Sápmi

Varraseamos dieđut koronavirusis: Doavttir árvala, ahte epidemiija sáhttá álgit Lappis jo boahtte vahkus, Suomas 13 jápmán koronavirusa dihte

Viruset är formad som en boll och har taggar som hjälper viruset att fästa sig.
Govva: Miro Johansson / Yle

Yle Sápmi beaiváda dán artihkkalii varraseamos dieđuid koronavirusa dagahan dilis eandalit davvin.

Koronarávvagat-24-03-2020
Govva: Matti Kurkela / Yle

30.3. dii 19.52 Boles: Uusimaa rájáin dárkkistuvvon sulaid 24 000 fievrru

Uusimaa rájáin lea mánnodaga dárkkistuvvon 23 791 fievrru diibmu 9.00–18.00 gaskasaš áigge, dieđiha Boles.Dain 132 leat gártán máhcahit ruovttoluotta. Gearggusvuođalágá rihkkumis ii leat addon sáhkut.

Togamátkkošteaddjit leat leamaš 435, ja sis vihtta leat máhcahuvvon ruovttoluotta.

30.3. dii. 19.02 Sameradion ja SVT Sápmi: Giddejuvvon ráját váttásmahttet boazodoalliid dili Ruoŧas

Könkämä čearu boazodoalliin leat bohccot Golmma váldegotti rádjemearkka birra. Vai sii besset dohko, galget sii vuodjit dohko Suoma bokte Gárasavvonis. Dál giddejuvvon rádji lea dagahan váttisvuođaid, go boazodoallit eai beasa Supmii, muitala Sameradion ja SVT Sápmi.

– Lean leamaš dáppe badjin ovcci beaivvi. Bensiidna ja dávvirat leat nohkagoahtán, muhto in duostta mannat ruoktot, go dalle in várra máhca ruovttoluotta, dadjá Könkämä čearu boazodoalli Raymond Vasara.

– Ipmirdan áigumuša geahpedit njoammumiid leavvama. Muhto mii biepmat bohccuid dáppe, eat sáhte dušše heaitit dan. Mis lea ovddasvástádus fuolahit bohccuin, Vasara joatká.

Guokte čearu leat fuolas dán áššis, Könkämä čearru ja Lainiovuoma čearru. Sii vurdet dieđuid Suoma rádjegozáhusas. Ruoŧa Sámiid Riikkasearvi SSR bargá áššiin ja guktuid riikkaid ministeriijat leat ságastallame áššis.

– Boazodoalliid gusket seamma njuolggadusat go buohkaid earáidge Stáhtaráđi mearrádusa mielde bargomátkkit rájá rastá leat dohkálaččat, jos dat lea vealtemeahttun, muitala Antti Saarinen Lappi rádjegozáhusas.

– Bargu galgá leat aivve vealtemeahttun, dat lea mátkki dohkkeheami vuođđogáibádus. Meroštallan das, divvetgo dárbbašlaš johtingáibádusat rájá rasttildeamis rádjerasttildanbáikkiin, dahkat báikki alde ja dasa gáibidit muhtinlágán duođaštusa, Saarinen muitala.

30.3. dii. 17.40 Doaktára árvalus: Epidemiija álgá Lappis kánske boahtte vahkus

Koronavirus ii leat vel Lappis ovdánan epidemiijan. Dassážii njoammumiid leat bastán guorrat sihke Lappi ja Oarje-Lappi buohccedikšunbiriin. Lappi buohccedikšunbire guovllus ođđa njoammumiid gávnnahit moadde njoammuma beaivvis, muitala Lappi buohccedikšunbire jođiheaddji bajitdoavttir Jukka Mattila. Son árvala, ahte epidemiija Lappis sáhttá álgit jo boahtte vahkus.

Lappi buohccedikšunbires lea gávnnahuvvon aŋkke 18 njoammuma ja Oarje-Lappi guovllus čieža njoammuma.

Lappi guovddášbuohcceviesus lea okta olmmoš beaktilis divššus, ja Oarje-Lappis beaktilis divššu eai leat vel dárbbašan.

30.3. dii. 16.47 Rádjerávvema koordináhtor: "Dearvvašvuođafuolahus Ruoŧa rájás hedjona, jos dát olbmot eai beasa šat bargui"

Bargomátkejohtolaga bisseheapmi Suoma oarjerájás ii leat ovttačilggolaš. Ášši loktanii ovdan, go vahkkoloahpas bohte ovdan eahpádusat koronavirusa leavvamis Ruoŧas Supmii.

Doaktáratge leat ráji giddemis sierra oaivilis. Lappi buohccedikšunbire infektiodoavttir Markku Broas háliidivččii ráddjet bargomátkejohtolaga, su hoavda, jođiheaddji bajitdoavttir Jukka Mattila fas ii dán muttus ane buorre jurddan oarjeráji ollislaš giddema.

Mattila ja Davvikalohta rádjerávvema koordináhtor Päivi Koivupalo muittuheaba, ahte Ruoŧa bealde johtet olu suopmelaččat dikšunsuorggi olbmot barggus.

– Dearvvašvuođafuolahus Ruoŧa rájás hedjona, jos dát olbmot eai beasa šat rájá badjel bargui, árvala Koivupalo.

Koivupalo árvala, ahte Suoma ja Ruoŧa ráji rastá johtet beaivválaččat barggus juobe sulaid 3 000 olbmo.

Loga eanet áššis suomagillii dáppe.

30.3. dii. 15.54 Ruotas koronavirusii jápmán olbmuid mearri stuorui measta 40:in

Ruoŧas koronavirusii leat jápmán oktiibuot 146 olbmo. Mánnodaga jápmán olbmuid meari muitaledje sturron 36 olbmuin. Buohkanassii Ruoŧas lea gávnnahuvvon koronavirusnjoammun badjel 4 000 olbmos. Beaktilis divššus leat badjel 300 olbmo.

Eanaš oassi jápmán olbmuin, 65, leat leamaš badjel 80-jahkásaččat. Okta jápmán olmmoš lea leamaš vuollel 50-jahkásaš. Dagens Nyheter dieđuid mielde sáhka lea 26-jahkásaš nissonis.

Ruoŧa jođiheaddji epidemiologa Anders Tegnell muitalii dieđihandilálašvuođas, ahte vearrát buohccán olbmuid joavkkus leat čielgasit eanet albmát go nissonat, muhto son ii bastte attit dasa ovttačilggolaš siva.

30.3. dii. 15.22 Suomas dál oktiibuot 13 jápmima – beaktilis divššus 49 olbmo

Suomas lea gávnnahuvvon 13 koronavirusnjoammuma dagahan jápmima, muitala Dearvvašvuođa ja buresveadjima lágádus THL. Jápmán olbmuin 10 leat leamašan Helssega universitehtalaš guovddášbuohcceviesu dikšunguovllus, okta Kuopio universitehtalaš buohcceviesu dikšunguovllus, okta Oulu universitehtalaš buohcceviesu dikšunguovllus ja okta Tampere universitehtalaš buohcceviesu dikšunguovllus.

Suomas divššu buohcceviesus koronavirusa dihte dárbbašit dál 143 olbmo. Beaktilis divššus leat 49 pasieantta. Oktiibuot Suomas leat gávnnahan dán rádjái 1 313 laboratorias nannejuvvon njoammuma.

30.3. dii. 14.47 EBI-guovddážat ruhtadišgohtet smávva fitnodagaid koronavirusa dagahan spiehkastatdilis

Ealáhus-, johtolat- ja birasguovddážat leat ožžon lassiruhtadeami vai sáhttet mieđihit ovddidandoarjagiid smávva fitnodagaide, mat gillájit koronavirusepidemiija dagahan spiehkastatdilis.

EBI-guovddážat ruhtadit dán dilis fitnodagaid, main leat eanemustá vihtta bargi. Priváhta fitnodatdoalliide leat válmmaštallamin sierra doarjjaortnega.

Ruhtadeami sáhttet mieđihit smávva fitnodagaide buot surggiin earret eana-, vuovde- ja guolledoalu fitnodagaide ja fitnodagaide, mat ráhkadit eanadoalu ovddosdikšunbuktagiid.

Ruhtadeapmi lea dárkkuhuvvon fitnodagaide, maid doaimma koronavirus hehtte dahje sáhttá hehttet gaskaboddosaččat, ja maid árvalit muđui birget boahttevuođas.

Fitnodagat sáhttet ohcat ruhtadeami maŋŋebárgga 31.3. rájes EBI-guovddáža neahttasiiddus.

30.3. dii. 14.30 Li Andersson: Anan jáhkehahttin, ahte skuvllat leat gitta guhkit áigge

Oahpahusministtar Li Andersson (gurut) dajai Säätytalo olggobealde doaimmaheaddjiide, ahte son atná jáhkehahttin, ahte skuvllaid uvssat bisošedje gitta vel 13.4. maŋŋáge. Álgoálggus duođain mearrádussan lei, ahte 13.4. maŋŋá skuvllaide sáhtášii fas mannat gáiddusoahpahusáigodaga maŋŋá.

Suoma ráđđehus gieđahallá otne čoahkkimisttis earet eará skuvllaid, girjerádjosiid ja eará almmolaš sajiid guoskevaš ráddjehusaid áigetávvaliid vejolaš guhkidemiid.

30.3. dii. 12.21 Suomas sihkkaraston njoammumat jo oktiibuot badjel 1 300

Dearvvašvuođa ja buresveadjima lágádusa THL mielde Suomas leat dál 1 313 laboratorias nannejuvvon koronavirusnjoammuma. Ikte dáhpáhusat ledje 1 218, nuba njoammumiid mearri stuorui 95:in jándoris.

Duohtavuođas njoammumat leat olu eanet, go buohkat geain leat dávdamearkkat, eai testejuvvo. Dan lassin oasis koronavirusii buohccán olbmuin ii leat dávdamearkkat.

30.3. dii. 11.00 Oaivegávpotguovllus 42 ođđa njoammuma

Helssega ja Uusimaa buohccedikšunbire (HUS) guovllus gávnnahedje sotnabeaivve 42 ođđa koronavirusnjoammuma. Dál guovllus leat sihkkarastán oktiibuot 782 njoammuma. Lávvarada ođđa njoammumat oaivegávpotguovllus ledje 39.

30.3. dii. 7.48 Guđa kilomehtera guhkkosaš biilaráiddut Uusimaa rájis – vuosttaš bargobeaivi sirrema maŋŋá

Bargojohtolat lea álgán vuosttaš árgabeaivve Uusimaa eanangotti sirrema maŋŋá.

Boles ávžžuha olbmuid ráhkkanit dasa, ahte váldogeainnuid alde lea bahkkehallan. Dárkkistusat leat geainnuid lassin maid togain ja linnjábiillain.

Uusimaa sirrejuvvui eará Suomas lávvordaga. Ráddjehusain geahččalit njoahcudit koronavirusa leavváma.

Yle dieđuid mielde áŋkke ovtta geainnu alde, Uusimaa ja Päijät-Häme rájis ledje juo guhkes biilaráiddut iđđes diibmu 6.30. Itä-Uusimaa bolesa bajitkomissár Timo Leppälä muitalii báikki alde Ylei, ahte ráidu lei sullii guđa kilomehtera guhkkosaš. Son árvalii, ahte dárkistanbáikkis olbmuin manná sullii diibmobeali.

30.3. dii. 7.27 Eanodaga gielda dieđiha bálvalusaid doaibmamis odne

Eanodaga gielda doallá dieđihandilálašvuođa gieldda YouTube-kanálas. Dieđihandilálašvuođas gieđahallet dan mot gieldda bálvalusat doibmet spiehkastatdilis.

Dieđihandilálašvuohta álgá odne vuossárgga diibmu 17.00 eahkedis.

30.3. dii. 6.22 Ráđđehus galggašii odne dieđihit vejolaš mearrádusain ja ráddjehusaid joatkimis

Suomas spiehkastatdilli joatkašuvvá vel máŋgga vahku. Ráđđehus lea válmmaštallan sotnabeaivve mearrádusaid das, man guhká ovdamearkka dihte ráddjehusat leat fámus. Mearrádusaid ráđđehus galggašii dahkat odne vuossárgga.

Ráđđehus lea ožžon sotnabeaivve árvalusa Suoma njoammundilis. Ovdadieđuid vuođul ráddjehusat leat juo váikkuhan ja njoammumiid mearri njohcon.

Ráđđehus mearrida maid galggašiigo Lappis Ruoŧa ráji bargojohtolaga ráddjet dahjege bissehit.

Yle dieđuid mielde skuvllat eai boađe rahpat uvssaidis vel cuoŋománu beallemuttus. Skuvllat leat gitta vejolaččat juobe miessemánu rádjái.

29.3. dii. 14.42 Lappis dál 23 koronavirusnjoammuma

Lappi buohccedikšunbires leat sihkaraston sotnabeaivvi eahketbeaivvi rádjái neallje ođđa koronavirusnjoammuma. Olles Lappi guovllus leat dál oktiibuot 23 koronavirusnjoammuma, mas stuorimus oassi, 17 njoammuma leat Lappi buohccedikšunbires. Oarje-Lappi buohccedikšunbires leat oktiibuot guhtta njoammuma.

29.3. dii. 12.33 Uusimaa rájáin jorgalahtte badjel 800 biilla ruovttoluotta

Uusimaa eanangoddái geahččaledje vuosttas beaivvi áigge 16 555 biilla, main 835 máhcahedje ruovttoluotta.

