Sápmi |

Vuohču skuvlla oahpahus sirdašuvvá vejolaččat modulaskuvlii: dálá skuvlavisttis sisáibmováttisvuođat

Vuohču skuvllas leat dutkamušain gávnnahan máŋggalágan čuolmmaid, mat dagahit sisáibmováttisvuođaid.

Vuohču skuvla
Vuohču skuvllas leat gávnnahan sisáibmováttisvuođaid. Govva: Maiju Saijets / Yle

Soađegili gielda lea guorahallamin nu gohčoduvvon modulaskuvlla sirdima Vuhččui, dasgo Vuohču dálá skuvlavisttis leat sisáibmováttisvuođat. Modulaskuvla lea geahppa visti, man lea álki sirdit báikkis nubbái ja dat heive gaskaboddosaš vistin.

Modulaskuvla lea Soađegili Tähtikunta skuvlla geavahusas dán 2021–2022 lohkanjagi lohppii, muhto dan maŋŋá vistti sáhtášii sirdit Vuhččui.

Gielddahoavdda evttohusa mielde Soađegili gielddaráđđehus bivdá áššis goittotge čuvgehuslávdegotti cealkámuša ovdal go sáhttet gieđahallat ášši ođđasit gielddaráđđehusas.

Vuohču skuvllas leat dál 30 oahppi ja ohppiid meari jáhkket bissot seamman ain moadde jagi.

Vuohču skuvllas gávdnon fibergávjjat

Vuohču skuvlla heajos sisáimmu leat dutkan, go jagiin 2019–2021 leat ožžon vihtta almmuhusa skuvlla sisáimmu dagahan dearvvašvuođalaš váttuin.

Dutkamušain leat gávnnahan máŋggalágan sisáibmováttisvuođaid, earret eará skuvlla áibmomolsunrusttegiin leat fiberat ja skuvlla seainnit leat njuoskan.

Dutkamušaid vuođul Duottar-Lappi birasdearvvašvuođafuolahus leage čuovvugoahtán Vuohču skuvlla dili beaktilabbot ja dili dárkkistit jahkebeali gaskkain. Birasdearvvašvuođafuolahus lea gáibidan, ahte vistti galgá divvut vai bastet doallat skuvlla rabas. Skuvlla leat divuhan gáibádusaid mielde, muhto gielda áigu vejolaččat burgit olles skuvlla.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä