Sápmi |

Veahkkeriektekánsler moaitá bargo- ja ealáhusministeriija sápmelaččaid rivttiid rihkkumis – ministeriija ii gullan sámedikki ruvkelága nuppástuhttimis

Almmolaš váldi galgá fuolahit álbmogii vejolašvuođa váikkuhit eallinbirrasii guoskevaš mearrideapmái, cealká veahkkevuoigatvuođakánsler Mikko Puumalainen.

Apulaisoikeuskansleri Mikko Puumalainen.
Veahkkeriektekánsler Mikko Puumalainen mielas Suoma vuođđoláhka geatnegahttá gullat Sámedikki stuorra láhkafidnuin dego ruvkelága nuppástuhttimis. Govva: Yle

Veahkkeriektekánsler Mikko Puumalainen moaitá Suoma bargo- ja ealáhusministeriija sápmelaččaid váikkuhanvejolašvuođaid healbadeames ja das, ahte ministeriija ii ráđđádallan jagis 2016 ruvkelága nuppástuhttimis sámedikkiin dego sámediggeláhka geatnegahttá.

Veahkkeriektekánsler gidde fuomášumi dasa, ahte ruvkelága nuppástuhttinevttohus lea olles servodahkii ja earenoamážit sápmelaččaide eamiálbmotrivttiid dáfus mearkkašahtti.

– Almmolaš váldi galgá fuolahit juohkehažžii rievtti dearvvaslaš birrasii ja vejolašvuođa váikkuhit su eallinbirrasii guoskevaš mearrideapmái, cealká veahkkeriektekánsler Mikko Puumalainen.

Veahkkeriektekánsler Puumalainen muittuha golggotmánu 3. beaivvi addojuvvon cealkámušastis, ahte riikkabeivviid birasváljagoddi lea maid gávnnahan, ahte ruvkelága nuppástuhttinevttohus heajuda oassálastima dihto dáhpáhusain. Dakkárat leat ovdamearkan dilit, main ruvkelohpeohcamuš lea juo dahkkon ja ollašuhttinmolssaeaktu válljejuvvon.

Veahkkeriektekánsler cealkámuša sáhttá fitnat lohkamin dáppe. Veahkkeriektekánsler moittii árat dán vahkus maiddái Kela sámegielat bálvalusaid ordnemis.

Ruvkelága nuppástuhttin bođii fápmui jagis 2018.

Varrasamosat: Sápmi

Váldoođđasat

Varrasamosat

Muualla Yle.fi:ssä