Sápmi |

Varas dutkamuša mielde bohccuid ja spiriid ovttaseallin soaitá leat veadjemeahttun

Dutkamušas geahččaledje gávdnat historjjás čovdosiid boazodoalu ja borasspiriid ovttaseallimii.

poroerotus
Varas dutkamuša mielde sihke boazodoalus ja spirenáliid suodjaleamis fertet dahkat kompromissaid vai ášši sáhttá čoavdit. Govva: Vesa Toppari / Yle

Varas dutkamuša mielde orru veadjemeahttun oktiiheivehit boazodoalu ja borasspiriid eallima.

Lappi Universitehta árktalaš guovddáža, Luondduriggodatguovddáža, Suoma fuođđoguovddáža ja Meahciráđđehusa luonddubálvalusaid dutkamušas čielggadedje Suoma spirepolitihkka ollašuvvama boazodoalloguovllus sihke birassuodjaleami ja boazodoalu oainnus.

Čavga bivdonjuolggadusat leat buorre spiriide

Dutkiid mielde Suomas lea leamašan garra ságastallan spireáššiin. Suodjalangeatnegasvuođa dihte ovdamearkka dihtii albasa, geatkki ja gumppe bivdui leat čavga bivdonjuolggadusat. Spiriid eallima dáfus dát lea buorre ášši, bohccuid ja badjealbmáid dáfus vuot ii.

Luondduriggodatguovddáža dutkamušprofessor Ilpo Kojola dadjá Lappi universitehta dieđáhusas, ahte geavatlaččat čovdosat elliid eallima oktiiheiveheamis eai leat dorjon boazodoalu.

– Spirenáliid nannun ja dihttongova rievdadeamit leat dagahan buriid vejolašvuođaid Suoma ja Skandinávia spirenáliid oktavuođaide, muhto seamma áigge spirevahágiid mearri lea šaddan máŋggageardásažžan.

Mission impossible – veadjemeahttun miššuvdna?

Lappi universitehta dutki Sirpa Rasmus muitala Yle Sápmái, ahte sii eai gávdnan čovdosa bohccuid já spiriid ovttaseallimii vel dan dutkamušas. Sii goittotge fuomášedje, ahte vai ášši sáhttá čoavdit, sihke boazodoalus ja spirenáliid suodjaleamis fertet dahkat kompromissaid.

– Kánske dat dehálamos boađus lea min artihkkala bajilčállagis: Mission impossible? Gal dat dilli orru leamen váttis, ahte guktot oassebealit galget dahkat kompromissaid. Oppalaš govva lei dat, ahte leaba gal váttes dilli, iige oktage áibbas dieđe, mo dás beassat ovddos guvlui, son muitala.

Rasmus muitala, ahte son lei beroštuvvan das, mo boazodoallit leat historjjás birgehallan spiriiguin ja sáhtášiigo historjjás gávdnot juoidá, mainna sáhtášii ávkkástallat vel otná beaivve.

– Dolin ledje anus dakkár aktiivvalaš guođohanvierut, mat leat dál otná beaivve váldon ođđasit atnui.

Varrasamosat: Sápmi

Váldoođđasat

Varrasamosat

Muualla Yle.fi:ssä