Sápmi |

Válgalohkui dohkkehedje 207 ođđa jienasteaddji – Válgalogahallan lea dál nannejuvvon

Sámedikki válgalávdegoddi oaččui 550 ođđa ohcamuša válgalogahallamii boahttevaš válggaide.

Janne Näkkäläjärvi
Válgalávdegotti ságadoalli Janne Näkkäläjärvi mielde dál sis álgá garra bargu. Govva: Vesa Toppari / Yle

Sámedikki válgalávdegoddi lea otne duorastaga nannen boahtte čavčča válggaid válgalogahallama. Dat dárkkuha dan, ahte válgalávdegoddi lea dál mannan čađa buot ohcamušaid ja dohkkehan sin, geain lea sámediggelága mielde riekti jienastit ja álgit evttohassan Sámedikki válggain.

Válgalávdegotti ságadoalli Janne Näkkäläjärvi muitala, ahte sii gieđahalle sullii 550 ohcamuša ja dain 207 dohkkehuvvojedje. Dat logut eai leat vel dárkkistuvvon, namuha Näkkäläjärvi.

Ovddit sámediggeválggain jagis 2015 jienastuslohkui ohce measta 800 olbmo. Sis válgalávdegoddi dohkkehii jietnavuoigadahtton olmmožin 483. Dasa lassin alimus hálddahusriekti dohkkehii válgalogahallamii vel 93 olbmo, geat ledje váidán Sámedikki válgalávdegotti ja stivrra mearrádusas.

Čuovvovaš lávki válgalávdegottis lea almmuhit ohcciide, ahte leatgo sii merkejuvvon válgalogahallamii.

– Dál go mii leat nannen válgalogahallama, de beassat sáddet poastta mielde daid almmuhankoarttaid. Mii almmuhit maiddái jus eat leat dohkkehan ohcci válgalogahallamii. Dál álgá garra bargu min virgeolbmuin, lohká Näkkäläjärvi.

Válgabeaivvi jienastus ii ordnejuvvo

Okta stuorra nuppástus boahtte čavčča válggain boahtá leat dat, ahte boahtte válggain ii ordnejuvvo válgabeaivvi jienasteapmi. Jienastit sáhttá poastta bokte, dahje doalvut jienastusbáhpáriid njuolga válgalávdegotti doaimmahahkii, Anárii.

Válgalávdegoddi mearridii áššis ovttamielalaččat, muitala Janne Näkkäläjärvi.

– Válgabeaivvi jienastanproseanta lea báhcán nu unnin. Mu rehkegiid mielde dat leamaš sullii 5,5 proseanta, de danin dán háve mearrideimmet ná. Sávvat dan váikkuhit positiivvalaččat poastajienasteapmái.

Divvojuvvon 5.3.2019 diibmu 14.23: Árrabus muitaleimmet, ahte válga doaimmahuvvo dušše beare poastta bokte. Poastta lassin jienasteaddji sáhttá ieš doaimmahit válgabáhpáriid válgalávdegoddái.

Varrasamosat: Sápmi

Váldoođđasat

Varrasamosat

Muualla Yle.fi:ssä