Junáin ledje 746 mátkkošteaddji, geain 19 máhcahedje. Gearggusvuođalága rihkkumis lea addon okta sáhkku vuosttas jándora áigge.

Uusimaa lea sirrejuvvon eará Suomas lávvardaga rájes. Cuoŋománu 19. beaivve rádjai Uusimaai ja doppe eret ii beasa johttit, jus ii leat buorre ágga johtimii.

Juohkehaš rájá rasttildeaddji galgá čájehit njálmmálaš dahje čálalaš duođáštusa Uusimaa guovllus johtimii.

29.3. dii. 11.10 Suomas 1 216 koronavirusnjoammuma

THL ođđasamos dieđuid mielde Suomas leat dál 1 218 laboratorias sihkarastojuvvon koronavirusnjoammuma.

Lávvardaga rájes njoammumat leat lassánan 55. Eanemus njoammumat, 810, leat oaivegávpotguovllu buohccedikšunbire HUS guovllus.

29.3. dii. 9.45 Ruošša gidde rájáidis vuossárgga rájes

Mearrádus guoská buot johtolaga. Diplomáhtaid johtin rájáid rastá lea ain vejolaš, nugo maiddái gálvvuid fievrrideapmi.

Ruošša lea juo ovdal bissehan riikkaidgaskasaš girdinjohtolaga.

29.3. dii. 9.40 Ruoŧas badjel čuohte olbmo jápmán koronavirusii

Ruoŧas lea dán rádjái juo 102 olbmo jápmán koronavirusii.

Sihkkaraston dávdadáhpáhusat leat 3 447. Beavttálmahttondivššus leat dál 239 olbmo.

29.3. dii. 9.25 Lappis njoammumat, mat vuolgán Ruoŧas

Lappi eanangottis árvalit koronavirusnjoammumiid leavvan Ruoŧas Supmii. Lappi koronanjoammumiid mearri lea lassánan guovttegeardásaččat maŋimus golmma beaivvi áigge. Oasi njoammumiin árvalit bargomátkkošteami boađušin Suoma ja Ruoŧa gaskkas.

Oarje-Lappis bargomátkkit ja bearrašiid eallin guovtti riikkas lea sáhttán joatkašuvvat nugo dábálaččatge, vaikko muđui rájáid ii leat ožžon rasttildit. Lappi guovddášbuohcceviessu infektiodoavttir Markku Broas evttoha, ahte rájá rasttildeami barggu dihte galggašii bissehit.

Lappis leat sihkkaraston oktiibuot 19 koronanjoammuma. Lappi buohccedikšunbires koronanjoammumiid mearri lea lassánan. Dál njoammumat leat 13. Lassin vel Oarje-Lappis leat guhtta njoammuma.

Buohccán olbmuin guovttis leaba buohccedivššus ja nubbi sis lea beavttálmahtton divššus.

28.3 dii. 14.38 Sullii guovttelotjahkásaš nisu beavttálmahttondivššus Jyväskyläs

Sullii guovttelotjahkásaš nisu lea gártan koronavirusa dihte beavttálmahttondikšui Jyväskyläs. Lagamuččaid mielde dearvvaš nisu lea gártan dikšui buohccevissui mannan disdaga.

Dearvvašvuođa- ja buresveadjinlágádus THL mielde Suomas leat koronavirusa dihte dál 108 pasieantta buohcceviesus divššus ja sis 32 leat beavttálmahttondivššus

Áššis sáhtát lohkat eanet dáppe.

28.3. dii. 14.35 Kainuu guovllus vuosttaš koronavirusnjoammumat – koronavirus lea dál juohke guovllus Suomas

Kainuu guovllus leat vuosttaš sihkkaraston koronavirusnjoammumat. Dearvvašvuođaeiseválddiid mielde iskosiin leat sihkkarastán guokte njoammuma. Goabbáge dain olbmuin ii dárbbat divššu buohcceviesus.

Árat Kainuu lea leamašan áidna eanangotti Suomas, gos ii leat leamašan dieđus vel oktage koronavirusnjoammun.

Gáldut: STT; Yle

28.3. dii. 13.11 Restoráŋŋat mannet gitta – giddejit áramustá mánnodaga

Suoma riikkabeaivvit leat dohkkehan ráđđehusa evttohusa restoráŋŋaid giddemis dihto áigái.

Ráđđehusas vurdet vel ákkastallamiid das, manin restoráŋŋaid gidden lea olles riikka ášši, iige dušše muhtin báikegottiid dahje eanangottiid ášši. Evttohusa sáhttet álgit heivehit geavadahkii easkka dalle, go ráđđehus lea addán dievasmahtti ásahusa áššis.

Evttohus sáhttá boahtit fápmui áramustá mánnodaga. Máŋggat restoráŋŋat ja káfeat leat jo ieš gidden goit kundarsajiid.

28.3. dii. 12.08 Stáhtaministtar Marin: Lea čielggas, ahte fitnodagat dárbbašit lasi doarjjadoaimmaid

Suoma stáhtaministtar Sanna Marin (sd.) mielde lea čielggas, ahte fitnodagat dárbbašit lasi doarjjadoaimmaid. Su mielde ráđđehusas lea dáhttu veahkehit sin, muhto ráđđehus lea gártan smiehttat mekanismmaid, movt juohkit doarjagiid.

Marin logai riikabeivviid dievasčoahkkimis maid, ahte son ii hálit oaidnit dakkár dili, go 1990-logu heajos ekonomalaš áigge (su. lama), go fitnodagat koŋkánedje. Stáhtaministara mielde lea dehálaš sihkkarastit buot vugiiguin, ahte das ii boađe šat duohtavuohta.

Riikabeaivvit leat čoahkkanan mearridit restoráŋŋaid giddemis.

Gáldu: STT

28.3. dii. 10.34 THL: Suomas 1163 koronavirusnjoammuma

Dearvvašvuođa- ja buresveadjinlágádus THL mielde Suomas leat dál 1 163 sihkkaraston koronavirusnjoammuma.

28.3. dii. 10.10 VR ja Finnair geahpedit johtima Lappii

VR heaittiha idjatogajohtolaga Kolarii sotnabeaivve rájes ja heaittiheapmi bistá goit 14.6 rádjai. Maŋimus idjatoga Helssegis Kolarii vuolgá odne lávvordaga 28.3 ja máhccá ihttin sotnabeaivve 29.3. Eará idjatogajohtolat Roavenjárgii ja Giemajávrái doaibmet, nu movt dábálaččat.

Njukčamánu 30. beaivve, nappo mánnodaga rájes Finnair lea heaittihan buot girdiruvttuid, mat johtet Helssegis Gihttelii ja Avvilii. Finnair lea maid šluhtten 28.3. ja 29.3. guokte girdimátkki Gihttelii ja rievdadan buot eará girdiid johtit nu, ahte dat girdet seammás sihke Avvilis ja Gihttelis.

Njukčamánu loahpas Finnair šluhtte maiddái nuppi girdiruvttu, mii johtá Helssega ja Roavvenjárgga gaskka. Nappo cuoŋománu álggus gitta geassemánu lohppii Finnair girdá dušše oktii beaivvis Helssega ja Roavvenjárgga gaskka. Dán áigodagas Finnair ii girdde eará Lappi girdigittiide.

28.3. dii. 09.08 Uusimaa lea sirrejuvvon eará Suomas

Uusimaa guovllu leat gaskaija áigge sirren eará Suomas. Dál johttin Uusimaas eará guovlluide Supmii ja eará guovlluin Uusimaai lea ráddjejuvvon. Cuoŋománu 19. beaivve rádjái Uusimaai ja doppe eret ii beasa johttit jus ii leat buorre ágga johtimii.

Riikabeaivvit dohkkehedje bearjadaga eahkes ráđđehusa ásahusa ráddjehusaid fápmui váldimis.

Váikko johtin lea ráddjejuvvon, de juohkehaččas lea goit lohpi máhccat iežas ruovttu- dahje orrungildii.

Dáppe oainnat filmmaža, go doaimmaheaddji vuodjá rájirasttildanbáikái, gos boles dárkkista sin geat leat johtime Uusimaa ráji badjel.

Helssega boles bijai lávvordatija dieđáhusa Twitterii ja muittuhii johtinráddjehusain.
Helssega boles bijai lávvordatija dieđáhusa Twitterii ja muittuhii johtinráddjehusain. Govva: Šearbmagovva HelsinkiPoliisi-twitter-siidu

27.3. dii. 18.06 Ráđđehus lea attan ođđa evttohusa Uusimaa sirremis eará Suomas

Riikabeivviid vuođđoláhkaváljagotti ávžžuhii árat Suoma ráđđehusa addit ođđasit Uusimaa sirrema guoski evttohusaid.

Ráđđehusa árat attan ásahusa sisdoalus leat leamašan muhtin čuolmmat.

Dan maŋŋá go ráđđehus atta ođđa ásahusa, nu riikabeaivvit ságastallet johtinráddjehusain vel ođđasit ja sádde evttohusa ođđasit vuođđoláhkaváljagotti gieđahallamii.

Vuođđoláhkaváljagotti dahká smiehttamuša das, dohkkehitgo riikabeaivvit johtinráddjehusaid.

Ásahusa geahččalit oažžut fápmui vel odne bearjadaga.

Yle dieđuid mielde boles lea gearggus fáktet Uusimaa ráji dalán, go riikabeaivvit mearridit áššis.

Loga olles ášši dáppe.

27.3. dii. 17:06 Koronavirusdilis váikkuhusat maiddái linjabiilajohtolahkii

Anára gielda rávve olbmuid dárkkistit linjabiilajohtolaga áigetávvaliid jus meine linjabiillain johtit. Koronavirusdilli dagaha nuppástusaid maid linjabiilajohtolahkii. Mátkkošteaddji galgá ieš dárkkistit Matkahuolto-neahttasiidduin, mot biillat johtet.

27.3. dii. 16.20 Lappis oktiibuot 14 koronavirusnjoammuma

Olles Lappis leat dál 14 koronavirusnjoammuma. Lappi buohccidikšunbires leat gávcci koronavirusnjoammuma. Buohccán olbmuid dikšot ruovttus. Lappi buohccidikšunbire njoammudávddaid bajit doavttir Markku Broas mielde ođđaseamos njoammumiin lea sáhka olbmuin, geat leat boahtán juogo Uusimaa guovllus dahje olgoriikkain.

Broas muitala ahte Lappis dahket iskosiid dál maid olbmuide geat leat fitnan Uusimaa guovllus ja geain leat dávdamearkkat. Oktiibuot iskosiid dahkket dál sullii 30 beaivvis. Dán rádjai Lappis leat dahkan badjel 530 koronaiskosa.

Loga olles ášši dáppe.

27.3. dii. 16.10 THL: Suomas oktiibuot 1025 sihkkaraston koronanjoammuma

Bearjadat iđida rádjai Suomas leat sihkkarastán laboratoriaiskosiin, ahte oktiibuot 1025 olbmos lea koronavirusa dagahan Covid-19-dávda. Stuorámus oassi suomas leamašan Covid-19- dávdadáhpáhusain leat leamaš láivves.

Buohcciviesus divššu dárbbašit dál 108 olbmo geain 32 leat beavttálmahttondivššus.

Suomas oktiibuot 7 olbmo leat jápmán koronavirusa dihte. Guhtta leamašan Helssega universitehtalaš guovddášbuohcceviesu dikšunguovllus ja okta Tampere universitehtalašbuohcciviesu dikšunguovllus.

27.3. dii. 14.50 NRK: Norggas 16 olbmo jápmán

NRK Sápmi muitala, ahte dál leat 16 olbmo jápmán koronavirusa dagahan COVID-19-dávdii.

Suomas koronavirusa dagahan dávdii leat jápmán viđas. Ruoŧas fas koronavirusa geažil leat 66 olbmo jápmán.

27.3. dii. 14.01 Ávvir: Kárášjogas koronanjoammun

Kárášjogas lea nannejuvvon okta koronanjoammun. Ávvir čállá, ahte Kárášjoga sátnejođiheaddji Svein Atle Somby lea muitalan aviisii áššis.

Olmmoš leamašan olgoriikkain ja lea dál ruovttus karantenas.

27.3. dii. 12.35 LK: Lappi buohccidikšunbires oktiibuot gávcci koronanjoammuma

Lapin Kansa -aviisa muitala, ahte Lappi buohccidikšunbires leat gávnnahan dál gávcci koronanjoammuma. Dán vahkkus leat gávnnahan disdaga ovtta njoammuma ja gaskavahkku guokte.

Lappi buohccidikšunbire njoammudávddaid bajit doavttir Markku Broas muitala Lapin Kansai, ahte dát obmot geaidda koronavirus lea njommon iešguđet gielddain ja sii leat ruovttus ja vedjet bures. Okta sis lea veahá vuorraset, earát juogo gaskaagis dahje oalle nuorat.

Buot njoammumiidda laktása juogo Uusimaa dahje olgoriikkat. Vel eai leat gávnnahan, ahte dávda livččii njommon eanangotti siste.

27.3. dii. 11.48 Uusimaa sirrejuvvo eará Suomas vaikko sii eai beasage fitnat Sámis, leat duđavaččat mearrádussii

Suoma ráđđehus lea mearridan giddet Uusimaa ja oaivegávpotguovllu rájáid. STT muitalii bearjadaga, ahte ráját giddejuvvojit gaskaija áigge.

