Sápmi

Varrasamos dieđut koronavirusis: Ijahis idja lea šluhttejuvvon, koronavirus áittan Amazona arvevuvddiid eamiálbmogiidda

Ijahis idja 2019
Govva: VT / Yle

Yle Sápmi beaivádii dán artihkkalii varraseamos dieđuid koronavirusa dagahan dilis eandalit davvin 20.5. rádjai.

  • Čoahkkaneapmeráddjehusat 1.6. rájes: eanemustá 50 olbmo
  • Badjel 500 olbmo dáhpáhusaid ráddjehus fámus goit 31.7. rádjai
  • Restoráŋŋat galget leat gitta 31.5. rádjái; restoráŋŋat ožžot rahpat uvssaideaset 1.6. rájes dihto eavttuiguin
  • Vuođđoskuvllat rahpasan 14.5. rájes, muhto nuppi dási oahppolágádusain ja allaskuvllain ávžžuhit vel ordnet gáiddusoahpahusa dán giđđabaji lohppii
  • Girjerádjosiin oažžu jo fitnat luoikkaheamen girjjiid ja eará materiála
  • Rádjejohtin Schengen guovllus rahppo 14.5. rájes: Suoma ja Estteeatnama gaskka oažžu johtit barggus
  • Olgolihkadanbáikkit rahpasan 14.5. rájes

Koronarávvagat-24-03-2020
Govva: Matti Kurkela / Yle

Yle Sápmi čuovvu koronadili 22.5. rájes ođđa artihkkalis.

20.5. dii. 17.21 Suomas golbma ođđa koronajámu

Suomas leat gávnnahan golbma ođđa koronajámu, muitala THL. Koronavirusa geažil leat jápmán oktiibuot 304 olbmo.

THL mielde buohcceviessodivššus leat dál 118 olbmo, main 20 beaktilis divššus.

20.5. dii. 15.07 Ijahis idja lea šluhttejuvvon

Eamiálbmogiid musihkkafestivála Ijahis idja galggai leat 14.–15.8.2020 Anáris. Festivála lágideaddjit leat guhká čuvvon, makkárin COVID-19-dilli šaddá ja leat dál gávnnahan, ahte riikkaidgaskasaš dáhpáhusa lágideapmi dorvvolaččat borgemánu beallemuttus ii leat vejolaš.

– Lea váivi šluhttet festivála, muhto dat lea áidna rivttes ja vásttolaš mearrádus dálá dilis, festivála buvttadeaddji Oula Guttorm čállá dieđáhusastis.

Ijahis idja lágida vejolašvuođaid mielde eará doaimmaid ja dieđiha áššis maŋŋelappos.

20.5. dii. 12.20 Suomas 44 ođđa koronavirusnjoammuma

Suomas leat dál 44 ođđa laboratoriijas sihkaraston koronavirusnjoammuma. Oktiibuot dán rádjái leat Suomas 6 443 koronavirusnjoammuma.

Oassi koronavirusa buohcan olbmuin leat jo dearvvasmuvvan. Mannan vahkus THL muitalii, ahte dearvvasmuvvan olbmuid mearri lea sullii 5 000.

20.5. dii. 12.16 Sámi fitnodatdoalliin leat ruossalas dovddut restoráŋŋaid rahpamis

Ráđđehus beasai maŋŋebárgga soahpamuššii restoráŋŋaid rahpamis geassemánu álggu rájes. Sámis eavttuid leat váldán vuostá ruossalas dovdduiguin.

Ohcejohkalaš Petteri Valle smiehttá vel, mo ordnešii restoráŋŋadoaimma. Anárlaš Issu Suoninen fas áigu rahpat bára dalán geassemánus.

Riikkabeaivvit galget gieđahallat restoráŋŋaid rahpaneavttuid jođánis áigetávvaliin.

Loga áššis eambbo dáppe.

20.5. dii. 12.10 Koronavirus áitagin Amazona arvevuvddiid eamiálbmogiidda

Máilmmi dearvvasvuođaorganisašuvnna Davvi-, Gaska- ja Mátta-Amerihkas doaibmi guovloorganisašuvdna Amerihka dearvvasvuođaorganisašuvdna váruha koronavirusa leavvamis Amazona arvevuvddiide.

Virusa leavvan lea lassánan Brasilia, Kolumbia ja Peru rádjaguovllus. Stuorra várran lea dál, ahte virus beassá leavvat guovllus ássi eamiálbmogiidda.

Amerihka dearvvasvuođaorganisašuvdna gáibida erenomašdoaimmaid, vai virusa leavvan easttašuvvá eamiálbmogiidda, mat ásset guovllus guhkkin eará ássanguovlluin.

Gáldu: Reuters

19.5. dii. 18.53 Lappi gielddat: Stáhta koronapakeahtta lea menddo unni

Koronakriisa dagaha Lappi gielddaid ekonomiijai badjel 60 miljon euro dáhpagiid, main stáhta koronadoarjja buhtadivččii vuollai beali. Lappi gielddat atnet stáhta gielddaide dárkkuhuvvon doarjaga menddo unnin.

Loga áššis eambbo suomagillii dáppe.

19.5. dii. 18.49 AVI: Geassit vuollel 500 olbmo čoahkkaneamit vejolačča erenomáš ordnestallamiin

Guovlohálddahusdoaimmahat AVI lea ožžon válmmašin vurdojuvvon rávvagiid iešguđetlágan dáhpáhusaid ordnemis. AVI almmustahtii dieđáhusa áššis otne maŋŋebárgga.

AVI mielde badjel 50 olbmo muhto eanemustá 500 olbmo dilálašvuođaid ja almmolaš čoahkkimiid siste ja olgun ráddjejuvvon sajiide lea vejolaš ordnet erenomáš ordnestallamiin.

Olbmuid dorvvolašvuohta sihkkarasto kundariid meari ráddjemiin sihke dorvogaskkain ja hygieniarávvagiin.

Badjel 500 olbmo dilálašvuođat ja almmolaš čoahkkimat leat gildojuvvon iige AVI mieđit dáidda spiehkastagaid.

Loga eambbo suomagillii dáppe.

19.5. dii. 18.34 Restoráŋŋaide eavttut rabasdoallamii

Ráđđehus lea muitalan otne makkár eavttuin restoráŋŋat ožžot rahpat uvssaideaset geassemánu álggus.

Ráđđehusa mearrádusa mielde restoraŋŋat ožžot leat rabas eahket 23 radjai, ja alkoholavuovdin bistá logi rádjai.

Restoraŋŋain siste oažžu čohkát dušše bealli dábálaš kundarmearis, muhto olgun terássain olbmuid mearri ii ráddjejuvvo. Riikkabeaivvit galget gieđahallat ášši jođánis áigetávvaliin.

Restoráŋŋat, kafeat, pubit ja bárat leamaš gitta cuoŋománu álggu rájes.

Loga eambbo suomagillii dáppe.

19.5. dii. 17.02 Suomas okta ođđa koronajápmu

Suomas leat jápmán oktiibuot 301 olbmo koronavirusdávdda geažil, muitala THL.

Buohcceviessodivššus leat olles riikkas 112 olbmo, main 25 leat beaktilis divššus.

19.5. dii. 12.28 Suomas 19 ođđa koronanjoammuma

Suomas leat gávnnahan 19 ođđa sihkaraston koronavirusnjoammuma, muitala THL. Oktiibuot sihkaraston njoammumat leat dán rádjái 6 399.

Lappis eai leamaš koronanjoammumat golmma beaivái. Oarje-Lappi buohccedikšunbiires maŋimuš koronanjoammun leamaš mannan lávvardaga ja Lappi buohccedikšunbiires fas vahku dassái maŋŋebárgga.

18.5. dii. 18.09 Badjel 70-jahkásaččat ožžot viimmat eanet friijavuođa Suomas

THL lea gárven ođasmahtton rávvagat badjel 70-jahkásaččaide. Áššis muitalii vuosttamužžan Helsingin Sanomat -aviisa.

Eará olbmuid sáhttá fas deaivat, muhto hygienias ja dorvogaskkain ferte fuolahit. Ođđa rávvagat leat dohkkehuvvon sosiála- ja dearvvasvuođaministeriijas.

Loga eambbo suomagillii dáppe.

18.5. dii. 14.46 THL: Suomas oktiibuot 300 koronajámu

Suomas leat dál THL statistihkaid mielde oktiibuot 300 koronavirusii laktaseaddji jámu. Dat lea guokte eanet go ikte.

Buohcceviessodivššus leat olles riikkas 117 olbmo, main 34 leat beaktilis divššus.

Jo sullii 5 000 olbmo Suomas leat dearvvasmuvvan covid-19-dávddas.

18.5. dii. 12.56 Lappis eai leamaš ođđa njoammumat guovtti beaivái

Lappis eai leat gávnnahan ođđa koronavirusnjoammumiid guovtti beaivái, muitalit Oarje-Lappi ja Lappi buohccedikšunbiiret. Olles Lappis leat dán rádjái gávnnahan oktiibuot 237 njoammuma.

18.5. dii. 12.39 Suomas leat 33 ođđa koronavirusnjoammuma

Suomas leat gávnnahan ievttá rájes 33 ođđa sihkaraston koronavirusnjoammuma, muitala THL. Buohkanassii Suomas leat dál sihkaraston njoammumat oktiibuot 6 380.

THL almmuha dieđuid koronajámuin maŋŋelabbos otne. Sotnabeaivve dieđuid mielde Suomas leat dán rádjái jápmán koronavirusa geažil 298 olbmo.

18.5. dii. 12.44 Máttimus Suomas leat muhtin skuvllain gávnnahan koronavirusnjoammumiid

Porvoo Linnajoki skuvllat leat ovtta skuvlla oahppis leat gávnnahan koronavirusnjoammuma, muitala Porvoo gávpot.

Skuvlla 17 oahppi ja njeallje oahpaheaddji leat biddjon ruoktokarantenii. Gávpoga dieđáhusa mielde eará skuvlla oahppit jotket skuvlla vázzima otne dábálaččat.

Otná rájes Sipoo gielda ávžžuha Söderkulla skuvlla 4.-6. luohkkálaččaid sirdašuvvat gáiddusoahpahussii. Gieldda dieđuid mielde stuorra oassi skuvlla oahppaheaddjiin ja skuvlavehkiin leat leamaš dahkamušas dakkár olbmon, geas lea koronanjoammun.

Loga áššis eambbo suomagillii dáppe.

Maiddái Helssegis leat Itäkeskus ja Kannelmäki skuvllain oahppit ja skuvlla bargit biddjon karantenai, go navdet sin leamaš dahkamušas olbmon, geas lea koronavirus.

Goappáge skuvllas leat gávnnahan ovtta koronavirusnjoammuma.

Loga áššis eambbo suomagillii dáppe.

Suomas rahpasedje skuvllat fas dábálaš oahpahussii duorastaga.

Loga maid: Oahppit máhcce fas skuvlii – avvilaš nieiddaguoktá illudeaba oaidnit skihpáriid skuvllas

18.5. dii. 12.20 Ecuadoris sihkaraston vuosttas koronanjoammun eamiálbmogiin

Ecuadoris, Mátta-Amerihkas, leat gávnnahan vuosttas koronavirusnjoammun eamiálbmogiid gaskkas. Virusa lea ožžon Amazona guovllus ássi waorani-álbmogiid gullevaš nuorra nieida, muitala Ecuadora dearvvasvuohtaministeriija.

Eiseváldiid mielde nieiddas álge dávdamearkkat miessemánu álggus ja su leat dolvon buohccevissui oaivegávpogii Quitoi ja biddjon erremii. Dárkilut dieđuid nieidda veadjimis eai muital.

Máŋggain olbmuin, geat leamaš dahkamušas nieiddain, leat leamaš dávdamearkkat ja sin leat testen. Eiseváldit eai leat muitalan testenbohtosiid.

Waorani-álbmoga ovddasteaddjit leat váruhan, ahte ođđa koronavirusnjoammun sáhttá leat katastrofa sin álbmogii.

Ecuadoris leat gávnnahan buohkanassii 33 000 koronavirusnjoammuma.

Gáldu: STT

17.5. dii. 9.18 Borgemánus Finnair girdigoahtá fas Avvilii ja Gihttelii

Finnair pláne girdigoahtit Avvilii ja Gihttelii borgemánus nu, ahte seamma girdimášen girdá Helssegis vuos ovdamearkka dihte Avvilii ja das joatká Gihttelii.

Álggus ulbmil lea girdit oktii vahkus Avvilii ja Gihttelii ja de gulul lasihišgoahtit girdivuoruid nu, ahte skábmamánus livčče beaivvis jo guokte girdivuoru Helssegii. Koronapandemiija áigge Finnair lea girdán Lappi girdigittiin dušše Roavenjárgii.

Boahtte dálvvi Finnair áigu girdit maiddái Avvilis Londonii, Gihttelis Brysselii, Pariisii, Londonii ja Zürichii.

16.5. dii. 14.34 THL: Suomas 58 ođđa koronavirusnjoammuma ja njeallje ođđa koronajámu

Suomas leat dál oktiibuot 6 286 sihkaraston koronavirusnjoammuma, muitala THL. Dat lea 58 njoammuma eanet go ikte bearjadaga.

Koronavirusa geažil leat jápmán dán rádjái oktiibuot 297 olbmo, otne almmuhii THL njealji ođđa koronajámus.

Buohcceviessodivššus leat 120 olbmo, main 30 leat beaktilis divššus.

16.5. dii. 10.40 Stáhtaráđđi: Eana- ja guolledoalu fitnodagat ožžot maid kriisaveahki

Koronavirusepideamis gillán dálonguovllu unna fitnodagaide, muhtin eanadoalu álgobuvttadeami ja guolledoallofitnodagaide álget juolludit gaskaboddásaš kriisaveahki.

Ruđalaš doarjaga sáhttet ohcat eanadoaluid oktavuođas doaibmi fitnodagat, eanadoalu buktagiid ovddušteaddji ja vuovdi unna fitnodagat, eanadoalu álgobuvttadeami, masa gullá maid boazodoallu sihke guolástusa, čáhcegilvima, guolleovddušteami fitnodagat ja guollegávppit.

Doarjaga ohcanáigi álgá vuossárgga 18.5. Lassedieđut ohcamis gávdnojit eana- ja vuovdedoalloministeriija siiddus.

16.5. dii. 10.13 Lappis plánejit ovttas doaimmaid hálddašit koronavirusdili

Lappi buohccedikšunbiire pláne ovttas Oarje-Lappi buohccedikšunbiiriin ja eanangotti eará doaibmiin kampanja, mainna geahččalit hálddašit koronavirusdili Lappis maiddái muhtin ráddjehusaid burgima maŋŋá. Kampanjain muittuhit buohkaid vásttolaš láhttemis ja doaimmas, vai koronavirusnjoammumat geahppánit ja virusa leavvan easttašuvvá.

Lappis koronavirusdilli lea dál ráfálaš, muhto buohccedikšunbiires ballet, ahte dilli sáhttá vearránit go muhtin ráddjehusat nohket geassemánus. Kampanjain hálidit muittuhit olbmuid doaibmat vásttolaččat, suddjet iežaset ja fuolahit eará olbmuid dorvvolašvuođas.

Kampanja plánemii oassálastet buohccedikšunbiirii lassin maid earet eará Lappi Lihttu, Sámediggi, gielddat, Lappi gávpegámmir ja fitnodatdoallit, mátkeealáhus- ja márkanfievrridansuorggi áššedovdit, organisašuvnnat sihke studeanttaid ja nuoraid fierpmádagat.

16.5. dii. 9.51 Lappi buohccedikšunbiires guokte ođđa njoammuma vahku sis

Lappi buohccedikšunbiires leat boahtán ovdan guokte ođđa koronavirusnjoammuma maŋimuš vahku áigge, okta vahkuloahpas ja okta álgovahkus. Maŋit dáhpáhusas lea sáhka goit olbmos, guhte ássá eará guovllus Suomas.

Maŋŋebárgga maŋŋá eai leat gávnnahan lasi koronavirusnjoammumii Lappi buohccedikšunbiires.

16.5. dii. 9.46 Ministeriija lea addán beaiváduvvon rávvagiid boarrásiidsiiddaide

Dakkár lagašolbmot, geain eai leat dávdamearkkat, galget beassat dorvolaččat galledit bearašlahtuid, geat leat duođalaččat buohccán ja jápmimin, cealká sosiála- ja dearvvasvuohtaministeriija ođđa ráva, mii addui bearjadaga.

Boarrásiidsiiddain ja eará erenomáš ássanovttadagain sáhttet fállat dorvvolaš vugiid deaivvadit ovdamearkka dihtii sierra viesus dahje olgun. Ministeriija rávvagis maiddái ávžžuhit, ahte boarrásiidsiiddaid ássit galget beassat olggos lihkadit koronapandemias fuolakeahttá.

Loga áššis eambo suomagillii dáppe.

16.5. dii. 9.34 Ohisalo: Mátkkoštanráddjehusaid sáhttá burgit dihto riikkaid oasil

Suopma sáhttá burgit riikkaid gaskasaš mátkkoštanráddjehusaid dihto riikkaid oasil, jus dain lea seammalágan koronadilli, dadjá sisáššiidministtar Maria Ohisalo (ruon.)

Ohisalo mielde vuordámušat rahpat geasi mátkkošteami várás leat stuorrá, muhto dehálamos lea burgit ráddjehusaid dearvvašvuođadili mielde, vaikko ráddjehusain leat stuorra sosiálalaš ja ruđalaš váikkuhusat.

Ohisalo lei mielde ikte bearjadaga ráđđádallamin rádjedárkkistusain EU ja Davviriikkaid sisáššiidministtariiguin.

15.5. dii. 17.28 Suomas guhtta ođđa koronajápmima

Suomas leat dál 293 COVID-19-dávdii laktáseaddji jápmindáhpáhusat. Jápmán olbmot leat guhtta eanet go ikte, raportere Dearvvašvuođa ja buresveadjima lágádus THL.

15.5. dii. 12.36 Suomas 83 ođđa sihkaraston koronavirusnjoammuma

Suomas leat dál 6 228 sihkaraston koronavirusnjoammuma, muitala THL. Dat lea 83 eambo go ikte duorastaga.

Duorastat rádjái ledje koronavirusdávdda geažil jápmán 287 olbmo. THL muitala ođđasamos dieđuid koronajámuin maŋŋelabbos otne.

