Sápmi

Vuohčulaš Leena, 77, illuda go lea oahppán "skypestit" earáiguin karantena áigge – vuorrásut olbmuid áigi gollá čorgemis ja doložiid muittašemiin

Leena Alakorva

Dál go koronavirus lea bidjan min orrut ruovttus, lea muhtun bearrašat bidjan vuorrasut olbmuide maiddái ođđalágan reaidduid ruoktot vai singuin gulahallan šaddá álkibun.

Vaikko olles Suomas buohkat leat gártán koronavirusa geažil bissut ruovttus, de lea vuohččulaš Leena Alakorva áigi gollán hui bures ruovttus.

Son lea beassán koronavirusa dihte oahpásmuvvat ja oahppat áibbaš ođđalágan neavvuid geavahit. Juo badjel 70-jahkásaš Alakorva mánát bidje sutnje dihtorii Skype-telefonprográmma, mainna son sáhttá karantenalágan dilis gulahallat mánáidisguin.

– Mánát bukte munnje dán Skype. In leat nu čeahppi rusttegiiguin, de in leat vel nu bures dán oahppan, muitala Alakorva.

Alakorva lei vuos smiehttan, ahte somá dál go sáhttá ruovttus leat okto ja buđaldit iežas hommáid ruovttus.

– Ja dál de sii bidje munnje dán vai besset čuovvut, ahte leango ortnegis. Ferten álo leat nu virkui go háleštan singuin, muđui mánát gáddet ahte lean buohccán, bohkosa Leena Alakorva.

Go Skype čuodjá dihtoris, ferte son álggos vehá deattašit boaluid ovdalgo láve lihkostuvvat vástidit. Dálá dilis Skypes lea šaddan hui olu ávkki sutnje.

– Das lea nu somá háleštit, go oaidná nubbi! Ja galhan dás de oaidná, go nubbi dolkagoahtá háleštit. Son álgá vilput dan láhkai eará guvlui ja mun oaidnán, ahte eai veajege šat muinna skypestallat.

Fuolla sámeservoša birgemis koronavirusa áigge

Leena Alakorva eallimis dát lea nubbi gearggusvuođalága vulosaš dilli. Alakorva lei easkka unna mánná go gártái vuolgit Vuohčus eváhkkui.

Dalle son mátkkoštii sisterehpos Pokka-gilážii siesás sealggis, muhto dál earenoamáš dilit dárkkuhit dan, ahte gártá dušše ruovttus orrut.

Go bohccos leat menddo olu muohta sealggis, dat savnnjaša visot eret. Kánske dál eanan dahká seamma ládje.

– Leena Alakorva

– Dál mis lea uhki, man mii eat oainne. Lea várálaš dilli, muhto galgá dušše bissot ruovttus.

Máŋgasiidda lea láittas bissut ruovttu seinniid siskkobealde. Koronavirus lea dagahan maiddái balu, go nu máŋgasat leat buohccán. Maid medias leat ollus ságat, mas hállet korona váikkuhusain.

Alakorva čilge, ahte son lea smiehtadan ja sus lea beanta fuolla das, mo sápmelaččat álbmogin birgejit dán kriissa áigge.

– Smiehttamat, go eai leat nu olu sápmelaččat. Dáppe Vuohčus mus lea hui dorvvolaš miella. Giliolbmot váldet várá nubbi nuppis. Sávan, ahte mii buohkat seailut heakkas dás, dadjá Alakorva.

Luondu maiddái soaitá dál čájehit fámuideaset, go olmmoš ii leat fuolahan das doarvái, smiehtada Alakorva.

– Eananspábba lea nugo boazu. Go bohccos leat menddo olu muohta sealggis, dat savnnjaša visot eret. Kánske dál eanan dahká seamma ládje.

Guldal Leena Alakorva jearahallama Dearvva! Tiörv! Tierva! -sáddagis Yle Areenas.

Varrasamosat

Muualla Yle.fi:ssä