Mira Pohjanrinne, Suvi West ja Martti Laiti leat duđavaččat, go Suoma ráđđehus lea mearridan ráddjet johttima máddin. Pohjanrinne ja West orruba guktot Helssegis, Laiti fas Vantaas, nappo buohkat Uusimaa guovllus.

– Dasa lea sivva, manin ráját leat gitta, lohká Pohjanrinne.

Dilli lea historjjálaš – ovdal Suomas ii leat leamašan dárbu ná garra mearrádusaide ráfi áigge.

Pohjanrinne lea eret Gáregasnjárggas, muhto dohko ii dál ábut vuolgit beassážiidda go Uusimaa ráját giddejuvvojit.

Ráddjehusat váikkuhit juohkehažžii iešguđetláhkái. Suvi West bearrášiinnis lei juo ovdal mearridan, ahte dál ii leat áigi vuolgit ruovttus gosage. Nuba sidjiide ii váikkuhan nu sakka dat, ahte Uusimaas ii oaččo šat johtit eará guovlluide.

– In oainne, ahte livčče vehášge riekta vuolgit ja lebbet dan virusa monu, muitala West.

Loga olles artihkkala dás.

27.3. dii. 11.40 Bargguhis olbmuid mearri lea lassánan sakka

Lupmui biddjon ja bargguhis olbmuid mearri lea lassánan Suomas hirbmat jođánit koronavirusa dihte njukčamánu beallemuttu maŋŋá.

Dutkamušhoavda Heikki Räsänen bargo- ja ealáhusministeriijas árvala, ahte jagis bargguhis olbmuid mearri sáhttá lassánit juobe 70 000 olbmuin. Lupmui biddjon olbmuid mearri sáhttá loktánit juobe čuđiid duháhiid.

Áššis lasi suomagillii dáppe.

27.3. dii. 7.16 Máilmmis badjel bealle miljovnna koronavirusdáhpáhusa

Gávnnahuvvon koronavirusdáhpáusaid mearri máilmmis lea loktanan badjel bealle miljovdnii. Amerihkálaš Johns Hopkins universitehta statistihkaid mielde máilmmis ledje gávnnahuvvon oktiibuot 529 591 koronavirusnjoammuma iđitija golmma maŋŋá Suoma áigge. Eanemus koronavirusdáhpáhusat leat Amerihkás, 83 836 dáhpáhusa, Kiinnás, 81 782 dáhpáhusa ja Itálias, 80 589 dáhpáhusa.

Koronavirusii laktáseaddji jápmimat leat oktiibuot 23 970 dáhpáhusa ja virusis buorránan 122 150.

26.3 dii. 20.02 NRK Sápmi: Tromssa ja Finnmárkku fylkkas 93 olbmos koronavirus

Norgga Álbmotdearvvašvuođainstituhtta logut čájehit, ahte Tromssa ja Finnmárkku fylkkas koronavirus lea njommon 93 olbmui. Dat lea 20 eanet go ikte gaskavahkku. Áššis muitala NRK Sápmi. Odne veaigin NRK Sápmi muitalii, ahte olles Norggas koronavirus lea njommon 3156 olbmui.

26.3. dii. 19.40 LK Ságat: Ohcejogas ráhkkanit dikšut 500 olbmo ja Norggas diŋgojit helikoptera jus lea heahtedilli

Jus Ohcejoga gieldalaččain 40 proseantta nappo váile 500 olbmo buohccájit koronavirusa dihte, nu dan mađe doppe gal nagodit dikšut. Ná muitala Ohcejoga gieldda vástideaddji doavttir Heidi Eriksen, Lapin Kansa Ságaide.

Dearvvašvuođa- ja buresveadjinlágádus THL árvalusaid mielde 40-70 proseantta bohtet buohccát koronavirusa dihte.

Heahtedilis Ohcejogas sáhttet ain diŋgot Norgga bealde gádjunhelikoptera veahkkin.

– Soahpamuša mielde sáhttit heahtedilis ain dáhttut Norgga beale gádjunhelikoptera veahkkin, muitala Eriksen Lapin Kansai.

26.3. dii. 18.03 Maid dus lea lohpi bargat, jus leat karantenas, sirrejuvvon dahje dearvvaš? Dá rávvagat oanehaččat

Leago mus lohpi fitnat gávppis, jus lean karantenas? Naba jus muhtin mu bearrašis buohccá, geas lea lohpi su dikšut? Mii leat viežžan dearvvašvuođa ja buresveadjinlágádus THL rávvagiin vástádusaid muhtin gažaldagaide.

Loga ášši dáppe.

26.3. dii. 17.40 Yle gažadeapmi: presideanta, ráđđehus ja stáhtaministtar dikšon áššiid bures koronakriisa áigge

Yle dahkan jearahallama mielde suopmelaččaid mielas Suoma njunnošat ja eisseválddit leat dikšon áššiid bures koronakriisa áigge. Eanemus positiiva olbmot ledje presideantta ja stáhtaministara doaimmain. Eanemus kritihkalaččat sii ledje opposišuvnna doaimmaide.

Gaskamearalaččat dievddut ledje eanet kritihkalaččat jo nissonolbmot.

26.3. dii. 13.07 Viđát olmmoš jápmán koronavirusa dihte Suomas

Vuorrasat olmmoš lea jápmán koronavirusa dagahan dávdii Helssega ja Uusimaa buohccedikšunbire (HUS) guovllus. Olmmoš jámii ikte gaskavahku 25.3.

Dát lei viđát koronavirusa dagahan jápmu Suomas ja goalmmát, mii lea almmuhuvvon HUS guovllus.

26.3. dii. 12.51 Suoma ja Norgga rádjá jaskkodii: okta gávpi gitta, bargit biddjon lupmui

Njuorggáma, Gilbbesjávrri ja Gáregasnjárgga gávpejasat leat dál ođđalágán dilis, go stuorámus kundarjoavku lea báhcán rájá duohkái Norgii.

– Sullii 90 proseantta vuovdimis boahtá Norgga bealde. Loguthan dan juo muitalit, mii dás boahtá dáhpáhuvvat, šuohkiha gávpejas Arto Aurala.

Rádjagávpi lea Ohcejoga gildii hui stuorra ealáhus ja addá dietnasa máŋgasii. Gávppi suorggi fitnodagat leat fállan barggu oktiibuot 82 olbmui, mii lea measta 20 proseantta olles Ohcejoga gieldda bargoveagas.

Loga olles ášši dáppe.

26.3. dii. 12.23 Njealját olmmoš jápmán COVID-19-dávdii Suomas

Vuorrasot olmmoš lea jápmán koronavirusa dagahan COVID-19-dávdii Suomas. Olmmoš lea jápmán Päijät-Häme guovllus.

Dát nannejuvvon dáhpáhus lea njealját koronajápmu Suomas.

26.3. dii. 11.17 Ávvir: Guovdageainnus vuosttaš koronadáhpáhus

Guovdageainnus lea nannejuvvon vuosttaš koronadáhpáhus. Guovdageainnu suohkanis leat váldán badjelaš 40 iskosa dán rádjái, ja dál lea boahtán vuosttaš iskkusboađus mii čájeha koronadávdda.

– Dál lea okta olmmoš Guovdageainnu geas lea čájehuvvon covid-19. Olmmoš lea leamaš mátkkis ja lea leamaš ruovttus erremis dan rájes go ollii ruoktot, ja šaddá dál ruovttusirremii. Min njoammunsuddjendoavttir čađaha njoammunguorrama, čállá Guovdageainnu suohkan.

Áššis muitala Ávvir.

26.3. dii. 9.57 Bolesa dieđihandilálašvuohta Uusimaa ráddjehusain: virgeveahkki dárbbu mielde Bealuštanfámuin ja Rádjegozahusas, buot johtolat ii gildojuvvon

Boles lea doallan dieđihandilálašvuođa Uusimaa guoski ráddjehusain. Bolesa bajithoavda Seppo Kolehmainena mielde Suoma boles ráhkkana bivdit virgeveahki Bealuštanfámuin ja Rádjegozahuslágadusas. Ráddjehusaid gozihit seammalágán lágain go normáladilisge, iige boles oažžu lasseresurssaid.

Ráddjehusain geavahuvvo rávvagiid, ávžžuhusaid ja gohččumiid. Easkka duođalaš diliin soitet geavahit garrasot vugiid.

Dárbbu mielde boles sáhttá bissehit, dárkkistit ja váldit olbmuid gitta johtinráddjehusaid čuovodettiin.

Kolehmainen čilge, ahte ráddjehusaid álgobeivviin boles goziha čielgasit nu, ahte olbmot dan bohtet fuomášit. Boles sáhttá maid bidjat dehálamos Uusimaa geainnuid gitta. Geainnuid lassin boles goziha toga- ja girdinjohtolaga.

Suoma ráđđehus lea muitalan, ahte rájá oažžu rasttildit barggu, ealáhusa dahje luohttámušdoaimma geažil. Maid ovdamearkka dihte máná deaivvadanrievtti beales oažžu johttit. Daid sivaid galgá goittotge bastit duođastit bolesii, vaikkoba áššebáhpariiguin.

Boles dárkkista juohke olbmo, gii johtá Uusimaai dahje doppe eret.

Áššis sáhttá lohkat eanet dáppe suomagillii.

26.3. dii. 8.15 Suoma ráđđehus lea mearridan ráddjet johtima Uusimaa ja eará Suoma gaskkas

Ráđđehus lea mearridan ráddjet Uusimaa ja eará eanagottiid gaskasaš johtolaga. Ovdamearkka dihte Suoma oaivegávpot Helsset lea Uusimaa eanagottis. Johtinráddjehusaid dárkkuhussan lea eastit koronavirusa leavvama Uusimaas eará Supmii.

Ráddjehus bisttášii álggus goit 27.3.–19.4. Ráđđehusa evttohus ovdána riikkabeivviid gieđahallamii odne duorastaga.

Uusimaa eanagoddái ja doppe eret johtin gildojuvvo, jos ja go ásahus boahtá fápmui. Ráđđehusas oidnet Uusimaa ráddjema dehálaš vuohkin njoahcudit koronoavirusepidemiija leavvama.

Stuorámus oassi Suoma njoammumiin lea Helsset ja Uusimaa buohccedikšunbire guovllus.


25.3. dii. 19.06 Vuođđoláhkaváljagotti dohkkehii ráđđehusa evttohusa restoráŋŋaid giddemis, muhto evttoha dárkkálmahttimiid

Suoma vuođđoláhkaváljagoddi dohkkehii Suoma ráđđehusa evttohusa restoráŋŋaid giddemis, muhto evttoha dasa dárkkálmahttimiid. Váljagotti evttoha earret eará, ahte gildosa ráddjejit guovlluid mielde ja dan man guhká gielddus bistá, jus dilli atta dasa vejolašvuođa.

Áššis muitalii váljagotti ságadoalli Johanna Ojala-Niemelä (sd.). Su mielde vuođđoláhkaváljagotti mielas lea vealtameahttun, ahte lágain mearridit fitnodatdolliide govttolaš buhtadusa dáhpagiin mat bohtet, go restoráŋŋaid giddejit.

25.3. dii. 16.56 ÁEL almmustahttán sámegillii dieđuid koronavirusa váikkuhusain

Álbmotealáhatlágádus ÁEL lea almmustahttán sámegillii dieđuid koronavirusa váikkuhusain. Sámegielat siidduin muitalit earret eará mot koronavirusepidemiija váikkuha ÁEL doarjagiidda ja bálvalusaide. Dieđut gávdnojit sihke nuortalaš-, anáraš- ja davvisámegillii.

25.3. dii. 16.35 Norggas heaittihit buot vuođđoskuvlla ja joatkkaskuvlla čálalaš eksámeniid

Norggas ráđđehus lea mearridan heaittihit buot vuođđoskuvlla ja joatkkaskuvlla čálalaš eksámeniid koronavirusa geažil. Áššis muitala NRK Sápmi. Máhttoministtar Guri Melby lohká ohppiid lihkka oaččut oahppoduođaštusa.

25.3. dii. 16.13 THL árvala: Epidemiija vearrámus muttus Suomas buohcceviesuid divššu dárbbašit 11 300

Dearvvašvuođa ja buresveadjinlágádus THL árvala, ahte daid mánuid áigge, go koronavirusepidemiija lea vearrámus muttus, nu Suomas leat 11 300 olbmo geat dárbbašit virusa dihte divššu buohcceviesus. Sis 3600 dárbbašit beavttálmahtton divššu.

Doaibmabijut doibmet, muhto dat galle olbmui ovtta olbmos virus njoammu lea lagabui guokte go okta, muitala THL dearvvašvuođadorvvolašvuođahoavda Mika Salminen.

25.3 dii. 15.29 Suomas 88 ođđa njoammuma, beavttálmahttondivššus 22 pasieantta

Dearvvašvuođa ja buresveadjinlágádus THL varraseamos loguid mielde Suomas leat dál oktiibuot 880 koronavirusnjoammuma maid leat sihkkarastán laboratorias. Njoammumiin 88 leat ođđa.

Divššu buohcceviesus dárbbašit dál 82 pasieantta geain 22 leat beavttálmahtton divššus. THL diehtu leat boahtán diibmu 15.00

25.3 dii. 14.48 Suoma ráđđehus lea válmmaštallame johtinráddjehusa mii guoskkašii olles Uusimaa guovllus.

Uusimaa guovllu guoski ráddjehusat leat dál virgeolbmuid válmmaštallamis ja ráđđehus lea ráhkkanan čoahkkanit odne diibmu 20.00.

Yle dieđuid mielde ráđđehusa válmmaštallan johtinráddjehusain lea eanet dan guvlui, ahte dat guoská olles Uusimaa guovllu, iige nu, ahte dat ovdamearka dihte guoskkašii dušše dihto gielddaid doppe. Ruovttoluotta Uusimaai goit beassá, jus lea leamašan ovdamearkka dihte hyhttas, guovllu olggobealde.

Ráddjehus ii sáhte boahtit dalán fápmui, go dat manná álggos riikabeivviid ja de vuođđoláhkaváljagotti gieđahallama čađa.

25.3. dii. 14.01 Vuohčulaš Leena, 77, illuda go lea oahppán "skypestit" earáiguin karantena áigge

Vaikko olles Suomas buohkat leat gártán koronavirusa geažil bissut ruovttus, de lea vuohččulaš Leena Alakorva áigi gollán hui bures ruovttus.

Son lea beassán koronavirusa dihte oahpásmuvvat ja oahppat áibbaš ođđalágan neavvuid geavahit. Juo badjel 70-jahkásaš Alakorva mánát bidje sutnje dihtorii Skype-telefonprográmma, mainna son sáhttá karantenalágan dilis gulahallat mánáidisguin.

Loga olles ášši dáppe.

25.3. dii. 11.00 Suomas ođđa koronajápmimat – dál golmmas jápmán COVID-19-dávdii Suomas

Gaskavahku leat dieđihan juo guovtti olbmo jábmimis koronavirusa dagahan COVID-19-dávdii. Okta olmmoš leat jápmán Kanta-Häme buohccedikšunbires ja nubbi fas Helssega ja Uudenmaa (HUS) buohccedikšunbires.

Kanta-Häme guovddášbuohcceviesu guovllus jámii gaskaahkásaš riskajovkui gullevaš olmmoš njukčamánu 25. beaivve ja HUS guovllus fas boarrásut olmmoš 24. beaivve koronavirusa dagahan COVID-19-dávdii. Dáhpáhusaid birra eai atte eará dieđuid ovttaskas olbmuid priváhta suoji dihte.

Suomas leat dán rádjái jápmán golbma olbmo COVID-19-dávdii. Vuosttas pasienta jámii Helssega ja Uudenmaa buohccedikšunbire guovllus 20.3.2020.

25.3. dii. 10.55 Davvin gielddat guorahallamin galgetgo bidjat bargiid bággolupmui

Miehtá Suoma ja maid Sámis leat ollu almmolaš báikkit giddejuvvon koronavirusa njoammunvára dihte. Ovdamearkka dihte vuojadanhállat, lihkadanbáikkit, girjerájut ja museat leat gidden uvssaid. Maiddái beaivedivššuin ja skuvllain leat unnán olbmot báikki alde ja dat lea geahpedan čorgema dárbbuid.

Gielddat leatge dál geahččaleamen gávdnat eará bargguid daidda gielddabargiide, geaid iežas barggut leat nohkan koronaráddjehusaid dihte.

Lappi eanangottis eai goittotge leat velá álgán bidjat bággolupmui bargiid. Gielddat leat goittotge vihkkehallamin ášši.

Loga áššis eanet dáppe.

25.3. dii. 9.50 Davvin giddejit lasi hoteallaid ja restoráŋŋaid – Gilbbesjávrris fállet idjasaji iehčanassii mátkkošteaddjiide

Santa's Hotels -hoteallafitnodat gidde hoteallaid ja restoráŋŋaid koronavirusa geažil.

Idjadandoaibma nohká doaisttážii Roavenjárggas, Luostos, Suoločielggis ja Kalajokis. Fitnodat muitala, ahte sáhttá dárbbu mielde fállat idjasaji iehčanassii mátkkošteaddjiide Gilbbesjávrris.

Roavenjárgga hotealla dollet rabas heahteidjademiid várás.

Davvi-Suoma stuorimus hoteallafitnodat Lapland Hotels almmuhii juo mannán vahkus, ahte sii giddejit hoteallaid, restoráŋŋaid ja prográmmabálvalusaid koronadili dihte.

24.3. dii. 19.56 Lávvordaga rájes restoráŋŋaide ii vealttekeahttá beasa boradit

Suoma ráđđehus lea válbmen restoráŋŋaid guoski ráddjehusdoaibmabijuid evttohusa. Stáhtaministtar Sanna Marin (sd.) muitalii eske, ahte evttohus lea riikabeivviid gieđahallamis jo odne.

– Buoremus dilis ráddjehusaid sáhttá oažžut fápmui nu jođánit go vejolaš.

– Sáhttán dadjat, ahte ráddjehusat leat fámus 31.5 rádjai, muhto leat gergosat burgit daid jus lea vejolaš. Háliideimme addit finodagaide dihto beaivvi, vai sii bastet ráhkkanit, Marin muitala.

Bargoministtar Tuula Haatainen (sd.) muitala ahte ráddjehus meine dan, ahte kundarat eai sáhtte báhcit restoráŋŋii boradit, muhto sáhttet váldit biebmu mielde. Lunšaboradanbáikkit bargosajiin livčče rabas nu mot dábálaččat.

Haatainen muitala, ahte jođáneamos lági mielde ráddjehusaid oažžu fápmui dál lávvordaga.

24.3. dii. 19.43 Suomas váldet válmmašvuođarájuin dálkkasmateriálaid ja suddjendiŋggaid

Suoma sosiála- ja dearvvašvuođaministeriija dieđiha, ahte sii leat mánnodaga mearridan, ahte koronaviruspandemiija dagahan spiehkastatdilis váldet adnui stáhta válmmašvuođarájuin leahki dálkkasmateriálat ja suddjendiŋggaid.

Dán doaibmabiju dahket go stáhta háliida sihkkarastit, ahte suddjendiŋggat leat doarvái suddjet sosiála- ja dearvvašvuođadivššu bargiid olles riikkas, maiddái go epidemiijadilli vearrána.

24.3. dii. 18.55 Lappi guovddášbuohcceviessu sirdá ii nu hohppos dutkamušaid ja čuohpadusaid maŋŋelebbui

Lappi guovddášbuohcceviessu dieđiha, ahte ii nu hohppos čuohpadus- ja dutkandoaimmaid galget sirdit maŋŋelebbui. Buohcciviesus goit dikšot ain pasieanttat geat dárbbašit divššu. Lappi guovddášbuohcceviessu ráhkkana dasa ahte koronaepidemiija álgá ja danin sirdá ii nu hohppos áiggiid.

Juohke pasieantta buohta árvvoštallet dili. Buohcciviesus váldet oktavuođa pasieanttaide geaid áiggiid áigot sirdit.

Doavttir árvvoštallá pasieantta dikšodárbbu ja mearrida sirdojuvvogo áigi maŋŋelebbui. Áiggiid maid lea várren ja maid eai leat buohcciviesu bealde šluhtten dollet ain deaivása.

24.3. dii. 17.57 NRK Sápmi: Norggas doaibmabijut korona vuostá guhkiduvvojit bistit badjel beassážiid

Norgga stáhtaministtar Erna Solberg lea dieđihan, ahte Norggas doaibmabijut korona vuostá guhkiduvvojit bistit badjel beassážiid, cuoŋománu 13. beaivve rádjai. Áššis muitala NRK Sápmi. Earret eará olbmot eai beasa vuolgit hyhttaide. Norgga ráđđehus oaivvilda, ahte álbmotdearvvašvuođainstituhtta logut čájehit, ahte doaimmat leat leamaš ávkin eastadit koronavirusa leavvamis.

24.3 dii. 16.51 Restoráŋŋaid áigot giddet ja Uusimaa guovllu sirret

Báraid ja restoráŋŋaid áigot giddet ja Uusimaa guovllu sirret. Doaimmat ožžot doarjaga buot bellodagain riikabeivviin.

Suoma ráđđehus joatká ráđđádallama ođđa doaimmaid birra diibmu 16 ja doallá dieđihandilálašvuođa sullii dii. 21.30.

Ođđa evttohusaid lea dárkkuhus leahkit riikabeivviin gaskavahkku.

Dál riikabeivviid dievasčoahkkimis ságastallet ráđđehusa koronalassebušeahtas.

Loga eanet áššis dáppe.

24.3. dii. 15.50 Sámediggi neahttasiidduin dieđut koronavirusa birra sámegillii

Sámediggi lea čohkken sin neahttasiidduide dieđuid koronavirusa birra sámegillii. Neahttasiidduin gávnnat earret eará stáhtaráđi, gielddaid ja álbmotealáhatlágádus ÁEL dieđáhusaid. Daid lassin gávdnojit maid Sámedikki, Meahciráđđehusa ja Yle Sámi dieđut.

24.3. dii. 15.04 Tokio olympialaččaid maŋidit jahkái 2021

Jáhpána stáhtaministtar Shinzo Abe ja Riikkaidgaskasaš olympiakomitea dieđihit, ahte Tokio olympialaččaid maŋidit koronavirusa dihte. Geasi 2020 olympialaččaid sirdet jahkái 2021.

Tokio olympialaččaid lei dárkkuhus álgit suoidnemánut 24. beaivve.

Gáldut: REUTERS, AP, NHK

24.3. dii. 14.40 Ráđđehusa mearrádus ii lasihan lagašoahpahusa ohppiid meari Anáris ja Ohcejogas

Suoma ráđđehus rievdadii mannan bearjadaga mearrádusa, ahte buot 1.–3.-luohkálaččaide galgá fállat lagašoahpahusa dán vahku álggu rájes.

Ráđđehusa mearrádus ii goit leat lasihan lagašoahpahusa oahppiid meari Anáris ja Ohcejogas. Ohcejogas fállet buot ohppiide skuvlaborramuša, vaikko lagašoahpahusas leat unnán oahppit.

Loga olles ášši dáppe.

24.4. dii. 13.20 Anára gielda fállá badjel 70-jahkásaččaide veahkki earret eará earániid dikšumii

Suoma ráđđehus addi mannan vahkkus doaibmarávvaga, mas badjel 70-jahkásaččat geatnegahttojit garvit kontávttaid eará olbmuiguin vejolašvuođaid mielde.

Anára gielda fállá badjel 70-jahkásaččaide gávpeveahki, fievrridanveahki, ságastallanveahki dahje, jus sis leat gažaldagat árgabeaivái laktáseaddji áššiin, nu sii sáhttet riŋget árgabeivviid diibmu 8—15. Buot nummáriid gávnnat dáppe.

Jus leat dearvvašvuođadillái laktáseaddji áššit, nu de sáhttá riŋget dearvvašvuođaguovddáža áigevárrennummárii nu mot dábálaččat.

24.4. dii. 13.08 Suomas 792 njoammuma

Suomas leat otnáža rádjái gávnnahuvvon oktiibuot 792 koronavirusnjoammuma, mat leat sihkkarastojuvvon laboratorias, dieđiha dearvvašvuođa- ja buresveadjinlágádus THL. Ođđa njoammumat leat oktiibuot 92. Buohcceviesuin divššus leat dál 40 olbmo, geain 11 leat beaktilis divššus.

THL lea čohkken dieđuid njuolga buohccedikšunbiriin, muhto ii šat dieđit iešguđege buohccedikšunbire loguin sierra. Stuorimus oassi buot njoammumiin, oktiibuot 512, leat Helssega ja Uusimaa buohccedikšunbires.

24.3. dii. 12.40 Koronavirusis oažžu dál dieđuid ja rávvagiid chat-bálvalusa bokte

Chatrávven lea ráhppojuvvon stáhtaráđi neahttasiidduide ja doppe oačču dieđuid ođđa koronavirusis. Chatbálvalus lea rabas árgabeivviin diibmu 8–21 ja lávvordaga diibmu 9–15. Bálvalusas bálvalit dál suomagillii ja vejolašvuođaid mielde maiddái ruoŧagillii ja eaŋgalasgillii.

Ođđa koronavirusis lea jo árat rahppon telefonrávven nummáris 0295 535 535. Dieđut maid chat-bálvalusas ja telefonrávvenbálvalusas oažžu vuođđuduvvá dearvvašvuođa ja buresveadjinlágádus THL neahttasiidduid dieđuide.

24.3. dii. 10.15 Soađegillái leat rahppojuvvon infekšuvdnavuostáiváldin

Soađegi buresveadjinguovddáš Sopukkai lea rahppojuvvon iežas infekšuvdnavuostáiváldin.

Sierra vuostáiváldin lea dárkkuhuvvon olbmuide, geat gillájit vuoigŋaninfekšuvnn dávdamearkkain. Olbmuid ávžžuhit riŋget vuos vuos gieldda koronarávvemii.

Soađegilli lea šluhtten buot doaktáriid ja buohccedivššáriid vuostáiváldináiggiid, main ii leat hoahppu. Sopukka ákuhttavuostáiváldin ja gohccintelefovdna doaibmet dábálaš vuogi mielde.

24.3. dii. 9.30 Presideanta Martti Ahtisaaris lea korona

Suoma ovddeš presideanta Martti Ahtisaaris leat gávnnahan koronavirusnjoammuma. Áššis dieđihii presideantta kansliija maŋŋebárgga.

Njoammun sihkkarastojuvvui vuossárgga 23. njukčamánu. Presideanta veadjá bures.

Dásseválddi presideantta kansliija dieđihii Eeva Ahtisaari koronavirusnjoammumis lávvardaga njukčamánu 21.

23.3. dii. 19.43 Lappi guovddašbuohcciviesut rahkkanit koronaepidemiijai

Lappis guovddášbuohcciviesut ráhkkanit dasa, ahte koronavirusnjoammumiid mearri lassána. Čuohpadusáliid ordnejit beavttálmahttondivššu várás ja bargiid skuvlejit.

Lappi buohccedikšunbires leat ovcci báikki beavttálmahttonjuvvon dikšui. Lappi guovddášbuohcceviesu infekšuvnnadoavttir Markku Broas namuha, ahte Roavvenjárgii sáhttet ordet 30 beavttalmahttojuvvon divššu báikki. Broas deattuha, ahte dat gáibida eará dikšobáikkiid dego čuohpadanšáliid ordnema beavttálmahttojuvvon divššu várás.

23.3. dii. 19.30 WHO hoavda: koronaviruspandemiija lea jođálmuvvame

Máilmmi dearvvašvuođaorganisašuvdna WHO váldohoavda Tedros Adhanom Ghebreyesus lohká, ahte koronaviruspandemiija lea čielgasit jođálmuvvame.

– Manne 67 beaivvi vuosttaš raporterejuvvon dáhpáhusas dasa, ahte divve 100 000 dáhpáhusa. 11 beaivve čuovvovaš 100 000 dáhpáhussii ja dušše njeallje beaivvi goalmmát 100 000 dáhpáhussii, logai Tedros virtuálalaš dieđihandilálašvuođas. Áššis muitala AFP.

Tedros Adhanom Ghebreyesus mielde lea goittotge vel vejolaš váikkuhit dasa, mot pandemiija ovdána.

Tedros lohká, ahte dearvvašvuođadivššubargiid galgá prioriseret, danin go muđui máŋggat olbmot jápmet dušše danin go olbmot, geat livčče sáhtán gádjut heakkaid, leat buohccin.

Tedros logai maid, ahte son áigu ságastallat industriijariikkaid G20-jovkui gullevaš riikkaid njunnošiiguin dán vahkus ja bivdit sin ovttasbargat vai suddjengálvvuid buvttadeami sáhttet lasihit.

Tedros mielde dat, ahte doallá gaskka nubbi olbmui ja dat, ahte olbmot bissot ruovttuin, leat bealuštanvuogit mainna bastet vuoitit koronaviruspandemiija.

Gáldut: AFP, Reuters

23.3. dii 18.23 Lappi guovddášbuohcciviesus gálledeapmi gildojuvvo

Olggobeale olbmuin lea gildojuvvon gálledeapmi Lappi guovddášbuohcceviesus. Gildosa leat dahkan vai koronavirus ii leavašii.

Daid oapmahaččaid buohta árvvoštallet vejolašvuođa gálledeapmái:

- Kritihkalaččat buohcci olbmo lagamuččat, geain eai leat dávdamearkkat.

- Mánáid lagamuččat geain eai leat dávdamearkkat.

- Mieđuštandivššus leahki pasieanta lagamuččat, geain eai leat dávdamearkkat.

- Riegádahttinossodagas leahki olbmo guoibmi dahje doarjjaolmmoš, geas eai leat dávdamearkkat.

Gálledemiin galgá soahpat ossodagain, gos pasieanta lea divššus.

23.3. dii. 17.19 Finnair šluhtte girdimátkkiid Lappii

Girdifitnodat Finnair šluhtte dán vahkus máŋggaid girdimátkkiid mat livčče johtán Avvilii, Gihttelii ja Guossamii. Seammás fitnodat muitala, ahte dat lea heaittiha buot girdimátkkiid Avvilii, Gihttelii ja Guossamii njukčamánu 30. beaivve rájes. Maŋŋel sotnabeaivvi áidna báiki Lappis gosa Finnair girdá lea Roavvenjárga.

Gáldu: STT

23.3. dii. 16.56 Meahciráđđehus gidde stobuid ja gođiid mat leat lahka Lappi turismaguovddážiid

Meahciráđđehusa luonddubálvalusat gidde Lappi turismaguovddážiid lahkosiin leahkki beaivestobuid, gođiid ja ávdinstobuid vai koronavirus ii leavašii nu jođánit.

Gođiid ja stobuid maid áigot giddet leat álbmotmehciin ja eará vánddardanguovlluin maid meahciráđđehus fuolaha. Ovdamearka dihte Suoločielggis, Kiilopääs, Pyhätunturis, Luostos, Pallas, Olos, Heahttá, Gilbbesjávrri ja Ylläs guovlluin.

Ráhkkanusaid lássejit ja daid uvssaide dolvot almmuhusa ahte dat eai leat geavahusas. Almmuhusaid dolvot maiddái ruvttaid álgogeahčái ja eará báikkiide. Dieđu bidjet maiddái Meahciráđđehusa Luontoon.fi-neahttabálvalussii.

23.3. dii. 15.56 Sámiráđđi ávžžuha čuojahit dušše Sámi musihka

Sámiráđđi ávžžuha doarjut sámi kulturbargiid ja ávžžuha čuojahit dušše sámemusihka. Sámiráđđi čállá, ahte koronavirusa geažil sámi kultur- ja dáiddamáilbmi lea heahtedilis, go sii leat massán dienasvejolašvuođaid go lágideamit, festiválat ja doalut leat šluhttejuvvon.

Sii evttohitge, ahte Sámi rádiokanálat čuojahit dušše Sámi musihka ja sii ávžžuhit maiddái earáid oastit ja streamet Sámi musihka ja doarjut sámi kulturmáilmmi nu bures go vejolaš.

Yle Sámi -rádiosáddagiin gullo eanáš Sámi musihka. Yle Sámi iežas Yle Sámi iđit -sáddagis ja Dearvva! -sáddagis gullo dušše Sámi musihka. Nuoraid rádiosátta Sohkaršohkas unnimustá goalmmátoassi lea Sámi musihkka dahje álgoálbmotmusihka. Sohkaršohkka áigu dál lasihišgoahtit Sámi musihka sáddagiin.

23.3. dii. 15.47 Sámi Soster -searvi fállá veahkki earániid dikšumii ja ságastallanvejolašvuođa

Sámi Soster -searvi dieđiha, ahte sin kundarat ja čuozáhatjovkui gulli olbmot sáhttet váldit sin bargiide sáhttá oktavuođa jus muhtin ášši boktá jurdagiid, jus dárbbaša veahkki earániid dikšumii dahje jus háliida humadit luohttámušain bargiiguin.

Sámi Soster -searvvi bargiide sáhttá riŋget, dahje sáddestit dieđu ja bivdit sin riŋget ruovttoluotta.

Dáppe gávnnat Sámi Soster -searvvi bargiid nummáriid ja áiggiid goas sidjiide sáhttá riŋget

23.3. dii. 13.30 Stáhtaministtar Marin: Restoráŋŋaid gidden ja johtinráddjehusat leat válmmaštallamis

Suoma stáhtaministtar Sanna Marin (Sd.) muitala Twitteris, ahte ráđđehus válmmaštallá ođđa ráddjendoaibmabijuid, mat laktásit earret eará restoráŋŋaid giddemii.

– Maiddái johtima ráddjen lea válmmaštallamis, čállá Marin.

Oahpahusministtar Li Andersson (Gurut) logai odne dieđihandilálašvuođas, ahte ráđđehusbellodagaid njunnošat čoahkkanit vel odne ášši olis.

Anderssona mielde doaibmabijuid leat válmmaštallan vahkoloahpa áigge.

23.3. dii. 13.01 Sámediggi ávžžuha Suoma stáhtaministara ráddjet Suoma siste mátkkošteami

Sámediggi bivdá, ahte Suomas johtin ráddjejuvvo vai koronavirusa ii leavašii nu jođánit ja riskajoavkkuin leahki olbmuid bastit suodjalit.

Vahkkoloahpa áigge medias lea beaggán dat, go máŋgasat leat mátkkoštan Lappii, váikko suoma ráđđehus lea rávven earret garvit badjel 10 olbmo deaivvademiid.

Sámedikki ságadoalli Tuomas Aslak Juuso muitala dieđáhusas, ahte son lea fuolas čuvvon dán dili ja lohká, ahte juohkehaš galggalii váldit dán dili duođas ja čuovvut rávvagiid mat leat addon.

– Mii eat hálit riskajoavkku šaddet áitaga vuollai, earenomážit boarráset sámit leat joavku, geaid mii galgat suodjalit, deattuha Juuso dieđáhusas.

Sámedikki oaidná, ahte Suoma siskkáldas mátkkošteami ráddjen lea buoremus vuohki suodjalit sámiid ja earenomážit riskajoavkkuid dego boarráset sámiid. Ráddjen sihkkarasttálii maid dan, ahte dearvvašvuođaresurssat, dego sámegielat bargit leat doarvái.

23.3. dii. 13.01 Sámediggi muittuha sámegielat dieđiheami dehálašvuođas

Dan lassin sámediggi muittuha eiseválddiide man dehálaš lea dieđihit maiddái sámegillii. Sámediggi lea ovdanbuktán sámegielat dieđiheami buorideami sihke sámi giellalága vuođul ja maiddái almmolaš dorvvolašvuođa dihte.

Sámediggi gielladorvočálli Anne Kirste Aikio lohká, ahte dainna ahte dieđut molsašuddet čađat ii sáhtte ákkastalat dan, ahte almmolaš rávvagat eai jorgaluvvo sámegielaide, muhto sámegielat dieđiheamis galgá maid ovdánit plána mielde ja beaivádit rávvagiid.

– Dál iešguđet eiseválddit galget fuolahit das, ahte sámiid gielalaš rievttit ollašuvvet ja ahte olbmo ipmirdit jus son hupmá sámegiela go riŋge váikko heahteguovddážii dahje dearvvašvuođaguovddážii jus son eahpida, ahte sutnje lea njommon koronavirus.

23.3. dii. 9.30 Kulmuni: Olbmuid johtima soitet ráddjet lasi

Ruhtadoalloministtar Katri Kulmuni mielde lea jáhkehahtti, ahte suopmelaččaid johtima riikka siste ráddjejit lasi.

– Sihkkarit odne dahje ihttin bohtet jo lassidoaimmat, vástidii Kulmuni dasa, ahte man jođánit eanangottiid rájiid giddegohtet.

Kulmuni lasihii, ahte lea vejolaš, ahte idjarestoráŋŋaid ja báraid maid giddejit.

23.3. dii. 9.21 Lappi gielddahoavddat ja Lappi Lihttu: Ráđđehus ferte mearridit bálvalusaid giddemis

Olles Lappi eanangotti gielddahoavddat ja gielddaid searvi Lappi Lihttu gáibidit ráđđehusa mearridit dakkár bálvalusaid giddemis, mat geasuhit olbmuid čoahkkanit. Sin mielas ovdamearkan bárat ja idjarestoráŋŋat galget giddejuvvot koronavirusepidemia dihte.

Seammás gielddaid njunnošat bivdet olbmuid árvvoštallat davás mátkkošteami dárbbu justa dál ja bivdet sirdit luomuid čakčii dahje boahtte dálvái.

Gielddat leat fuolas dearvvašvuođabálvalusaid resurssaid reahkkámis juos koronadilli vel vearrána. Maiddái fitnodatdoalliid dáfus čielga giddenmearrádus livčče buoremus dán dilis.

22.3. dii. 15.12 Eurohpás gávnnahuvvon jo badjel 150 000 koronanjoammuma, jápmán 7 800

Eurohpá riikkain gávnnahuvvon koronanjoammumiid mearri lea loktanan ođasdoaimmahat AFP árvvoštallama mielde badjel 150 000:ii. Dávda lea dolvon 7 800 olbmo heakka.

Pandemiija lea leavvan virggálaš loguid mielde eananosiin vearrámusat Eurohpás. Ásias njoammumat leat gávdnon vádjit 97 000 ja virus lea dagahan 3 500 olbmo jápmima.

Olles máilmmis njoammumiid leat dán rádjái gávnnahuvvon oktiibuot badjelaš 300 000.

Virggálaš logut leat goittotge jáhkkimis dušše unna oasáš buot njoammumiin, dasgo máŋggain riikkain testejit dušše daid buohccán olbmuid, geat dárbbašit dikšuma buohcceviesus.

Gáldu: STT

22.3. dii 15.02 Ruka ja Pyhä mearridedje dastoge giddet milliideaset disdaga

Yle oažžun dieđuid mielde Ruka ja Pyhä leat mearridan giddet milliideaset disdaga rájes. Dárkkuhus lea eastit dan, ahte stuorra mátkkošteaddjijoavkkut Lappi guovddážiin jorggihit Kuusamoi ja Pyhäduoddarii.

Ruka ja Pyhä leat vel rabas mánnodaga 23.3.