15.5. dii. 12.33 Davvi-Suomas sáhttet fargga bargat badjel duhát koronavirusiskosa beaivvis

Davvi-Suoma koronavirusa testenkapasitehta leat bajideamen sullii 250 iskosiin jándoris miessemánu loahpa rádjái. Boahtteáiggis Nordlab testenválmmašvuođa viđa buohccedikšunbiires lea badjel 1100 iskosa beaivvis.

Nordlab bajida kapasitehta eanemus Oulus, sullii 100 iskosiin beaivvis. Roavvenjárggas testen lassána 60 iskosiin, Giemas ja Kokkolas fas guktuin 40 iskosiin.

Dál stuorámus oassi Nordlab koronavirusiskosiin analyserejit Oulus.

14.5. dii. 17.20 Suomas golbma ođđa koronajámu

Suomas leat gávnnahuvvon golbma ođđa koronavirusa dagahan jápmindáhpáhusa, muitala THL. Dán rádjái Suomas koronavirusii leat jápmán oktiibuot 287.

Buohcciviesus leat dál divššus 143, geain 33 leat beaktilis divššus.

14.5. dii. 14.12 Skuvllat leat vuot rabas – eatnašat sámeguovllu mánáin máhcce skuvlii

Stuorámus oassi sámeguovllu mánáin máhcce skuvlii odne duorastaga 14.5, go skuvllat rahpe uvssaideaset measta guovtti mánotbaji maŋŋá.

Muhtin veardde mánát goit báhcet eret skuvllas. Sámegielddain eanemus mánát báhce ruoktot Eanodaga gielddas, gos badjelaš 20 proseantta oahppiin leat almmuhan ruoktot báhcimis. Vuohču skuvllas fas muitalit, ahte sin skuvllas lea dálá dieđu mielde goit okta mánná báhcimin ruoktot.

Loga maid: Oahppit máhcce fas skuvlii – avvillaš nieiddaguoktá illudeaba oaidnit skihpáriid skuvllas

14.5. dii. 14.07 Suomas leat 91 ođđa njoammuma

THL loguin mielde Suomas leat sihkkarastán dán rádjai oktiibuot 6 145 koronavirusnjoammuma. Njoammumat leat 91 eanet go gaskavahku.

Gáldu: STT

14.5. dii. 08.59 Ráđđehus soabai fitnodatdoarjagiid máksimis – restoráŋŋaid rahpama eai bastán vel čoavdit

Suoma ráđđehus soabai gaskavahku fitnodatdoarjagiin, maiguin geahččalit veahkehit fitnodagaid ceavzit koronakriisa dagahan dáhpagiin. Ealáhusministtar Mika Lintilä muitala aiddo doarjaga detáljain dieđihandilálašvuođas.

Gaskavahku ráđđádalle maiddái das, maiguin eavttuiguin restoráŋŋat sáhttet rahpasit geassemánu álggus. Dasa eai goit vel gávdnan čovdosa, ja ráđđádallamat joatkašuvvet duorastaga.

13.5. dii. 15.17 Suomas koronai jápmán oktiibuot 284 olbmo

THL dieđuid mielde Suomas koronai leat dán rádjái jápmán oktiibuot 284 olbmo. Jápmán olbmuid mearri stuorui ievttážis ovcciin.

Buohcceviesus leat divššus oktiibuot 157 olbmo, geain 35 leat beaktilis divššus.

Dán liŋkkas beasat geahččat THL statistihkaid koronadáhpáhusain.

13.5. dii. 14.26 Suomas 51 ođđa koronanjoammuma

Suomas leat gávnnahuvvon 51 ođđa koronavirusnjoammuma, muitala THL. Suomas leat dál oktiibuot 6 054 koronanjoammuma.

13.5. dii. 10.20 Norga álgá gulul ložžet iežas koronaráddjehusaid riikkarájáin

Norgga ráđđehus mearridii maŋŋebárgga ložžet koronaráddjehusaid riikkarájáid alde, muitala Iltalehti-aviisa.

Dál Norgii besset vuot olbmot ETA ja EU riikkain, Islánddas ja Liechtensteinas dainna eavttuin, ahte sus lea Norggas bearašlahttu dahje viessu, dego ovdamearkka dihtii barta dahje luopmoviessu.

Bearašlahttun gehččet vuolleahkásaš mánáid, náittos- dahje ássanguimmiid ja sin mánáid ja vuolleahkásaš máná váhnemiid.

Norgga ložžendoaimmat gusket maiddái guolásteami rádjejogain. Norgga ráji rasttildeapmi Deanus lea fas lobálaš fatnasiin guolástettiin 14.5.2020. Mearrádusa mielde fatnasis oažžu guolástit, go beare ii mana gáddái nuppi riikka beallái.

Norga giddii rájáidis 16.3. Stáhtaministtar Erna Solberg muitalii mannan vahkus TT-ođasdoaimmahahkii, ahte Norga mearrida eará ráddjehusaid burgimis ihttin duorastaga. Ulbmilin lea rahpat buot giddejuvvon fitnodagaid ja almmolaš bálvalusaid geassemánu beallemuttu rádjai, jus dat fal lea epidemiijadili dáfus vejolaš.

13.5. dii. 7.50 Ráđđehus ráđđádallá fitnodatdoarjagiin ja restoráŋŋaid rahpamis

Suoma ráđđehus ráđđádallá gaskavahku veaigin fitnodagaid doarjagiin ja restoráŋŋaid vejolaš rahpamis.

Ráđđádallamiin galget mearridit, ovddidago ráđđehus nu gohčoduvvon almmolaš gánnáhahttivuođadoarjaga. Sáhka lea dálá dieđuid mielde čuđiid miljovnnaid euroid sturrosaš doarjagis, maid mávssášedje fitnodagaide, mat gillájit koronavirusa dagahan dilis.

Dasa lassin ráđđehus ráđđádallá earret eará das, mo restoráŋŋaid sáhtášii dorvvolaččat rahpat geassemánu álggu rájes. Restoráŋŋat, kafeat ja bárat leamašan áššehasaide gitta 4.4. rájes.

12.5. dii. 15.40 Njeallje ođđa koronajápmima Suomas

Suomas leat gávnnahan njeallje ođđa jápmindáhpáhusa, mat laktásit koronavirusa dagahan dávdii, muitala THL. Dán rádjái Suomas koronavirusii leat jápmán oktiibuot 275 olbmo.

Buohcceviesus leat divššus dál 152 olbmo, geain 34 leat beaktilis divššus.

2.5. dii. 13.25 Suomas gávnnahuvvon oktiibuot 6 003 njoammuma

Suomas leat dán rádjái gávnnahuvvon oktiibuot 6 003 koronavirusnjoammuma, muitala Dearvvašvuođa ja buresveadjima lágádus THL.

12.5. dii. 7.12 Soađegilis ordnejit koronatestema Sopukka šiljus

Soađegilis leat dahkan koronatestema álkkibun ja testejit buohkaid, geain leat geahppa dávdamearkkat. Gielddas rávvejit váldit oktavuođa koronarávventelefonii, jus eahpidat alddát leat koronavirusdávdamearkkat.

Čájánasaid váldet Buresbirgenguovddáš Sopukka šiljus, sierra tealttás. Bohtosat iskosiin válmmaštuvvet moatti beaivvis ja daid sáhttá jearrat rávventelefonis. Bohtosiid oaidná maiddái kanta.fi -bálvalusas.

Eambbo dieđut gávdnojit Soađegili gieldda neahttasiidduin.

12.5. dii. 7.10 Oahpamusministtar muitala otne skuvllaid erenomaš ordnemiin

Oahpahusministtar Li Andersson doallá otne iđđes dieđihandilálašvuođa skuvllaid oahpahusa ordnemis ja beaivedivššuid rávvagiin. Skuvllain álgá lagašoahpahus duorastaga ja oahppiid dorvvolašvuođa geahččalit dáhkidit erenomášordnemiin.

Mielde dilálašvuođas leat maid Oahpahusráđđehusa váldohoavda Olli-Pekka Heinonen ja mánáid infekšuvdnadoavttir Otto Helve Dearvvašvuođa ja buresveadjima lágádus THL.s. Yle čájeha dieđihandilálašvuođa njuolggosáddagis tv1 kanálas ja Areenas diibmu 9.

Dát giđđalohkanbadji bistá vel sullii guokte vahku, go vuođđoskuvllat rahpasit buohkaide boahtte duorastaga. Lohkanbadji nohká miessemánu 30. beaivve.

11.5. dii. 15.48 Suomas njeallje ođđa jápmindáhpáhusa

Suomas leat njeallje ođđa koronavirusa dagahan jápmindáhpáhusa, muitala THL. Oktiibuot Suomas koronavirusa dagahan dávdii leat jápmán dál 271 olbmo. Beaktilis divššus leat dál 44 olbmo.

11.5. dii. 12.29 Suomas 22 ođđa koronanjoammuma

Suomas leat dál 5 984 sihkarastojuvvon koronavirusnjoammuma, muitala Dearvvašvuođa ja buresveadjima lágádus THL. Ođđa sihkaraston njoammumat leat ievttáža ektui 22.

THLmuitala vejolaš ođđa koronai laktáseaddji jápmindáhpáhusain maŋŋelabbos odne. Koronai laktáseaddji jápmindáhpáhusaid raporterejedje sotnabeaivve leat oktiibuot 267.

11.5. dii. 8.25 Máŋggain Eurohpa riikkain ložžejit koronaráddjehusaid otne

Máŋggain Eurohpa riikkain burgigohtet otná rájes koronavirusráddjehusaid.

Espánjas ožžot olbmot fas deaivvadit bearašlahtuiguin ja ustibiiguin vuollel 10 olbmo čoahkkanemiin.

Norggas, Sveicas ja Hollándas rahpet skuvllaid.

Ránskás rahpasit vuoktačuohppahanfitnodagat ja girjegávppit.

Stuorra-Británnias fas ávžžuhit olbmuid máhccat bargui, jus eai sáhte bargat gáiddusin.

Loga eambbo suomagielat áššis dáppe.

10.5 dii. 14.28 THL beaivádii sihkkaraston njoammumiid logu: Suomas leat 82 ođđa sihkkaraston njoammuma

Dearvvašvuođa ja buresveadjinlágádus THL lea dárkkálmahttán sotnabeaivve addojuvvon loguid sihkkaraston njoammumiin. Diibmu 13.00 addojuvvon dieđuid mielde Suomas lei oktiibuot 5913 sihkkaraston koronavirusnjoammuma, nappo 33 eanet go ievttá dieđuin. Lohku lei goittotge boastut ja rivttes lohku njoammumiin lea 5962, nappo ođđa njoammumat leat 82.

10.5. dii. 12.30 Suomas leat dál 5913 sihkkaraston koronavirusnjoammuma

Dearvvašvuođa ja buresveadjinlágádus THL muitala, ahte Suomas leat dál oktiibuot 5913 sihkkaraston koronavirusnjoammuma. Dat lea 33 njoammuma eanet go maid ievtta dieđuin.

Ievttá rádjai Suomas ledje raporteren oktiibuot 265 jápmima mat laktásit koronavirusii.

10.5. dii. 9.55 Máilmmis leat dál badjel 4 miljon sihkkaraston koronavirusnjoammuma

Málmmis leat dál badjel 4 miljovnna sihkkaraston koronavirusnjoammuma, muitala Johns Hopkins – universitehta statistihkat. Universitehta mielde virusa dagahan dávdii leat jápmán goit 278 000 olbmo.

Buot virusdáhpáhusaid eai duođaš teasttain, nu ahte duođas logut sáhttet leat olu stuorrát.

Gáldu: STT

9.5. dii. 15.25 Njuorggánlaš fitnodatdoalli: Geasis šaddá ceavzindáistaleapmi

Njuorggánlaš fitnodatdoalli Ari Naapanki oamasta biillaid divuhanfitnodaga, muhto eanáš oassi su kunddáriin bohtet Norgga bealde. Maŋŋágo Norgga rádjá manai gitta, su fitnodaga doaimmat leat nohkan goasii oalát.

Dál son ballá, mo su fitnodahkii geavvá jus ráját bissot oppa geasi gitta.

Loga suomagielat ášši dás.

9.5. dii. 13.05 Suomas vihtta ođđa koronajámu – Ođđa njoammumat 142

Suomas raportejit vihtta ođđa koronavirusa dagahan jámu, muitala dearvvašvuođa- ja buresveaddjinlágádus THL. Koronavirusa dagahan dávdii leat jápman dál 265 olbmo.

Buohccedivššuin dikšot dál 161 koronapasieantta. Sis 45 dárbbašit beaktilmahttojuvvon divššu.

Suomas leat dál oktiibuot 5 880 sihkkarastojuvvon njoammuma. Njoammumiid mearri badjánii ievttážis 142:n.

8.5. dii. 17.04 Oulu universitehta doavttirpromoveren sirdašuvvá čakčamánnui

Oulu universitehta 11. doavttirpromoveren sirdašuvvá koronapandemiija dihte miessemánus čakčamánnui. Doavttirpromoveren ordnejuvvo golmmabeaivvát dáhpáhussan 11.-13.92020.

Eanet diehtu promoverema sirdašuvvamis Oulu universitehta neahttasiidduin.

Okta guhte vihahuvvo dilálašvuođas, lea Uccpárnáá Vuoli Ilmar, Ilmari Mattus. Son nammaduvvo Oulu universitehta humanisttalaš dieđagotti gudnedoavttirin. Mattus lea giellaaktiiva, girječálli, jorgaleaddji ja dáiddár.

Son lea áŋgiruššan anárašgiela giellaealáskahttimiin ja lea leamaš váikkuheamen dasa, ahte anárašgiella lea šaddan universitehta oahppoávnnasin. Son lea leamaš áššedovdin, diehtoaddin ja dutkanguoibmin iešguđet surggiid dutkiide.

Gudnedoavttirin vihaheapmi lea alimus fuomášupmi, man universitehta sáhttá mieđihit ovttaskas olbmui

8.5. dii. 15.47 Suomas vihtta ođđa jápmima

Dearvvašvuođa ja buresveadjima lágádus THL muitalii bearjadaga viđa ođđa jápmimis, mat laktásit koronavirusii. Virusa dagahan dávdii leat Suomas jápmán oktiibuot 260 olbmo.

Buohcceviesus divššus leat dál oktiibuot 169 olbmo, geain 45 leat beaktilis divššus.

8.5. dii. 15.13 Anáris galledeapmi lágádusdivššu ja bálvalanássama bires leahkki ássiid luhtte lea vejolaš ihttáža rájes

Anára gielddas galledeapmi lágádusdivššu ja bálvalanássama bires leahkki ássiid luhtte lea vejolaš 9.5. rájes.

Galledeaddjit gálget leat dearvasat ja sii galget várret áiggi ovddal gihtii.

Männikkö bálvalanruovttu ássiid deaivvadeamit ordnejuvvojit doaisttážii šiljus leahkki deaivvadanbarttas. Deaivvademiide galgá várret áiggi ovddal gihtii.

Dárkilut dieđuid ja rávvagiid gávnnat Anára gieldda neahttasiidduin.

8.5. dii. 14.45 Koronavirusii jápmán olbmuin measta 90 proseanta leat badjel 70-jahkásaččat – duogážis dábálaččat maiddái muhtin vuođđobuohcuvuohta

Suomas leat gávnnahuvvon ievttáža rádjái 255 koronavirusnjoammumiidda laktáseaddji jápmindáhpáhusa. 211 dáhpáhusas leat oažžumis dárkilut dieđut. Dain 88 proseanta ledje badjel 70-jahkásaččat. Mediánaahki lea 84 jagi, muitala THL.

Bargoahkásaččaid jápmindáhpáhusat leat hui hárvenaččat ja mánáid ja nuoraid jápmimiid eai leat gávnnahan.

Jápmán olbmuin sulaid 96 proseanttas lei okta dahje eanet guhkit áiggi buohcuvuohta. Dábálamosat ledje váibmodávddat ja diabetes. Dego máŋgga eará Eurohpa riikkas, maiddái Suomas measta bealli buot jápmimiin lea dáhpáhuvvan sosiálafuolahusa ovttadagain, main lea doaibma birra jándora.

Koronavirusepidemiija ii leat lasihan jámolašvuođa Suomas. Ođđajagimánus gitta njukčamánu lohppii Suomas jápme sulaid 14 000 olbmo, mii lea Statistihkkaguovddáža dieđuid mielde veháš unnit mearri go dábálaččat álgojagi.

– Koronavirusinfekšuvdnii jápmán olbmuin oassi livččii sáhttán jápmit maiddái muhtin eará dávdii, dego influensii, dadjá THL jođiheaddji áššedovdi Jussi Sane.

8.5. dii. 12.33. Suomas ođđa koronanjoammumat 65 – oktiibuot dál 5738 njoammuma

Suomas leat dál oktiibuot 5738 sihkaraston koronavirusnjoammuma, muitala THL. Lohku lea lassánan ievttážis 65:in.

Koronavirusjámuid oasil THL dieđiha otne eahketbeaivve.

8.5. dii. 12.16 Norga rahpá skuvllaid vuossárgga

Koronavirusnjoammumiid mearri lea geahppáneamen Norggas nuba doppe leat mearridan rahpat skuvllaid boahtte vuossárgga, muitalii riikka ráđđehus duorastaga. Maiddái bárat ožžot rahpat uvssaideaset geassemánu 1. beaivve rájes.

Vuollel 200 olbmo čoahkkanemiid ja valástallandáhpáhusaid sáhttá lágidit geassemánu 15. beaivve rájes. Norgga stáhtaministtar goittotge váruhii, ahte beaivemeriin dollet gitta dušše dan dáhpáhusas, ahte epidemia ii vearrán ođđasit.

Gáldu: AFP

8.5. dii. 12.09 Gažadeapmi: Bealli Lappi fitnodagain ballá reastaluvvat

Varas jearahallama mielde koronakriisa čuohcá garrasit Lappi guovllu turismii. Bealli fitnodatdoalliin jáhkká, ahte sii eai ceavcce čuovvovaš sesoŋŋa rádjai. Dušše njealjátoassi jáhkká birget badjel 10 mánotbaji.

Stuorámus oassi goit leat dan oaivilis, ahte koronakriisa dikšuma dihte ásahuvvon stáhtadoarjagiid lea váttis ávkkástallat.

