Sápmi |

Vuohččulaš Čearpmahat-teáhterjoavku vuittii Sámenuoraid dáiddadáhpáhusa – geahča video vuoiti dovdduin

Joavkku neavttárat besset searvat riikkaviidosaš Nuorra kultuvra Teatris -dáhpáhussii Jyväskyläi.

Čearpmahat-joavku sámenuoraid dáiddadáhpáhus 2019
Vuohču Čearpmahat-teáhterjoavku beassá ovddastit sámiid Jyväskyläi Teatris-dáhpáhussii. Govas duohkin Čearpmahat-joavku, ovddas dáiddadáhpáhusa dán jagáš duopmárat. Govva: Martta Alajärvi / Yle

Vuohččulaš Čearpmahat-teáhterjoavku vuittii sámenuoraid dáiddadáhpáhusa otne Anáris. Duopmárat rábmojedje, ahte bihtá lei ollislaš ja das lei čielga sápmelaš máinnas. Čearpmahat-joavkku neavttárat besset ovddastit Gufihttara máilmmis -čájáhusain sámiid Suoma viidosaš Nuorra kultuvra Teatris -dáhpáhusas Jyväskyläs miessemánus.

Čearpmahat-joavkkus leat oktiibuot njealje nuora ja sin jođiheaddjin doaibmá Mathis Ole Vars. Jovkui gullet Biret-Ingermaria Vars, Helli Alakorva, Mihkal-Mahtte Magga ja Sinna-Briitta Sieppi. Duopmárat rámiidedje joavkku ovdanbuktimis earenomážit dan čielga ollisvuođas.

Video: Biret-Ingermaria Vars
Geahča videos Biret-Ingermaria Vars dovdduid. Video: Yle Areena

Vuohččulaš Biret-Ingermaria Vars lei hui movtta vuoittus.

– Mun in leat goassige neaktán ja dat bođii dego yllättäen. Mun ihan bisánin, go dat lei nu suohtas, illudii Vars.

Gudnemáinnašumi ožžo vihtta joavkku

1) Pasila vuođđoskuvlla sámeluohkkálaččaid Diidamáilbmi ovdanbuktimiin Arvečalmmit. Joavkku jođihii Milla Pulska.

2) Aivvefal Eanodagas – Sámi Sinderellá. Joavkku jođiheigga Anne-Mari Kukkonen ja Ulla Magga.

3) Sueʹnnʹjel siid äʹrbb– Tuõtt avi ǩeeʹles Čeavetjávrris. Joavkku jođiheigga Hanna-Maaria Kiprianoff ja Seija Sivertsen.

4) Davvinásttit – Boahttedolin Gáregasnjárggas. Joavkku jođiheigga Hanna Outakoski ja Satu Nieminen.

5) Skállovári idjaskuvlaččat – Oaivvehis olmmoš. Joavkku jođihedje Anni Ahlakorpi, Aleksi Ahlakorpi ja Sini Länsman.

Sámenuoraid dáiddadáhpáhusa duopmáriin doibme filbmabagadalli Katja Gauriloff, neavttár Ánneristen Juuso ja neavttár ja sámegielat mánáid tv -prográmma buvttadeaddji Heli Huovinen.

Duopmárat oidne fiinna čájálmasaid

Gilvvu duopmárat Katja Gauriloff ja Anni-Kristiina Juuso muitaleaba, ahte beaivvi áigge lávddi alde leat oaidnán fiinna čájálmasaid, mat leat boagustahttán ja maiddái veháš ganjaldahttán. Soai oinniiga teáhterbihtáin čielga sámetemáid.

– Dat lea hui somá ahte leamaš iešironiija maid juste das, ahte leat seaguhan dološ ja dálá áiggi. Ja sehkken maid gielaid, ja várra dat lea sámemánáid ja -nuoraid eallin dán áigge – seaguhus, árvala Juuso.

– Dat maid lea hui buorre, ahte gieđahallet áigeguovdilis fáttáid teáhtera bokte, jurdila Gauriloff.

Sámenuoraid dáiddadáhpáhus 2019 duopmárat Anni-Kristiina Juuso Katja Gauriloff
Anni-Kristiina Juuso ja Katja Gauriloff doibme dán jagáš Sámenuoraid dáiddadáhpáhusa duopmárin. Govva: Maiju Saijets / Yle

Soai muitaleaba, ahte giddiiga duopmárin fuomášumi eandalii ollisvuhtii, guhkkodahkii ja dasa, mo čájáhallit váldet kontávtta gehččiide. Anni-Kristiina Juuso mielas lea maiddái dehálaš eallit muitalusa.

– Mun lean fuobmán mun geahčan mo dat mánát ja nuorat ellet doppe lávddi alde dan maid sii muitalit, dadjá Juuso.

Lávddi alde maiddái sámi veršuvdna Gutnabáđožis

Sámenuoraid dáiddadáhpáhus čohkkii Anárii measta 500 sámemáná ja -nuora, geain badjel 100 ledje čájeheame dáidduideaset lávddi alde. Lávddi alde fitne oktiibuot 13 joavkku.

Okta joavkkuin lei Eanodaga badjedási joavku Aivvefal, mii lei heivehan dovddus Gutnabáđoš-máidnasa dálá sámi máilbmái. Sin čájálmas muitalii Gutnabáđožis, geasa boazoisida bárdni ráhkásmuvvá Márjjabeaivvi márkaniin ja loahpas nuorra bárra gávdná oktasaš ráhkisvuođa.

Ibba Lauhamaa lei mielde Eanodaga badjedási čájálmasas. Son muitala lea leamaš somá ráhkkanit ja hárjehallat čájálmasa. Son lei duđávaš maiddái čájálmasa maŋŋá.

– Gal dat manai bures. Dieđusge álo sáhtášii buorebutge mannat, muhto gal dat livččii sáhtán fuonibutge mannat.

.

Sámenuoraid dáiddadáhpáhus 2019 Eanodaga badjedási joavku
Eanodaga badjedási joavku lávddi alde. Govva: Maiju Saijets / Yle

Geahča dán áššis maiddái duorastaga Yle Ođđasiin Yle TV1:žis diibmu 16.45 ja maŋŋelabbos Yle Areenas.

11.4.2019 dii. 17.32 Lasihuvvon video, mas Biret-Ingermaria Vars muitala dovdduid gilvvu máŋŋá.

Varrasamosat: Sápmi

Váldoođđasat

Varrasamosat

Muualla Yle.fi:ssä