Sápmi |

Vildá-duo lea evttohassan Music Moves Europe Talent -bálkkašupmái, man vuoiti fidne EU:s 10 000 euro

Bálkkašumi evttohasat leat ođđa násttit, geat leat ožžon iežaset ruovtturiikka olggobealde fuomášumi ja beroštumi.

Vildá
Vildá nappo Hildá Länsman ja Viivi-Maria Saarenkylä. Govva: Joanna Suomalainen

Ohcejohkalaš lávlu ja juoigi Hildá Länsman ja geasanasčuojaheaddji Viivi-Maria Saarenkylä Vildá-duo lea evttohassan Music Moves Europe Talent -musihkkabálkkašumi oažžun.

Music Moves Europe Talent (MMETA) lea jahkásaš dálá musihka bálkkašupmi, man ulbmilin lea ovddidit Eurohpalaš musihkkajoavkkuid máilmmeviidosaš beaggima ja ávvudit ihttábeaivve násttiid. Bálkkašumi evttohasat leat ođđa násttit, geat leat ožžon iežaset ruovtturiikka olggobealde fuomášumi ja beroštumi.

Beroštupmi olgoriikkain dihtto

Sáhka ii leat vuosttáš evttohasvuođas. Jagis 2019 Vildá Vildaluodda -skearru válljejuvvui Songlines jagi buorimus skearuid jovkui. Jagi 2020 bealde Vildá lea leamaš golmma sierra musihkkabálkkašumi evttohassan.

Vildá
Vildá Vuotalos, Helssegis 19.9.2020. Govva: Aija Lehtonen

Vildá musihkka lea čuodján radioin miehtá máilmmi, Amerihkas Eurohpa bokte álo gitta Afrihkkai ja Australiai. Duo lea maiddái geargan ovdanbuktit nu davviriikkain go maiddái ovdamearkka dihte Kánadas, Fránkriikkas, Spánnjas ja Bulgarias.

Vuoiti fidne 10 000 euro bálkkašupmi EU:s

Dán háve evttohasat leat 16. Evttohasaid válljemii geavahit dakkár vuogádaga, mainna čuvvot, man olu joavkkuin leat guldaleaddjit neahtas earáge riikkain go iežaset ruovtturiikkas.

Eurohpa uniovdna doarju MMETA-bálkkašumi vuittiid 10 000 euro ovddas. Uniovnna ulbmilin lea bálkkašit vuittiid bálkkašupmepakeahttain, mii veahkeha ain ovddosguvlui ovddidit sin riikkaidgaskasaš karrieara. Bálkkašupmepakeahtta lea guovtti oasis: turneadoarjaga lassin das oažžu bisnes- ja márkanastinveahkki.

EU sávvá, ahte dat bastá veahkehit vuittiid earret eará ođđa márkanastinguovlluid gávdnamis, ođđa dáidduid oahpahallamis ja dieđuid viiddideames.

Vuoiti almmuhuvvo ávvudilálašvuođas 15. ođđajagimánu 2021 Hollánddas.

Varrasamosat: Sápmi

Váldoođđasat

Varrasamosat

Muualla Yle.fi:ssä