Sápmi |

Vaikko boazodoallit leat olu meahcis, sáhttá sidjiidege njoammut koronavirus – Dalle boazodoalliid sadjásašveahkkeortnet galggašii veahkehit

Boazodoallibearaš ii njuolga bala vel koronavirusis, muhto veagalge jurdda joriha dan guvlui, ahte mo de jus buohccá.

Ari Kustula, Kirsti Kustula
Avvila bálgosa boazoisit Ari Kustula ja Kirsti Kustula eaba vel nu bala koronavirusis. Govva: Kirsti Länsman / Yle

Kustula boazodoallibearaš ráhkkanišgoahtá vuolgit biepmat ealu meahccái. Koronavirus, mii leavvá máilmmis, orru leamen guhkkin ja Kustula bearaš lea dego dorvvus smávva Tolosa gilážis ja meahcis.

– In mun bala, mun lean dearvvas. Mus ii leat heahti. Dáppe eai leat nu olu olbmot ja mun sáhttán váruhit dan koronavirus oba áigge, dadjá Kirsti Kustula.

– Muhto dieđusge ferte suodjalit boares olbmuid. Sii leat juohke beaivve mielas, son joatká.

Kustula ii leat vel nu olus smiehttan, maid de, jos ieš buohccáge.

– Galhan mis leat dán gilis olbmot, geat sáhttet veahkehit. Mun jurddašan, ahte in mun leat okto.

Kirsti Kustula
Kirsti Kustula lebbe suinniid. Govva: Kirsti Länsman / Yle

Suomas jos boazodoalli buohccá, sus lea vejolašvuohta oažžut alcces sadjásačča, jus lea bákkolaš ealáhatdáhkádus ja badjel 50 lohkkojuvvon bohcco.

Avvila bálgosa boazoisit Ari Kustula mielas lea buorre ášši, go Mela ordne sadjásašveahki. Son sávvá, ahte vearrámus koronavirusáigodat ii ollešii vel sin lusa. Jos nu geavašii, de fertešii iskat gávdnat sadjásačča.

– Sávvamis dearvvas sadjásaččat gávdnojit. Ferte sávvat, ahte virus joavdá easkka, go muohta lea suddan.

Kustula jáhkká goittotge leat oalle láhkai dorvvus ruovttus.

– Ii dat dainna lágiin darván, go dáppe eai leat earát. Gilis go fitná bensiinna viežžame, boahtá dat njoammunriska. Doppehan dat sáhttá gos nu boahtit, son smiehtada.

Ari Kustula
Avvila bálgosa boazoisit Ari Kustula. Govva: Kirsti Länsman / Yle

Telefovnnas mieđihuvvon duođaštus dohkke

Jus boazodoalli buohccá, ferte deavdit sadjásašveahkkeohcamuša ja riŋget dearvvašvuođaguovddážii. Dál dohkke telefovnnasge mieđihuvvon duođaštus.

– Jus dat buozalmasvuohta bistá eambbo go čieža beaivvi, dalle ferte oažžut duođaštusa bargonávccahisvuođas. Dasa dohkke doaktára, buohccidivššára, dahje dearvvasvuođadivššára duođaštus, muitala Eanadoalliid ealáhatlágádusa áššeolmmoš Nina West.

Suomas sáhttá maid ohcat buohcanbeaiveruđa dan áiggis, jus leat karantenas dahje sirrejuvvon virusa dihte, rávve West.

– Dieid eavttuid ja ohcanáiggiid birra sáhttá vaikko riŋget, dahje ohcat dieđu Mela neahttasiidduin. Dasto lea vel njoammunbeaiveruhta, masa gáibiduvvo dasto dan gieldda njoammundávddain vástideaddji doaktára duođaštus.

Nina West
Eanadoalliid ealáhatlágádusa áššeolmmoš Nina Westii sáhttá vaikko riŋgestit. Govva: Anneli Lappalainen / Yle

Sadjásašveahki diimmuid leat geahpedan

Dán jagi boazodoallái buhtadit eanemustá 120 diimmu sadjásašveahki geavaheamis. Maŋimuš jagiid diimmuid leat buhtadan 200 diimmu ovddas.

– Dat váikkuha dán dilis, ahte buohkat geat dárbbašit, eai soaitte oažžut dan sadjásašveahkki nu olu go dárbbašit, dadjá West.

Sosiála ja dearvvasvuođaministeriijas lea ulbmil, ahte dan giđa lassebušeahtas oaččolii dan 200 diimmu juohkehažžii, muitala West.

– Dan oažžu oaidnit mo dat geavvá. Dat livčče hui dárbbašlaš dál go lea dákkár dilli.

Varrasamosat: Sápmi

Váldoođđasat

Varrasamosat

Muualla Yle.fi:ssä