Säämi |

Vanhimeh láá távjá keessiv pargoost, mutâ maid párnááh pargeh talle? – Enni almottij jieijâs párnáá leeirân já kuohtuuh láá tuđâvááh

Párnáin älgih kesiluámuh, mutâ vanhimeh sättih leđe vala pargoost. Syeinimáánust lii máhđulâš almottiđ jieijâs párnáá ereslágán leeirâid.

Ronja Nikula kuudij suávvil kuálástemleeirâst Rivdulist.
Ronja Nikula kuudij suávvil kuálástemleeirâst Rivdulist. Govva: Vasatokka

Vanhimeh láá távjá keessiv pargoost já kolgâččii keksiđ ohjelm párnáid. Tääl Anarist lii máhđulâšvuotâ almottiđ jieijâs párnáá leeirân. Syeinimáánust Vasatokka uárnee Rivdulist maaŋgâid leeirâid. Vasatokka fáálá peivileeirâid ubâ syeinimáánu. Mikko Ljetoff muštâl, ete vuossâmuu peivileeirâst lijjii 14 uásálisted já tot lâi sijjân stuorrâ miänástus. Lase Vasatoka leeirâin puávtáh luuhâđ tääbbin.

Eija Ojanlatva almottij jieijâs nieidâ kuálástemleeirân já illood tast, ete Vasatokka uárnee leeirâid.

– Toh láá tääbbin tavveen nuuvt teháliih muu mielâst eidu tondiet ko motomeh vanhimeh, tego mun, láá pargoost jyehi peeivi. Tondiet lii tehâlâš, ete nieidâ uážžu moonnâđ, muštâl Ojanlatva.

Ojanlatva lii uuccâm neetist leeirâid já tobbeen sun lii kavnâm-uv mielâkiddiivâš leeirâid. Oovtâ leeirâ sun kuittâg käibidičij vala Anarân.

– Taggaar muusikleirâ ličij pyeri. Toh láá lamaš peiviv já Avelist já talle tom lii vaigâd orniđ, muštâl Ojanlatva.

Eija Ojanlatva lii ilolâš, ko párnáid uárnejeh leeirâid.
Eija Ojanlatva lii ilolâš, ko párnáid uárnejeh leeirâid. Govva: Anja Kaarret / Yle

Aanaarlâš Ronja Nikula kuudij oovtâ suávvil majebaargâ Rivdulist párnái kuálástemleeirâst.

– Hitruumus äšši lâi kuálástem, ááigum vyelgiđ meid miällumleeirân, muštâl Nikula.


Aanaar servikodde ij ornii leeirâid keessiv. Nuorâipargostivrejeijee Tuomas Nivalainen muštâl mondiet servikoddeest iä lah leeirâh.

– Iä lah eres leeirah ko rippâleirâ. Suijâ taas lii tot, ete mun lam uđđâ pargee já jiem lah val kiergânâm orniđ aašijd. Mist lii meiddei vädisvuotâ kavnâđ saje kost orniđ leeirâid, muštâl Nivalainen.

Servikode leiráid peessih puohah fáárun.

– Piäsá fáárun veikkâ ij kulluu kiirkon, mutâ hadde lii váhá tivrâsub talle, iätá Nivalainen.


Eres tábáhtusah párnáid:

Aanaar kieldâ fáálá meid ereslágán tábáhtusâid párnáid já nuoráid. Lasetiäđuid kaavnah tast.

Anarist, Inarin yritys, uárnee meid lihâdemkerhoid. Lasetiäđuid kaavnah tast.

Akvarellimáálámpáájáh Anarist já Avelist syeinimáánust. Eenâb uáináh tääbbin.

Varrasamosat: Säämi

Váldoođđasat

Varrasamosat

Muualla Yle.fi:ssä