Sápmi |

Vel eahpesihkkar, ahte bessetgo Ohcejogas álgit skuvlabarggu divoduvvon skuvlaguovddážis

Ohcejoga skuvlaguovddáža galge giđđat evakueret heajos sisáimmu dihte. Geasi áiggi skuvlaguovddážis leamaš divvunbarggut jođus.

Ohcejoga skuvlaguovddáš
Govva: Vesa Toppari / Yle

Boahtte vahkus álget maiddái Ohcejoga gielddas skuvllat. Goittotge dál vahku ovdal ii leat velá sihkkar, gos oahppit álggahit skuvlajagiset. Ohcejoga čuvgehushoavda Laura Arola dadjá, ahte dán muttus skuvlaveahka vuordá dieđu sisáimmu mihtideami bohtosiid. Sisáimmu mihtidit dán vahkus ja bohtosat čilget loahppavahkus. 

– Dál vuossárgga eat dieđe vel sihkkarit, muhto jáhkkimis skuvla beassá álgit skuvlaguovddážis. Dál giddodaga leat čorgemin ja dan maŋŋá ferte mihtidit vistti sisáimmu ja geahččat, ahte sáhttágo doppe leat, dadjá Laura Arola.

Ohcejoga skuvlaguovddáža sisáibmováttisvuođat dihttogohte giđđat. Cuoŋománus mearridedje sirdit skuvllalaččaid ja bargiid eret skuvlaguovddážis go áibmomolsuma bokte sisáibmui besse lássaulluid fiberat ja olbmot reageregohte daidda. 

Ohcejoga huksendárkisteaddji Markku Porsanger.
Ohcejoga huksendárkisteaddji Markku Porsanger. Govva: Kaisa Aikio / Yle

Ohcejoga teknihkalaš hoavda Markku Porsanger mielde sisáibmováttisvuođat álge giddodagat ortnega dárkkisteami ja áibmomolsuma divodanbargguid álggaheami maŋŋá. Giddodaga áibmomolsuma buhtisteami oktavuođas lássaullut leavvagohte skuvlla sisáibmui.

– Go álggiimet burgit daid lássaulluid doppe áibmomolsunbohcciid birra, de leavvagođii lássaullogavja miehtá skuvlla ja dat dagahišgođii váttisvuođaid giđđat, dadjá Markku Porsanger.

Unnimus sámeluohkálaččat jotket Sirpmás skuvlabálgá – stuoribut Ohcejogas

Ohcejoga čuvgehushoavda Laura Arola dadjá, ahte vaikko skuvlaguovddáža sisáimmu ortnet lea velá eahpesihkkar, de okta ášši goit lea sihkkar. Unnimus sámeluohká oahppit nappo ovdaskuvllalaččain gitta njealját luohká rádjái jotket skuvlabálgáset Sirpmá skuvllas dál čakčat.

– Skuvla álgá Sirpmás vahku maŋŋelis go Ohcejogas dasto unnit sámeluohkálaččat jotket skuvllavázzima doppe.

Laura Arola dadjá, ahte jurddan lea, ahte stuorit sámeoahppit, suomagielat oahppit ja logahat oahppit fas vázzet skuvlla Ohcejogas. Jus sisáibmodutkamuša bohtosat čájehit, ahte skuvlaguovddážis sáhttá bargat, de dalle skuvlla álgá doppe.

– Muhtin bargit leat šaddan hui hearkin lássaulluide, jus sii eai gierdda skuvlaguovddáža sisáimmu, de lea vejolaš sirdit sin Áilegas-dállui, gos lea skuvlla geavahusas guokte lanja, dadjá Laura Arola.

Ohcejoga skuvlaguovddáža sisáibmováttisvuođat gusket birrasiid 80 skuvllalaččat, loginar logahatoahppi ja sullii 30 bargi.

Beaiveruovttut leat juo ovdalis mearridan, ahte eai máhca ovddeš doaibmalanjaideaset skuvlaguovddážii. Beaiveruovttut leat skáhppon eará sajis gilis alcceset doaibmabáikkiid.

Paráhkaskuvla ii geargga dán hohppui go miehtá Suoma dárbu seammaláganiidda

Miehtá Suoma leat váttisvuođat skuvlaguovddážiid ortnegiin ja heajos sisáimmuin. Maiddái Sámi guovllu gielddain leat seammalágan váttisvuođat. Ovdamearkka dihte Soađegilis ja Avvilis leat gártan ordnet ohppiid geavahussii nu gohčoduvvon paráhkaskuvllaid dahjege gaskaboddasaš lanjaid.

Mannán čavčča Avvilis válde atnui paráhkaskuvlla Avvila badjeskuvllas ja ovdalis Anár gielda lei ordnen maiddái Avvila vuolleskuvla šilljui paráhkaid. Maiddái Soađegilis lea gielda ordnen Soađegili márkana nuppi skuvlla oktavuhtii paráhkaid vai ožžot skuvlla doaimma váras ođđa sajiid sisáibmováttisvuođaid dihte.

Ohcejogasge leat guorahallan vejolašvuođaid paráhkaskuvllavisttid skáhppomii. Dán čakčii paráhkaskuvllat eai goittotge geargga. Stuorra jearaldat dihte paráhkaskuvllaid gártá vuordit máŋggaid mánuid, diehtá Ohcejoga huksendárkisteaddji Markku Porsanger.

– Mii eat leat áidna gielda, gos leat sisáibmováttisvuođat. Dat orrot leamen dás máttásguvlui oalle máŋgga sajis Suomas. Leat ožžon dieđu fitnodagain, ahte paráhkaskuvllaid vuordináigi lea sulaid 6-8 mánnui.

Ohcejoga čuvgehushoavda Laura Arola dadjá, ahte jus Ohcejoga skuvlaguovddáža sisáimmu dutkanbohtosat čájehit, ahte visttis ii sáhte vázzit skuvlla dahje bargat, de sii leat guorahallan čakčii maid eará vejolašvuođaid.

– Leat dutkan maid, ahte sáhttágo skuvlla vázzit Pohjantuli-hoteallas dahje Ohcejoga gielddadálus. Sisáimmu dutkanbohtosat mearridit, ahte maid dasto dahkat boahtte vahkus go skuvlla álgá.

Laura Arola mielde Ohcejoga gielddas leat dál maid válmmaštallamin ođđa skuvlla huksenplánaid. Politihkkárat mearridit galgetgo plánain ovdánit ja galgágo hukset ođđa skuvlla vistti, dadjá Arola.

Varrasamosat: Sápmi

Váldoođđasat

Varrasamosat