Sápmi

Veikko Palttos lei logi diimmu boahkuhanmátki – ránnjá háliidii fuolahit ustibis mátkkiin ja goluin

Veikko Paltto
81-jahkásaš Veikko Paltto oaččui koronaboahkuhusa, go su ustit veahkehii su beassat Avvila dearvvašvuođaguovddážii. Govva: Vesa Toppari / Yle

Álbmotealáhatlágádus Kela ii vel mávsse ahkeolbmuid mátkkiid boahkuhussii, muhto dilli boahtá nuppástuvvat.

Go Anárjávrri duohkin vuolgá boahkuhanmátkái Avvilii, áigi ja ruhta bullet.

Anára Čuolisvuonas orru Veikko Paltto lea 81-jahkásaš, iige okto livčče arvan vuolgit mátkái, vaikko boahkuhusa háliidiige váldit.

– Vuolggán luohttevaš mielain. Ii dárbbašan guhká hálahit. Juos dat vel veahkeha heakka seailumis guhkibut, árvalii Paltto ovdal reaissu.

"Háliidan atnit buorre ustibis fuola"

Lappi buohccedikšunbires ahkeolbmuid boahkuheamit leat ovdánan bures. Álbmotealáhatlágádus Kela ii vel mávsse sin mátkkiid boahkuhussii, muhto dilli boahtá nuppástuvvat.

Veikko Paltto ja Olavi Nousiainen lähdössä Ivaloon koronavirusrokotetta saamaan.
Oasi mátkkis galggai dieđus mohtorgielkkáin johttit. Govva: Vesa Toppari / Yle

Veikko Palttos deaivvai lihkku, go su ránnjá háliidii veahkehit su. Paltto ustit lei gearggus máksit buot boahkuhanmátkki goluid.

– Dás leat guokte ášši: mu sielu ruoktu lea Anára meahcceguovllus ja nubbin, atnit buorre ustibis Veikkos fuola, muitala Olavi Nousiainen.

500 ahkeolbmo Anáris boahkuhuvvon

Dán rádjái Anára gielddas vádjit 500 ahkeolbmo leat ožžon boahku. Dat ahkeolbmot, geat vel ruovttus birgejit, leat bieđgguid birra gieldda ja mátki boahkuhansadjái soaitá leat oalle guhkki.

Peruspalvelujohtaja Mirja Laiti Ivalon terveyskeskuksessa.
Rabasbálvalushoavda Mirja Laiti jurddaša, ahte dárbu boahkuhanmátkkiid buhtadeapmái gal livčče. Govva: Vesa Toppari / Yle

Anára rabasbálvalushoavda Mirja Laiti muitala, ahte giige ii leat máksán ahkeolbmuid mátkegoluid.

– Dieđusge livčče buorre, ahte daid mátkegoluid oaččošii ohcat dan rájes, go dat boahkuhusat lea álgán, Laiti árvala.

Boahkuheamit álge ođđajagimánus.

Čuovvovaš háve geassemánus

Veikko Paltto boahkuhanmátki manai bures. Ođđa áigi nannenbiikka varas lea juo várrejuvvon geassemánnui. Ránnja Olavi Nousiainen ii leat nuge fuolas mávssuin, gohan beare beassaba johtui.

Veikko Paltto ja Olavi Nousiainen Ivalon terveyskeskuksen edustalla kasvomaskeissaan.
Olavi Nousiainen fuolahii Veikko Paltto gitta Avvila dearvvašvuođaguovddážii koronavirusboahkuhusa váldit. Govva: Vesa Toppari / Yle

– Justa ságastallen dearvvašvuođadivššáriin ja čuovvovaš áigi lea geassemánu beallemuttus sulain. Sávvamis Anárjávrris leat jieŋat vuolgán ja rabas čázit vai mii beassat Veikko fatnasiin viežžat deike, Nousiainen juo pláne.

Paltto ieš lea dan oaivilis, ahte logi diimmu reaisu boahkuheapmái lei gánnehahtti.

– Dál lea buorre, Paltto lohká.

Dán áššis oainnát lasi beaivvi Yle Ođđasat -sáddagis. Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat

Muualla Yle.fi:ssä