Sápmi |

Válgalávdegotti guoddaleami váikkuhusain ii diehtu – AHR lohpida gieđahallat guoddaleami jođánamos lági mielde

Alimus hálddahusriekti čohkke dál sorjjaskeahtes olbmuin joavkku, mii gieđahallágoahtá sámedikki válgalávdegotti guoddaleami, muitala alimus hálddahusrievtti presideanta Kari Kuusiniemi.

Korkeimman hallinto-oikeuden presidentti Kari Kuusiniemi
Alimus hálddahusrievtti presideanta Kari Kuusiniemi. Govva: Juha Kivioja / Yle

Sámedikki válgalávdegoddi guoddalii disdaga 20.8. alimus hálddahusriektái gomihanmearrádusain, mat gusket daid iešnjulgemiid, maid válgalávdegoddi suoidnemánus dagai. Válgalávdegoddi lea guoddalan visot gomihemiid, maid AHR lea dássážii sidjiide sádden.

Sámedikki válgalávdegotti ságadoalli Janne Näkkäläjärvi ii máhte dadjat, makkár váikkuhus guoddaleamis lea geavadis, muhto válgalávdegoddi gáibida alimus hálddahusrievttis dásseárvosaš meannudeami. Váldoágga válgalávdegotti guoddaleapmái lei dat, ahte sin mielas áššemeannudeamis lei meannudanfeaila.

– Go AHR dagai daid gomihanmearrádusaid, AHR ii lean gullan min ollenge. Das lea meannudeamis boahtán boasttovuohta, dadjá Näkkäläjärvi.

Válgalávdegotti mielas alimus hálddahusriekti livččii galgan oba vuđoštallat dan, manin ii dárbbaš gullat válgalávdegotti áššis.

– Dat goittotge lea nu dehálaš ášši midjiide sápmelaččaide ja Sámedikki válgalávdegoddi lea dies dehálaš rollas.

Válgalávdegoddi livččii maiddái gáibidan, ahte alimus hálddahusriekti livččii meroštallan buorebut iešnjulgenparagráfa.

– Min mielas dat ii meroštallan dan nu viidát. Dat beare geahčai dan ráđđehusa evttohusa mielde, ahte dat livččii beare teknihkalaš ášši mainna dan paragráfa sáhtašii geavahit. AHR livččii galgan váldit vuhtii maiddái dan, mii doppe ieš lágas čuožžu dan iešnjulgenparagráfas, iige beare dan ráđđehusa evttohusa mielde.

Go Sámedikki válgalávedgoddi suoidnemánus válddii olbmuid eret válgalogahallamis, geavahii válgalávdegoddi nu gohčoduvvon iešnjulgema, mii lea sámediggelága 26 paragráfas.

Ii leat vel diehtu goas AHR gieđahallagoahtá guoddaleami

Alimus hálddahusrievtti presideanta Kari Kuusiniemi ii sáhte kommenteret sámedikki válgalávdegotti guoddaleami, dasgo son lea easttalaš vástidit sámediggái guoski gažaldagaide, iige son leat oahpásmuvvan vel guoddaleami sisdollui.

Kuusiniemi goit muitala šleađgaboasta bokte Yle Sápmái, ahte lea addán Alimus hálddahusrievtti juhkosiid ságadoalliide bárgun čohkket sorjjaskeahtes olbmuin joavkku, mii de gieđahallagoahtá ášši.

– Dasa, ahte leago alimus hálddahusriekti bargan boastut go ii leat gullan oassebeliid, nugo guoddaleamis oaivvilduvvo, dasa váldá áiggi mielde beali sorjjaskeahtes olbmuid joavku, čállá Kuusiniemi Yle Sápmái.

Kuusiniemi ii máhte vel dadjat makkár áigetávvaliin áššis basttet addit mearrádusa.

– Juohke dáhpáhusas áššit čovdojuvvojit nu jođánit go vejolaš, vástida Kuusiniemi Yle Sápmái.

Varrasamosat: Sápmi

Váldoođđasat

Varrasamosat

Muualla Yle.fi:ssä