Sápmi |

“Vuorddán bivastaga, vara ja ganjaldeami” – Avvila Rádjejeagárkompaniijas álggahedje vuossárgga ođđa soalddátálggut

Geahča videos makkár dovdduin nuorat álggahedje bálvalusa báikkis, gosa eai beasa eará go lášmes ja searalaš nuorra albmát.

Vuoden toinen saapumiserä aloitti palveluksensa Ivalon Rajajääkärikomppaniassa.
Govva: Kaija Länsman / Yle
Avvil

Busses njuikejit viehka jávohis nuorra albmát olggos. Čalbmi ohcá ráđi, ahte gosa dálges. Avvila Rádjejeagárkompaniijas álggahedje vuossárgga sullii 130 soalddátálggu bálvalusa. Buohkat sis eai nagot čađahit soahteveaga, dábálaččat moaddelogi soalddátálggu guđđet bálvalusa gaskan.

Vuosttamužžan joavkku dolvot stuorra latnjii, gos soahteveaga bargit dutket dárkket juohkehačča lávkka.

– Dás dutket soalddátálgguid dávviriid. Dás ohcet váralaš dávviriid, dego gárrenávdnasiid. Daid mii eat hálit deike soahtevehkii, muitala lutnánta Jussi Sorjonen.

Video: Täytenä armeijan reppu painaa jopa 40 kiloa.
Avvila Rádjejeagárkompaniijas álggahedje ikte sullii 140 soalddátálggu.

“Dáppe dat gal leaiku bivastaga” – Rádjejeagárkompaniijai eai beasa buohkat sisa

Avvila Rádjejeagárkompaniijas lea dihto beaggin. Dan dovdet báikin gos ii leat álki, ja nuorra albmás gáibiduvvojit searat. Nissonat eai beasa ollenge deike.

Rádjejeagárkompaniijai eai váldde buot albmáidge sisa. Okta gáibádus lea, ahte bastá viehkat 12 minuhtas 2700 mehtera. Dan lassin galgá bissut sabehiid alde ja čoavjedeahkit galget leat čavga ordnegis.

– Deike jus háliida sisa, galgá leat lášmat. Dáppe dat gal leaiku bivastaga. Avvila dovdet garra báikin, gos gártá ráhčat, muitala Sorjonen.

Sorjonen lea skuvlen maiddái seivvonjeagáriid (su. laskuvarjojääkäri). Dohko leat sisabeassaniskosat, Avvilii eai leat. Lihkká Sorjonen mielas Avvila buoremus soalddáhat nagodit dahkat dan seammá maid seivvonjeagárat.

– Mis leat gávcci joavkku dáppe. Jus veardidat min moadde buoremus joavkku seivvonjeagáriidda, de eat mii dáhpe gal. Seammalágan hárjehusaid miige čađahat dáppe, muitala Sorjonen.

Ivalolainen Joonas Kasurinen odottaa jo harjoitusleirejä. Hän halusi Rajajääkärikomppaniaan juuri sen kovan maineen vuoksi.
Avvillaš Joonas Kasurinen háliidii Avvilii Rádjejeagárkompaniijai dan dihte, go kompaniija beaggá leat gárra báiki. Govva: Kaija Länsman / Yle

Avvillaš Joonas Kasurinen lea eanet go gárvvis. Iđđes go morihii, sus ledje guovttelágan jurdagat, nuppe dáfus lei hui movtta, muhto seammás lei gealdagasas.

– Háliidin alccen hástalusaid soahteveaga čađaheapmái, danin bohten Avvilii. Vuorddán, ahte beassat olggos hárjehusleairraide, muitala Kasurinen.

Avvila rádjejeagárkompaniija nu gohčoduvvon loahppasoahti bistá badjel vahku. Dat lea okta garraseamos hárjehusain. Avvilis maid hárjehallet luonddus ceavzima vehkiid haga.

– Daid ii dárbbaš sierra oba dahkatge garra hárjehussan. Dáppe leat dakkár dálkkit, ahte dat hástá maid skuvlejeaddjiid, muitala lutnánta Sorjonen.

Juho Veijola tuli Iistä asti suorittamaan palvelustaan Ivalon Rajajääkärikomppaniaan.
Juho Veijola bođii Iis Avvilii soahtevehkii. Son jáhkká, ahte buohkat earátge leat seamma gealdagasas go son. Govva: Kaija Länsman / Yle

“Vuorddán bivastaga, vara ja ganjaldeami”

Juho Veijola iskkada soahteveaga dálvegahpira oaivái. Son lea boahtán Oulu láhkosis Avvilii soahtevehkii. Ovdal bálvalusa álgima njuolga balai.

– Ledjen nu gealdagasas, ahte ii leat oba leaikage. Jáhkkán, ahte buohkat ballet seamma olu. Vuorddán bivastaga, vara ja ganjaldeami, muitala Veijola ja doapmá bivttasjorriin ovddos guvlui.

Maŋŋelaš son lea iežas stobus bivttas- ja dávvirlánain dego láhppon láppis.

– Bálkestin seaŋgga ala dávvirlána. Dál in dieđe maid galggan. Ammal dat joavkojođiheaddjit farga bohtet rávvet, smiehtada Veijola.

Dábálaččat soalddáhat rehkenastet čohkuma vehkiin iđidiid, muhto Veijola ii leat dakkára oastán.

– In oastán čohkuma. Vuovttaidge beaskidit, de maidbat dainna čohkuminge dahká?, reašká Veijola.

Soalddátálgguin leat ovddabealde vel 164 iđida. Otne iđđes sin eai leat rávkan seamma linisvuođain go eatnit lávejit.

– Sáhttáhan dat hoahppu šaddat, go čalbmerávkaleamis ferte morihit, láhčit seaŋgga ja vel gárvodit, loahpaha Sorjonen.

Varrasamosat: Sápmi

Váldoođđasat

Varrasamosat

Muualla Yle.fi:ssä