Sápmi

Vuohčus áimmit lávlot ja gámabárat šaddet – Duodjebusse lea dál jagi njurgguhan sámeguovllus

Video: Rauna Vieltojärvi
Duodjebusse-fidnu bargi Rauna Vieltojärvi lea jagi áigge vuodján miehtá sámeguovllu lágideame duodjegurssaid. Video: Kirsti Länsman/ Yle

Vel ii leat diehtu joatkašuvvágo Duodjebusse-fidnu miessemánu maŋŋel.

Bastilis skieraiguin lea álki čuohpastit guolggaid vaddjojuvvon ruodjasa ravddas. Gáma bihtáid ferte bures guolggavuolastit, vai sávdnji doallá ja buolaš ii beasa cikcestit juolgesuorpmaid.

Áimmit dušše lávlot, go nissonat leat čoahkkanan Vuohču skuvlii goarrut gápmagiid Duodjebusse-fidnu lágidan gursii. Hárjánan duojár Eila Laiti oaivvilda, ahte ovttas lea olu suohttasut duddjot go okto.

– In leat viššan álgit neaskit okto, eandalii dáid njunehisdiŋggaid in livčče álgán okto. Mii leimmet gal vuordán dán gurssa. Ja doaivut, ahte joatkašuvvá dát duodjebussehommá vai oažžut ain lasi daid seammalágan gurssaid, dadjá Laiti.

Eila Laiti
Eila Laiti lea gurssas gorron vuosttaš geardde njunehis gámabára. Govva: Kirsti Länsman / Yle

Fidnu olahan nuoraid

Bussebiila, mas lea duodjemearka siiddus, lea šaddan jo oahpisin sámeguovllus maŋemuš jagi áigge. Duodjebussiin leat buktán iešguđetlágan duodjegurssaid ja duodjebiergasiid smávit giliide Anáris, Ohcejoga ja Vuohču guovlluin.

Sámi Duodji -searvvi Duodjebusse-fidnu bargi Rauna Vieltojärvi muitala, ahte fálaldat leamašan bivnnut, vaikko pandemiija gal lea veháš caggan lágidemiid.

– Gal mis lea mannan bures, go váldá vuhtii dan koronadili. Mii leat leamaš oktiibuot čieža sierra sajis ja ordnen oktiibuot 14 iešguđetlágan duodjegurssa ja bargobáji, muitala Vieltojärvi.

Duddjondáiddu ovddideapmái ja dieđu sirdimii nuorabuidda fidnu lea ožžon Leader-prošeaktaruhtadeami ja dasa lassin vel loana Anára gielddas. Vieltojärvi mielde fidnu lea movttiidahttán nuoraid duddjot.

– Mun lean hui ollu illudan, go leat olahan nuoraid ja nuorat leat oassálastán gurssaide.

Fidnu álggii mannan giđa ja dál dat lea nohkamin. Vieltojärvi ii dieđe joatkašuvvágo doaibma miessemánu maŋŋá.

– Álggos ferte vuos dán fidnu doalvut loahpa rádjái ja dasto plánet mo boahttevuođas bargat dainna doaibmamálliin, dadjá Vieltojärvi.

Duodjebusse-fidnu bargi Rauna Vieltojärvi muitala, ahte fálaldat leamašan bivnnut, vaikko pandemiija gal lea veháš caggan lágidemiid. Jietna: Maiju Saijets / Yle
Duodjebusse
Duodjeoahpaheaddji Kristiina Näkkäläjärvi rávve Laura Leppänen goarrut jocca. Govva: Kirsti Länsman / Yle

Vuohččulaččat movttáskan duddjot ovttas

Dán vahkus Vuohču gursalaččat leat oahppan earret eará ráhkadit minstariid, vadjat ja badnit suona muttágin. Gámabárat nu šaddet ja Laiti maid jáhkká geargat iežas njunehis gápmagiiguin.

Ovttas duddjon lea seammás sosiáladáhpáhus ja vuohččulaččain gal leat jo gárvves plánat boahtteáigái, vaikko Duodjebusse ii šat jođášiige guovllus.

– Miihan leat dál plánen, ahte mis lea Vuohčus duodjebádji boahtte jagi. Mii doppe de ovttas buđaldit, dál go mis leat ná olu dáppe gámaduojárat šaddame. Go vel livččii muhtin báiki gosa čoahkkanit ja doppe bargat, smiehtada Laiti.

Hárjánan duojár Eila Laiti oaivvilda, ahte ovttas lea olu suohttasut duddjot. Jietna: Maiju Saijets / Yle

Áššis oainnát lasi Yle Ođđasat -sáddagis diibmu 16.45. Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat

Muualla Yle.fi:ssä