22.3. dii. 14.09 THL: Suomas gávnnahuvvon oktiibuot 626 sihkkaraston njoammuma

Suomas leat gávnnahan 22.3. rádjái oktiibuot 626 laboratorias sihkkaraston koronavirusa (COVID-19) dagahan dávdadáhpáhusa, muitala Dearvvašvuođa ja buresveadjima lágádus THL.

Ođđa dáhpáhusat leat oktiibuot 105. HUSis leat gávnnahan 71 ođđa koronavirusnjoammuma.

22.3. dii. 13.16 Lappi čuoiganguovddážat giddejuvvojit sotnabeaivvi maŋŋá

Muhtin Lappi stuorra čuoiganguovddážat giddejit hissaideaset jo dán beaivvi maŋŋá. Álgoálggus guovddážat ledje plánen giddet boahtte bearjadaga rájes.

Ylläs, Levi, Luosto, Olos, Pallas ja Ounasvaara muitalit, ahte mearrádusa duogážis váikkuhit ođđasat Lappii mátkkošteaddji biilaráidduin.

– Uhkkin lea, ahte boahtte vahkus áššehasmearit livčče sturron, dadjet earet eará Ylläsis doaibmi fitnodatdoalli Pertti Yliniemi ja Levi čuoiganguovddáža beaivválaš jođiheaddji Jouni Palosaari.

Ruka ja Pyhä čuoiganguovddážat jotket nu, ahte boahtte lávvardaga 28.3. lea maŋimus beaivi go guovddážat leat rabas. Ášši sihkkarasttii sotnabeaivve Ylei Rukakeskus beaivválaš jođiheaddji Ville Aho.

– Earet eará Rukas lea dál áššehasat sulaid goalmmádas uhcit go gaskamearalaččat dán áigge. Rukas ja Pyhäs ii leat virus nannejuvvon ja dilli lea dan dáfus ráfálaš. Eat gal váldde šat vuostá lanjaid várremiid, muhto bálvalit daid áššehasaid, geat deike leat dál boahtán dahje leat dáppe boahtte vahku loahpas, Aho dadjá.

22.3. dii. 12.52 Stáhtaministtar Löfven hállá eahkedis televišuvnnas Ruoŧa álbmogii koronaepidemiija dihte

Ruoŧa stáhtaministtar Stefan Löfven hállá eahkedis álbmogii koronaepidemiija dihte. Viđa minuhtta guhkkosaš sáhkavuoru sádde Ruoŧa oktasašradiofitnodat SVT. Dát lea Ruoŧas hui spiehkastatlaš meannudeapmi. Sullasaš dilli lea leamaš SVT mielde dušše oktii, go jagi 2018 válggaid áigge buot bellodatjođiheaddjit ledje bovdejuvvon hállat álbmogii.

– Mis lea Ruoŧas eahpedábálaš dilli, ja stuorra oassi máilmmis lea dárpmehuvvan. Das lea čielgasit árvu, ahte sáhttá gullat stáhtaministara hállame njuolga álbmogii, kommentere Helena Olsson SVT:s.

Ruoŧas muitaluvvui lávvardaga, ahte nannejuvvon njoammumat leat 1 746 ja 20 olbmo leat jápmán. Beaktilis divššus ledje 61 olbmo. Vearrámusat epidemiija váikkuha Stockholmma guovllus. Stockholmmas leat rahčan dan ovdii, vai ožžot eanet sajiid beaktilis dikšui.

– Mis lea dál bures sajit beaktilis divššus. Mii leat ráhkkaneamen dasa, ahte mis boahtá leat fargga olu váigadut, guovllu dearvvašvuođa- ja buohccedikšuma jođiheaddji Björn Eriksson muitalii lávvardaga.

Gáldu: STT

22.3. dii. 11.48 HUS guovllus 71 ođđa njoammuma

Helssega ja Uusimaa buohccedikšunbires (HUS) gávnnahedje lávvardaga 71 ođđa koronavirusnjoammuma.

Dat lea alimus lohku dán rádjai ovtta jándoris gávnnahuvvon njoammumiin. Ovddit alimus lohku gávnnahuvvui bearjadaga, goas gávnnahedje 53 njoammundáhpáhusa.

Dán rádjái Helssega ja Uusimaa buohccedikšunbires leat gávnnahan oktiibuot 378 njoammuma.

22.3. dii. 11.28 Levi čuoiganguovddáš heaitá hissabileahtaid vuovdima

Levi čuoiganguovddáš Gihttelis heaitá odne bileahtavuovdima ja čierastallanbiergasiid láigoheami, muitala Visit Levi virggis leahkki beaivválaš jođiheaddji Yrjötapio Kivisaari.

Kivisaari mielde dán beaivvi maŋŋá bileahtaid dahje čierastallanbiergasiid ii sáhte oažžut. Dan lassin Visit Levi lea heaitán barttaid láigoheami. Visit Levi lea muitalan iežas áššehasaide, ahte dat máhcaha ruđaid várremiin mat eai ollašuva, dahje várremiid sáhttá sirdit ovddos guvlui.

Gáldu: STT

22.3. dii. 10.17 Nuppástus Ráji-Jovsseha ja Salla rádjerasttildanbáikkiid rabasáiggiide

Suoma ja Ruošša gaskasaš rádjeortnetsoahpamuša vuođul Lappi ja Alakurtti rádjesáttaolbmot leat mearridan ráddjet Salla ja Ráji-Jovsseha rádjerasttildanbáikkiid rabasáiggi 23.3.–31.5.2020. Salla ja Ráji-Jovsseha rádjerasttildanbáikkit leat dan áigodagas rabas dii. 9.00–17.00 Suoma áiggi.

Áššis dieđiha Lappi rádjegozáhus.

22.3. dii. 9.59 Korona leavai maiddái Ålándii

Ålánddas lea gávnnahuvvon guokte koronavirusnjoammuma, muitaledje eiseválddit lávvardateahkeda. Sáhka lea Ålándda vuosttaš koronadáhpáhusain.

Buohccán olbmot leaba nuorra ollesolbmot, geain ii leat oktavuohta nuppiideaskka. Buohccán olbmot leaba karantenas iežaska ruovttuin.

22.3. dii. 9.32 Oahpahusministtar Andersson: Allet doalvvo mánáid skuvlii, jos ii leat bággu

Oahpahusministtar Li Andersson (gurut) čálii lávvardateahkeda sosiála medias dan bealis, ahte vánhemat árvvoštalaše hui dárkilit, ahte dolvotgo mánáideaset skuvlii vai eai. Andersson čálii Facebookas ja Twitteris, ahte jos du mánná lea árabajásgeassimis dahje 1.-3. luohkáin, ale doalvvo su lagašoahpahussii, jos ii leat bággu.

Andersson dadjá dán leat beaktileamos vuohki njoahcudit koronavirusa dagahan dávdda leavvama ja doallat spiehkastatáigi nu oanehažžan go vejolaš.

22.3. dii. 9.07 Suopmelaš dálkasis sávvat veahki koronai

Turkulaš Faron Pharmaceuticals Oy dahkan Traumakine-dálkkas boktá dál olu beroštumi. Beroštumis muitala jo dat, ahte fitnodaga ossosa árvu loktanii badjel guovtte geardásažžan Helssega börssas. Beroštumi sivvan lea, ahte Traumakine jáhkkit fállat veahki koronavirusa dagahan geahpesdávdii ja geahpedit virusa dagahan jápmimiid.

Juovlamánus 2019 fitnodat ozai Amerihká dálkkaseiseváldi FDA:s lobi joatkit Traumakine dutkamušaid. Loahpas ožžo lobi ja iskosiid besset joatkit jođánahtton áigedávvala mielde.

21.3. dii. 15.32 Ođđa koronadáhpáhus Unjárggas - Romssas guokte ođđa dáhpáhusa

Unjárggas lea sihkkarastojuvvon ođđa koronadáhpáhus. Buohccán olmmoš lea leamašan karantenas njukčamánu 18. beaivve rájes, iige leat dárbbašan buohcceviessodivššu.

Romssas leat guokte ođđa sihkkarastojuvvon dáhpáhusa. Romssa guovllus leat oktiibuot 21 sihkkarastojuvvon njoammuma dán rádjai.

Áššis muitala NRK.

Norggas leat dál buohkanassii 1 926 sihkkarastojuvvon njoammuma. 148 olbmo dikšot buohcceviesuin.

21.3. dii. 15.24 Ruoŧa beale virusii leat jápmán 20 olbmo

Ruoŧas koronavirusii jápmán olbmot leat dál 20, muitalit riikka eiseválddit dieđáhusastis lávvardaga. Ruoŧa bealde leat oktiibuot 1 746 sihkkarastojuvvon njoammamu.

Eanáš oassi Ruoŧa koronadápáhusain leat Stockholmma guovllus.

21.3. dii. 15.09 Vuosttas olmmoš jápmán koronavirusii Suomas

Suoma dearvvašvuođa- ja buresveaddjinlágádus THL dieđiha, ahte COVID-19 -dávdii buohccán olmmoš lea jápmán Suomas. Dat lea Suoma vuosttas koronavirusa dagahan jápmu.

Pasieantta lei vuorrasut olmmoš, ja son gulai Helsset-Uusima HUS buohccedikšunbirii. Pasientta jámii bearjadaga, 20. beaivve.

THL ii atte eambo dieđuid áššis suodjalandihte priváhtavuođa.

21.3. dii. 15.04 Guovdageainnu suohkanis duppal kriisa

Guovdageainnu suohkan lei guhká rahčan heajos ruhtadiliin, muhto dál dilli orru mannamin fas fuonit guvlui. Suohkana jođiheaddji Hans Isak Olsen ballá mo geavvá erenomážit smávva fitnodagaide, mat barget mátkeealáhusain. Giđđadálvi ja beassážat leat guovllu turismma dehálamos áiggit.

– Mis leat hui olu smávva fitnodagat, nuppelot čuođi ovttaolbmofitnodaga. Mun veahá balan sin boahtte áiggis, mot dat šaddá dál, muitala Olsen NRK Sápmái.

Korona lassin fuones guohtun áitá boazodoalu. Norgga bealde ballet juobe 200 000 bohcco nealgut jámás.

Loga olles ášši NRK Sámi -siidduin.

21.3. dii. 14.03 Suomas 521 sihkkarastojuvvon njoammuma

Suomas leat dán rádjai 521 labotoriijas sihkkarastojuvvon njoammuma, muitala dearvvašvuođa- ja buresveaddjinlágádus THL. Mearri lea sturron ievttážis 71:in. Suomas leat dutkan dássážii 7300 čájánasa.

Buohccán olbmuin Suomas 61 proseanta leat dievddut ja 39 proseanta nissonat.

Olles máilmmis leat raporteten sullii 230 000 njoammuma 176 sierra riikkas. Eanaš oassi dain, badjel 100 000 dáhpáhusa, leat Eurohpás.

Logut eai leat dárkilit, daningo iešguđege riikkas lea earálágan testenvuogádat.

21.3. dii. 12.40 HUS guovllus 53 ođđa njoammuma

Helsset-Uusimaa buohccedikšunbires leat gávnnahan bearjadaga 53 ođđa njoammuma. Dat lea alimus lohku dán rádjai ovtta jándoris gávnnahuvvon njoammumiin. HUS infekšuvnnaid bajitdoavttir Asko Järvinen mielde dat muitala das, ahte dávda lea leavvagoahtán johtilabbo.

Njoammumiid joavkkus leat sihke olgoriikkain álgán njoammunbálgát sihke Suoma siskkáldas njoammunbálgát, muhto oasis njoammumiin eai dieđe, gos dat leat vuolgán.

21.3. dii. 11.22 Koronavirus leavvá miehtá Eurohpá - Itálias duháhiid mielde njomohallan

Koronavirusepidemiija leavvá fárttain Eurohpás, vaikko máŋggat Eurohpá riikkat leat gidden rájáid ja olbmuid johtima leat ráddjen.

Itálias leat gávnnahan duháhiid njoammumiid juohke beaivve dán vahkus. Itálias leat maid gieldán ollásit buot johtima olgun, jus ii leat bákkolaš sivva. Itálias leat jápmán eambo olbmot koronavirusii go Kiinnás.

Espánnja, Frankriikkas ja Duiskkas koronanjoammumat čuvvot Itália. Espánnjas ja Frankriikkas lea maid olgun johttin gielddus, Duiskkas gielddus lea fámus dušše Baijer guovllus. Espánnjas ja Frankriikkas jámut leat lassánan johtilit.

Olgun johttima ja olbmuid čoahkkaneami ráddjejit ain eambo miehtá Eurohpá. Boahtte vahku álggus skuvllat giddejuvvojit maiddái Stuorra-Británnias.

Loga eambo Eurohpá dilis suomagillii dáppe.

21.3. dii. 10.42 Norrbottenis sihkkarastojuvvon vuosttas njoammun, mas ii leat oktavuohta eará njoammumiidda

Davvi-Ruoŧas, Norrbottena leanas lea sihkkarastojuvvon vuosttas koronajoammun, mas ii leat oktavuohta olgoriikkaide, olgoriikkain fitnan olbmuide dahje Ruoŧa siste mátkkoštan olbmuide. Virusa njoammunbálggis ii leat dieđus.

Norrbottenis leat 17 sihkkarastojuvvon koronapasieantta. Golbma sis leat buohcceviessodivššus.

21.3. dii. 10.28 Ráđđehus lea gárvvis ráddjet johtima Uusimaa ja eará riikka gaskkas

Stáhtaminister Sanna Marin dajai lávvardaga Yle Ykkösaamu -tv-sáddagis, ahte Suoma ráđđehus lea gárvvis ráddjet olbmuid johtima Uusimaas nappo oaivegávpot guovllus eará guovlluide Suomas, jus koronadilli vearrána.

Ášši ii vel leat áigeguovdil, muhto ráđđehus čuovvu dili beaivválaččat.

Stuorámus oassi Suoma koronanjoammumiin leat máddin, Uusimaa guovllus.

21.3. dii. 9.20 Stáhtaminister Marin Yle iđit tv -sáddagis

Suoma stáhtaminister Sanna Marin lea otne lávvardatiđit Yle Ykkösaamu -sáddagis diibmu 10.05 ovddosguvlui. Son vástida koronavirusa ja Suomas álgán spiehkastatdili boktán gažaldagaide.

Sáddaga sáhttá geahččat Yle tv1:žis ja Yle Areenas.

21.3. dii. 9.12 Suodjegárvvut báikuin nohkamen – HUS gohcá vuoigŋansujiid geavaheami

Dearvvašvuođasuorggi bargiid geavahan suodjegárvvuid fidnemis Supmii leat leamašan váttisvuođat. Suodjegárvvuid fidnema lea váttásmahttán riikkarájáid gidden ja eará ráddjehusat Eurohpás.

Suoma stuorámus buohccedikšunbire HUS (Helsset-Uusimaa) lea ráddjegoahtán kriittalaš suodjegárvvuid geavaheami spiehkastatdili dihte.

Loga áššis suomagillii dás.

20.3. dii. 19.49 LME: Lappi mátkeealáhusdoaibmit galget váldit ovddasvástádusa

Lappi mátkeealáhus lihttu LME ávžžuha lahtuidis ja olles Lappi mátkeealáhusdoibmiid váldit dálá njuolggadusaid ja ávžžuhusaid duođas.

Lihttu mielde dearvvašvuođasuorggi ámmátlaččat leat gidden fuomášumi dasa, go Davvi-Suoma mátkeguovddážiin leat ain olu turisttat. Dearvvašvuođasuorggis leat fuolas dikšobáikkiid reahkkámis, jus epidemiija vearrána.

Dilli lea ekonomalaččat hástaleaddji, muhto lihttu lahtut galggašedje váldit ovddasvástádusa kundariid, bargiid ja servodaga dearvvašvuođas, lohket LME:s

20.3. dii. 19.15 Rájá geahččalit rasttildit lobi haga

Suoma rádjegozáhus muitala, ahte rájá geahččalit rasttildit eará sajiin go virggálaš rasttildanbáikkiin. Rádjegozáhus lea fidnen eambo resurssaid riikkarájáid gohcimii Suoma ja Ruoŧa rájá alde Durdnosis ja Perämeri guovllus.

Rádjegozáhus muittuha, ahte dárbbašmeahttun ja lobitkeahtes rájá rasttildeapmi sáhttá ráŋggáštuvvot.

20.3. dii. 18.59 Boles muittuha: Virusa lebben diđolaččat lea rihkus

Hämeguovllu bolesat muittuhit Twitteris, ahte koronavirusa diđolaččat lebben lea rihkus, mas sáhttá ráŋggáštuvvot.

– Jus lea diđolaš das, ahte lea ieš buozus muhto liikká lebbe virusa de dalle lea sáhka duođalaš rihkkosis, civkká boles.

Ášši birra čállá Ilta-Sanomat.

20.3. dii. 18.23 Jáhkkimis guktot čuoiganguovddáš-koronadáhpáhusat leat vuolgán Levis

Suoma bearaš- ja bálvalalusminister Krista Kiuru muitalii bearjadaga, ahte Lappi čuoiganguovddážiin lea vuolgán koronanjoammun. Kiuru ii namuhan man guovddážis lea sáhka.

Roavvenjárgga guovddášbuohcceviesu infekšuvdnadoavttir Markku Broas mielde guktot koronavirusii buohccán olbmot leaba jáhkkimis njomohallan Levis. Soai eaba gullan seamma jovkui. Broas muitala, ahte guktot leaba leamašan Levis njukčamánu álggus.

Buohccedikšunbiret leat dál čielggadeamen ášši.

Máŋggat čuoigan- dahje čierastallanguovddážit giddejit milliideaset boahtte vahkus.

20.3. dii. 17.17 125 doaktára karantenas Levis ordnejuvvon skuvlejumi maŋŋá

Levis ordnejuvvui njukčamánu álggus ortopediija ja traumatologiija skuvlenbeaivvit, masa oassálaste lagabui 200 doaktára miehtá Suoma. Skuvlejumi maŋŋá okta doavttir buohccái koronavirusii.

125 doaktárii leat ávžžuhan báhccit karantenii.

Ovdamearkka dihte Helsset-Uusimaa buohccidikšunbire Hus doaibmasuorgejođiheadji Jarkko Pajarinen muitala, ahte badjel 20 Hus doaktára leat karantenas.

Áššis muitalii vuosttamužžan Helsingin Sanomat.

20.3. dii. 16.45 Davvi-Ruoŧas vuosttas koronanjoammun man álggu eai bastte čielggadit

Ruoŧa bealde Norrbottena leanas leat gávnnahan koronavirusnjoammuma vuorrasut olbmos, geas ii leat leamašan čielga kontákta koronavirusii buohccán olbmuin.

Norrbottenis leat oktiibuot 13 koronanjoammuma. Infekšuvdnadoavttir Anders Nytstedt mielde dát lea vuosttas, man álggu eai dieđe.

20.3. dii. 16.35 Čuoiganguovddážiid gidden sáhttá váikkuhit girdijohtolahkii

Čuoiganguovddážiid gidden sáhttá váikkuhit Finnair girdijohtolahkii beassážiid áigge. Finnair lea geahpedan fitnodaga girdijohtolaga olu, muhto plána mielde lea galgá girdit Avvilii, Gihttelii ja Guossámii beassážiid áigge.

Finnair dieđiheamis muitalit, ahte fitnodat sáhttá šluhttet beassášgirdimiid. Finnair dieđiha áššis neahttasiiddustis.

20.3. dii. 16.05 Davvi-Norggas 32 njoammuma

Romssa ja Finnmárkku guovllus leat gávnnahan dál oktiibuot 32 njoammuma, muitala Norgga álbmotdearvvašvuođainstituhta.

Norggas leat gávnnahan oktiibuot 1741 njoammuma dán rádjai, ja virusii leat jápman čiežas.

20.3. dii. 15.37 Suomas 450 koronanjoammuma – viđas beavttálmahttojuvvon divššus

Suoma dearvvašvuođa- ja buresveadjinlágádusa mielde Suomas leat testejuvvon sullii 450 koronaviruspositiiva. Dán rádjai leat testen oktiibuot sullii 6500 olbmo. Lohku lea duohtavuođas stuorát, daningo buot eahpádusat eai leat testejuvvon.

Seaŋgaossodatdivššus leat dál 17 pasieantta, beavttálmahttojuvvon divššus vihtta ja moattis leat beassan buohcceviesus ruoktot.

20.3. dii. 15.20 Čuoiganguovddážiin vuolgán njoammunbálggis

Lappis čuoiganguovddážiin galledan ruovtturiikka mátkkošteddjiin leat gávnnahan koronanjoammumiid. Sii leat maiddái njoammudan eará olbmuid, muitala bearaš- ja bálvalanminister Krista Kiuru.

Goittot okta buohccán olbmuin gullá Vaasa dikšunbirii.

– Dáhpáhusat eai leat vel máŋga, muhto dat čájeha man duođalaš dat dilli lea, lohká minister Kiuru.

20.3. dii. 15.10 Minister Kiuru: Suomas lasihit testenkapasitehta ja beavttálmahttojuvvon dikšobáikkiid

Sosiála- ja dearvvašvuođaministeriija dieđihandilálašvuođas bearaš- ja bálvalanminister Krista Kiuru muitalii, ahte Suoma ulbmilin lea duppalastit beavttálmahttojuvvon dikšobáikkiid sihke loktet testenkapasitehta.

Dálá dilis Suomas sáhttet leat 300 olbmo beavttálmahttojuvvon divššus ain hávil, muhto ulbmilin lea oažžut 1000 báikki.

Njoammumiid testenkapasitehta loktejit dál 2300 čájánassii beaivvis. Suomas lasihit čájánasaid váldin báikkiid, čájánasaid gieđahallet beaktilabbot sihke háhkat ođđa rusttegiid.

Maiddái eará čuohpadusaid sirdet vejolašvuođaid mielde, vai beavttálmahttojuvvon dikšobáikkiid oaččošedje guorusin.

Áššis eambo suomagillii dáppe.

20.3. dii. 14.45 Čierastallanguovddážat mannet gitta

Suoma stuorimus čierastallanguovddážat Ylläs, Pallas, Olos, Luosto, Levi sihke Roavvenjárgga Ounasvaara mannet gitta boahtte vahku bearjadaga, 27. beaivve, koronavirusa dihte.

Maiddái Ruka ja Pyhä giddejuvvo jáhkkimis boahtte vahku bearjadaga.

Loga áššis suomagillii dás.

20.3. dii. 13.50 Buot 1.–3. luohkálaččat ožžot dattetge searvat lagašoahpahussii

Buot 1.–3. luohkálaččaide fállet dattetge lagašoahpahusa, jus lea dárbu. Suoma ráđđehus gomihii eavttu, ahte lagašoahpahussii oaččošedje oassálastit dušše dat oahppit, geaid váhnemat barget nu gohčuduvvon servodahkii krihtalaš surggiin.

Ráđđehus goittotge ávžžuha báhccit gáiddusoahpahussii, jus dat lea vejolaš.

Bajit luohkáid ohppiide oahpahus ordnejuvvo ain dušše beare gáiddusin.

20.3. dii. 13.30 Sanila-Aikio čalmmustahttá sámeboarrásiid somes: "Sii leat nannosamos giela ja kultuvrra guoddit"

Suoma Sámedikki ovddeš ságajođiheaddji Tiina Sanila-Aikio muittuha Twitteris, boarrásiid mearkkašumis sámekultuvrii ja -gielaide. Son oaivvilda, ahte danin ii leat vástolaš báhtarit koronavirusa Sápmái, gos eanáš oassi sámeboarrásiin ásset.

– Boarrásat leat buot nannosamos giela ja kultuvrra guoddit sihke sirdit. Mis ii leat várri massit sin, čállá Sanila-Aikio.

20.3. dii 13.19 Eanodagas gávpi doaimmahišgoahtá biepmuid miehtá gieldda

K-Market J Ad Rantakokko doaimmaha borramuš- ja eará gálvvuid Eanodagas vahkus 13.

Diŋgojumiid sáhttá sáddet gávpái šleađgapoasttain dahje telefovnnain.

Doaimmahusat johtet vuossárggaid Muotkejávri-Bálojohnjálbmi-Gárasavvon guovllus, gaskavahkuid Leaibejávri-Bálojávri-Neahkkil guovllus ja bearjadagaid Vuottesjávri-Bealdovuopmi-Njunnás guovllus.

Gávpi lea várren diibmu 8–9 riskajovkui. Sámis maiddái eará gávppit leat almmuhan das, ahte doaimmahit borramušgálvvuid ruovttuide.

20.3. dii. 13.11 Sámedikki dievasčoahkkin ja válgabaji rahpandoalut maŋiduvvojit

Sámediggi lea mearridan, ahte dan cuoŋománu dievasčoahkkin ja válgabaji 2020-2023 rahpandoalut maŋiduvvojit koronavirusdili dihte.

Sámedikki stivra lea ikte, njukčamánu 19. beaivve gieđahallan čoahkkimistis dárkilut doaibmabijuid koronavirusdilis.

Sámediggi čállá dieđahusastis, ahte dat vuođđuda spiehkastatdili gearggusvuođajoavkku, mii addá dárbbu mielde dievasmahtti dahje eará rávvagiid dillái.

Gearggusvuođajoavkku jođiha ságadoalli Tuomas Aslak Juuso ja dan áššemeannudeaddji lea hálddahushoavda Pia Ruotsala-Kangasniemi. Gearggusvuođajoavkku eará lahtut leat vuosttaš várreságadoalli Anni Koivisto, nubbi várreságadoalli Leo Aikio ja láhkačálli Kalle Varis.

– Leat áibbas ođđa dilis ja lea dehálaš, ahte bastit dorvvastit Sámedikki vuođđodoaimmaid maiddái dán rievdan dilis, Tuomas Aslak Juuso lohká Sámedikki dieđahusas.

Sámediggi lágidan seminárat, dilálašvuođat ja dáhpáhusat šluhttejuvvojit miessemánu loahpa rádjái ja čoahkkimiidda oassálastojuvvo gáiddusoktavuođa bokte.

20.3. dii. 13.03 Romssa buohcceviesus vuosttas beavttálmahttojuvvon divššus

Vuosttas koronaviruspasientta lea sirdojuvvon beavttálmahttojuvvon dikšui Romssa universitehta buohcceviesus. Pasientta lea vuorrasut olmmoš, muitala NRK Trømso ja Finnmark.

Romssa ja Finnmárkku guovllus leat oktiibuot 28 olbmo, geain leat diagnoserejuvvon koronavirus.

20.3. dii. 12.55 Siida luopmuda bargiidis

Sámemuseavuođđudusa stivra mearridii čoahkkimisttis 18.3.2020, ahte dat luopmuda čieža Sámemusea Siidda bargi. Sámemuseas lea oktiibuot 16 bargi.

Luopmudemiid sivvan lea dat, go Sámemusea ja luondduguovddáš Siida lea gitta koronavirusepidemiija dihte.

20.3. dii. 12.47 Presideanta Niinistö deattuha olbmuid ovddasvástádusa

Dásseválddi Presideanta Sauli Niinistö leamaš odne Yle spesiálajearahallamis. Son deattuhii garrasit dan, ahte juohkehaččas lea dál ovddasvástádus dáistalit koronavirusa vuostá.

Dán ovddasvástádussii gullá dat, ahte čuovvu njuolggadusaid ja ávžžuhusaid.

Suoma stáhta lea ávžžuhan garvit buot sosiála kontavttaid. Earenoamážit dat ávžžuhus guoská badjel 70-jahkásaš olbmuid, geaid geatnegahttet bissut karantenalágán dilis.

Suomas lea leamaš garra ságastallan das, go badjel 70-jahkásaš olbmot eai buohkat čuovo njuolggadusaid das, ahte galggašii garvit sosiála kontavttaid.

– Mii galgat ieš dahkat doaibmabijuid, min iežamet oasil ja oktavuođas eará olbmuide, lohká Niinistö.

Presideantta Niinistö jearahallama beassá guldalit Yle Areenas.

20.3. dii. 12.34 Ráđđehusas 15 miljardda doarjjapakeahtta fitnodagaide ja bargosajiide

Suoma ráđđehus lea odne almmustahttan 15 miljardda euro doarjjapakeahta suodjalandihte fitnodagaid ja bargosajiid. Dasa lassin dat addá riikkabeivviide lassebušeahtaárvalusa.

Lassebušeahtta lea 400 miljuvnna euro. Fitnodatdoalliide lea boahtimin gaskabottosaš dorvu bargguhisvuhtii. Áššis sáhttá lohkat eanet suomagillii dáppe.

20.3. dii. 10.49 Lappi guovllus guđat sihkkaraston koronavirusnjoammun

Lappi buohccedikšunbiireguovllus almmuhuvvui ikte eahkes okta ođđa koronavirusnjoammun. Dat lea guđat sihkkaraston koronanjoammun Lappis.

Almmáiolmmoš lei ožžon dávdda váttuid, go lei máhccan ruoktot olgoriikkain.

20.3. dii. 10.20 Dieđut máilmmis: Italias 3 405 jápmán koronavirusa geažil

Odne lea juo nubbi beaivi, go Kiinná almmuha, ahte doppe ii leat riikka siste leamaš ollenge ođđa njoammumat statistihkaid mielde.

Italias leat dál jápmán eanet olbmot koronavirusa geažil, go Kiinnás, oktiibuot 3 405 olbmo.

Suomas lea vel ievttá veaigi loguid mielde 400 laboratoriijas sihkkarastojuvvon koronavirusnjoammuma. (19.3. dii. 14.35)

20.3. dii. 9.11 Suoma ráđđehus doarju Finnair-girdifitnodaga

Suoma stáhta meannuda eanemustá 600 miljuvnna euro sturrosaš stáhtadahkadusa Finnaira ruhtadandárbbuid várás. Dahkadus gáibida vel riikkabeivviid dohkkeheami.

Fitnodagaid ruhtadanreaiddut eai doaima dábalaččat koronavirusa leavvama dihtii. Finnair lea ráhkkaneamen dillái, mas dat soaitá dárbbašit bargoealáhagaid ruovttoluotta vai lasseruhtadeapmi sihkkarastojuvvo.

Suoma stáhta oamásta goasii 56 proseantta Finnair ossosiin.

Loga áššis eanet dán arktihkkalis.

20.3. dii. 9.01 Norga doarju Norwegian ja SAS -girdifitnodagaid

Norgga ráđđehusbellodagat lea soahpan guhtta miljardda Norgga ruvnnu nappo measta 500 miljuvnna euro doarjapakeahtas riikka girdinsuorgái. Ássis muitala ođasdoaimmahat NTB.

Loanadahkadusain 3 miljardda Norgga ruvnnu (250 milj. euro) čujuhuvvo Norwegianii ja 1,5 miljardda (125 milj. euro) SAS:ii.

19.3. dii. 20.16 Sádde jearaldagaid gielddahovdii dahje doaktáriidda

Eanodaga gielda lágida gieldalaččaide dieđihančoahkkima erenomaš vugiin bearjadaga gaskabeaivve. Ulbmilin lea muitalit gieldalaččaide koronavirusdiili váikkuhusain gieldda bálvalusaide.

Dieđihančahkkin lea bearjadaga 20.3.2020 diibmu 12 áigge youtube-kánalas ja doppe báikki alde leat gielddahoavda Jari Rantapelkonen, jođiheaddji doavttir Teemu Taulavuori ja njoammudávddain vástideaddji doavttir Sirpa Pajunen.

Dál berre smiehtastit maid sis háliida jearrat. Sidjiide sáhttá sáddet ovddalgihtii jearaldagaid čujuhussii mihku.nakkalajarvi@enontekio.fi.

19.3. dii. 18.31 THL: Koronaepidemiijas váddásamos dilli miessemánu beallemuttus

Suoma dearvvasvuođa- ja buresveadjinlágádus THL einnosta, ahte Suomas koronavirusepidemiijas váddásamos dilli lea áramustá miessemánu nuppi vahkus.

Ovdal THL árvalii, ahte epidemiija alimus dilli livčče cuoŋománu beallemuttus. Dát einnostus dahkkui ovdal go Suomas ásahedje ráddjendoaimmaid. THL bajit doavttir Tuija Leino muittuha, ahte einnostusat boarásnuvvet jođánit.

19.3. dii. 18.14 Ministeriijain ja foanddain ruđalaš doarjja kultursuorgái

Dáidaga ovddidanguovddáš Taike, oahpahus- ja kulturministeriija sihke stuorra suopmelaš foanddat áigut doarjut veahkkeruđain dáidda- ja kulttorsuorggi, mii lea gillán koronavirusa dihtii.

Ulbmilin lea juohkit sullii 1,5 miljovnna euro cuoŋománu áigge. Ministeriija čujuha 500 000 euro lasseruhtadeami Taikei. Maiddái Suoma foanddat nugo Suoma kulturfoanda, Jane ja Aatos Erkko foanda, Ruoŧŧelaš kulturfoanda, Saastamoinen foanda sihke Jenny ja Antti Wihuri foanda čujuhit ovttas heahtedoarjaga Taikei.

Buot ruhtadoarjagat juolluduvvojit Taike bokte, mii bidjá veahkkeruđat ohcanláhkái cuoŋománu loahpas. Vuosttažettiin veahkkeruđat juolluduvvojit oanehis veahkkeruhtan freelancer-dáiddáriidda.

19.3. dii. 17.22 Lasi rádjefávttat davás

Go Ruošša rádji biddjojuvvui gitta, logemiid rádjefávttaid leat kommanderen Suoma máttanuortaoasis davás doarjut Lappi rádjegozáhusa Suoma viesttarrájis. Viesttarrájis dárbbašuvvo eanet fávttaid, go ovdal doppe lea sáhttán johttit friija.

19.3. dii. 17.12 Buohccedikšuma vuoigŋanmáskkat nohkkagoahtán Suomas

Koronavirusa epidemiija dihte oassin Suoma buohccedikšunbiriin leat nohkkagoahtán vuoigŋanmáskkat bargiide. Sosiála- ja dearvvašvuođaministeriija gearggusvuođahoavda Pekka Tulokas muitala, ahte máskkaid mearri molsašuddet. Tulokas mielde máskkat leat ain muhtun veardde stáhta gearggusvuođavuorkkás. Olgoriikkain daid ii šat oaččo.

19.3. dii. 17.03 EU veahkeha eurohpálaččaid máhccat olgoriikkain ruoktot

EU kommišuvnna ságadoalli Ursula von der Leyen lohpida, ahte EU veahkeha lahttoriikkaid riikkavuložiid máhcat ruoktot. Sullii 100 000 olbmo háliidivčče máhccat iežaset ruovtturiikkaide, muhto girdimiid šluhttemat leat dagahan váttisvuođaid. Kommišuvdna áigu ovttasbargat lahttoriikkaiguin dan ovdii, ahte olbmot besset ruovttuideaset.

19.3. dii. 14.35 Suomas 400 koronanjoammuma

Suoma dearvvašvuođa- ja buresveadjinlágádusa mielde Suomas leat gávnnahan oktiibuot birrasiid 400 koronanjoammuma.

Lohku vuođđuduvvá labortoriain sihkkaraston loguide, maid THL lea čoaggán njuolga buohccidikšunbiriin.

Dás duohko njoammunlogut vuođđuduvvet dušše njoammudávdaregistara bokte addojuvvon loguide, muitalit THL:s.

19.3 dii. 14.00 Norgga ruvnnu kursa vulos

Norgga kruvnnu kursa lea gahččan vuolimus dássái 30 jahkái. Ovttain euroin oažžu dál 12,90 ruvnnu. Mediadieđuid mielde kurssat leat dál oalle vuollin, juoba heajumus dilis go goassige.

Maiddái Ruoŧa ruvnnu árvu lea gahččamin. Norgga stuorámus beaiveáviissa VG mielde sivvan lea ruhtamárkaniin riegádan panihkka koronavirusa dihte, man dihte maid börsakurssat leat mannamin vulošgovlui.

Maiddái Ruoŧa ruvnnu gursa čielgasit niedjan. Ovttain euroin oažžu dál 11 Ruoŧa ruvnnu. Ruhtadoalloáššedovdiid mielde sivvan lea dat, go dál ruhtaváriid sirdet nana valuhtaide dego euroi ja dolláriidda.

19.3. dii. 12.30 Vaikko mátkkošteami ja čoahkkanemiid leat ráddjen, de Davvi-Suoma čuoiganguovddážat leat dievva turisttat

Suopma lea otná duorastaga rájes ráddjegoahtán rádjerasttildeami riikka rájáid alde. Suopmelaččaid mátkkošteami eai goit vel leat ráddjegoahtán. Dat oidno bures Davvi-Suoma čuoiganguovddážiin, gosa suopmelaččat leat dollen luopmomátkái.

Helssetlaš Virve Reinikka muitala, ahte vihkkehalai dárkilit luopmomátkki davás.

– In ballan, muhto smihtten garrasit ášši. Jurddašeimmet goittotge, ahte boahtit deike dál, dáppe leat buoret dorvvus go Helssegi.

Loga áššis eanet dán arktihkkalis.

19.3. dii. 10.35 Ipmilbálvalusat streamejuvvojit

Ipmilbálvalusat doaimmahuvvojit doaisttážii nu, ahte dat leat sátneipmilbálvalusat ja báikki alde girkus leat dušše ipmilbálvalusa doaimmaheaddjit. Bismmaid rávvagiid mielde ipmilbálvalusat streamejuvvojit ja sáddejuvvojit neahta bokte guđege searvegotti vejolašvuođaid mielde. Áššis sáhttá lohkat eanet girku sámebarggu Facebook-siidduin.

Ovdamearkka dihte Anára searvegoddi muitala, ahte sin ipmilbálvalusaid sáhttá čuovvut neahttaradios ja vejolaččat maid Facebook bokte livesáttan.

Sámebáhppa Mari Valjakka muitala, ahte Anára searvegoddi lea leamaš mielde rihppaskuvllaid digitálalaš ovdánahttinfidnus ja danin sin digitálabálvalusaid ordnen leat buori vuođu alde.

Yle Sámi radiokanálas gullo rohkos juohke vuossárgga diibmu 10.00–10.30 ja nuppádassii maŋŋebárgga 14.00–14.30. Prográmmaid sáhttá guldalit maid Yle Areena bokte.

19.3. dii. 10.08 Unjárga gidde gielddarájá

Unjárgga gielda Norgga bealde lea mearridan giddet gielddarájá, čállá NRK Sápmi. Dat olbmot, geat eai ása Unjárggas, eai oaččo šat mannat barttaide eaige mátkkoštit almmolaš máđiijaid mielde. Dan lea Unjárgga gielddadoavttir mearridan vai nagodit koronavirusnjoammumiid.

Gielddus ii guoskka gádjunveagaide iige daidda olbmuide, geat leat jo Unjárggas ja áigot máhccat ruoktot. Gielddadoavttir maid rávve gieldda ássiid joreštit unnimus lági mielde gieldda rájáid olggobealde.

19.3. dii. 10.00 Suopma áigu skáhppot ođđa koronavirusteasttaid

Suopma lea skáhppome ođđalágan teasttaid koronavirusnjoammumiid testemii.

Dassážii Suomas leat gávnnahan 359 njoammuma, muhto duohtavuođas lohku lea stuorát, dasgo buohkaid geat buohccájit koronavirusii, eai teste.

Sosiála- ja dearvvašvuođaministeriija bajithoavda Päivi Sillanaukee dadjá, ahte geahččala skáhppot ođđa teasttaid dakkaviđe, go dat bohtet márkaniidda.

Dáppe gávnnat artihkkala, man leat beaivádan 19.3. rádjái.

Varrasamosat

Muualla Yle.fi:ssä