Säämi |

Vijmâg Njellim kiäinu tivvoom álgá

Kiäinu lii lamaš ihepuudâid hiäjus oornigist já tom tivomist lii lamaš saahâ siämmáá kuhháá. Kiäinu áiguh njuolgiđ já pieijâđ asfalt.

Njellim kiäinu
Njellim kiäinu tivvoom lii savastittâm jo ihepuudâid. Govva: Vesa Toppari / Yle

Čievrâmaađij Avelist Njellimân lii mokkáá já roggáá. Maaŋgah vyeijeeh láá jo ihepuudâid láittâm kiäinu hiäjus oornig. Puárádâspargoh kolgâččij älgiđ čuávuváá täälvi ääigi já pišteh muáddi ive.

Kuhes tivvoomäigi piäjá njellimlii Jane Helppi smiettâđ, et talle vyeijim sáttá leđe muálkkáá.

Njellimlâš Jane Helppi kiävttá Njellim kiäinu távjá.
Jane Helppi kiävttá Njellim maađij távjá. Govva: Vesa Toppari / Yle

– Tiäđust-uv sáttá leđe hástulâš, et luhhoost tobbeen láá ennuv tuoh moheh, et toh pargeh enâmustáá tuárispeln. Kalhân tast nuorbâs vissásávt šadda já maŋgii kalga orostiđ rááiđun já suáittiđ, et addâgâs ko maŋanuum, láittá Helppi.

Njellimlâš Tarja Arttijeff uáiná iänááš puorijd aašijd uđđâ maađijst.

Njellimlâš Tarja Arttijeff
Tarja Arttijeff hundâruš positiivlávt uđđâ maađijst. Govva: Vesa Toppari / Yle

– Tothân lii viehâ muálkkáá tot maađij, te jis tot lasseet torvolâšvuođâ, te lii pyeri. Já tiäđust-uv, ko smiättá auto, te šiäštá poossâmkoloin já lođđâseh pisoh pyereeb tiileest. Toh láá toh positiivliih ääših, smiättá Arttijeff.

Uđđâ maađijst šadda torvolub já kobdeeb

Maađij vuáđupuárádâsân lii mieđettum 10,4 miljovn eurod ive 2016. Kiäinu áiguh kobdediđ, njuolgiđ já pieijâđ oolâ oljočievrâase ađai asfalt. Uđđâ maađijst kolgâččij šoddâđ torvolâš já tuárvi kubduv Njellim sijdâ jotoluvân. Keijo Heikkilä jotolâhtoimâttuvâst iätá, et jotoluvâst sáttá pargoi ääigi moonnâđ váhá kuhheeb mut čuolmâid láá varriidâttum.

Proojeekthovdâ Keijo Heikkilä Jotolâhvirgáduvvâst.
Proojeekthovdâ Keijo Heikkilä jotolâhtoimâttuvâst. Govva: Liikennevirasto

– Luodâid porgâp tobbeen, kost jotolâh ij pyevti jotteeđ tááláá väävlist já tágárijd uccâ tuárispel luodâid vissásávt kolgâp porgâđ, mut kuhás piergip tááláin vávláin. Rähtip maađijpele vistig tâi talle jyeledep maađij aijuu, Heikkilä muštâl.

Puárádâspargo álgá juovlâmáánust tâi tállân, ko maađij rähtee kávnoo. Pargoh hettejeh jotoluv enâmustáá puáttee keesi. Tast maŋa jotteem šadda älkkeebin.

Varrasamosat: Säämi

Váldoođđasat

Varrasamosat

Muualla Yle.fi:ssä