Sápmi |

Visit Inari -turismafitnodat ii áiggo šat doalvut turisttaid Áijihsullui – goittot okta fitnodat joatká doaimmas dábálaččat

Ságastallan sápmelaččaide bassi Äijihsullo ollislaš ráfáidahttimis oaččui anárlaš mátkkoštanfitnodaga heaitit tuvrraid sullui.

Ukonkivi Inarijärvi
Äijihsullos guovllu sápmelaččat leat oaffaruššan sihkkaris dieđu mielde goit 1300-logu rájes. Sullos leat gávdnan dávttiid, čorvviid ja ruđaid. Govva: Tapio Heikkilä, ympäristöministeriö

Yle Sápmi muitalii duorastaga, ahte Anára vejolaččat dehálamos turismačuozáhaga, anáraččaide bassi Áijihsullo Anárjávrris hálidivčče giddet ja ráfáidahttit.

Äijihsullo ollislaš ráfáidahttin loktanii vuot ságastallamii, go nákkosgirjedutki ja arkeologa Eeva-Kristiina Harlin ja meahcceekologa Inka Musta evttoheigga Helsingin Sanomat -aviissa oaivilčállosis 28.10.2019, ahte Äijihsullui ii galggašii leat šat vejolaš boahtit gáddái fatnasiin ja goargŋuma bassi sullui galggašii maid gieldit.

Dál Visit Inari – Safaris & Accommodation -fitnodat, mii ordne eanemus fanastuvrraid Áijihsullui, lea mearridan, ahte ii šat boahttevuođas doalvvo turisttaid Äijihsullui.

Fitnodat lea ordnen fanastuvrraid sullui jagi 2003 rájes. Turisma sullos álggii juo 1970-logus.

– Árbevirolaččat, jus dálki leamaš buorre, mii leat gorgŋon sullui ja muitalan turisttaide Äijihsullo mearkkašumis anáraččaide. Dál maŋimuš ságastallamiid maŋŋá mii leat mearridan, ahte min fanastuvrraid ja eará turismaprográmmaid olis mii eat mana sullui, muitalit Visit Inaris.

– Mii háliidat dainna čájehit, ahte báikkálaččaid ja báikkálaš eamiálbmotkultuvrra sávaldagaid sáhttá guldalit ja gudnejahttit eiseválddiid mearrádusaid haga. Mii háliidat leat ovdamearkan eará turismafitnodagaide, ahte mii sáhttit ovttas ovddidit min doaimmaid ekologalaččat, kulturlaččat ja sosiálalaččat bistevaččat.

Fitnodat áigu joatkit fanastuvrraid sullo guovllus, muhto hálidivčče daidge oasil ovttasbargat Sámi musea Siiddain. Visit Inari pláne fállagoahtit tuvrraid, main turisttat oaččošedje eambo dieđuid sullo historjjás.

Dušše okta turismafitnodat áigu sihkkarit joatkit tuvrraid Äijihsullui

Yle Sápmi gulaskuttai maiddái Anára ja Suoločielggi guovllu eará turismafitnodagain, áigotgo dat boahtteáiggis ordnet tuvrraid Äijihsullui.

Aurora Village Ivalo -fitnodat lea guktii ordnen tuvrra sullui, muhto ii jáhkkimis šat boahttevuođas fála dán bálvalusa. Yle Sámi dieđuid mielde Lapland Safaris ja Wilderness Hotel -fitnodagat leat stivren turisttaid Visit Inari ordnen tuvrraide.

Luontoloma Pro-Safaris lea ordnen tuvrraid Äijihsullui ain duollet dálle, muitala fitnodaga oamasteaddji Teuvo Katajamaa. Fitnodat ii goittot vuos áiggo heaitit johtimis sullos.

– Dát ii boađe váikkuhit min doaimmaide, dat joatkašuvvet dego dánge rádjai goittot doasttažii, lohká Katajamaa.

Varrasamosat: Sápmi

Váldoođđasat

Varrasamosat

Muualla Yle.fi:ssä