Sápmi |

Vánhen illuda go Mumenleahki dubbejuvvo sámegillii – jáhkká addit sihkkarvuođa sámásteapmái

Sámevánhen válddii ođđasa sámegielat mumeniin iluin vuostá, go sámegielat animašuvnnat leat unnán.

Ulpu Mattus-Kumpunen
Ulpu Mattus-Kumpunen vuordá iluin sámegielat Mumenleahki-prográmma. Govva: Gabriela Satokangas / Yle

Ulpu Mattus-Kumpunen bearrašis gehččet vel dál suomagielat mumeniid, muhto boahtteáiggis besset návddašit mumeniid máilmmis maiddái sámegillii, go Yle áigu buvttadit ođđa Mumenleahki-prográmma sámegillii. Dat lea illuođas sidjiide, go sámegielat mánáidprográmmat eai dál gávdno menddo olu.

– Go mánát goittotge háliidit sámástit, de mun jáhkán dat addá dakkár sihkkarvuođa dasa – stuorat sátneráju ja ođđalágán cealkagiid, maid geavahit juohkebeaivválaš eallimis, oaivvilda Mattus-Kumpunen.

Muumipeikko istuu sängyllään, vieressä pieni lohikäärme.
Mumenleahki-prográmma ođđa suomagielat oasit sáddejuvvojit tv:s vuossárggaid diibmu 20.00 Yle TV2:žis ja maŋŋebárggaid diibmu 17.25 Yle Fem -kanálas. Govva: Moomin Characters & Gutsy Animations

Sámediggi evttohii jahkedoajáldagas, ahte Yle barggašii Mumenleahki-ráiddus suoma- ja ruoŧagielat veršuvnnaid lassin maiddái sámegielat jietnaveršuvnna. Yle mearridiige dahkat dan, ja jietnaveršuvnnas galggašedje váldit vuhtii davvisáme-, anáraš- ja nuortalašgiela.

– Dál čielggadit dan, mo dat ođđa veršuvdna bálvalivččii buot golmma sámegiela buot buoremusat. Dál buvttadanfitnodat ja jietnabuvttadeami ollašuhtti jietnastudio dutket, mo buvttadit dan nu, ahte geahččanvásáhus livččii nu buorre go vejolaš, ja ahte buot giellaveršuvnnat váldojuvvojit vuhtii, muitala Yle Draama buvttadeaddji Suvi Mansnerus.

"Olu positiivvalaš váikkuhusat"

Maiddái Sámedikkis leat duđavaččat ođđasii. Sámedikki gielladorvočálli Anne Kirste Aikio oaivvilda, ahte Mumenleagi dubbemis leat olu buorit bealit.

– Mii diehtit, ahte eandalii min mánáide ja nuoraide media lea hui guovddážis sámegiela ja buot gielaid ektui. Medias lea unnán sámegiella, eandalii dakkár sisdoallu mii lea mánáide ja nuoraide, de dat váikkuha sin gillii.

– Mun jurddašan, ahte dákkár bivnnuhis prográmma dubbemis sámegillii leat olu positiivvalaš váikkuhusat giellaealáskahttimii ja eará áššiide, jurddaša Aikio.

Anne Kirste Aikio
Sámedikki gielladorvočálli Anne Kirste Aikio jáhkká dubbenbarggu váikkuhit sámegielaid giellaealáskahttimii. Govva: Vesa Toppari / Yle

Ulpu Mattus-Kumpunen nieida, 7-jahkásaš Elle Kumpunen mielas livččiige somá, jos su favorihttafiguvra, Unna Miáš, hálašii sámegiela.

– Dalle das livččii sámegiella, ja dat eai hála dušše suomagiela. Dat livččii suohtas.

Ulbmil lea almmustahttit Mumenleahki-ráiddu sámegillii Yle Areenas vel dán jagi bealde.

Varrasamosat: Sápmi

Váldoođđasat

Varrasamosat

Muualla Yle.fi:ssä