Lappi gávpekámmára ja turismmasuorggi lihttu jearahallamii vástidedje 200 fitnodatdoalli.

8.5. dii. 12.05 Ráđđehus: Sisrájiid rasttildeapmi lea lobálaš guolástusdárkkuhusas, gáddái ii oaččo mannat

Deanujoga luossabivdu beassá álgit, ja bivdit besset oaggut dahje golgadit olles joga govdodagas, muhto Norgga beallái ii leat lohpi gorgŋet gáddái.

Ráđđehus lea ikte dárkkálmahttán Suoma ja Ruoŧa sihke Suoma ja Norgga gaskasaš rádjejohtolaga mearrádusaid. Mearrádus guoská maid Durdnosjoga. Mearrádusa mielde riikkaidgaskasaš sisrájá rastá lea vejolaš johtit, muhto koronakriisa dihte gáddái mannan ii leat vejolaš.

7.5. dii. 18.09 Rievdadusat rájáid rasttildeapmái: Earáge go vealtemeahttun bargomátkejohtolat dohkkehuvvo

Ráđđehus lea odne duorastaga mearridan joatkit gaskaboddosaš Suoma rádjejohtolaga guoskevaš ráddjehusaid 14. geassemánu rádjái. Mearrádus lea joatkka njukčamánus dahkkon ráđđehusa mearrádussii, mainna máhcahuvvui rádjegohccin sisrájáide, giddejuvvui dihto rájárasttildanbáikkiid ja ráddjejuvvui olgorájiid rasttildeaddji johtolat.

Olgorádjejohtolaga ráddjehusat bissot seammalágánin 14. geassemánu rádjái.

Bargojohtolat Suoma ja eará Schengen-guovllu gaskkas šaddá álkibun. Miessemánu 14. beaivvi rájes Schengena sisrájáid rasttildeaddji johtolagas ii dárbbašuvvo šat ákkastallan bargomátkki vealtemeahttunvuođas. Daid rájáid rastá beassá bargojohtolaga lassin maiddái eará vealtemeahttun johtolat. Sisministeriija mielde mearrádusain álkidahttit maiddái lagaš fulkkiid deaivvademiid.

Sisrádjegohccima joatkit eanarájiin, hámmaniin ja girdingiettiin

7.5. dii 17.37 Suomas golbma ođđa koronajámu

Suomas leat dál jápmán koronavirusa dagahan dávdii oktiibuot 255 olbmo, muitala THL. Lohku stuorui golmmain ievttážis.

7.5. dii. 13.01 Sámi našunálateahter rahpá uvssaidis

Sámi Našunálteáhter Beaivváš rahpá fas uvssaidis. Sámi našunálateáhter illuda, go miessemánu 7. beaivvi rájes lea vejolaš lágidit čájálmasaid, main leat vuollel 50 geahčči. Teáhter ávvuda dán rahpaseami čájálmasain “Jallas stállu” man ovdanbuktá neavttár Iŋgor Ántte Áilu Gaup.

Sotnabeaivve, miessemánu 10. beaivvi Beaivváš sámi teáhter čájeha neahtas, mánáidčájálmasa “Hamelna roahttobivdi” Dan ovdanbuktá neavttár Egil Keskitalo. Fálaldat lea nuvttá, ja rabas buohkaide. Maiddái mánáidčájálmasat “Jallas stállu” ja “Stállu ja guovssahasa bárdni” čájehuvvojit neahtas dán mánus. Áššis muitala Ávvir-aviisa.

7.5. dii. 12.59 Meahciráđđehus rahpá luondduguovddážiid ja ávdinstobuid geassemánu álggus

Meahciráđđehusa Luonddubálvalusat rahpá luondduguovddážiid sihke várren- láigohan- ja ávdinstobuid geassemánu vuosttaš beaivvi rájes. Mearrádus čuovvu stáhtaráđi linnjema almmolaš sajiid rahpamis.

Áššehasbálvalusčuoggáid dorvvolašvuohta sihkkarastojuvvo áššehasmeari ráddjema, dorvogaskavuođaid sihke hygieniijarávvagiid bokte. Meahciráđđehus dárkkálmahttá mearrádusaid vel miessemánu áigge, go ožžot lasserávvagiid.

Vánddardanetikeahta čuovvun lea dál vel dehálut sihke luonddu ja olbmuid iežaset dorvvolašvuođa dihte, čállet Meahciráđđehusa dieđáhusas.

7.5. dii. 12.57 Eiseváldit fuolas olbmuid veadjimis koronakriisa joatkašuvvamis

Lappi eiseváldit leat fuolas olbmuid psyhkalaš veadjimis go koronakriisa joatkašuvvá ain. Erenomážit eiseváldit leat fuolasmuvvan mánáid ja nuoraid birgemis.

Boles mielde oktavuođa váldimat sidjiide leat lassánan. Ikte čoahkkanan Lappi guovlolaš válmmašvuođadoaibmagotti mielde oktavuođa veahkeheaddjiide galgá váldit áiggil ja doarvái árrat.

Lappis leat ráhkkaneamen dál koronaráddjehusaid ložžemii. Válmmašvuođadoaibmagotti mielde Lappi koronavirusnjoammundilli lea dál oalle ráfálaš.

7.5. dii. 12.51 Suomas 100 ođđa koronanjoammuma

Suomas leat gávnnahuvvon 100 ođđa koronavirusnjoammuma, muitala THL. Oktiibuot Suomas leat dál 5673 sihkaraston njoammuma.

6.5. dii. 16.45 Suomas guhtta ođđa koronajámu

Koronai leat Suomas dán rádjái jápmán 252 olbmo, muitala THL. Ievttážis lohku lea sturron guđain.

Suomas leat gaskavahku sihkarastojuvvon 161 ođđa koronavirusnjoammuma. Oktiibuot sihkarastojuvvon njoammumat Suomas leat dán rádjái 5 573.

5.5. dii. 16.41 Suomas dál 246 koronajámu

THL muitala, ahte koronavirusii laktáseaddji jápmimiid leat Suomas raporteren dál 246. Dáhpáhusat leat dál guhtta eanet go ikte.

5.5. dii. 12.56 Ođđa koronavirusnjoammumat 85

Suomas leat dál 5 412 laboratorias sihkarastojuvvon koronavirusnjoammuma. Njoammumiid mearri stuorui ievttážis 85:in, muitala THL.

5.5. dii. 7.47 Skuvllat ja beaiveruovttut ožžo dárkilut koronarávvagiid

Oahpahusráđđehus ja THL leat almmustahttán dárkilut rávvagiid skuvllaide ja beaiveruovttuide das, mo ordnet oahpahusa ja bargama koronavirusdilis.

Rávvagiin čalmmustahttet gieđaid bassama ja muđuige čorgatvuođa skuvllain ja beaiveruovttuin. Buohccin ii galgga skuvlii mannat ja riskajoavkkuide gullevaš olbmuid dili árvvoštallet sierra.

5.5. dii. 7.36 Ráđđehus ložžii koronaráddjehusaid

Suoma ráđđehus almmuhii ikte eahkes koronaráddjehusaid ložžemis. Ovdamearkka dihtii 14. beaivve rájes rádjajohtin Schengen guovllus rahppo bargomátkkiid várás, dát mearkkaša dan ahte olbmot sáhttet johtit barggus Suoma ja Estteeatnama gaskka. Maiddái olgolihkadanbáikkit rahpasit miessemánu beallemuttus.

Geassemánu rájes fas rahpasit ovdamearkka dihtii iešguđetlágan kulturdoaimmat, valástallanbáikkit ja astoáiggedoaimmat. Čoahkkaneapmeráddjehus lea loktejuvvon logi olbmos eanemustá 50 olbmui. Badjel 500 olbmo dáhpáhusat leat ain gildojuvvon suoidnemánu lohppii.

Ráđđehus barggai mearrádusa ráddjehusaid ložžemis vuolitstáhtačálli Martti Hetemäki "korona exit" -bargojoavkku dahkan raportta vuođul.

Eanet ráddjehusaid ložžemis sáhttá fitnat lohkamin Yle ođđasiid neahttasiidduin.

4.5. dii. 15.46 Suomas 10 ođđa koronajámu

Koronavirusii leat Suomas jápmán 240 olbmo, muitala Dearvvašvuođa ja buresveadjima lágádus THL. Lohku lea sturron jándoris logiin jápmindáhpáhusain. Beaktilis divššus leat dál 49 olbmo.

4.5. dii. 13.50 Suomas 73 ođđa koronavirusnjoammuma

Suomas leat dál 5 327 laboratoriijas sihkaraston koronavirusnjoammuma, muitala Dearvvašvuođa- ja buresveadjinlágádus THL. Eanemus njoammumat leat Helssegis (1975), Vantaas (559) ja Espoos (550).

Uusimaa eanangotti lassin nubbi koronaguovddáš lea Oarje-Lappi guovllus, gos ovdamearkan Badje-Durdnosa unna gielddas leat 25 koronavirusnjoammuma.

4.5. dii. 13.43 Ruoššas koronavirusnjoammumat lassánit ain sakka

Koronavirus leavvá ain garrasit Ruoššas. Eiseváldiid mielde jándoris leat almmuhuvvon 10 581 njoammuma. Mearri lea measta seamma olu go ievttá olahuslohku.

Ruoššas leat dál oktiibuot measta 145 300 sihkaraston njoammuma, dain badjel bealli lea Moskovas.

Ruoššas leat jápmán koronavirusdávdii 1 356 olbmo.

Gáldut: Reuters, Tass

4.5. dii. 8.33 Norggas ráját gitta vel borgemánu rádjái, Ruošša mearridan guhkedit rádjesteŋgema mearrikeahtes áigái

Norgga joatká rádjágiddema gitta borgemánu 15. beaivve rádjái. Ráját leamaš gitta njukčamánu 16. beaivve rájes.

Ruoššas fas ráját leat gitta mearrikeahtes áiggi, muitala Barents Observer. Ruošša ráđđehus lea mearridan rádjagiddemis dassážii ahte koronavirusdilli ložže.

4.5. dii. 8.22 Norggas 38 ođđa njoammuma, Ruoŧas jo badjelaš 22 300 njoammuma

Norggas leat dán rádjai 7 847 olbmos duođaštuvvon koronavirusnjoammuma. Maŋimuš jándora áigge lea 38 ođđa njoammuma, dan čájehit Norgga Álbmotdearvvašvuođainstituhta logut. Buohcceviessodivššus leat 80 olbmo.

Norggas leat jápmán 211 olbmo koronavirusdávdda dihtii.

Ruoŧas leat badjelaš 22 300 koronavirusnjoammuma. Buohccediviessodivššus leat badjelaš 1 500 olbmo ja koronavirusdávdda dihtii leat jápmán badjelaš 2 600 olbmo.

4.5. dii. 8.00 Lappi buohccedikšunbiire testegoahtá olbmuid, geain leat geahppa infenšuvdnadávdamearkkat

Dán vahku rájes testegohtet Lappi guovddášbuohcceviesus maid dakkár olbmuid, geain leat geahppa infekšuvnadávdamearkkat. Teasttaid barget gielddaid dearvvasvuođaguovddážiin, gosa olbmot sáhttet ohcalit jus sis leat dávdamearkkat.

Guovddášbuohcceviesu infekšuvdnadoavttir Markku Broas mielde dáinna geahččalit eastadit koronavirusa leavvama.

4.5. dii. 7.55 Ráđđehus čoahkkana fas ráđđádallat koronaráddjehusaid burgimis

Suoma ráđđehus joatká otne ráđđádallamiid koronaráddjehusaid burgimis dii. 10. Mearrádusa galge muitalit jo sotnabeaivve 3.5., muhto Yle dieđuid mielde ievttá ráđđádallamiin ii šaddan ovttaoaivilvuohta.

Ráđđehus galgá earet eará mearridit mo geavvá čoahkkaneapmeráddjehusaide ja nuppi dási oahpahussii.

3.5. dii. 14:10 Suomas jápmán dássážii 230 olbmo, dávda vearrána ain Ruoššas

Sotnabeaivve radjai leat Suomas dieđihuvvon buohkanassii 230 jápmindáhpáhusa maid sivvan lea koronavirus. Lohku lassánii lávvardagas logiin.

Ovtta jándoris Suomas bohte dihtui 78 ođđa njommuma. Olles lohku lea dál badjelaš 5250 iskosiin sihkkarastojuvvon njoammuma. Suomas leat buohccceviesuin dál 136 koronabuohcci divššus, intensiivadivššus leat 49 olbmo.

Máilmmis koronavirus njoammu ain garrasit ovdamearkan Ruoššas ja USA:s, dán muitalit ođasdoaimmahagat. Eandalii Ruoššas dilli lea vearránan sakka dáid beivviid, dávdii dieđihit doppe jápmán dássášii 1280 olbmo.

USA lea dat riika gos koronavirusa dagahan dávda lea njeaidán eanemus, buohkanassii 66 000 olbmo leat jápmán.

Koronabuohcciid lohku lea fas geahppáneamen Spánias ja muhtin dieđuid mielde maiddái Itálias. Itálias leat dattege jápmán USA maŋŋá nubbin eanemus olbmot.

3.5. dii. 11:20 Dál eai bearráigeahččit šat duotto oaidnit olbmuid čomisteamen rájá alde

Priváhta olbmuid gaskasaš gálvolonohallan rájá alde ii leat dakkár gálvofievrredandoaibma masa spiehkastatdilis livččii lohpi.

Dál leat ferten eiseválddit njuolga gieldit gávpegálvvuid lonohallama Durdnosa rádjerasttildanbáikkis. Gielddus boahtá fápmui vuossárgga miessemánu 4. beaivve iđđes diibmu 8.

Rádjegozáhuslágádus bearráigeahččá rádjárasttildanbáikkiin dan ahte olbmot čuvvot stáhtaráđi addin mearrádusa.

Stáhtaráđi mearrádusa vuostá lea maiddái dat jus gávpejasat doaimmahit gálvvu njuolga geavaheaddjái rájá alde.

Rádjebearráigeahčus deattuhit ahte jus vástideaddji gálvu lea fidnemis almma ahte dárbbaša dan skáhppot riikkarájá duohkin de rájá rasttildeapmi ii leat vealtameahttun ja nu rájá rasttildeapmi lea stáhtaráđi mearrádusain gildojuvvon.

Buohccedivššu bealde Länsi-Pohja njoammudávddaid áššedovdit maiddái nannosit ávžžuhit olbmuid bissut eret Suoma ja Ruoŧa rádjaguovllus. Maŋimuš áiggiid leat eiseválddit gidden fuopmášumi dasa ahte olbmot čomistit dárbbašmeahttumit rájá lahkosiin.

2.5. dii. 14:20 Koronavirus njoammu ain Suomas - logut lassánan dássidit njukčámánu loahpa rájes juo guhtta vahku

Korona njoammu ain Suomas. Logut čájehit ahte maŋimuš jándoris leat boahtán dihtui badjel guokte geardde eanet njommumat go ovddit birranbeaivvis. Dávdii jápmán olbmud mearri ges lei unnit ovddit beaivvi ektui.

THL almmuhii lávvardaga 125 ođđa njoammundáhpáhusas, bearjadaga lohku lei 56. Kronavirusa dagahan COVID-19 dávdii jápmán olbmuid lohku lassánii suomas 218:s guvttiin, dálá dieđu mielde leat 220 olbmo jápmán.

Koronavirusa dagahan jápmaságat gullogohte Suomas njukčamánu 25. beaivve. Dan rájes logut leat dássidit sturron.

Maŋimuš logi beaivve áigodagas dihtui boahtán njoammumiid mearri lea lassánan sullii viđádasain (21%) ja dávdii jápmán olbmuid mearri badjel njealjadasain (28 %). Sin lohku, geat leat koronavirusa geažil divššus buohcceviesuin, lea logi jándoris geahppánan badjelaš logiin proseanttain.

2.5. dii. 11:00 Riektekansler: Spiehkastatdili ásaheapmi heivii funet sosiálalaš ja ekonomalaš eallima meroštallamii

Riektekansler Tuomas Pöysti oaivvilda ahte váldoosiin vuoiggalašvuohta lea ollašuvvan Suomas koronaepidemiija áigge.

Son lea fuolas eandalii ealáhusdoaimma ráddjema váikkuhusain ja das mo guhkálaš epidemiija fuonida sin birgejumi geat leat juo heajos sosialalaš ja ekonomalaš dilis.

Riektekansler muittuha ahte ealáhusdoaimma gieldima spiehkastatdili ákkain galggašii čuovvut govttolaš buhtadus. Dálá dieđu mielde ráđđehus addáge áššis evttohusa miessemánu vuosttas vahkus.

Válmmašvuođaláhka lea ain fámus vaikko oassi lihkadan- ja čoahkkananráddjehusain lea burgojuvvon, numo Uusimaa rájáid gidden.

Riektekanslera oktan doaibman lea čuovvut dan ahte stáhta hálddahus doaibmá lágalaččat. Tuomas Pöysti lei mielde Yle 1 Ykkösaamu Tv-jearahallamis.

Suoma ráđđehus ovttas dásseválddi presideanttain gávnnahii njukčamánu 16. beaivve ahte Suomas lea spiehkastatdilli ja ráđđehus attii maŋit beaivve guokte ásahusa maiguin válmmašvuođalága dihto njuolggadusat bohte dalle fápmui.

1.5. dii. 19.34 Koronaráddjehusat váikkuhedje válborávvudemiide eanet máddin go davvin

Válbora leat ávvudan miehtá Suoma dán jagi erenoamáš spiehkastatdilis, go fámus leat čoahkkananráddjehusat ja restoráŋŋatge leat gitta. Eambo dat goit vuhtto máddin go davvin. Sámis leat ain buorre giđđasiivvut ja danin olbmot johtet muđuige mielas meahcis.

Loga dáppe suomagielat artihkkala das, mo válbora leat ávvudan miehtá Suoma. Artihkkalis muitalit maiddái anárlaš Johanna Fabritius válboris. Son lea vuolgán Anárjávrri ala oaggut ja návddašit giđđabeaivvis iežas lagamuččain.

1.5. dii. 14.31 Suomas oktiibuot 218 jápmima

THL dieđuid mielde oktiibuot 218 olbmo leat Suomas jápmán koronavirusa geažil. Duorastaga logu ektui ođđa jápmimat leat čieža. Buohcceviessodivššus bearjadaga ledje oktiibuot 136 olbmo ja beaktilis divššus 49 olbmo.

