Sápmi

Vildá duo bálkkašuvvui eurohpalaš Music Moves Europe Talent -gilvvus

Music Moves Europe Talent -gilvvus bálkkašedje buohkanassii gávcci musihkkara dahje musihkkajoavkku.

Vildá duo kuvattuna nojaamassa toisiinsa.
Vildá duo atná bálkkašumi stuorra gudnin. Govva: Nelli Kenttä / YleX

Ohcejohkalaš lávlu ja juoigi Hildá Länsman ja geasanasčuojaheaddji Viivi-Maria Saarenkylä Vildá-duo bálkkašuvvui Music Moves Europe Talent -musihkkabálkkašumiin.

Vildá duo lassin bálkkašumi ožžo Melenas Espanjas, Lous and The Yakuza Belgias, Julia Bardo Itálias, Inhaler Irlánddas, Alyona Alyona Ukrainas, Sassy 009 Norggas ja Rimon Hollánddas.

Álbmoga válljejupmi -jienasteami vuittii Alyona Alyona.

Gilvvu bohtosat almmuhuvvojedje virtuálalaš ávvudilálašvuođas bearjadateahkes. Koronadili dihte mátkkošteami eai ávžžut ja danin Länsman ja Saarenkylä eaba beassan mátkkoštit Hollándii, gos ávvudilálašvuohta galggai lágiduvvot.

Hildá Länsman ja Viivi-Maria Saarenkylä giittiiga bálkkašumis videodearvvahusain. Soai muitaleigga bálkkašumi leat sudnuide stuorra gudni.

– Lea stuorra gudni oažžut munno musihka gullot ná stuorra arenas, Länsman dajai sáhkavuorustis.

Vuoitái 10 000 euro bálkkašupmi EU:s

Music Moves Europe Talent (MMETA) lea juohke jahkásaš dálá musihka bálkkašupmi, man ulbmilin lea ovddidit Eurohpalaš musihkkajoavkkuid máilmmiviidosaš beaggima ja ávvudit boahtteáiggi násttiid. Bálkkašumi evttohasat leat ođđa násttit, geat leat ožžon iežaset ruovtturiikka olggobealde fuomášumi ja beroštumi.

Bálkkašumi leat árat vuoitán earret eará dakkár máilmminásttit go Adele, Dua Lipa ja suopmelaš, guhkes karrieara dahkan Sunrise Avenue.

Evttohasat ledje oktiibuot 16. Evttohasaid válljemii geavahit dakkár vuogádaga, mainna čuvvot, man olu joavkkuin leat guldaleaddjit neahtas earáge riikkain go iežaset ruovtturiikkas.

Eurohpa uniovdna doarju MMETA-bálkkašumi vuitiid 10 000 euro ovddas. Ulbmilin lea bálkkašit vuittiid bálkkašumiin, mii veahkeha ain ovddosguvlui ovddidit sin riikkaidgaskasaš karrieara. Bálkkašupmi lea guovtti oasis: turneadoarjaga lassin das oažžu bisnes- ja márkanastinveahki.

Varrasamosat: Sápmi

Váldoođđasat

Varrasamosat

Muualla Yle.fi:ssä