Sápmi |

Vuoigatvuođaministeriija váldá atnui sámegielat logo

Vuoigatvuođaministeriija geavaha logo divššodettiin áššiid sámeguovllus ja sámegielat dieđihanmateriálain.

logo, vuoigatvuođaministeriija
Logos lea vuoigatvuođaministeriija namma buot golmma Suomas hállon sámegielain, davvisámegillii, anárašgillii ja nuortalašgillii. Govva: Vuoigatvuođaministeriija

Vuoigatvuođaministeriija háliida gulahallamisttis buktit ovdan sámi gielaid, namuha hálddahusčálli Maija Iles vuoigatvuođaministeriijas.

– Jurdda bođii das, go Sámediggi bovdii searvat giellavahkkui. Smiehttagođiimet dasto, ahte mo mii sáhttit dasa searvat ja dát lei okta ášši, man hutkkaimet, Iles namuha.

Vuosttas háve sámegielat logo geavahuvvo maŋŋebárgga, go vuoigatvuođaministeriija oktavuođas doaibmi giellaáššiid ráđđádallangoddi ordne panelaságastallama ja dáhpáhusa, mas gieđahallet earret eará sámeoahpahusa Davviriikkain ja eamiálbmotgielaid, kultuvrraid ja skuvlejumi. Dilálašvuohta álgá diibmu 9.00 ja dan sáhttá čuovvut neahttastreama bokte.

Virgeolbmuide maid sámegiela minikursa

Vuoigatvuođaministeriija čalmmustahttá dan vahkus muđuige sámegielaid. Ministeriija virgeolbmuide leat ordnemin guokte 90 minuhta guhkkosaš minikurssa davvisámegielas. Kurssas gieđahallet davvisámegiela ja sámekultuvrra vuođđodieđuid.

Oahpaheaddjin gurssas lea Helssega sámegielat vuođđooahpahusa oahpaheaddji Milla Pulska.

– Kurssas oahppá jietnadeami, dearvvahusaid ja muitalit dan, ahte gii olmmoš lea. Oahppodiimmuide leamaš stuorra beroštupmi, dadjá Maija Iles.

Vuoigatvuođaministeriija namuha dieđáhusastis, ahte virgeoapmahaččat galget sámi giellalága vuođul geavahit dieđiheamis maiddái sámegiela. Earret eará almmuhusat ja dieđáhusat galget addojuvvot sámegillii dalle, go dat gusket eanaš sápmelaččaid dahje dain lea earenoamáš stuorra mearkkašupmi justa sápmelaččaide.

Suoma Sámediggi ordne ovttas eará Sámedikkiiguin Sámi giellavahku 21.–27.10.2019. Suomas , Ruoŧas ja Norggas.

Varrasamosat: Sápmi

Váldoođđasat

Varrasamosat

Muualla Yle.fi:ssä