1.5. dii. 13.04 Suomas leat 56 ođđa njoammuma

Suomas leat dál oktiibuot 5 051 sihkkaraston koronavirusnjoammuma, muitala Dearvvašvuođa- ja buresveadjinlágádus THL. Ođđa njoammumat leat duorastaga loguid ektui 56.

Eanemus njoammumiid, lagabui duhát njoammuma, leat sihkkarastán 50–59-jahkásaččain. Uhcit njoammumat leat vuollel 10-jahkásaš mánáin, geain dán rádjai leat gávnnahan 120 njoammuma.

Nissonolbmuin njoammumat leat binnáš eanet go almmáiolbmuin, 52,1 proseantta.

Helssegis njoammumat leat 1 888, Espoos 527 ja Vantaas 519.

Gáldu: STT-Yle

1.5. dii. 10.08 Ráđđehus guorahallá sotnabeaivve, maid ráddjehusaid sáhttá čuovvovaččat burgit

Suoma ráđđehus ráđđadallá koronavirusa dihte dahkkon ráddjehusain sotnabeaivve. Stuorra oassi Suoma ráddjehusain lea fámus 13.5. rádjai.

Helsingin sanomat -aviissa dieđuid mielde máŋggat ministarat háliidivčče rahpat girjerájuid muhtin ráddjehusaiguin. Maiddái asttuáiggedoaibmabáikkiid rahpama guorahallet.

Čoahkkananráddjehusaid maid árvalit joatkit 13.5. maŋŋá vel gitta miessemánu lohppii, muhto das eai leat vel mearrádusat.

Loga eanet áššis Helsingit Sanomat -aviissa neahttasiidduin.

30.4. dii. 17.19 Bálkká haga barggus eret gártan olbmot sáhttet ohcat gaskaboddosaš doarjaga

Sosiála- ja dearvvašvuođaministeriija dieđiha, ahte koronaepidemiija dihte sii, geat leat bálkká haga eret barggus, sáhttet ohcat gaskaboddosaš doarjaga.

Gaskaboddosaš epidemiijadoarjagiin buhtadit dienasmassima dalle, go váhnen báhcá bálkká haga ruoktot dikšut máná epidemiija áigge. Dienasmassin buhtaduvvo maiddái dilis, mas olmmoš lea láidestuvvon karanteanalágan dillái, go lea máhccan olgoriikkain Supmii.

Loga eanet doarjaga eavttuin ja ohcamis dáppe.

30.4. dii. 15.54 Suomas vihtta ođđa koronajápmima

Dearvvašvuođa ja buresveadjima lágádus THL muitalii duorastaga viđa ođđa koronai jápmán olbmos. Suomas koronavirusa dagahan COVID-19-dávdii leat dán rádjái jápmán oktiibuot 211 olbmo.

Buohcceviesus leat divššus 187 olbmo, geain 48 leat beaktilis divššus.

30.4. dii. 14.22 Suomas oktiibuot 4 995 koronanjoammuma – lohku stuorui 89:in

Suomas leat gávnnahan dán rádjái 4 995 laboratorias sihkarastojuvvon koronavirusnjoammuma, muitala Dearvvašvuođa ja buresveadjima lágádus THL. Ikte almmuhuvvon lohkui veardidettiin dat lea 89 njoammuma eanet.

THL mielde njoammumiid leat gávnnahan Suomas eanemus 50.59-jahkásaččain. THL muitala maŋŋelabbos eahketbeaivve, man máŋgasat leat dávdda dihte buohcceviesus divššus ja máŋgago olbmo leat jápmán virusa dagahan dávdii.

30.4. dii. 8.26 Kela almmustahttán sámegielat info-gihppaga

Kela ávžžuha dán spiehkastatdilis dikšut áššiid ruovttus. Álbmotealáhuslágádus lea čohkken sámegielat info-gihppagii dieđuid das, makkár áššiid telefonbálvalusas sáhttá dikšut ja mot riŋgenáiggi sáhttá ieš várret neahtas.

Info-gihppaga sáhttá fitnat printemin Kela neahttasiidduin.

30.4. dii. 8.03 Norga geahpeda oljobuvttadeami vástádussan hatti njiedjamii

Norga geahpeda oljobuvttadeami dán jagi loahpa guvlui. Ulbmilin lea dásset oljju hatti, mii leat niedjan erenomáš vulos eandalit koronakriisa dihtii.

Máŋggaid ođđa oljogittiid atnuiváldima maiddái maŋidit.

Gáldut: STT, AFP

30.4. dii. 7.58 Murmánskkas huksenbargoeatnamiin badjel 900 njoammuma

Okta Ruošša stuorámus koronavirusguovddážiin lea Murmánskka guovllus. Doppe lea stuorra huksenbargoeatnamis gávnnahuvvon badjel 900 koronavirusnjoammuma, muitala ođasdoaimmahat Interfax.

Virus lea leavvan Belokamenka huksenbargoeatnamis jo máŋggaid vahkuid. Doppe leat huksemin fuolahusguovddáža kássafitnodat Novatekii. Barggus leat duháhat olbmot, joba badjel 11 000, muitalii Barents Observer árabut dán mánus.

Murmánskka guovllus leat Interfax mielde duođaštuvvon buohkanassii badjel 1 100 njoammuma.

Gáldu: STT

30.4. dii. 7.48 Kela lea hilgon 80 proseantta karantenabuhtadusohcamušain

Stuorámus oassi olbmuin, geat leat ohcan koronakarantena dihtii buhtadusa, eai leat ožžon dan. Kela lea hilgon 80 proseantta ohcamušain, main leat ohcan njoammodávdabeaiveruđa.

Hilguma sivvan leamaš dábálaččat dat, ahte ohcamušas ii leat mielde njoammodávdadoaktára duođaštus. Beaiveruđa oažžuma eaktun lea njoammodávdadoaktára mearrádus karantenas, erremis dahje eretbáhcin barggus.

Loga lasi dáppe.

30.4. dii. 7.42 Ráđđehus: Vuođđoskuvllat rahpasit 14.5. rájes

Ráđđehus lea burgán skuvllaid guoskevaš ráddjehusaid ja vuođđoskuvllat rahpasit miessemánu 14. rájes. Áššis muitalii stáhtaministtar Sanna Marin (sd.) ráđđehusa dieđihandilálašvuođas ikte gaskavahku.

Skuvllain váldet atnui erenomáš ordnemii, maiguin geahččalit unnidit koronavirusa riskka. Oahpahus- ja kulturministeriija ja Dearvvašvuođa ja buresveadjima lágádus THL leat bargan rávvagiid dan várás.

Oahpahusa sáhttá ovdamearkka dihtii ordnet vuoruid miel nu, ahte unnit oahppit lea skuvllas iđitbeaivve ja stuorábut eahketbeaivve. Skuvllain galget čuovvut dárkilut hygienia- ja dorvogaskkanjuolggadusaid.

Oahpahusministtar Li Andersson (gur.) mielde dárbbašmeahttun kontávttaid galgá ain vealtit ja oahppit leat seamma lanjain unnit go dábálaččat. Dát ollašuhtto nu ahte váldojit atnui lanjaid mat muđui leamaš guorosnaga.

Dan lassin oahpaheaddjit bissot seamma skuvllas eaige jođe eará skuvllain. Skuvlla borranlanjain oažžu fitnat dušše iežas oahpahusjoavkkuin ovttas eaige skuvllaid giđđadoaluid láganat lágiduvvo.

Skuvllaid guoskevaš koronaráddjehusaid burgima dihte oahpahusa ordnejeaddji ii šat sáhte ordnet oahpahusa gáiddusin. Gielddat eai sáhte ieža mearridit skuvllaid giddemis eaige gielddat sáhte maid mearridit oahpahusa ordnemis gáiddusin.

Oahpahussuorggi ámmátorganisašuvdna OAJ lea vuosttildan skuvllaid rahpama. OAJ mielde skuvllat livčče sáhttán sirdašuvvat njuolga gáiddusoahpahusas geasseluomuide.

Skuvllat leamaš gitta njukčamánu 18. beaivve rájes.

Ráđđehus gieđahallá nuppi dási ja allaskuvllaid ráddjehusaid maŋŋá.

Dearvvašvuođa ja buresveadjima lágádus THL dieđuid mielde Suomas leat dál 4 926 sihkaraston koronavirusnjoammuma.

29.4. dii. 15.05 Yle dieđut skuvlaevttohusas: Vuosttaš oahppit sáhtále máhccat skuvlii 14. miessemánu

Yle dieđuid mielde ráđđehussii evttohit, ahte skuvllaid rahpagoahtit 14. miessemánu rájes.

Skuvllaid rahpama várás oahpahusministerijas leat dahkan evttohusa. Evttohusa várás leat gullán Dearvvašvuođa ja buresveadjima lágádus THL ja sosiála- ja dearvvašvuođaministeriija áššedovdiid.

Yle gáldut muitalit, ahte rahpan guoskkašii dán muttus vuođđoskuvllaid. Skuvlii máhccan dáhpáhuvašii nu, ahte buohkat vuođđoskuvlalaččat eai álggat skuvlla seamma áigge. Nuppi dási skuvllat bisošedje dán dieđu mielde vel gitta.

Ráđđehus čoahkkana ráđđádallat skuvllaid rahpamis odne eahketbeaivve diibmu 16.30. Skuvllat leat leat leamaš gearggusvuođa lága mielde eanaš gitta 18. njukčamánu rájes. Ovddit mearrádusa mielde dat leat rabas miessemánu 13. beaivvi rádjái. Mearrádusa isket dahkat odne.

29.4. dii. 11.45 Lappi turisma geahppánii njukčamánus

Lappi turisma lassáneapmi dán dálvvi bisánii njukčamanus. Statistihkkaguovddáža ovdadieđuid mielde registrerejuvvon idjadeamit Lappi fitnodagain geahppánedje 40 proseantta ovddit jagi ektui.

Olles riikkas idjadeamit geahppánedje njukčamánus vel eanet, 47 proseantta nappo measta beallái diimmá ektui. Vel ođđajagi-guovvamánus idjadeamit lassánedje Lappis 10 proseanttain ja olles riikkas vádjit gávcci proseanttain.

Turisma gillá dál koronaviruspandemias ja mátkkoštanráddjehusain. Olgoriikalaččaid idjadeamit leat geahppánan go riikaráját leat giddejuvvon.

29.4. dii. 10.30 Njunuš doaktára dieđáhus: Anáris leat álkkidahttán virusiskosiid váldima

Anára gielddas lea ráfálaš dilli koronavirusa ektui, čállá Anára njunuš doavttir Outi Liisanantti gieldda neahttasiiddus. Avvila dearvvasvuođaguovddážis leat váldon 76 virusiskosa eaige dain leamaš cuoŋománus positiivalaš bohtosat.

THL rávvagiid mielde maiddái Anáris leat álkkidahttán virusiskosiid váldima. Dálá ávžžuhusa mielde iskkus váldo buohkain, geain leat koronavirusdávdii gullevaš dávdamearkkat.

Iskosa váldin gáibida vuos riŋgema dearvvasvuođaguovddáža áiggivárrennummirii 040 188 7400, gos fidne dárkilut rávvagiid ja áiggi iskosa váldimii.

29.4. dii. 9.36 Stáhtaministtar addá riikabeivviide almmuhusa koronakriisa dikšumis

Ráđđehus guorahallá skuvllaid rahpama otne gaskavahku. Stáhtaministtar Sanna Marin (sd.) addá riikkabeivviid dievasčoahkkimis vuos almmuhusa koronakriisa dikšumis dii. 14.

Ráđđehusa ulbmilin lea dan maŋŋá ráđđádallat skuvllaid rahpamis eahketbeaivve.

Stáhtaministtara almmuhusa sáhttá čuovvut Yle erenomašsáddagis dii. 13.55 rájes.

29.4. dii. 9.29 Sámi musihkkaakademiija festivála sirdon borgemánnui

Sámi musihkkaakademiija miessemánnui plánejuvvon prošeavtta loahppakonsearta lea sirdojuvvon borgemánnui. Konseartta galggai leat 16.5., muhto koronadili dihte dat sirdašuvvá 22.8.

– Eat dieđe velá bessetgo olbmot searvat vai streamejuvvogo, muhto dan birra mii dieđihit dađistaga. Sihkar lea goittot dat, ahte festivála lágiduvvo, dadjá musihkkaakademiija prošeaktahoavda Kati Eriksen.

Oahpaheaddji Anna Näkkäläjärvi-Länsman muitala, ahte dát erenomáš áigi lea váikkuhan maid musihkkaakademiija oahpahussii. Sii leatge váldán atnui ođđa oahpahanvugiid gáiddusin.

28.4. dii. 18.23 Suomas koronavirusii leat jápmán 199 olbmo

Dearvvašvuođa ja buresveadjima lágádus THL muitala, ahte dál leat sihkarastojuvvon 199 koronavirusii laktáseaddji jápmindáhpáhusa.

28.4. dii. 17.08 Koronanjoammumiid mearri Lappis jo 200

Lappi buohccedikšunbires lea gávnnahuvvon maŋimuš jándora áigge okta ođđa koronavirusnjoammun. Ovddit háve ođđa njoammumiid gávnnahedje mannan vahku lávvardaga.

Buohkanassii Lappi buohccedikšunbire guovllus leat gávnnahan 89 njoammuma. Oarje-Lappis ođđa njoammumiid gávnnahedje disdaga guokte, nappo njoammumat leat oktiibuot 111.

Olles eanagotti guovllus leat dál gávnnahan 200 laboratorias sihkarastojuvvon koronavirusnjoammuma.

28.4. dii. 13.52 Bealuštanfámuin 30 sihkarastojuvvon njoammuma

Bealuštanfámut muitala, ahte mánnodateahkeda rádjái Bealuštanfámuin lei sihkarastojuvvon oktiibuot 30 koronavirusnjoammuma. 13 njoammumiin lei gávnnahuvvon bálvalusgeatnegasain ja 17 bargoveagas.

Váldonjunušgotti dieđuid mielde badjel guoktelogi buohccán olbmo leat jo buorránan.

28.4. dii. 12.02 Sihkarastojuvvon dáhpáhusaid mearri stuorui 45:in

Suomas leat dál oktiibuot 4 740 sihkarastojuvvon koronavirusnjoammuma, muitala THL. Mearri stuorui ievttážis 45:in.

Duohtavuođas dáhpáhusaid leat árvalan leat máŋga geardde eanet go sihkarastojuvvon dáhpáhusat leat.

Vejolaš ođđa jápmimiin THL dieđiha eahketbeaivve.

28.4. dii. 9.38 Yle gažadeapmi: Stuorra oassi vástideaddjiin doalašii skuvllaid gitta olles loahppagiđa

Suomas guorahallet rahpat skuvllaid miessemánus. Yle gažadii ikte vuossárgga neahttasiidduid lohkkiin, ahte guottihitgo sii vuođđoskuvllaid rahpama vai eai.

Gažadeamis jerre maid háliditgo lohkkit bidjat iežaset mánáid lagašoahpahussii, jus skuvllaid rahpet. Vástádusat bohte badjelaš 3 200 vádjit guovtti diimmus, ja rabas vástádusat dárkilut ákkastallamiiguin badjel 900. Eanaš oassi vástideaddjiin muitalii leat vuolleskuvla ahkásaš máná fuolaheaddji.

Eatnasat vástideaddjiin, sullii 70 proseantta, doalašedje skuvllaid gitta vel loahppagiđa. Loahpat 30 proseantta guottihit skuvllaid rahpama. Gažadeami vástideaddjit eai ovddas buot suopmelaččaid.

Ráđđehusa vurdet dahkat mearrádusa skuvllaid rahpamis vel dán vahku áigge.

27.4. dii. 17.44 THL árvalus: Riska stuorra epidemiijai maŋŋelabbos lea vejolaš

Jos koronavirusepidemiija njoahcun joatkašuvvá guhká, lea riska stuorát epidemiijai maŋŋelabbos, árvala Dearvvašvuođa ja buresveadjima lágádus THL raporttas, mii ovdanbuktui ráđđehussii mannan gaskavahku.

Seammás THL árvalii, ahte epidemiija njoahcun sakka maiddái guhkida epidemiija bistima mearkkašahtti olu.

27.4. dii. 17.28 Suomas golbma ođđa koronajámu

Suomas koronavirusa dagahan COVID-19-dávdii leat jápmán oktiibuot 193 olbmo, muitala Dearvvašvuođa ja buresveadjima lágádus THL. Mánnodaga raporterejedje golbma ođđa jámus.

Buohcceviesus divššus leat 187 olbmo, geain beaktilis divššus leat 56.

THL mielde 144 jápmán olbmos leat dán rádjái oažžumis dárkilut dieđut. Sis 52 proseanta leat albmát ja 48 proseanta nissonat. Jápmán olbmuid mediánaahki lea 84 jagi.

Ahkejoavkkuin 30–39-jahkásaččat, 40–49-jahkásaččat ja 50–59-jahkásaččat jápmán olbmot leat buot joavkkuin vuollel vihtta, 60–69-jahkásaš jápmán olbmot leat ovcci, 70–79-jahkásaččat leat 29, 80–89-jahkásaččat leat 60 ja badjel 90-jahkásaččat leat 32.

Gávnnahuvvon njoammumat Suomas leat oktiibuot 4 695.

27.4. dii. 12.53 Suomas 4 695 sihkarastojuvvon njoammuma

Suomas leat dál oktiibuot 4 695 sihkarastojuvvon koronavirusnjoammuma, boahtá ovdan THL loguin. Mearri stuorui jándoris 119 njoammumiin.

Duohtavuođas njoammumat leat máŋga geardde eanet go sihkarastojuvvon dáhpáhusat leat.

27.4. dii. 11.54 Lappi gielddanjunnožat gáibidit fievrridanfitnodagaide johtilis doarjaga

Lappi gielddaid njunnožat gáibidit fievrridanfitnodagaide johtilis doarjaga koronakriisas šaddan ruhtaváttisvuođaid dihte.

Gielddaid njunnožat muittuhit, ahte tákse- ja bussefitnodagat leat dehálaš doaibmit bálvalusaid dihte. Dáid fitnodagaide hálidit njuolggodoarjaga das go ráđđehusa mearrádus doallat skuvllaid gitta, lea heaittihan skuvlasáhtuid.

Gieldanjunnožiid mielde fitnodagaid koŋkáneamis soitet šaddat guhkit áigge váttisvuođat gielddaid bálvalusaide erenomážit Lappis, gos leat guhkes gaskat ja olu boarrásut olbmot.

26.4. dii. 14.11 THL: Njeallje ođđa jámu

Koronavirusa dagahan dávdii leat jápmán 190 olbmo. Ođđa jámut lávvardaga dieđuid maŋŋá leat njeallje, muitalit THL:s.

Buohcceviesuin dikšot 189 koronapasieantta. Sis 62 ožžot beaktilis divššu.

26.4. dii. 12.53 Suomas 101 ođđa njoammuma

Suoma buresveadjin- ja dearvvašvuođalágádus THL mielde Suomas leat dál 4 576 sihkkarastojuvvon koronavirusnjoammuma. Jándor áigge leat ihtán 101 ođđa njoammuma.

THL dieđiha vejolaš jámuid birra maŋŋelabbos odne.

26.4. dii. 12.00 Oarje-Lappis gávcci ođđa sihkkarastojuvvon njoammuma

Oarje-Lappi buohccedikšunbires leat gávnnahan gávcci ođđa koronavirusnjoammuma lávvardatiđida maŋŋá, muitala Lapin Kansa. Guovtti dáhpáhusa njoammunbálggis lea eahpečielggas, muhto daid leat čielggadeamen, dadjá jođiheaddji-bajitdoavttir Jyri J. Taskila.

Lappi buohccedikšunbires eai leat gávnnahan ođđa njoammumiid goittot dán rádjai.

25.4. dii. 14.33 Okta ođđa sihkarastojuvvon koronavirusnjoammun Lappi guovllus

Lappis lea gávnnahuvvon okta ođđa sihkarastojuvvon koronavirusnjoammun. Dat lea Oarje-Lappi buohccedikšunbires, gos leat dál 99 sihkarastojuvvon njoammuma.

Lappi buohccedikšunbires eai leat gávnnahan ođđa njoammumiid. Ovddit ođđa njoammun Lappi buohccedikšunbires gávnnahuvvui vahku dassái lávvardaga.

Lappis leat dál oktiibuot 187 sihkarastojuvvon koronavirusnjoammuma.

25.4. dii. 13.38 SR & SVT Sápmi: Konsearttat neahtas, jus Riddu Riđđu -festivála ii lágiduvvo dán jagi

Koronavirusa dihte ii leat sihkkar, ahte Riddu Riđđu -festivála Olmmáivákkis Norgga bealde sáhttá lágiduvvot.

Festivála jođiheaddji Sandra Márjá West muitala Sameradion & SVT Sápmái, ahte Norgga eiseváldit leat gieldán stuorát lágidemiid dego festiválaid gitta 15.6. rádjái, muhto eai leat dadjan mii dáhpáhuvvá loahppageasi oasil.

Festivála jođiheaddjit barget dál garrasit gávdnat ođđa čovdosiid, go sii jurddašit artisttaid sisaboađu birra. Okta čoavddus dán dilis lea lágidit streamejuvvon konsearttaid.

– Mii háliidat doarjut Sámi artisttaid, geat dál leat massán buot čuojahanbargguid, lohká festivála jođiheaddji Sandra Márjá West.

Riddu Riđđu -festivála lágiduvvo 8. – 12.7.2020.

25.4. dii. 13.18 Suomas leat dál 4 475 sihkarastojuvvon njoammuma ja 177 jápmima

Ođđasamos THL dieđuid mielde Suomas leat dál 4 475 sihkarastojuvvon njoammuma ja 177 jápmima. Beavttálmahtton divššus leat dál 61 olbmo ja buohcceviessodivššus leat dál 138 olbmo.

Dearvvasvuođa- ja buresveadjinlágádus THL hoavda Mika Salminen mielde Suomas epidemia alimus áigi lea vel ovddabealde. Salminen ávžžuhii Yle TV1 Ykkösaamu-prográmmas, ahte geahppasutge dávdamearkkaid dihtii gánniha válddihit koronateastta.

25.4. dii. 10.08 Koronakriisa šaddá divrrasin Lappi gielddaide

Koronaviruspandemia dagaha Lappi gielddaide sullii 63 miljon euro rehkega, cealká Lappi lihttu. Dat mearkkaša sullii 360 euro ovtta olbmo ala.

Koronakriisa dihtii gielddaid vearroboađut geahppánit ja golut lassánit. Lappi lihtu mielde ovdalis máinnašuvvon submi ii sisttisdoala buohccedikšunbiiriid goluid, maid maiddái árvalit lassánit.

Dieđut vuođđuduvvet Lappi lihtu bargan gažadeapmái Lappi gielddaide.

25.4. dii. 9.34 Norgga Sámediggi rahpá uvssaidis álbmogii vuossárgga Kárášjogas

Norgga Sámediggi lea dieđihan iežas neahttasiiddus, ahte rahpá fas uvssaidis vuossárgga 27.4. rájes álbmogii dihto ráddjejumiiguin.

Sámediggi bivdá galledeaddjiid doallat unnimusat 2 mehtera gaskka, garvit ahte eanebut go 5 olbmo oktanaga čoagganit seamma sadjái ja čuovvut dábálaš buhtistanrávvagiid. Sámediggi ii váldde vuostá stuorra galledanjoavkkuid, eaige dál fála dábálaš ofelastimiid.

Sámedikki girjerádju lea goittot ain giddejuvvon, muhto olbmot sáhttet Sámedikki iežas čoakkáldagas diŋgot ávdnasiid telefovnnas, e-poasttas dahje finademiin ja gulahallamiin girjeráju bargiiguin.

25.4. dii. 9.13 Lapin Liha -fitnodat cealká eret čieža bargi ja luopmudit loahpaid

Lapin Liha Oy cealká eret čieža bargi ja luopmuda loahpaid eanemustá 90 beaivái. OB-ráđđádallamat nohke bearjadaga.

– Koronadili ovdáneapmi mearrida dan, man guhkes luopmudeamit leat. Jus dilli buorrána, dalle eai luopmudeamit ollašuva áibbas dan guhkimus áiggi mielde, dadjá beaivválaš jođiheaddji Mari Onkamo.

Stuorámus sivva buohkanassii 50 bargái guoskevaš ob-ráđđádallamiidda ledje koronavirusis šaddan ráddjehusdoaimmat, erenomážit restoráŋŋaid gidden. Iežas váikkuhus ráđđadallamiidda ledje buvttadanmeari ja bargoveaga dárbbu geahppáneamis.

24.4. dii. 18.19 Lappi gielddahoavddat gáibidit ráđđehusas doarjaga fievrridansuorggi fitnodatdoalliide

Lappi gielddahoavddat ja Lappi lihttu váldet dál beali fievrridansuorggi fitnodatdoalliid beales. Sii gáibidit boaittobealguovlluid tákse- ja linnjábiilafitnodagaide jođánis doarjaga.

– Ráđđehusa mearrádusas skuvllat leat giddejuvvon ja skuvllalaččaid fievrrideamit leat nohkan. Doarjjadoaimmain sihkkarastit fievrridanbálvalusaid guhkit áigái, gielddahoavddat ja Lappi lihttu celket oktasaš bealiváldimisttis.

Lappi gielddain leat guhkes gaskkat ja olu vuoras ássit. Lappi gielddahoavddat ja Lappi lihtu buktet ovdan, ahte gielddaid bálvalusaid dáfus tákse- ja linnjábiilafitnodagat leat erenoamáš dehálaččat.

– Máŋggain gielddain fitnodatdoallit leat uhcán ja livččii vahát, jus fitnodagat koŋkánivčče dán dili dihtii.

Gielddahoavddat deattuhit, ahte doaimmaid galgá álggahit dalán vai gielddat eai šatta dahkat ovttaskas mearrádusaid.

– Dat bijašii gielddaid ássiid eahpedásseárvosaš sajádahkii, bealiváldimis čuožžu.

24.4. dii. 17.58 LK: Stuorámus oasis Lappi gielddain eai leat gávnnahan koronanjoammumiid

Lappi buohccedikšunbires leat gávnnahan oktiibuot 88 njoammuma. Lapin Kansa -aviissa dieđuid mielde Njoammumiin 85 leat Gihttelis, Roavvenjárggas ja Kolaris. Anáris leat gávnnahan goit ovtta dáhpáhusa ođđajagimánu loahpas ja ovtta njukčamánu loahpas.

Koronanjoammumiid eai leat gávnnahan goit Ohcejogas, Eanodagas ja Muonás, čállá Lapin Kansa.

Lappi buohccedikšunbire njoammumiin 70 leat gávnnahuvvon Lappi eanangotti ássiin ja 18 olgobáikegottálaš olbmuin.

24.4. dii. 17.13 THL muitala viđa ođđa jápmimis

Dearvvašvuođa ja buresveadjima lágádus THL muitala, ahte 177 olbmo leat dán rádjai jápmán koronavirusa dagahan dávdii Suomas. Jápmimat leat lassánan duorastaga logus viđa dáhpáhusain.

Beavttálmahtton divššus leat dál 61 olbmo, nappo okta eanet go ikte. Buohcceviessodivššus leat dál 199 olbmo, čieža unnit go ikte.

THL muitalii árat bearjadaga, ahte Suomas leat oktiibuot 4 395 sihkkaraston koronavirusnjoammuma ja ođđa njoammumat leat 111.

24.4. dii 16.43 Lappi buohccedikšunbires eai leat gávnnahan ođđa njoammumiid máŋgga beaivái

Lappi buohccedikšunbire ii leat vel beassan koronas, vaikko ođđa njoammumiid eai leat gávnnahan guđa beaivái. Infekšuvdnadoavttir Markku Broas oaivvilda, ahte dilli ii leat vel meattá.

– Olbmot johtet ja deaivvadit guđet guimmiideasetguin, dalle sáhttet šaddat ođđa njoammumat ja njoammunbálgát, dadjá Broas.

Buohccedikšunbire guovllus korona testegohtet álkibut boahtte vahku rájes. Čájánasaid áigot váldit buohkain, geain leat vuoigŋanoali infekšuvnna dávdamearkkat dahje luhčadávdda váttut ja geain ii leat čielggas, gos dávda lea njommon.

Bearjadaga rádjai olles Lappi eanangotti guovllus leat sihkkarastán oktiibuot 186 koronavirusnjoammuma ja okta olmmoš lea jápmán koronavirusa dagahan dávdii.

24.4. dii. 16.24 Anára gielda lea beastán muhtin fitnodagaid láiggu máksimis

Máŋggat Lappi eanangotti gielddat leat addán fitnodatdoalliide lassiáiggi láigguid máksimii koronokriisa dihtii.

Anára gieldda giddodatfitnodat lea miehtán maid beastit muhtin fitnodagaid láiggu máksimis ovtta mánotbajis ja addán maid lasi máksináiggi. Fitnodagas lea galgan leat buorit ákkat ja das eai leat ovdal leamaš váttisvuođat láigguid máksimis.

Sáhka lea vuollel logi fitnodagas. Anára gieldda oamástan lanjaid láigohit oktiibuot sullii 35 fitnodaga.

24.4. dii. 12.18 Anárvahkut 2020 šluhttejuvvon – vejolaččat gáiddusin

Anára kulturdoaibma lea mearridan, ahte árbevirolaččat suoidnemánu loahpas ordnejuvvon Anárvahkuid eai ordne dán gease. Ággan šluhttemii lea Suoma ráđđehusa linnjen, man mielde badjel 500 olbmo dilálašvuođaid ii oaččo ordnet koronariskka dihte aŋkke ovdal borgemánu.

Gieldda kulturčálli Mirja Karjalainen muitala, ahte sii leat mearridan jearrat Anárvahkuid oassálastiin, livččego olbmot beroštuvvan oassálastit Anárvahkuid dáhpáhusaide gáiddusin. Dál Anárvahkuide sáhttáge almmuhit dáhpáhusaid, maid bastá ollašuhttit gáiddusin.

24.4. dii. 12.14 Suomas gávnnahuvvon 111 ođđa njoammuma

Suomas leat dál oktiibuot 4 395 laboratorias sihkarastojuvvon koronavirusjoammuma, muitala THL. Lohku lea sturron duorastagas 111:in.

Eanemus njoammumat leat Helssegis, gos leat 1 642 sihkarastojuvvon njoammuma.

23.4. dii. 20.06 Suomas leat sullii 2 000 olbmo buorránan koronavirusa dagahan dávddas

Suoma dearvvašvuođa ja buresveadjima lágádus THL jođiheaddji áššedovdi Jussi Sane árvala, ahte Suomas leat birrasiid 2 000 olbmo, geat leat buorránan koronavirusa dagahan dávddas.

Áššis sáhttá lohkat lasi suomagillii dáppe.

23.4. dii. 20.02 Lappi EBI-guovddáš lea mieđihan koronaruhtadeami eanemustá turismasuorgái

Lappi EBI-guovddáža guovllus spiehkastatruhtadiemi leat leat ohcan viidát iešguđet doaibmasurggiin. EBI-guovddáš dieđiha, ahte dán rádjai eanemus doarjjamearrádusat leat dahkkon idjadan- ja boradandoaimmaide, turismabálvalusaide, erenoamášgávppi suorgái ja fievrridanbálvalusaide. Dáid doaibmasurggiid fitnodagaide koronadili ráddjendoaimmat leat váikkuhan njuolga.

Lappis koronaruhtadeami leat ohcan oktiibuot 742 fitnodaga, ja dán rádjai ruhtadeami leat mieđihan 268 ohcamuša vuođul.

23.4. dii. 17.26 Davvi-Norgga universitehtabuohcciviesus guovttis leat jápmán koronavirusa dihte

Romssas Davvi-Norgga universitehtabuohcciviesus jámii gaskavahku eahket juo nubbi koronabuohcci dán rádjai. Áššis muitala NRK Sápmi.

Norgga álbmotdearvvašvuođainstituhta gaskavahku loguid mielde Norggas leat 7350 registerejuvvon koronavirusnjoammuma ja 182 olbmo leat jápmán covid-19 njoammudávdii.

23.4. dii. 16.39 Bargguhemiid mearri lea lassánan sakka

Bargguhis olbmuid mearri lea jođánit lassánan Lappi eanangottis koronavirusa leavvama eastadeapmin dahkkon doaimmaid dihtii, muitalit Lappi EBI-guovddážis.

Sámegielddain bargguhemiid mearri lea eanemus lassánan Anáris, gos bargguhis olbmot ledje njukčamánus masá guokte geardde eanet go vel guovvamánus. Ohcejogas ja Soađegilis bargguhis olbmuid mearri lea lassánan masá beliin guovvamánu logus, Eanodagas sullii goalmmádasain.

Divvojuvvon 24.4. dii.12.00: Eanodagas bargguhemiid mearri lea lassánan sullii goalmmádasain.

Loga lasi: Bargguhemiid mearri šattai mánotbajis masá guovttegeardásažžan Anáris – sámegielddain buoremus dilli lea Eanodagas

23.4. dii. 15.47 Suomas leat dál oktiibuot 172 olbmo jápmán korona dihtii

Suoma dearvvašvuođa- ja buresveadjima lágádus THL mielde Suomas leat dál oktiibuot 172 olbmo jápmán koronavirusa dagahan dávdda dihtii. Mearri lea lassánan gaskavahku logus 23 olbmuin. Buohcceviessodivššus leat 206 olbmo, geain beavttálmahtton divššus leat 60 olbmo.

23.4. dii. 12.35 Ođđa njoammumat 155

Suomas leat dál oktiibuot 4 284 koronavirusnjoammuma, muitala THL. Mearri lea 155 stuorat go ikte gaskavahku.

Eanemusat njoammumat leat Helssegis, 1 592.

23.4. dii. 9.53 Lappi guovddášbuohcceviessu addá pasieanttaide kirurgalaš njálbme- ja njunnesuoji

Lappi guovddášbuohcceviessu addá dutkamušaide ja doaktárii boahtti olbmuide kirurgalaš njálbme- ja njunnesuoji, amas korona leavvat. Olmmoš galgá geavahit suoji olles dan áiggi go lea guovddášbuohcceviesus.

Boahtte vahku rájes olbmot beassagohtet fas álkibut dutkamušaide ja spesiáladoaktáriid lusa, go koronadilli lea čielgasit ráfon guovllus.

Lappi buohccedikšunbires eai leat gávdnon ođđa koronanjoammumat lávvardaga maŋŋá.

22.4.2020 dii. 20.35 Stuorra dáhpáhusaid ii sáhte lágidit ovdal borgemánu, Suopma rievdada strategiija

Stuorra dáhpáhusaid ii oaččo Suomas lágidit aŋkke ovdal borgemánu. Gielddus guoská badjel 500 olbmo dáhpáhusaid.

Stáhtaministtar Sanna Marin muitalii áššis gaskavahku ráđđehusa dieđihandilálašvuođas. Loahppageasi ja álgočavčča dáhpáhusaid lágideami árvvoštallan dahkko Marin mielde maŋimustá geassemánu álggus.

Suopma lea stáhtaministara mielde čuovvugoahtimin nu gohčoduvvon hybridastrategiija, mas ráddjendoaimmaid sáhttá burgit ovtta lávkki hávil nu, ahte seammás galgá ain eanet testet, ohcat njoammunbálgáid ja sirret buohccán olbmui.

Ráđđehus mearrida boahtte vahkus das, dolletgo skuvllaid gitta vai galgetgo skuvllalaččat máhccat skuvlii vel ovdal go lohkanjahki nohká.

22.4. dii. 19.04 Koronavirus leavvá Ruošša davviguovlluin – njoammumat buohcceviesuin ja bargobaráhkain

Barents Observer -neahttaaviissa mielde Davvi-Ruoššas koronanjoammumat lassánit jođánepmosit Belokamenkas lahka Murmánskka. Das lea áimmu mielde 200 kilomehtera mátki Suoma rájá ala.

Belokamenkas leat huksemin eanagássafitnodaga fuolahandoarjjabáikki ja badjel 4 000 bargi orrot doppe smávva baráhkain. Murmánskka guovllu koronanjoammumat leat fáhkka šaddan guovttegeardásažžan. Stuorámus oassi njoammumiin leat namalassii guovllus, go Belokamenka bargoeana lea. Statistihkaid mielde Murmánskka guovllus leat dál badjel 400 njoammuma ja golbma olbmo leat jápmán.

