Sápmi |

Vuohččulaš Helli Alakorva ráhkkana stáhtaministara iehčanasvuođabeaivvi doaluide – Sullii 500 máná bovdejuvvon

Juohke gielddas Suomas leat bovdejuvvon guokte 10-jahkásaš máná Seahtodállui mánáid iehčanasvuođaávvudeapmái juovlamánu 5. beaivve.

Helli Alakorva etniinis
Eadni Nina Hirvonen mieđušta nieiddas Helli Alakorva stáhtaministara iehčanasvuođadoaluide. Govva: Jouni Aikio / Yle
Vuohčču

Eadni Nina Hirvonen stelle boahkána nieiddas, Helli Alakorva, badjelii. Boagán lea vehá menddo guhkki ja dan galgáge vel ordnet ovdal stuorra ávvubeaivvi.

– Juha Sipilä lea bovden mu mannu festii Helssegis, muitala Alakorva.

4. luohkkálaš Helli Alakorva lea okta sullii 500 mánás, geat leat ožžon stáhtaministtar Juha Sipiläs bovdehusa Seahtodállui mánáid iehčanasvuođaávvudeapmái juovlamánu 5. beaivve.

Bovdehus mánáid iehčanasvuođabeaivvi ávvudeapmái
Helli Alakorva bovdehus lea čállojuvvon davvisámegillii. Govva: Jouni Aikio / Yle

Ávvudeami ordne stáhtaráđi kansliija ovttasbarggus Mannerheim mánáidsuodjalanlihtuin ja Mánáidáittardeaddjiin. Stáhtaministtar bovde juohke jagi guokte njealját luohkkálaš nappo 10-jahkásaš máná iešguđege Suoma gielddas mánáid iehčanasvuođaávvudeapmái.

Soađegili gielddas lei dán vuoro Vuohču skuvlla vuorru, doppe bovdejuvvuiga Helli Alakorva ja Mihkkal Máhtte Magga. Alakorvai lei dalán čielggas, ahte son coggá doaluide gávtti, man eadni lea gorron. Áhkku lea áigá čuoldán boahkána, ja dan lea maiddái Helli áhčči geavahan mánnán.

Helli Alakorva gápmagat ja boagán
Gápmagat ja vuoddagat leat ortnegis ávvudoaluid várás. Boagán lea vel vehá menddo guhkki, muhto dan geargá vel divvut ovdal doaluid. Govva: Jouni Aikio / Yle

Vuohččulaččat vulget gaskavahko iđđes girddi Helssegii. Máná guoktá lassin dohko vuolgiba maiddái Helli Alakorva eadni ja Mihkkal Máhtte Magga áhčči. Váhnemiid eai goit luoitte sisa ávvubáikái.

– Olgouvssaid buohta moai dasto sávve somás doaluid ja besse de viežžat moadde diimmu geahčen, čilge Nina Hirvonen.

Helli Alakorva ráhkkana mánáid iehčanasvuođadoaluide.
Helli Alakorva lea movtta go beassá ávvudit stáhtaministariin Suoma iehčanasvuođa. Govva: Jouni Aikio / Yle

Guldal lasi dán áššis maŋŋebárgga 4.12. Dearvva-sáddagis, mii sáddejuvvo diibmu 14:30-16:00.

Varrasamosat: Sápmi

Váldoođđasat

Varrasamosat