Sápmi

Viđát Skábmagovat-filbmaávžžuhus: Filmmat Perus, Sahas ja Sámis

Anni Koivisto
Skábmagovaid veahkkebuvttadeaddji Anni Koivisto. Govva: Xia Torikka / Yle

Skábmagovaid filbmaávžžuhusat -ráiddu maŋimuš oasis veahkkebuvttadeaddji Anni Koivisto ávžžuha oahpásmuvvat earret eará Perus, Saha dásseválddis ja Sámis bagadallon filmmaide.

Skábmagovaid dán vuoro maŋimuš filbmaávžžuhusaid addá veahkkebuvttadeaddji Anni Koivisto.

Koivisto ávžžuha olbmuid fitnat geahččamin guokte guhkesfilmma Perus ja Saha dásseválddis nappo Jakutias, mii lea guovlu Davvi-Ásias Nuorta-Sibirijá gaska- ja davviosiin. Daid lassin oaidninveara leat earret eará Sámi allaskuvlla ja Sámi oahpahusguovddáža studeanttaid bagadan varas filmmat.

Ná Koivisto muitala daid birra.

Sembradoras de vida

"Dán filmma sámegielat namma lea "Eatnama eatnit". Filbma boahtá Perus ja dan leaba bagadallan Alvaro Sarmiento ja Diego Sarmiento.

Sembradoras de vida
Badjin Peru Andiin nissonjoavku doallá eamiálbmogiid seremoniijaid ja rituálaid šattu sihkkarastima dihtii. Dálkkádatrievdan lea buktán eallimii hástalusaid, muhto nissonat figget sirdit dieđuideaset ja dáidduideaset čuovvovaš bulvii. Govva: Skábmagovat

Filbma muitala nissonolbmuin, geat vigget doalahit árbevieruideaset Peru Andi-váriin ja sirdit daid ovddosguvlui, vaikko dálkkádaga rievdan leage dahkan dan olu váddásabbon."

Sembradoras de vida čájehuvvo lávvardaga diibmu 10.00 sámekulturguovddáš Sajosis.

The Sun above me never sets

"Filmma bagadalli, sahalaš Lyubov Borisova lea leamaš ovdalge mielde Skábmagovain. Diibmá Skábmagovain čájehuvvojedje máŋga su buvttadan filmma, ja okta dain leige festivála bivnnuhamos filmmaid joavkkus. Lean gullan, ahte dát su bagadan The Sun above me never sets lea hui fiinnis.

The Sun Above Me Never Sets
Altan oažžu bargosaji ávdin sullos ja fuomáša, ahte sus lea doppe ránnjá – boaran Baibal ja su ártegis bivdagat. Baibal lea gearggus vádjolit ja bivdá gándda hávdádit su iežas eamida lahkosii. Altan geahččala dahkat buot visot vai boares almmái ealášii vel ovtta čáppa beaivvi. Govva: Skábmagovat

Filbma čuovvu Altana, guhte oažžu bargosaji ávdin sullos. Son oahpásmuvvá doppe ođđa ránnjáinis, geas soitet ártegis bivdagat."

Filbma čájehuvvo sotnabeaivve diibmu 10.00 sámekulturguovddáš Sajosis.

Čuovga ja seavdnjadas -čájáhus

"Dán čájáhusas leat mielde Sámi oahpahusguovddáža ja Sámi allaskuvlla studeanttaid filmmat, ovdamearkka dihte Anne Seipiharju Kielâmiäštáreh-filbma, mii muitala anárašgiela hálliin ja giellameaštáriin."

Čuovga ja seavdnjadas -čájáhus sisttisdoallá čieža studeantta filmmaid. Čájáhus lea bearjadaga diibmu 13.00 sámekulturguovddáš Sajosis.

Maiddái olu eará go filmmat

Vaikko Skábmagovat lea namalassii filbmafestivála, sisttisdoallá dat olu earáge go beare filbmačájáhusaid.

Veahkkebuvttadeaddji Anni Koivisto muitala, ahte festivála oktavuođas ordnejuvvojit ovdamearkka dihte máŋggalágan ságastallandilálašvuođat ja Skábmaklubba-eahketdáhpáhusat, main beassá gullat livemusihka, deaivvadit olbmuiguin ja vehá dánsestitge.

Skábmaklubbat ordnejuvvojit bearjadat- ja lávvardateahkediid sámekulturguovddáš Sajosis. Okta erenoamášvuohta dain lea bearjadateahkeda UAAJEERNEQ-máskadánsunčájáhus.

– Filmmaid lassin háliidan tipset, ahte mis lea máskadánsa Kalaallit Nunaattis dahjege Ruonáeatnamis. In leat ieš goassige dan oaidnán, muhto lean gullan, ahte dat lea fiinnis ja ahte dan gánneha boahtit geahččat. Dan maŋŋá de joatkit eahkeda Skábmaklubbas, muitala veahkkebuvttadeaddji Anni Koivisto.

Skábmagovaid olles prográmmakárta ja lassidieđut filmmain gávdnojit festivála neahttasiidduin.

Skábmagovaid filbmaávžžuhusat -ráidu oidno neahtas ja gullo rádios

Eamiálbmogiid filbmamáilmmis dehálaš filbmafestiválan šaddan Skábmagovat lea fas dán vahkus Anáris.

Skábmagovat čohkke juo 22. geardde filbmadahkkiid ja kulturberošteaddjiid miehtá máilmmi geahččat eamiálbmotfilmmaid. Festivála álgá duorastaga 23.1. ja bistá gitta sotnabeaivái 26.1. Dán jagi temán lea oktavuohta eatnamii. Festivála váldoguossit bohtet Mátta-Amerihkás, earenomážit Perus.

Festivála dáiddalaš jođiheaddji Jorma Lehtola, veahkkebuvttadeaddji Anni Koivisto ja filbmaguovddáš Skábma plánejeaddji Tarja Porsanger addet iežaset filbmaávžžuhusaid Yle Sámi kanálain juohke beaivve dán vahkus.

Neahta lassin ávžžuhusat gullojit rádios beaivválaččat Yle Sámi iđitsáddagis diibmu 7.00–8.00 ja nuppádassii veaigin Dearvva! Tiervâ! Tiõrv! -sáddagis diibmu 14.30–16.00.

Varrasamosat

Muualla Yle.fi:ssä