Sápmi |

Varas raporta muitala boazodolliid vásáhusaid bieggafámus – Peer Gaup: "Dat lea hui garrasit čállojuvvon, das ii leat čihkkojuvvon mihkkige"

Varas raporttas muitalit čieža bálgosa vásáhusaid bieggafámu váikkuhusain boazodollui Norgga bealde.

Peer Gaup.jpg
Guovdageaidnulaš badjeolmmoš Peer Gaup lea leamašan mielde raportta doaimmahangottis. Govva: Nils Henrik Måsø / NRK

Ávjovári luonddugáhttenlihttu ja MOTVIND Norge leat gieskat almmustahttán varas raportta, Bieggafápmu vai boazodoallu, mii muitala bieggafápmohuksema váikkuhusain boazodollui.

Raporta lea čállojuvvon čieža dakkár Norgga beale bálgosa vásáhusaid vuođul, main jagis 2015 ledje doaimmas gávcci bieggamillofápmorusttega.

Guovdageaidnulaš badjeolmmoš Peer Gaup lea leamašan mielde raportta doaimmahangottis. Gaup muitala, ahte bálgosiin leamašan garra vásáhusat guovlluid massimis ja fitnodagaid rihkkon lohpádusain. Dáid vásáhusaid čilgejit raporttas vuđolaččat.

– Muhtun boazoeaiggádat leat juo addán vuollái, eaige šat geavat daid guovlluid, gos bieggamillorusttegat leat, muitala Gaup.

Tuulimyllyjä.
Raportta mielde bieggafápmu lea stuorimus áitta, man boazodoallu lea goassige vásihan. Govva: Remko de Waal / EPA

Gaup muitala, ahte bieggamillut ja bohccot eai sáhte leat seammá guovllus, danin go bieggamillorusttegat leat hui allagat, dain lea jietna ja dat lihkadit.

– Boazu suorgana jiena. Dan ii lean oktage boazoeaiggádiin nu jurddašan, ahte jienat leat maiddái. Boazu ii dieđe mii dat lea, iige duostta mannat dohko lusa.

Bieggamilluid huksema ákkastallet ruonáenergiijain

Bieggamilluid huksema vigget ákkastallat máŋggalágán vugiiguin, muhto ruonáenergiija lea okta stuorámus ákkain, muitala Gaup.

– Dat galggašii mahkáš leat dat boahtteáigi, nu ahte ii billistuvvo áibmu. Naba luondu? Bieggamillot billistit luonddu nu issorasat ja ii leat šat vejolašvuohta oažžut luonddu ruovttoluotta, juos ovtta čáppa beaivvi fuomášit, ahte bieggafápmu ii leat šat gánnehahtti.

Gaup muitala, ahte dát lea vuosttaš raporta, mii lea dahkkojuvvon dainna ulbmiliin ja jurdagiin, ahte muitalit Norgii ja máilbmái, mii lea dáhpáhuvvamen bieggafámuin Norggas.

– Dat raporta lea hui garrasit čállojuvvon. Das ii leat čihkkojuvvon mihkkige.

Raportta oanehis sámegielat veršuvnna ja olles dárogielat raportta sáhttá lohkat Finnmárkku luonddugáhttenlihtu neahttasiiddus. Dan áigot almmustahttit maiddái eaŋgalsgillii.

Varrasamosat: Sápmi

Váldoođđasat

Varrasamosat

Muualla Yle.fi:ssä