Sápmi

Virtuála Skábmagovat eai gotte festiválamovtta – Mustonen: "Hui váivi, muhto dieđusge mun áiggun geahččat vaikko interneahtasge"

Hilma Mustonen
Anárlaš Hilma Mustonen mielas lea váivi go dán jagi ii beasa deaivat oahpes olbmuiguin muohtateáhteris, muhto son áigu geahččat filmmaid dánge jagi. Govva: Vesa Toppari / Yle

Dán jagi Skábmagovat-filbmafestivála ordnejuvvo neahta bokte 29.1.–31.1.2021.

Dábálaččat dáid áiggiid Sámemusea Siidda olgomuseas livčče šilju dievva olbmot huksemin Skábmagovaid muohtateáhtera. Dán jagi muohtateáhter huksejuvvo Sajosa šilljui, muhto das eai leat beaŋkkat, dasgo olbmot gehččet filmmaid ruovttuinis iežaset suffáid alde.

Anárlaš Hilma Mustonen lea oasálastán Skábmagovaide juohke jagi, nu guhká go dáhpáhus lea ordnejuvvon. Son áigu oasálastit maiddái virtuála Skábmagovaide.

– Na hui váivi, muhto dieđusge mun áiggun geahččat vaikko interneahtasge. Dieđus mun geahčan, go mun lean juohke jagi fitnan álo muhtun filmmaid geahččamin ja muđui oaidnimin, ja hui olu oahpesolbmot leat, datge lea hui somá.

Mustonen mielas buoremus ášši Skábmagovain lea oaidnit boares filmmaid, mat leat ráhkaduvvon Sámis.

– Dat lea hui dehálaš munnje oaidnit daid ja maiddái olgoriikka filmmaid, leahan dat somá oaidnit, mo doppe olbmot ellet.

Mustonen mielas lea gelddolaš beassat oaidnit filmmaid, vaikko su mielas leage váivi go koronadávda midjiide bođii.

Skábmagovat
Dán jagi Skábmagovaide lea huksejuvvon unnit muohtateáhter Sajosa šilljui vai festivála geahččit goittotge besset vásihit Skábmagovaid dovddu. Govva: Vesa Toppari / Yle

Dábálaččat ii oasálastte gáiddusdáhpáhusaide, Skábmagovaide goit áigu

Avvillaš Ulpu Mattus-Kumpunen ii leat nu olu oasálastán dál gáiddusdáhpáhusaide, danin go son maid bargá dál gáiddusin. Skábmagovaide son goittotge áiggu oasálastit.

– Ii bargobeaivvi maŋŋá viša šat nu olu čohkkát dihtora guoras, dušše dalle juos lea muhtun earenoamáš miellagiddevaš dáhpáhus, Ijahis idja dahje Skábmagovat. Gal mun áiggun goit muhtun filmma geahččat.

Ulpu Mattus-Kumpunen
Avvillaš Ulpu Mattus-Kumpunen vuordá Skábmagovain earenoamážit Nannaam-joavkku konseartta. Son áigu čuovvut festivála ruovttus. Govva: Vesa Toppari / Yle

Su mielas lea somá, ahte dál maiddái dakkár olbmot, geat eai leat ovdal beassan Anárii Skábmagovaide, sáhttet oasálastit neahta bokte.

– Dego ovdamearkka dihtii mu eatni mielas lea oalle somá, ahte dál viimmatge beassá ruovttus geahččat daid, illuda Mattus-Kumpunen.

Mattus-Kumpunen ii leat vel oahpásmuvvan dárkilabbot festivála prográmmii, muhto ovtta ášši son earenoamážit vuordá.

– Mun goit vuordán dan Nannaam-konseartta. Dan lea somá geahččat ruovttus.

Neahttavuogádahkii galgá registreret iežas

Skábmagovaid neahttabálvalus lea almmustahttojuvvon mannan vahkuloahpa. Filbmaguovddáš Skábma plánejeaddji Tarja Porsanger muitala, ahte ovdal go beassá filmmaid geahččat ja bileahtaid oastit, galgá registreret iežas bálvalussii.

– Dalle go leat válljen filmma maid áiggot geahččat, de manat ovddosguvlui ja mávssát daid bileahtaid, go leat mannamin geahččat dan filmma.

Festivála álgá bearjadaga eahkedis 29. beaivve ja bistá gitta sotnabeaivái. Porsanger muitala, ahte filmmaid sáhttá geahččat olles vahkuloahpa.

Tarja Porsanger
Filbmaguovddáš Skábma plánejeaddji Tarja Porsanger sávvá, ahte gáiddusdáhpáhusaid stuorra fálaldagas olbmot oasálastet maid Skábmagovaide. Govva: Vesa Toppari / Yle

Measta buot filmmaid sáhttá geahččat miehtá máilmmi

Plánejeaddji Tarja Porsanger ii máhte vel árvalit, man olu olbmot oasálastet dán jagi festiválii, dát lea goittotge vuosttaš háve go Skábmagovat ordnejuvvo ollásit neahta bokte.

– Go mis lea dál ollásit neahttafestivála, de measta buot min filmmaid beassá geahččat miehtá máilmmi. Doaivvu mielde mii fidnet ollu gehččiid, sávvá Porsanger.

Porsanger sávvá, ahte maid olgoriikalaččat oasálastet festiválii dál, go ii dárbbaš mátkkoštit gitta Anárii.

– Dat livčče stuorra doaivva, muhto neahtashan leat maiddái nu olu fálaldagat, ahte galggašii olahit nu olu olbmuid ovddalgihtii. Dat lea hástalus dákkár neahttamáilmmis.

Maiddái mánáid já nuoraid Skábmagovat leat dán jagi ollásit neahta bokte.

Varrasamosat

Muualla Yle.fi:ssä