Sápmi |

Vuohču nuorat leat behtton, go Meahciráđđehus ii dán geasi lágidan vuovdegilvimiid: “Leamašan buorre vuosttas bargosadji”

Meahciráđđehusa lágidan vuovdegilvimat leat dábálaččat leamašan dehálaš geassebarggut nuoraide miehtá Sámi. Dán jagi lea goittot geavvan nu, ahte nuoraide lohpiduvvon bargosajit eai leatge ollašuvvan ja nuorat leat báhcán oahpes bargosaji haga.

Jietna: Iisko ja Niilles Hirvasvuopio
Jietna
Guldal das maid Iisko ja Niilles Hirvasvuopio muitaleaba geassebargguin. Jietna: Sohkaršohkka

17-jahkásaš vieljašguovttos Iisko ja Niilles Hirvasvuopio leaba eret Vuohčus, gos soai guktot ovdal leaba leamašan barggus vuovdegilvimiin, guovtti ovddit geasi. Dán geasi eai gilvinbarggut goittot Vuhččui boahtán. Hirvasvuopiot leaba behtton.

– Dat lea gal hui fuones ášši, ahte gilvimiid leat geahpedan. Gilvimat leat leamašan buorre vuosttas bargosadji Vuohču nuoraide. Vuohčus lea goittot nu guhkes mátki lagamus giliide dego Soađegillái ja Avvilii, ahte bargosadji ieš Vuohčus lea dehálaš, dadjá Iisko Hirvasvuopio.

Vuovdegilvin lea maiddái nu buorre dienas, ahte Niilles livčče áinnas vuolgán fas gilvit.

– Dieđusge dohko manalii ođđasit bargui. Vaikko soaitáge leat muhtun mielas lossa ja garra bargu, nu bargá dan goittot hui mielas, oaivvilda Niilles Hirvasvuopio.

Dál lea vuosttas geardi maŋimus logi jahkái, go davimus Sámis eai leat Meahciráđđehusa gilvimat

Maŋimus guovtti jagis Meahciráđđehus lea geahpedan Lappis 70 geassebargosaji.

Eanaš gilvimiin leat dán jagi sámeguovllu olggobealde, daningo Meahciráđđehus lea geahpedan vuovdečuollamiid Lappis. Dán jagi eai gilvimat boahtán ollenge davimus Sápmái – vuosttas geardde maŋimus logi jahkái.

Lappi vuovdedikšunhoavda Olli Lipponena mielde dán jagi ohccit ledje Lappis goittot eanet go bargosajit.

– Olles Lappis mis ledje dain njealji guovllus (Oarje-, Gaska-, Lulle- ja Nuorta-Lappi) bargosajit rabas ja ohccit ledje eanet go bargosajit. Buohkaide ii leat leamašan vejolaš addit bargosaji, nuba muhtimat leat sihkkarit behtton.

Lipponen čilge bargosajiid leamen unnán, daningo čuollamatge leat leamašan unnán. Son goittot jáhkká, ahte bargosajit lassánit.

– Dat lea áibbas gitta das, mo čuollamat mannet, daningo dainhan dat barggut šaddet. In jáhke, ahte dála dilis gilvimiid mearri eanet unnu, muhto ahte gal dat dás lassánit, čilge Lipponen.

Viššalis nuorain eai bargosajit beasa nohkat

Vaikko Hirvasvuopio vieljažagat eaba beassange gilvimiidda bargui dan jagi, eaba soai bargguid haga leat báhcán. Goabbatge leaba álgogeasi LAPECOs barggus ja Iisko Hirvasvuopios leat jo lasi bargoplánat loahppageassái.

– Galhan dat barggut rehket go fal máhttá ohcat ja dovdá rivttes olbmuid, Hirvasvuopio dadjá mojunjálmmiid.

Dán artihkkala lea čállán Lassi-Olavi Mäkinen. Son lea geassehárjehallin Yle Sámis.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä