Sápmi

Virtuálanjuovahagas sáhttá fargga hárjehallat njuovvama vaikko ruoktosuffá alde – boazodoalus maid ávkkástallagohtet digitálareaidduid

Karoliina Majuri
Virtuálanjuovahahkii beassá 3D-lásaid bokte. Govva: Xia Torikka / Yle

Virtuálanjuovahat ii galgga goittotge buhttet konkrehta oahppama, oaivvilda Poropeda-fidnu prošeaktahoavda.

Lappi ámmátallaskuvllas káfestallanlatnja orru áibbas dábálaš, muhto go coggá 3D-lásaid oaivái ja geahččá birrasii, de báiki leage dego albma njuovahat. Ja go de váldá giehtastivrániid gihtii, de daiguin sáhttá dohppet bissu ja báhččit bohcco.

– Jus čoavjevuođus dovdo dáppe, de ferte smiehttat dárkilit, ahte bastágo oba albma njuovahahkii mannatge, dadjá Lappi ámmátallaskuvlla spealloinsinevra Juha-Matti Taikina-aho.

Son lea hábmen dán digitála njuovahaga.

Video: Virtuálanjuovahat
Geahča dás, makkár lea virtuálanjuovahat. Video: Xia Torikka / Yle

Virtuálanjuovahat lea Lappi ámmátskuvlla jođihan fidnu, mas leat mielde maid earret eará Sámi oahpahusguovddáš ja Bálgosiid ovttastus.

Fidnu ulbmilin lea dievasmahttit ja nanosmahttit njuovahatbargiid dáidduid ja maiddái ovddidit oahppomateriála njuovvamii. Poropeda-fidnu prošeaktahoavda Karoliina Majuri oainnu mielde dákkár digitálalaš reaidduide lea boahttevuođas ain eambo dárbu.

– Boazodoalloguovlu lea hui viiddis ja dat gokčá goalmmátoasi Suoma viidodagas, nappo boazodoallit leat bieđgguid miehtá riikka. Lea hui dehálaš, ahte boazodoalu skuvlejupmi lea oažžumis badjeolbmuide sin iežaset bálgosiidda gáiddusoktavuođain, čilge Majuri.

Virtuálanjuovahaga várás fidnu bargojoavku lea oahpámuvvan máŋgga sierra njuovahahkii miehtá boazodoalloguovllu.

Virtuálabiras geasuha nuoraid, muhto albma barggu galgá oahppat praktihkas

Virtuálanjuovahat lea ain veháš gaskan, ja dohko lea dárkkuhus vel hukset ovdamearkka dihte jietnamáilmmi, mii vástida albma njuovahaga jienaid. Dan leat goittotge beassan muhtin badjeolbmot jo testet.

Karoliina Majuri deattuha, ahte vaikke virtuálamáilmmis sáhttá hukset hui realistalačča, de njuovvama, nu mo earáge boazobargguid, ii sáhte oahppat dihtor bokte. Son lohká, ahte daid galgá oahppat baicca doppe báikki alde albma barggus.

Karoliina Majuri
Karoliina Majuri mielde virtuálanjuovahat sáhttá movttiidahttit badjenuoraid stuđeret njuovvama teorehtalaš beali. Govva: Tomi Lampinen / Yle

Njuvviin gáibidit goittotge dálá áigge olu maid teorehtalaš dieđuid ja dáidduid. Daid oahppamii dakkár oahpporeaidu heivege bures, oaivvilda Majuri. Sámi oahpahusguovddáža boazodoallooahppit leatge dehálamos sin ulbmiljoavku.

– Ja dákkár virtuálabiras geasuha eandalitge nuoraid, geaiguin lea dábálaččat hoahppu beassat dohko meahccái ja albma bargguide. Dákkár virtuálamateriálat bissehit nuoraid olu buorebut, go dakkár čálálaš materiála, maid ovdal leat hárjánan geavahit, árvala Majuri.

Virtuálanjuovahaga lassin Poropeda-fidnu buvttada oahppomateriálaid njuovvamis nehttii. Virtuálanjuovahat ja eará oahppomateriálat gárvánit maŋimušta cuoŋománus 2022 ja dat leat dalle fidnemis buohkaide. Njuovvama sáhttá hárjehallat vaikko ruoktosuffá alde, jus fal ruovttus gávdnojit 3D-lásat ja eará dárbbašlaš rusttegat.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat

Muualla Yle.fi:ssä