Sápmi |

Vánhen illuda evttohusas hukset Gárasavvonii gaskaboddosaš skuvlla: "Sávvamis dat dál manná jođánit ovddosguvlui"

Eanodaga gielddaráđđehus evttoha gielddastivrii, ahte Gárasavvonii huksejuvvošii geahppa sadjásaš skuvlavisti. Dál dárbbašit jođánis čovdosiid vai visti livččii válmmaš ođđajagimánu álggus, muitala gielddaráđđehusa ságadoalli Leena Palojärvi.

Nils-Jonas Ketola Enontekiöltä
Golmma skuvllalačča vánhen Nils-Jonas Ketola illuda juos fargga su mánát besset gaskaboddosaš skuvlii. Govva: Jouni Aikio / Yle

Nils-Jonas Ketola illuda gielddaráđđehusa evttohusas. Guldal maid son muitala jearahallamis. Jietna: Sáárá Seipiharju / Yle

Eanodaga gielddaráđđehus mearridii čoahkkimisttis maŋŋebárgga evttohit gielddastivrii huksehit Gárasavvona skuvlii ja beaiveruktui áibba ođđa gaskaboddosaš lanjaid skuvlla lahkosiidda.

Golmma skuvllalačča vánhen Nils-Jonas Ketola illuda evttohusas ja das, ahte ášši ovdána viimmatge.

– Mun lean lihkolaš, ahte dat álget dál konkrehtalaččat dahkat juoidá. Dás leamašan čielggadusat, čoahkkimat ja gulaskuddamat. Sávvamis dat dál manná jođánit ovddosguvlui, iige bisán byrokráhtaid ja paragráfaid duohkái vuohon.

Son sávvá gaskaboddosaš skuvlla ceagganit jođánit ja albma skuvlla plánenbarggu álgit jođáneamos lági mielde.

– Gal olles dán čavčča leamašan máŋggalágan streassa. Lean galgan jurddahallat, go iežan mánát doppe leat ja dat sisáibmu lea mii lea, de gal dat leamašan váivi dohko bidjat, Ketola muitala.

Gielddaráđđehus evttoha nu gohčoduvvon geahppa skuvlla

Gielddaráđđehus evttoha váldostivrii, ahte gaskaboddosaš skuvlan šattašii geahppasit huksejuvvon skuvla (su. viipalekoulu), muitala Eanodaga gielddaráđđehusa ságadoalli Leena Palojärvi.

Dasa lassin gielddaráđđehus evttoha válddostivrii mearreruđaid gaskaboddosaš skuvlla vuođđudeapmái, oastimii ja bajásdoallamii: 50 000 euro dán jagi badjelmearálaš bušehttii ja boahtte jagi bušehttii várrejuvvošii 300 000 euro.

Dál dárbbašit jođánis čovdosiid, go boares skuvllas lea geavahanáigi dán jagi lohppii ja ođđa báiki galggašii leat válmmašin ođđajagimánu álggus. Sadjásaš skuvla galggašii gárvánit sullii gávcci vahkus, juos viessuvuođđu lea válmmašin.

Leena Palojärvi
Eanodaga gielddaráđđehusa ságadoalli Leena Palojärvi muitala, ahte sii leat evttohan váldostivrii nu gohčoduvvon geahppa skuvlla. Govva: Vesa Toppari / Yle

Gielda lea čielggadan máŋggaid molssaeavttuid vai sáhttet fállát váldostivrii ja Gárasavvonlaččaide buoremus vejolaš evttohusa, dadjá Palojärvi. Son jáhkká, ahte evttohus manná čađa, danin go dat lea áidna heivvolaš molssaeaktu.

Juos mearrádusat eai šatta ovdal ođđajagimánu álggu, eai skuvlla lihkká gidde dalán dalle, muitala Palojärvi. Dearvvašvuođadárkkisteaddji lea lohpidan, ahte sii ožžot vehá lassiáiggi, juos buorit plánat leat gárvvisin sadjásaš skuvlalanjaide.

– Mun jáhkán dat gal vuordá moadde vahku. Dieđusge moadde mánu ii leat vejolašvuohta, ahte gal dan plánema ferte oažžut dál johtui.

Gielddaváldostivra gieđahallá ášši skábmamánu 8. beaivve.

Guldal maid Eanodaga gielddaráđđehusa ságadoalli Leena Palojärvi muitala sin evttohusas ja plánain. Jietna: Sáárá Seipiharju / Yle

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä