Sápmi |

Veahkkeriektekánsler: Deanu guolástusrivttiid láigoheamis eai leat rihkkon lága  

Deanu giddodatoamasteddjiid searvi guoddalii eana- ja meahccedoalloministeriija ja Lappi EBI-guovddáža meannudeamis geassemánus 2019 riektekánslerii.

Mikko Puumalainen
Mikko Puumalainen cealká, ahte Deanu guolástusrivttiide laktáseaddji meannudeapmi ii dagat doaimmaid su oasil. Govva: Yle

Deanu giddodatoamasteaddjiid searvi čállá guoddalusastis, ahte Deatnogátti fástaássiin leat buoret guolástusvuoigatvuođat, go dain guolástanrievtti hálddašeaddjiin, geat orrot eará sajis go Deanu čázádaga guovllus.

Searvi bivddii riektekánslera dutkat ministeriija ja EBI-guovddáža doaimmaid guolástuslobiid láigoheamis ja priváhtalohpevuovdimis.

Veahkkeriektekánsler Mikko Puumalainen cealká, ahte sutnje doaimmahuvvon dieđuid mielde Deanu guolástusrivttiid láigoheamis eai leat rihkkon lága.

– Dan oasil go guoddaleames lea gažaldat eana- ja meahccedoalloministeriija ja Lappi ealáhus-, johtolat- ja birasguovddáža meannudeames Deanu soahpamuššii guoski lágaid heiveheamis, in leat čielggademiid vuođul oaidnán áššis dakkár doaimmaid, mat leat lága vuostá dahje muđuid meannuduvvon boastut, cealká Puumalainen.

Puumalainen cealká maid, ahte meannudeapmi ii dagat eanet doaimmaid su oasil.

LK: Giddodatoamasteaddjit eai duđa mearrádussii

Deanu giddodatoamasteaddjiid searvvi ságadoalli Veikko Rintamäki ii leat duđavaš veahkkeriektekánslera vástadussii. Rintamäki dadjá Lapin Kansa -aviisii, ahte sii eai áiggo duhtat veahkkeriektekánslera čovdosii.

Veikko Rintamäki
Deanu giddadatoamasteaddjiid searvvi ságadoalli, bártaeaiggát Veikko Rintamäki mielas sin rivttiid leat duolbman guolástanlobiid láigoheamis. Govva: Harry Johansen / NRK

Rintamäki mielde sáhka lea das, ahte muhtin giddodatoamasteaddjit massájedje mannan geasi sidjiide gullevaš rivttiid ja báhce luossalobiid haga. Báikegoddelaš giddodatoamasteaddjiide leat measta 50 000 lohpejándora, go fas olgobáikegoddelaš dáluid oamasteaddjit ožžot dušše jándorlobiid dan mielde maid sii oamastit eatnamiid.

Deanu giddodatoamasteaddjiid searvi lea vuođđuduvvon vuodjit olgobáikegoddelaš giddodatoamasteaddjiid áššiid Deanu guolástussoahpamuššii guoskevaš gažaldagain.

Veahkkeriektekánsler: Ođđa ráđđádallamat álgimin ja dain sáhttá buktit ovdan oainnus

Veahkkeriektekánsler Mikko Puumalainen gidde fuomášumi maid dasa, ahte Suopma ja Norga leat dál álggaheamen ođđa ráđđádallamiid Deanu guolástusnjuolggadusa ođadeames. Ministeriija lea dagahan soahpamuša váikkuhusain olggobeale árvvoštallama, masa leat čohkken sierra oassebeliid oainnuid áššis.

Ministeriija mielde riektegažaldagaid lassin dán guorahallamis gávnnahedje máŋggaid vugiid geahpedit soahpamuša dagahan hehttehusaid ja buoridit dálá dili.

Guolástusrivttiid hálddašeaddjiid váldin fárrui ráđđádallan- ja árvvoštallanproseassaide lei okta vuohki, mainna soahpamuša sáhttá oažžut buorebut dohkkehuvvot. Ministeriija áigu joatkit oassebeliid gullama earet eará bargobájiiguin.

Deanu njuolggadussii gullevaš rievdadandárbbuid lei vejolašvuohta cealkit njukčamánu álggu rádjái, ja ášši olis leat ordnen maid ságastallandilálašvuođa Ohcejogas.

Veahkkeriektekánsler Puumalainen muittuha njukčamánu 25. beaivvi addojuvvon cealkámušastis, ahte guolástusnjuolggadusa guoskevaš ráđđádallan- ja árvvoštallanproseassaide oassálastin lea sierra oassebeliide buorre vuohki buktit ovdan iežas vuođuštuvvon oainnuid ja váikkuhit guolástussoahpamuša, man leat ođasmahttimin, sisdollui.

Varrasamosat: Sápmi

Váldoođđasat

Varrasamosat

Muualla Yle.fi:ssä