ođđa vistti gárvvásmuvvama maŋŋonit

Varrasamosat: Sápmi

Váldoođđasat

Varrasamosat

Muualla Yle.fi:ssä