Komi dásseválddis leat raporteren sullii 500 koronanjoammuma ja dávdii leat jápmán golbma olbmo. Álbmotaktivisttat leat dutkan njoammunbálgá ja gávnnahan, ahte dávda lea leavvan Komi oaivegávpot Syktyvkara lahka buohcceviesus, mas muhtun kirurga lei leamaš barggus buohccin. Eiseválddit eai sirren buohcceviesu, baicce sirde pasieanttaid eará sajiide ja geahččaledje čiehkat ášši.

Koronavirus leavvá dál jođánit Ruoššas. Sihkkaraston njoammumiid mearri lassána 4 000–6 000 dáhpáhusain beaivvis. Vahkku dassái seamma lohku lei birrasiid 3 000. Njoammumat leat oktiibuot sullii 58 000. Badjel bealli dain leat Moskovas dahje dan birrasis.

Eiseválddiid dieđuid mielde koronavirusa dagahan dávdii leat Ruoššas jápmán 513 olbmo. Jápmimiid mearri lassána máŋggain logiin juohke beaivve.

Loga eanet Ruošša koronadilis suomagillii dáppe.

22.4. dii 17.23 Länsi-Pohja guovllus lea álgán epidemiija

Länsi-Pohja pandemiijabargojoavkku mielde guovllus lea álgán epidemiija. Dávda ii goittot vel olus leava friija álbmoga siste.

Epidemiija lohket álgit dalle, go njoammunbálgát leat lassánan, njoammumat gávnnahuvvojit boarrásiidsiiddain ja koronavirusdáhpáhusaid mearri lea lassánan jođánit maŋimuš guovtti vahku áigge.

Länsi-Pohja buohccedikšunbires leat dán rádjai sihkkarastán 91 koronavirusnjoammuma. Ođđa njoammumiid eai leat gávnnahan maŋŋebárgga iđida rájes.

22.4. dii. 16:08 Yle dieđuid mielde geassit ii oaččoše lágidit festiválaid

Suoma ráđđehus lea Yle dieđuid mielde guorraseamen dasa, ahte stuorra dáhpáhusaid dego festiválai ii dán gease sáhtáše lágidit amas koronavirus njoammut. Álgodieđuid mielde dáhpáhusaid sáhtášii lágidit áramustá borgemánus.

Ráđđehus lea ráđđádallamin koronaráddjehusaid joatkimis. Yle čájeha ministariid kommeanttaid nuolggosáddagin diibmu 16.25 rájes ja ráđđehus doallá eahkedis dieđihandilálašvuođa, man árvalit álgit diibmu 19.30.

Dálá koronaráddjehusat leat fámus miessemánu beallemuttu rádjai ja restoráŋŋat rahpasit dálá dieđu mielde geassemánu álggus.

22.4. dii. 13.59 Anára gielddas korona testejuvvon 70 olbmos – vuollel vihtta positiiva čájánasa

Anára gielddas leat testen oktiibuot 70 olbmo. Korona leat gávnnahan vuollel viđa olbmos.

Maŋimuš positiiva njoammunbohtosa Anára gielddas leat ožžon njukčamánu loahpas, muitala Anára gieldda jođiheaddji doavttir Outi Liisanantti dieđáhusastis.

Dalle baste gávdnat buot olbmuid, geat ledje leamaš dahkamušas buohccán olbmuin ja ollašuhtte sirremiid ja karantenaid, muitala Liisanantti.

Su mielde dilli Anára gieldda guovllus lea ráfálaš, muhto son ávžžuha ain olbmuid leat várrugasat ja čuovvut Stáhtaráđi rávvagiid.

22.4. dii. 12.11 Suomas 115 ođđa koronanjoammuma

Suomas leat dál oktiibuot 4 129 sihkarastojuvvon koronavirusnjoammuma, muitala Dearvvašvuođa ja buresveadjima lágádus THL. Ođđa sihkarastojuvvon njoammumat leat 115.

THL muitala vejolaš ođđa jápmindáhpáhusain maŋŋelabbos odne. Disdaga dieđuid mielde Suomas leat korona dihte jápmán 141 olbmo.

22.4. dii. 12.07 Yle gažadeapmi: gielddat eai ane oahppama dáfus dárbbaslaččan máhccat lagašoahpahussii miessemánus

Yle jearai gielddaid ovddasteaddjiin, galggašiigo lagašoahpahussii máhccat miessemánu beallemuttus. Máŋggat vástideaddjit sávve gáiddusoahpahusa joatkašuvvat lohkanbaji loahpa rádjái, muhto máŋggat jáhkke stáhtaválddi bastit buorebut mearridit dilis.

Sámegielddain Eanodaga gieldda hálddahuslaš rektor Riitta Peltovuoma mielas gáiddusoahpahusa gánnáhivččii joatkit loahppagiđa. Jos ráđđehus goittotge mearrida joatkit lagašoahpahusa, leat gielddas dasa gergosat johtilit.

Anára gieldda čuvgehushoavda Ilkka Korhonen ii váldde beali dasa, gánnáhago gáiddusoahpahusa joatkit giđa lohppii.

– Stáhtaváldi mearrida áššis, dat gullá sin bargguide. Stáhtaváldi maiddái vihke iešguđege doaimma ávkkiid ja hehttehusaid.

Ráđđehusas vuordit hohpolaš mearrádusaid lagašoahpahussii sirdáseamis skuvllain. Ráđđehus gieđahallá ráddjehusaid váikkuhusaid virusa leavvamii odne gaskavahku.

Suoma ráđđehusa dálá linnjema mielde gáiddusoahpahus joatkašuvvá 13. miessemánu rádjái.

22.4. dii. 7.24 Yle grafihkat muitalit dilis iešguđege Davviriikkas

Davviriikkat leat válljen sierra strategiijaid dáistaleamis koronavirusa vuostá.

Dán áššis beasat lohkat suomagillii Yle veardádallama koronanjoammumiid, koronajámuid, dahkkojuvvon testemiid ja beaktilis divššus leahkki olbmuid mearis Suomas, Ruoŧas, Norggas, Dánmárkkus ja Islánddas.

Dieđuid lea háhkan ja čohkken álgoálggus Svenska Yle.

21.4. dii. 20:19 THL dutki árvala, ahte epidemiija vearrámus muttus leat beassan meattá

Koronadáhpáhusaid mearit leat njiedjamin iešguđet guovlluin Suomas, árvala Dearvvašvuođa ja buresveadjima lágádusa (THL) dutki.

– Min árvvoštallama mielde sáhttá lohkat, ahte alimus muddu lea meattá ja dál leat mannamin vulos guvlui, dadjá THL erenoamášdutki Simopekka Vänskä.

Árvalus vuođđuduvvá árvalussii, man mielde ráddjehusat bissot dálá dásis.

Vänskä mielde lohku, mii govvida dávdda njoammuma olbmos nubbái, lea šaddan unnibun. Njukčamánu einnostusas árvaledje, ahte lohku bázášii 1,6 sulaide. Dalle okta njomohallan olmmoš njoamuhivččii dávdda gaskamearalaččat 1,6 olbmui.

– Dál njoammumiid govvideaddji lohku, R0, lea ovttežis dahje dan vuolde, nappo njoammumiid mearri lea njiedjamin. Dat govvida dili dálá ráddjendoaimmaid ja kontávttaid áigge.

21.4. dii. 17.20 THL: Suomas oktiibuot 141 jápmán koronavirusa dagahan dávdii

Dearvvašvuođa ja buresveadjima lágádus THL muitala, ahte Suomas lea jápmán dál oktiibuot 141 olbmo koronavirusa dagahan dávdda dihte.

THL muitala, ahte ollislaš mearri lea olu eanet go ikte, dasgo HUS lea raporteren oaivegávpotguovllu boarrasiidsiiddaid dávdii laktaseaddji jápmimiid.

Buohcceviesus lea 202 ja beaktilis divššus 63 olbmo.

21.4. dii. 13.45 Lappis skuvlejit bargiid beaktilis dikšui

Lappi buohccedikšunbire skuvle jođánit bargiidis beaktilis dikšui koronavirusa dihte. Dikšobargiin sullii 60 skuvlejuvvo beaktilis dikšui ja dasa láktaseaddji bargguide.

Beaktilis divššu ossodaga jođiheaddji divššára mielde anestesiijadivššárat leat buorimus ámmátjoavku skuvlejupmái danin, go sidjiide leat oahppásat nu beaktilis divššu dálkasat go maiddái heahtedilis leahkki pasieanttaid dikšun čuohppansáles.

Mielde sii leat ožžon eará ossodagain bargiid, geat leat ovdal bargan beaktilis divššus.

Skuvlejupmái lea dahkkon skuvlenpakeahtta, mainna sii čađahit teoriijaskuvlejumiid ja barget oahppočájánasaid nu biergasiin go dálkásiinge.

21.4. dii. 13.06 Suomas dál badjel 4 000 koronavirusnjoammuma

Suomas lea dál sihkarastojuvvon 4 014 koronavirusnjoammuma, muitala Dearvvašvuođa ja buresveadjima lágádus THL. Ođđa njoammumat leat 146.

Ođđa sihkarastojuvvon njoammumiid mearri lea measta guovttegeardásaš ievttá ektui, go dalle dat ledje 85.

THL muitala dieđuid vejolaš ođđa jápmindáhpáhusain maŋŋelabbos odne. Vuossárgga dieđuid mielde Suomas leat jápmán korona dihte 98 olbmo. Loguin sáhttá goittotge váilot logit dáhpáhusat, mat leat dáhpáhuvvan boarrásiidsiiddain.

Gáldu: Yle - STT

21.4. dii. 7.38 THL muitalii stuorra koronalogus Ohcejogas, gielddas ii goittotge oktage dáhpáhus

Dearvvašvuođa ja buresveadjima lágádus THL almmustahttán kárttá lea imaštahttán Ohcejogas, muitala Uusi Suomi -aviisa. THL kárttá mielde Ohcejogas leat olu koronadáhpáhusat olmmošlogu ektui.

Sáhka ii leat THL koronakárttás masa beaiváduvvojit nannejuvvon njoammundáhpáhusat, baicce kárttás mii gávdno THL cealkámušas, mii guoskkai Uusimaa guovllu rahpama. Dán kárttás lea sáhka COVID-19-dáhpáhusain Suoma gielddain 14. cuoŋománu.

Ohcejoga gieldda gielddahoavda Vuokko Tieva-Niittyvuopio ja gieldda vástideaddji doavttir Heidi Eriksen lohkaba, ahte virus ii dihtto gielddas. THL dadjá, ahte kárttás ii leat feaila.

Kárttá dahkko olbmo ruovttugieldda mielde. Heidi Eriksen mielde dalle áidna vejolašvuohta lea, ahte korona lea gávnnahuvvon dakkár olbmos, geas lea ruovttugieldan Ohcejohka, muhto guhte ii goit oro gielddas.

Gáldu: Uusi Suomi

20.4. 19.38 Lappis leat ođđa njoammumat dušše Länsi-Pohja guovllus

Lappi buohccedikšunbire guovllus eai leat gávnnahan ođđa koronavirusnjoammumiid guovtti jándorii. Maŋimuš golbma njoammuma gávnnahedje lávvardaga, man maŋŋá njoammumat leamaš oktiibuot 88.

Länsi-Pohja buohccedikšunbires leat vahkuloahpa maŋŋá gávnnahan guokte ođđa njoammuma ovddežis oahpes njoammunbálgáin. Länsi-Pohjas njoammumat leat dál 83.

20.4. klo 16.05 THL: Suomas 85 ođđa njoammuma ja njeallje ođđa jápmima

Suomas leat dál oktiibuot 98 olbmo jápmán koronavirusa dagahan dávdii, muitala Dearvvašvuođa ja buresveadjima lágadus THL. Sotnabeaivvi loguin jápmán olbmuid mearri lea lassánan njeljiin. Loguin soitet goit váilut logit boarrásiidsiiddaid jápmimat. Helsset ja Uusimaa buohccedikšunbires dakkár jápmimat leat olles 50–60.

Suomas leat dál THL dieđuid mielde oktiibuot 3 868 sihkkaraston koronavirusnjoammuma. Ođđa njoammumat sotnabeaivve loguid ektui leat 85. Buohcceviessodivššus leat 209 olbmo ja beavttálmahtton divššus 67 olbmo.

Gáldu: STT-Yle

20.4. dii. 15.53 Anáris ja Ohcejogas koronavirusa testejit hui hearkkit, jus dasa lea dárbu

THL statistihkaid mielde Anára ja Ohcejoga gielddain eai leat duođaštuvvon koronavirusnjoammumat. Ohcejogas ja Anáris čájánasaid váldet, jus dávdamearkkat dihttojit ja virusis lea eahpádus.

Geavadis Ohcejogas leat nagodan testet buohkaid, geain leat veháge leamašan eahpádus koronavirusis. Ohcejoga vástideaddji doavttir Heidi Eriksen muitala, ahte dán rádjái sáhttá suorpmaiguin rehkenastit daid olbmuid meari, geaid leat testen.

Anára vástideaddji doavttir Outi Liisanantti muitala, ahte Anáris leat váldon dán rádjái oktiibuot 62 koronavirusteastta.

– Sáhtán gal ráfohit ja dadjat, ahte mis eai leat koronavirusnjoammumat. Maŋimus njoammumiinge lea gollán nu guhkes áigi, ahte dálá dilli lea optimálalaš ja sávan, ahte dat bissu maiddái dákkárin, dadjá Liisanantti.

Loga lási dáppe.

20.4. dii. 10.23 Deanu guolástanlobiid vuovdin maŋiduvvo

Deanu guolástanlobiid vuovdin maŋiduvvo koronavirusdili dihte. Vuovdin lei dárkkuhus álgit mánnodaga 20.4. Lappi EBI-guovddáža mielde lohpevuovdin álggahuvvo áramustá 11.5.

Koronavirusii laktáseaddji spiehkastatláhkaásaheapmi sáhttá vel rievdadit áigetávvala. EBI-guovddážis goittotge sávvet, ahte luosa bivddu Deanus beassat álggahit geassemánu álggus dego dábálaččat.

19.4. dii. 13.50 Suomas jápmán oktiibuot 94 olbmo koronavirusii

THL dieđuid mielde Suomas leat jápmán oktiibuot 94 olbmo koronavirusii sotnabeaivve rádjái. Ievttážis lohku lea sturron njeljiin. Loguin eai leat váldon vuhtii jápmimat, mat leat dáhpáhuvvan buohcceviesuid olggobealde.

Beavttálmahtton divššus leat dál 68 olbmo, dat lea guokte olbmo unnit go ikte lávvardaga.

19.4. dii. 12.00 Norga ráhkkana burgit ráddjehusaid juo vuossárgga

Norggas burgigohtet koronavirusa dihte biddjon ráddjehusaid. Earret eará beaiveruovttut rahppojuvvojit fas.

Boahtte vahkus olles riikkas rahpet maiddái vuolledási skuvllaid, vuoktačuhppiid bálvalusaid ja eará bálvalusaid, mat leat leamašan gitta njukčamánu beallemuttu rájes.

18.4. dii. 15.20 Suomas 90 olbmo jápmán koronavirusii

THL muittuha, ahte lohku ii muital buohcceviesuid olggobealde dáhpáhuvvan jápmimiin. THL dieđuid mielde beaktilis divššus leat dál 70 olbmo.

18.4. dii. 15.00 Lappi guovllus 10 ođđa koronanjoammuma

Davvin buohccedikšunbiriin leat measta seamma olu koronanjoammumat. Maŋimuš jándora áigge Lappi buohccedikšunbires leat gávnnahan golbma ođđa njoammuma. Njoammumat leat dál oktiibuot 88.

Länsi-Pohja buohccedikšunbires leat maŋimuš jándora áigge sihkkaraston 7 ođđa koronavirusnjoammuma. Dál njoammumat leat 80.

Lappi buohccedikšunbire infekšuvdnadoavttir Markku Broas muitala, ahte buot Lappi njoammumat laktásit mátkkošteapmái.

Lappis lea oktiibuot čieža gieldda, gos leat aŋkke vihtta koronavirusnjoammuma.

Lappi davimus osiin njoammumat leat dušše Gihttelis ja Kolaris.

17.4. dii. 17.30 Ohcejoga gielddas eai leat duođaštuvvon koronavirusnjoammumat

Ohcejoga gielda dieđiha, ahte gielddas eai leat duođaštuvvon koroanvirusdáhpáhusat.

Gielda čállá, ahte áššis leat boahtán gažaldagat, go Uusi Suomi -neahttasiiddus lea artihkal, mas čujuhuvvo Ohcejohkii gieldan, mas leat olu dáhpáhusat. Artihkkalis lea vuođđun THL kárta.

Gielda čállá, ahte kárttás lea goittotge feaila, go duođaštuvvon dáhpáhusat eai dál leat. Ohcejoga gielda čielggada ášši.

17.4. dii. 17.22 Olles Lappis dál 158 sihkarastojuvvon njoammuma

Lappi buohccedikšunbires leat gávdnon ievttáža maŋŋá golbma ođđa koronanjoammuma. Buohkanassii Lappi buohccedikšunbire guovllus leat gávnnahan 85 njoammuma.

Oarje-Lappi buohccedikšunbires ođđa njoammumat leat 11. Guovllus leat dieđus buohkanassii 73 koronavirusnjoammuma.

Nuba Lappis leat gávnnahan oktiibuot 158 koronavirusnjoammuma.

17.4. dii. 16.15 Suomas 82 olbmo jápmán koronavirusii

Koronavirusa dagahan dávdii leat Suomas jápmán oktiibuot 82 olbmo, muitala THL. Buohcceviesus divššus leat 208 olbmo, geain 73 leat beaktilis divššus.

17.4. dii. 15.30 Badjel bealli Lappi eanangotti fitnodagain ballá gártat heaittihit dahje geahpedit doaimma koronakriisa maŋŋá

Guhtta fitnodaga logis jáhkket iežaset gártat heaitit dahje aŋkke geahpedit doaimmaset koronakriisa maŋŋá Lappi eanangottis.

Vihtta proseantta fitnodagain jáhkká maid, ahte fitnodatdoaibma lea nohkan ollásit kriisa maŋŋá.

Dát dieđut bohtet ovdan Lappi fitnodatdoalliid Lapin Yrittäjät -searvvi ollašuhttin čielggadeamis. Áššis eanet dáppe.

