Sápmi |

Vulggii Sápmái viežžat ideaid oahpuid ovddideapmái – Lappi universitehta ođđa rektor Antti Syväjärvi sávvá lasi ovttasbarggu sámeguovllu ja davi universitehtaid gaskii

Luondo- ja birasoahpahus sáhttá boahttevuođas gullat Lappi universitehta oahpuide.

LY.n rehtori Antti Syväjärvi Inarissa
Antti Syväjärvi lea doaibman diehtaga veahkkerektorin Lappi universitehtas Roavvenjárggas ovdal rektorin válljema. Son lea álggoálggus eret Duortnosleagis, Pellos. Govva: Jouni Aikio / Yle

Jahkemolsumis Lappi universitehta ođđa rektorin lea álggahan hálddahusdiehtagiid doavttir Antti Syväjärvi.

Dalán virgeáigodagas álggus son háliidii boahtit Sápmái ja galledit Sámi oahpahusguovddáža Anáris. Doppe son lea ságastallan oahppolágádusa njunnošiiguin ja oahpásmuvvan maiddái oahpahussii ja deaivvadan studeanttaiguin.

Eandalitge giellaovttasbarggu son háliidivččii lasihit ja doalahit.

– Lappi universitehta geahččanguovllus mii galgat geahččat ođđa vugiin giellaovttasbarggu. Sámi oahpahusguovddážis lea juo buorre ovttasbargu Oulu universitehtain. Sámegiela ja -kultuvra ovttasbarggu vejolašvuođaid eat sáhte vajáldahttit, smiehtada Syväjärvi.

Boahtteáiggis háliidit ovddidit universitehtaoahpuid, maid vuođđun lea luondu

Lappi universitehta ja Sámi oahpahusguovddáža ovttasbargu guoská earret eará árktalaš čehppodaga sihke skuvlejumis ja dutkandoaimmas. Lappi universitehtas Roavenjárggas lea álgoálbmot- ja sámedutkamuš dán áigái nana oassin beaivválaš barggus.

Dál bargomátkkistis son oaččui olu ođđa jurdagiid, mo davviguovllu oahppolinjjáid sáhtášii ovddidit maiddái universitehta dásis.

– Oainnán, ahte luondo- ja birasbajásgeassin sáhtášii hui lunddolaččat láktasit oahpaheaddjiskuvlejupmái, turismasuorgái ja hábmemii. Doppe leat hui buorit vejolašvuođat, dadjá Syväjärvi.

Lagaš áiggiid easkkaálgán rektoris lea ollu bargu universitehta konsearnna boađusmihttomeriiguin boahttevaš njealje jahkái.

– Dat leat hui dehálaš ja dárbbašlaš resurssat universitehtii. Dat lea vuođđu dasa, mo mii ovdamearkka dihte hukset ovttasbarggu maiddái sámeguvlui, dadjá Syväjärvi.

Varrasamosat: Sápmi

Váldoođđasat

Varrasamosat

Muualla Yle.fi:ssä