Loga maid: Fitnodatdoallis jávke kundarat koronadili dihtii: goarrugođii máskkaid ja nu dahket máŋgasat dál – Ii leat virggálaš suodji, muhto sáhttá leat ávkin

17.4. dii. 12.20 Suomas 120 ođđa njoammuma

Suomas leat gávnnahan dál oktiibuot 3 489 koronavirusnjoammuma, muitala THL. Njoammumat leat dál 120 eanet go ikte duorastaga.

17.4. dii. 12.10 Norrbottenis Bealuštanfámuid ambulanšat veahkehit koronapasieanttaid fievrrideames

Norrbottenis koronapasieanttaid fievrrideapmái ožžot veahki Ruoŧa Bealuštanfámuin boahtte vuossárgga rájes.

Ruoŧa SVT muitala, ahte Luleås ja Bodenis golbma ambulanša bargoveagainis bohtet fuolahit pasieanttaid fievrrideames Haparanda ja Jiellevári birrasis.

Ambulanša vuoddjis lea dearvvašvuođasuorggi skuvlejupmi ja fievrridemiin lea álo mielde maid báikálaš vuosttašdivššu buohccedivššár.

Norrbottenis lea sihkarastojuvvon 167 koronanjoammuma. Mearri lea lokten vahkus 40 dáhpáhusain. 15 olbmo leat jápmán.

16.4. dii. 16.36 Oktiibuot 75 olbmo jápmán koronavirusa dagahan dávdii

Dearvvašvuođa ja buresveadjima lágádus raporterii duorastaga golmma ođđa koronavirusa dagahan jápmindáhpáhusas. Suomas dávdii leat dál jápmán oktiibuot 75 olbmo. Buohcceviesus divššus leat oktiibuot 215 olbmo, geain beaktilis divššus leat 76 olbmo.

THL mielde dávddas vejolaččat jo buorránan olbmot leat dálá meroštallama mielde aŋkke 1 700. Meroštallan vuođđuduvvá raporterejuvvon dáhpáhusaide, maid gávnnaheamis lea jo unnimustá guokte vahku iige dieđus leat eará čuovvundieđut mat laktásit dávdda ovdáneapmái.

Suomas leat duorastaga rádjái gávnnahuvvon oktiibuot 3 369 koronavirusnjoammuma.

.16.4. dii. 15.38 Lappi koronadilli orru ráfáiduvvamen

Lappi buohccedikšunbire guovllus eai leat boahtán dihtui ođđa njoammumat guovtti beaivái. Maŋimuš dáhpáhus gávnnahuvvui disdaga.

Lappi guovddášbuohcceviesu infekšuvdnadoavttir Markku Broas dadjá, ahte várra Lappi buohccedikšunbires ii leat koronavirus jođus álbmotdásis, go buot buohccámat leat laktásan čuoiganguovddážiidda ja daid leat bastán kártet.

16.4. dii. 12.29 Suomas dál 3 369 njoammuma

Suomas lea dál duođaštuvvon oktiibuot 3 369 sihkarastojuvvon koronavirusnjoammuma, muitala THL. Njoammumiid mearri lea 132 eambbo, go ikte.

Ođđa dáhpáhusain 95 duođaštuvvojedje Helssega ja Uusimaa buohccedikšunbire (HUS) guovllus. Njoammumat HUS guovllus leat dál 2 133.

Sihkarastojuvvon njoammumat leat dušše oassi buot njoammumiin, dasgo dušše oassi eahpádusain testejuvvo. Koronavirustestemat leat dahkkon dál sullii 49 700.

THL muitala ođđa jámuid birra maŋŋelabbos odne. Ikte gaskavahku koronavirusjámut ledje Suomas oktiibuot 72.

Gáldu: STT-Yle

15.4. dii. 9.57 Festiválaid oasil mearrádus cuoŋománu áigge

Stáhtaministtar Sanna Marin (sd.) mielde stuorra festiválaid dahje geassedáhpáhusaid lágideamis dahkojuvvo mearrádus vel cuoŋománu áigge. Marin muitalii áššis Yle aamu -prográmma jearahallamis. Marin mielde ráđđehus gullá boahtte vahkus vuosttaš árvalusaid das, ahte mii livčče rivttes áigi ja ordnet ráddjendoaimmaid heaittimii.

Suoma Sámi stuorámus eamiálbmotmusihkkadáhpáhusa, Ijahis ija, festiválajođiheaddji Oula Guttorm muitalii maŋŋebárgga, ahte sii jotket festivála plánema eahpesihkkaris dilis fuolakeahttá ja almmuhit maŋŋelabbos das, ordnejitgo festivála borgemánus.

15.4. dii. 19.56 THL: Koronavirustestema lasihit ain

Dearvvašvuođa ja buresveadjima lágádus THL háliida lasihit buohccedikšunbiriid sihke guovddáš sosiála- ja dearvvašvuođafuolahusa doaibmiid čájánasaidváldin- testen- ja njoammumiid guorrama kapasitehta.

Dál laboratoriijat bastet dutkat badjel 4 000 čájánasa beaivvis.

THL dahkan beaiváduvvon rávvaga mielde testemii galggašii dás ovddos guvlui rávvet buot pasieanttaid, geain leat koronavirusinfekšuvdnii laktáseaddji dávdamearkkat dahje doaktára árvvoštallama vuođul eahpidit koronavirusnjoammuma. Testemii rávvet maiddái ovdamearkka dihte sosiála- ja dearvvašvuođafuolahusa suorggi bargiid ja krihtalaš surggiid bargiid, jos sis eahpidit njoammuma.

15.4. dii. 17.54 Máilmmis badjel 2 miljon koronavirusnjoammuma – njoammumiid mearri lassánii miljovnnain guovtti vahkus

Máilmmis leat raporteren buohkanassii badjel guokte miljon koronavirusnjoammuma. Njoammunrehkenastimiid dahket earet eará ođasdoaimmahat Reuters, ođasdoaimmahat AFP ja amerihkálaš Johns Hopkins -universitehta. Buot golmma mielde njoammumiid mearri lea dál badjel guokte miljovnna.

Koronavirusa dagahan dávdii leat jápmán gaskavahkkoeahkeda rádjái Johns Hopkins -universitehta statistihkaidmielde sulaid 128 000 olbmo.

Eanemusat olbmot leat jápmán dávdii Amerihkás, gos badjelaš 26 000 olbmo leat jápmán ja badjel 600 000 olbmos lea njoammun. Amerihká maŋŋel eanemus japmimat leat leamaš Itálias, Espánnjas, Fránskkas ja Británnias.

Dan maŋŋá go dávda leavvagođii Kiinná Wuhanis, bisttii 83 beaivvi ovdal go njoammumiid mearri manai badjel miljovnna. Dan maŋŋá bisttii dušše guokte vahku dasa, ahte dávdadáhpáhusat ledje guokte miljovnna.

Gáldut: Reuters, AFP

15.4. dii. 17.32 Suomas 72 olbmo jápmán koronavirusii

THL dieđuid mielde Suomas koronavirusii leat jápmán 72 olbmo. Buohcceviesus leat divššus 226 olbmo, geain 75 leat beaktilis divššus.

15.4. dii. 17.00 Davvi buohccedikšunbirein eai jáhke Uusimaa rájáid rahpama lasihit koronavirusa leavvama Lappii

Sihke Lappi buohccedikšunbire infekšuvdnadoavttir Markku Broas ja Oarje-Lappi buohccedikšunbire jođiheaddji bajitdoavttir Jyri J. Taskila árvvoštallaba, ahte Uusima rájá rahpaseamis eai leat stuorra váikkuhusat dasa, mo epidemiija leavvá davvin.

Buohccedikšunbiriin deattuhit, ahte čoahkkananráddjehusat ja ávžžuhus vealtit mátkkošteami leat ain fámus. Stuorra olmmošjoavkkuid eai leat vuordimen Lappii maiddáige danin, go čuoiganguovddážat leat gitta.

15.4. dii. 16.53 Soađegili filbmafestivála sirdása dán jagi nehttii

Soađegili filbmafestivála Midnight Sun Film Festival ollašuhtto koronavirusdili dihte virtuálalaččat neahtas.

– Festivála ii šluhttejuvvo iige sirdojuvvo, dat rievdada hámi. Maŋimuš njealje vahku leat plánen sihke árbevirolaš festivála ja molssaevttolaš ollašuhttindábiid, muitala filbmafestivála dieđiheaddji Saija Holm.

Dán gease lei dárkkuhus ávvudit festivála 35-jagi ávvudoaluid, muhto dál ávvufestivála lea mearriduvvon ordnet geasset 2021.

15.4. dii. 13.02 THL: Suomas 76 ođđa njoammuma

Dearvvašvuođa ja buresveadjima lágádus THL mielde Suomas leat dál 3 237 laboratorias sihkarastojuvvon koronavirusnjoammuma. Njoammumiid mearri lea sturron ikte almmuhuvvon loguin 76 dáhpáhusain.

15.4. dii. 11.18 Uusimaa sirren nohká odne

Ráđđehus almmuhii, ahte Uusimaa eanangotti sirremii eai leat šat vuoigatvuođalaš ákkat.

Stáhtaministtar Sanna Marin deattuha, ahte ráđđehus ávžžuha garvit eaktodáhtolaš mátkošteami.

– Dál ii leat rivttes áigi vuolgit stohpui, dadjá Marin.

15.4. dii. 8.32 Ráđđehus muitala diibmu 10 Uusimaa sirrema joatkagis

Ráđđehus ordne odne diibmu 10.00 dieđihandilálašvuođa koronavirusepidemiija leavváma easttadeapmái asáhuvvon Uusimaa johttinráddjehusa birra. Dilálašvuođas leat mielde stáhtaministtar Sanna Marin, sisministtar Maria Ohisalo ja riekteministtar Anna-Maja Henriksson.

Báikki alde leat maiddái sosiála- ja dearvvašvuođaministeriija strategiijahoavda Liisa-Maria Voipio-Pulkki, Dearvvašvuođa ja buresveadjima lágádusa THL hoavda Mika Salminen ja riekteministeriija kansliijahoavda Pekka Timonen.

Yle čájeha info njuolggosáddagin Areenas ja TV1:žis.

15.4. dii. 7.46 Ráđđehus galggašii odne almmuhit das, maid sii leat mearridan Uusimaa sirremis

Suoma ráđđehus heittii ráđđádallamiiddis Uusimaa sirrema birra ikte maŋiteahkedis. Yle dieđuid mielde ráđđádallamiin sohpojuvvon áššiin muitalit odne gaskavahku dárkilut.

Joatkamearrádusa haga Uusimaa sirren nogašii maŋimuštá 19. cuoŋománu nappo dán vahku sotnabeaivve. Yle dieđuid mielde eiseválddit eai evttot sirrema joatkima.

14.4. dii 19.47 Anára gieldda korona-doarjagat priváhta fitnodatdoalliide dál ohcanláhkái

Anára gielda lea rahpan priváhta fitnodatdoalliid korona-doarjaga ohcama odne. Doarjaga maŋimus ohcanbeaivi lea 31.8.2020.

Priváhta fitnodatdoalliid korona-doarjagiid juolludit boahtinortnegis. Doarjaga stuorámus supmi lea 2 000 euro.

Dohkkehuvvon doarjjamearrádus boahtá máksimii sulaid guovtti beaivvi siste mearrádusa dahkamis, ja hilgojuvvon mearrádus boahtá ohcci dihtui virgehálddašeaddjimearrádussan.

Ohcanskovi ja rávvagiid gávnnat Anára gieldda neahttasiidduin.

14.4. dii. 17.27 Suomas koronavirusii jápmán 64 olbmo

Dearvvašvuođa ja buresveadjima lágádusa THL varrasamos loguid mielde Suomas koronavirusii leat jápmán 64 olbmo. Buohcceviesus divššus leat 232 olbmo, geain 75 leat beaktilis divššus.

14.4. dii. 13.51 Beassážat bukte Lappii measta 40 ođđa koronanjoammuma

Lappis leat gávnnahan dál oktiibuot 136 sihkarastojuvvon koronavirusnjoammuma. Beassážiid áigge ođđa njoammumiid čálle bajás Lappi ja Oarje-Lappi buohccedikšunbire guovlluin guktuin 19 dáhpáhusa, nappo oktiibuot 38 ođđa njoammuma. Lappi buohccedikšunbires njoammumat leat mánnodaga dieđuid vuođul 82 ja Oarje-Lappis 54.

Eanemus njoammumat lohkomeari dáfus leat Gihttelis, oktiibuot 36. Lappi guovddášbuohcceviesu infekšuvdnadoaktára Markku Broas mielde loguin leat mielde sihke báikegoddelaččaid ja eará sajis virggálaččat ássi olbmuid, ovdamearkka dihte sesoŋŋabargiid, njoammumat.

14.4. dii. 13.01 Oahpahusa ordnejeaddjiin ávžžuhus skuvllas geargan olbmuid ávvudoaluid ordnemii

Oahpahusa ordnejeaddjit leat addán oahppolágádusaide ávžžuhusa das, mo doallat ávvudoaluid logahaga studeanttaide ja ámmáhii válmmaštuvvan olbmuide dán giđa. Ávžžuhusa mielde oahppolágádusat doaimmahit duođaštusaid skuvllas válmmaštuvvan olbmuide boastta bokte. Báikálaš dili mielde sáhttá ávvudoaluid ordnet gáiddusoktavuođaiguin lávvordaga 30. miessemánu.

Oahppolágádusat ordnejit maŋŋelabbos oktasaš ávvudilálašvuođa válmmaštuvvan olbmuide. Logahaga studeanttaid doaluid ávvubeaivin ávžžuhuvvo juogo bearjadaga 28. borgemánu dahje lávvordaga 29. borgemánu, jus doaluid lea dalle juo dorvvolaš doallat. Doalut ordnejuvvojit maid ámmáhii válmmaštuvvan olbmuide.

14.4. dii. 12.24 Lappis virgeolbmuid dihtui boahtán rihkkumušat: "Karantena dáhtul rihkkun dagaha eará olbmuide váralaš dili"

Virgeoapmahaččaid gearggusvuohta nu koronavirusepidemiijai vástideapmái go giđđadulvviide lea buorre, muitala Lappi guovlohálddahusvirgedoaimmahat.

Lappi válmmašvuođadoaibmagoddi giitá lappilaččaid buot doaimmaid ovddas maŋimuš vahkuid áigge, mat leat dahkkon eastadandihte koronavirusa leavváma. Áššis muitala Lappi guovlohálddahusvirgedoaimmahat dieđáhusastis.

Virgeolbmuid dihtui leat goittotge boahtán karantenamearrádusaid rihkkumušat.

– Lea dehálaš, ahte addojuvvon karantenamearrádusat čuvvojuvvojit dárkilit. Karantena dáhtul rihkkun dagaha eará olbmuide váralaš dili, muittuha Lappi guovlohálddahusvirgedoaimmahaga bajimuš hoavda Kaisa Ainasoja.

Lappilaš doaibmit leat ráhkkanan doarjut nuppiideaset koronaepidemiija ovdánettiin ja vejolaš dulveáitaga ollašuvadettiin. Sis lea maid gielddaiguin nana ovttasbargu.

Gáldu: Lappi guovlohálddahusvirgedoaimmahat

14.4. dii. 12.04 THL: 97 ođđa njoammuma Suomas

Dearvvašvuođa ja buresveadjima lágádusa (THL) mielde Suomas leat oktiibuot 3 161 koronavirusnjoammuma. Ođđa njoammumat leat 97.

14.4. dii. 11.10 Gáldu ráđđehusas Ylei: Uusimaa sirremii ii evttohuvvo joatkaga

Sosiála- ja dearvvašvuođaministeriija ja Dearvvašvuođa ja buresveadjima lágádus (THL) eai evttot Uusimaa sirrema joatkima, muitala gáldu ráđđehusas Ylei.

Ákkan dasa lea Yle ožžon dieđuid mielde dat, ahte njoammundilli Uusimaas ii leat šat mearkkašahttiláhkái garraseabbo, go eará guovlluin Suomas, gos njoammumat leat olu.

Uusimaa eanangoddi lea sirrejuvvon dán vahku sotnabeaivve, nappo 19.4. rádjái.

14.4. dii. 9.44 22 sáhkohalle ikte gearggusvuođalága rihkkumis Uusimaa rájis

Boles mearridii 196 fievrru jorggihit Uusimaa eanangotti rájis ievttá áigge. 22 sáhkohalle gearggusvuođalága rihkkumis, Helssega bolesa dieđahusas muitalit. Oktiibuot bolesa dárkkistanbáikái bohte 13 743 fievrru.

Togain boles dárkkistii ikte oktiibuot 663 olbmo mátkki siva. Njeallje mátkošteaddji galge máhccat, muhto oktage ii sáhkohallon.

Gáldu: STT

14.4. dii. 8.13 Ávvir: Olmmoš buohccedivššus Girkonjárggas koronavirusa dihte

Girkonjárgga buohcceviesus lea dál olbmos duođaštuvvon koronavirus. Olmmoš leamašan divššus olles beassážiid.

Olmmoš lea dál nubbi Finnmárkkus buohcceviesus, guhte oažžu divššu koronavirusa dagahan dávdda dihte.

Áššis muitala Ávvir.

14.4. dii. 6.12 Máilmmis badjel guokte miljovnna koronanjoammuma

Máilmmis lea dál duođaštuvvon badjel guokte miljovnna koronavirusnjoammuma, muitalit Johns Hopkins -universitehta statistihkat. Koronavirusa dagahan dávdii lea olles máilmmis jápmán goasii 120 000 olbmo.

13.4. dii. 15.08 Suomas 59 koronajámu ja Lappis dál badjel čuođi njoammuma

Lappis leat badjel 100 koronanjoammuma. THL ođđa loguid mielde njoammumat leat Roavenjárggas 19, Kolaris 11, Gihttelis 25, Durtnosis 21, Giemas 23 ja Keminmaas 5 koronanjoammuma.

Dássážii Suomas leat jápmán koronavirusa dihte 59 olbmo. Sin gaskaahki leamašan 81 jagi.

Suomas lea binná geahppánan sin mearri, geat dárbbašit beaktilisdivššu dahje leat buohcceviesus divššus.

13.4. dii. 12.42 Suomas 90 ođđa koronanjoammuma

Suoma dearvvašvuođa- ja buresveadjinlágádus THL mielde Suomas leat dál 3064 koronanjoammuma, maid leat sihkkarastán laboratoriočájánasain. Njoammumiid mearri lea lassánan ievttážis 90:n.

Eanemus njoammumat leat Helsset ja Uusimaa buohccedikšunbires.

13.4 dii. 9.17 Beaktilisdivššus návccaiduvvá 1–3 vahkus – jápmin lea ráfálaš, muitala beaktilisdiššu bajitdoavttir

Jus gártá beaktilisdikšui koronanjoammuma dihte, olbmo dikšot seammaláhkai, go earáidge, geat gillájit vuoigŋanváttisvuođain dahje lahppaseamis. Áidna erohus lea divššariid suodjegárvvut, muitala Tampere universitehta buohcceviesu beaktilisdivššu bajimus doavttir Sari Karlsson.

Eanaš oassi koronabuohcciin ohcalit beaktilisdikšui namalassii dan dihte, go eai šat sáhte vuoigŋat albmaláhkai. Stuorra oassi sis dárbbaša vuoigŋanmašiinna.

– Návccaiduvvan bistá guhkká. Dávjá koronabuohcci ferte leat beaktilisdivššus 1-3 vahku, dadjá Karlsson.

Jus olmmoš jápmá beaktilisdivššu áigge, jápmin lea dábálaččat hui ráfálaš. Buohccit jápmet dávjá dieđuhisdilis. Dan seammá leat duođaštan maiddái eará riikkain, muitala Karlsson.

13.4. dii. 8.56 Olmmošlogu ektui Gihttelis leat eanemus njoammumat

Vaikko stuorra gávpogiin leat mearálaččat eanemus koronanjoammumat, de olmmošlogu ektui eanemus njoammumat leat Gihttelis. Doppe leat 25 koronanjoammuma. Dat dárkkuha 387 njoammuma 100 000 olbmo ala.

THL almmustahttá dieđuid koronanjoammumiin dieđuid dalle, jus gielddas leat badjel vihtta sihkkarastojuvvon njoammuma. Sotnabeaivve Suomas ledje 69 gieldda, main leat badjel vihtta sihkkarastojuvvon koronanjoammuma.

12.4. dii. 15.03 Beassášbasit jáhkkimis váikkuhit ođđa njoammumiid mearrái

Ođđa laboratoriain sihkkarastojuvvon njoammumat leat oalle unnán go veardida ovddit beivviid loguide. Sotnabeaivve rádjai ledje sihkkarastán 69 ođđa njoammuma. Lávvardaga njoammumat ledje 136. Suoma dearvvašvuođa- ja buresveadjinlágádus THL almmustahttá beaivválaččat ođđa statistihkaid, mat čájehit ovddet beaivve loguid.

Otná loguide váikkuha jáhkkimis dat, ahte basiid áigge olbmot eai vealttekeahttá ohcal dearvvašvuođabálvalusaide, árvala THL infekšuvdnadávddaid ja boahkuhusaid bajitdoavttir Hanna Nohynek.

– Mii diehtit buot golgodávddain, ahte basiid áigge logut njidjet, lohká Nohynek.

Nohynek mielde áššái sáhttá váikkuhit maiddái dat, ahte diehtojuohkin laboratoriaid ja njoammudávdaregister gaskkas sáhttá leat njoazit basiid áigge.

– In jáhke, ahte infekšuvnnaid duođalaš mearri livčče geahppáneamen, dadjá bajitdoavttir Hanna Nohynek.

12.4. dii. 13.57 Čieža ođđa jámu Suomas – Eurohpás jápmán juo badjel 75 000 olbmo

Koronavirusa dagahan infekšuvdnadávdii jápme jándora áigge čiežas. Dál dasa leat jápmán Suomas dál oktiibuot 56 olbmo, muitala THL.

Buohcceviesuin dikšot dál 235 olbmo, geain 77 leat beavttálmahttojuvvon divššus. Máŋggat buohccevissui gártan pasieanttat leat maiddái beassan juo ruoktot.

THL mielde riska njomohallat leat badjánan olles riikkas.

Eurohpás leat jápmán oktiibuot 75 011 olbmo koronavirusa dagahan dávdii, muitala AFP-ođasdoaimmahus. 80 proseanta jámuin leat Itálias, Espánnjas ja Stuorra-Británnias.

12.4. dii. 12.22 Suomas 2974 njoammuma, ođđa njoammumat 69

Dearvvašvuođa- ja buresveadjinlágádus THL mielde Suomas leat duođaštuvvon 2974 koronanjoammuma. Njoammumat leat lassánan lávvardagas 69:n.

Eanemusat njoammumat leat 50-59 ahkásaččain. Eanaš oassi njoammumiin leat ain Helsset ja Uusimaa buohccedikšunbires.

Davvi-Suomas eanemusat njoammumat leat Mearra-Lappis, Kemi guovllus.

12.4. dii. 11.25 Stuora kiinnálaš fitnodat doaimmaha eambo suodjegálvvuid Supmii

Hengan International -nammasaš kiinnálaš fitnodat muitala, ahte nubbi suodjegálvoearri man Suoma fuolahansihkkarvuođaguovddáš lea diŋgon, ollešii Supmii boahtte vahkus.

Fitnodaga dieđáhusas dadjo, ahte fuolahansihkkarvuođaguovddáš lea oasttán sis “dálkkasdieđalaš doaimmaide heivvolaš sujiid”, mat leat Kiinná standárddaid mielde ráhkaduvvon. Sin mielde Suoma kunddar lea dohkkehan ovddalgihtii sáddejuvvon čájánasaid.

Fitnodaga ovddasteaddji ii muital, man sturrosaš dahje man divrras earri lea boahtimin.

12.4. dii. 9.28 EU-kommišuvnna ságajođiheaddji: Vuorrasiid johtinráddjehusat sáhttet joatkašuvvat jagi lohppii

EU-kommišuvnna ságajođiheaddji Ursula von der Leyen muitala, ahte vuorrasut olbmuid johtinráddjehusaid soitet joatkkit jagi lohppii suodjalan dihte koronavirus njoammumis.

– Mii fertet ráddjet buot kontávttaid vuorrasiidda nu olu go vejolaš, dasgo boahkuhus ii vel leat, dadjá von der Leyen duiskalaš bláđđái.

Son mieđiha ahte dakkár ráddjehusat leat váddásat, muhto áššis lea sáhka eallimis ja jápmimis, oaivvilda son.

EU-kommišuvnna ságajođiheaddji mielde mánát ja nuorabut besset návddašit friijavuođas árabut go vuorrasut olbmot ja sii, geat gullet riskajovkui.

Son sávvá, ahte eurohpalaš laboratoriat gerget boahkuhusain ovdal dán jagi loahpa.

11.4. dii. 14.56 Beaktilis divššu báikkiid lasihit miehtá Suoma

Beaktilis divššu báikkiid áigut lasihit dál koronapandemiija dihte miehtá Suoma. Dál báikkit leat sullii 480.

Seammás buohcceviesut leat ráhkkaneamen dasa, ahte muhtin guovllus beaktilis divššu kapasitehta dievvá ja pasieanttaid leat ráhkkanan sirdit.

– Prinsihpas gosa beare, gos pasieanttaid lea vejolašvuohta dikšut. Jus friddja kapasitehta gávdno lagašguovlluin, dieđusge mannat dohko, muitala KYS ja Nuorta-Suoma universitehta anestesiologiija ja beaktilis divššu professor Matti Reinikainen.

Doaisttážii beaktilis divššu sajit leat olles Suomas rehkken bures, muhto koronaepidemiija ovdáneami čuvvot dárkilit. Koronadili dihte čohkejuvvon ovttasbargojoavku čuovvu beaktilis divššu dili olles Suomas.

11.4. dii. 14.25 Oktiibuot 49 koronavirusa dagahan jámu Suomas

Dearvvašvuođa ja buresveadjima lágádus THL mielde koronavirusa dihte Suomas lea jápmán dál 49 olbmo. Dat lea okta eanet, go ikte.

Jápmán olbmuid mediánaahki lea 81 jagi. Sis 40–59-jahkásaččat leat guokte, 60–79-jahkásaččat 11 ja badjel 80-jahkásaččat 22. Jápmán olbmuin 69 proseantta leat almmáiolbmot, 31 proseantta nissonolbmot.

Buohccedivššus lea 235 olbmo, geain beaktilis divššus 80.

Ovdal odne THL muitalii, ahte Suomas lea dál sihkarastojuvvon 2 905 njoammuma. Dáhpáhusain 1 816 lea duođaštuvvon Uusimaas ja Uusimaa dáhpáhusain 1 009 Helssegis.

Gáldu: THL

11.4. dii. 12.19 Suomas duođaštuvvon 136 ođđa koronavirusnjoammuma

THL varraseamos statistihkaid mielde Suomas lea duođaštuvvon dál oktiibuot 2 905 laboratorias sihkarastojuvvon koronavirusnjoammuma. Bearjadaga maŋŋá ođđa dáhpáhusat leat boahtán 136, go dalle ollislaš mearri lei 2 769.

11.4. dii. 12.15 Uusimaas ain olu dárbbašmeahttun ráji rasttildeamit

Uusimaas dárbbašmeahttun ráji rasttildemiid mearri bisui alla dásis.

Boles muitala dieđahusastis, ahte Uusimaa dárkkistanbáikkiide bohte bearjadaga goasii 11 500 biilla. Biillat eai lean seamma olu, go duorastaga, muhto boles gárttai dattege máhcahit measta seamma olu fievrruid.

Bearjadaga boles fertii máhcahit 266 fievrru. Duorastaga lohku lei 283 fievrru.

11.4. dii. 11.38 Amazona eamiálbmogii gullevaš nuorra gánda jápmán korona dihte

Brasilias Amazona guovllu čearddas 15-jahkásaš gánda lea jápmán koronavirusa dagahan dávdii.

Dál balletge, ahte virus álgá leavvat Amazona eamiálbmogiid gaskkas. Máŋggat čearddat ellet erremis ja olbmot doppe leatge hui hearkkit vieris dávddaide.

Brasilias leat árvalusaid vuođul sullii 800 000 eamiálbmotolbmo. Čearddat ja etnalaš joavkkut leat badjel 300. Brasilia media lea ovdal muitalan guovtti koronajámus eamiálbmogiid joavkkus.

Koronai jápmán gánda gulai yanomami-čerdii, mas leat sullii 27 000 olbmo. Son lei leamaš kontavttas máŋggain čeardda olbmuin ovdal dávdamearkkaid álgima.

Jáhkkimis gánda lea ožžon virusnjoammuma čeardda guovllus olbmuin, geat leat doppe lobi haga roggamin golli.

Badjel 200 miljuvnna ássi Brasilia lea Mátta-Amerihka stuorámus stáhta. Dán rádjái doppe lea duođaštuvvon sullii 20 000 virusnjoammuma ja badjel 1 000 jámu korona dihte. Brasilia lea testen olbmuid easkka unnán.

Gáldu: STT

11.4. dii. 10.56 Lappis oktiibuot badjel 100 koronavirusnjoammuma

Oarje-Lappi buohccedikšunbire guovllus lea dán rádjái sihkarastojuvvon oktiibuot 42 koronavirusdáhpáhusa. Bearjadahkii lohku lassánii guđain ja maŋimuš jandora áigge lea sihkarastojuvvon vel okta ođđa njoammun. Dasa lassin okta čájanas lea dárkkistananalysas rievdán negatiivalažžan, muitalit Oarje-Lappi guovddášbuohcceviesus.

Oktiibuot Lappis lea dál sihkarastojuvvon badjel 100 koronavirusnjoammuma. Lappi buohccedikšunbires lea sihkarastojuvvon aŋkke 63 njoammuma.

Lohku beaiváduvvo vel lávvordaga áigge.

11.4. dii. 9.46 Uusimaa sirrema eai leat plánemen joatkit

Stáhtaministtar Sanna Marin (sd.) muitala Ilta-Sanomat -aviisii, ahte ráđđehus ii leat válmmaštallamin joatkaga Uusimaa sirremii. Jus sirrema hálidivčče joatkit, galggašii evttohusa guođđit riikkabeivviide beassážiid maŋŋá.

Marin muitala, ahte johttima ráddjema gáibádus lea dat, ahte dat lea vealtameahttun. Jus koronavirusnjoammundilli ráfáiduvvá Uusimaa ja eará Suoma gaskas, ii johttima ráddjen šat leat vealtameahttun.

Njukčamánu loahpas álgán sirren galggašii joatkašuvvat 19. cuoŋománu nappo boahtte vahku sotnabeaivvi rádjái. Eará ráddjemiid eai áiggo heaitit, mii boahtá ovdán Marina jearahallamis.

– Vel ii leat dat áigi, ahte sáhtášeimmet burgit ráddjehusaid. Seammás, go mii dikšut krisa, mii bargat dainna, ahte beassat olggos krisas ja huksegoahtit servodaga ođđasit, Marin dadjá.

STT

10.4. dii. 15.12 Lappi eanangottis testejuvvon 1 006 olbmo

Otná statistihkaid mielde Lappi eanangottis koronavirusnjoammun lea testejuvvon 1 006 olbmos.

Uusimaa eanangottis leat bargan 19 901 koronavirusiskosa.

Geahča dáppe, man olu Suomas leat bargan koronavirusiskosiid.

Divvojuvvon 10.4. dii. 15.24: Sáhka lea koronavirustestemiin, iige njoammunmeriin, dego leimmet vuos čállán. Liŋkkas beassá oaidnit grafihka koronavirusiskosiin.

10.4. dii. 14.16 Guhtta ođđa jámu Suomas

Ođđa statistihkaid mielde koronavirusii lea jápmán Suomas dál oktiibuot 48 olbmo. Dat lea guhtta eanet, go ikte.

Koronavirusa dihte buohccedivššus leat 155 pasieantta, geain 81 beaktilis divššus.

10.4. dii. 12.24 Suomas 164 ođđa duođaštuvvon njoammuma

THL beaivádii aiddo ođđa dieđuid koronavirusnjoammumiid mearis Suomas. Dál Suomas lea duođaštuvvon oktiibuot 2 769 laboratoriijas sihkarastojuvvon njoammuma. Ođđa njoammumat leat 164, go duorastaga almmuhuvvon ollislaš mearri lei 2 605.

Dán rádjái duođaštuvvon njoammumiin 955 leat Helssegis, 275 Espoos ja 195 Vantaas.

10.4. dii. 12.09 Uusimaa rájis sáhkohalle ikte eambbo, go vuosttaš vahkus oktiibuot

Duorastaga 9.4. Uusimaa eanangodderájis bolesa dárkkistanbáikkiide bohte oktiibuot 45 604 fievrru. Dain 283 galge jorggihit ruovttoluotta. Ovccis sáhkohalle gearggusvuođalága rihkkumis. Togain jerre mátkki siva 832 mátkošteaddjis, geain 20 galge máhccat ja guovttis sáhkohalle gearggusvuođalága rihkkumis.

Sáhkohallon olbmot ledje oktiibuot 11, nappo bolesa mielde seamma olu go vuosttaš gozihanvahkus oktiibuot.

– Mii leimmet ráhkkanan dasa, ahte beassážat lasihit mátkošteame, mii ii leat vealtameahttun. Uusimaas ja Uusimaai mátkošteapmi lea duođaige gildojuvvon vealtameahttun siva haga, dadjá operašuvnna hoavda, bajitkomissár Jarkko Lehtinen Helssega bolesis.

Boles meroštallá juohke mátkkis sierra, leago dat vealtameahttun.

10.4. dii. 11.27 Koronaerren sáhttá lasihit veahkaválddi ruovttus

Koronavirusepidemiija geažil veahkaváldi ruovttus ja illásteapmi leat lassáneamen oppa máilmmis.

Ruovttuveahkaváldi ja illásteapmi lassánitge dávjá dalle, go leat ekonomalaččat váttis ja losses áiggit. Alaskalaš nissonorganisašuvdna váruha, ahte árktalaš guovlluin dilli sáhttá leat dál fuolastuhtti, go olbmot leat koronavirusepidemiija dihte ruovttuerremis.

– Árktalaš guovlluid gilit leat hirbmat isolerejuvvon ja doppe lea váttis fidnet veahkki, váruha Alaska Native Women’s Resource Center bajimus direktevra Tami Truett Jerue.

Gálddut: NRK Sápmi, Nunatsiaq News

10.4. dii. 10.52 Lappis jáhkket, ahte lagašguovlluide mátkošteapmi lassána

Lappi turisma boahtá rievdat olu koronakriisa maŋŋá. Áššedovdit ja fitnodatdoallit jáhkket, ahte lagašguovlluide mátkošteapmi lassána koronavirusepidemiija maŋŋá. Olbmot ohcalit ruovtturiikkas dorvvolaš mátkkoštanvugiid. Dasa lassin olbmuid válljejumiide váikkuhit olbmuid návccat golahit ruđa ja maid dat, mo girdinjohtolat álgá fas doaibmagoahtá. Lappi guovllu turismafitnodatdoalli mielas dasa gal gollá áiggi, ahte besset fas ruovttoluotta normáladillái.

10.4. dii. 9.17 ON váldočálli: COVID-19 lea uhki máilmmeráfái

Ovttastuvvan našuvnnaid váldočálli António Guterres váruhii duorastaga ON dorvvolašvuođaráđi das, ahte koronaviruspandemia uhkida riikkaidgaskasaš ráfi ja dorvvolašvuođa.

ON dorvvolašvuođaráđđi čoahkkanii duorastaga vuosttaš háve gieđahallat koronaviruspandemia.

Guterresa mielde koronavirusa dagahan COVID-19-pandemia sáhttá lasihit ovdamearkka dihte veahkaválddi, mii bealistis sáhttá unnidit riikkaid návccaid doaibmat dávdda leavváma vuostá.

Váldočálli oaidná pandemias máŋggalágán riskkaid. Dat sáhttá ovdamearkka dihte heajudit olbmuid luohttámuša almmolaš institušuvnnaide, lasihit ekonomiijalaš eahpediđolašvuođa ja politihkalaš riidduid.

Guterres ávžžuhii dorvvolašvuođaráđi miellahttoriikkaid ovttasbargat eastadandihte virusa leavváma. Son gohčodii pandemia "sohkabuolvva dáistaleapmin" ja garrasamos teastan ON:ii dan vuođđudeami maŋŋá.

Gáldu: AP

Varrasamosat

Muualla Yle.fi:ssä