Sápmi |

"Vuordimis juogalágan ovdáneapmi" – Sámediggi ráđđádalai Suoma virgeolbmuiguin illudahtti bohtosiiguin

Sámeáššiid ráđđádallanbeaivvit ordnejuvvojedje mannan vahkus Helssegis jo viđát geardde.

Suomen saamelaiskäräjien edustajat keskustelupäivillä oikeusministeriössä.
Skábmamánu 7.–8. beivviid ordnejuvvojedje ráđđádallanbeaivvit Sámedikki ja Vuoigatvuohtaministeriija gaskkas. Govva: Sámediggi

Sámediggi ráđđádalai mannan duorastaga ja bearjadaga 7.–8.11. Suoma virgeolbmuiguin áigeguovdilis sámeáššiid birra. Jearaldat lei nu gohčoduvvon sámeáššiid ráđđádallanbeivviin, mat ordnejuvvojedje Helssegis dál viđát geardde.

Dán jagi Sámediggi lei soahpan Vuoigatvuohtaministeriijain ságastallama fáddán ráđđehusprogramma sámi girjejumiid, kulturáššiin erenoamážit Sámedikki kulturguovddážiid doaimma, ja sode- ja eanangoddeođastusaid.

Ráđđádallamiidda oassálaste Sámedikki bealis vuosttas várreságadoalli Heikki Paltto, nubbi várreságadoalli Tuomas Aslak Juuso, stivrra lahttu Nilla Tapiola, hálddahushoavda Pia Ruotsala-Kangasniemi, kulturčálli Riitta Orti-Berg, ealáhusčálli Sarita Kämäräinen ja gáiddusoktavuođaid bokte Sámedikki virgeolbmot iešguđege suorggis.

Erenoamážit mánáidkulturguovddáš beroštahtii

Ságastallamiidda oassálastán Sámedikki nubbi várreságadoalli Tuomas Aslak Juuso lea duđavaš guovttebeaivásaš ságastallamiidda.

– Virgeolbmot válde min oainnuid vuostá áššálaččat. Ságastallamiin lei buorre vuoigŋa, Juuso govvida.

Sámedikki ja Suoma ministeriijaid ovddasteaddjit háleštedje earret eará Sámedikki Mánnu-mánáidkulturguovddáža ja musihkka- ja filbmaguovddážiid boahttevuođas ja Duodjeakademiija fásta ruhtadeamis. Erenoamážit mánáidkulturguovddáš oaččui olu fuopmášumi, muitala Tuomas Aslak Juuso.

– Mis lei hui buorre ságastallan guovddážiid ruhtadeamis. Vuordimis lea juogalágan ovdaneapmi, Juuso árvala.

Sode-ođastus ja turismma ehtalaš njuolggadusat maid sáhkan

Tuomas Aslak Juuso muitala, ahte proseassat ovdánit olles áigge, muhto ovdamearkka dihtii sosiála- ja dearvvašvuođaođastusas diehtit eambbo easkka boahtte jagi bealde.

– Mis lei sáhka das, mo Sámediggi bastá buorebut bargat ja bargonávccaid hálddašit sode-bálvalusaid ovddideamis, čilge Juuso.

Turismmage birra vel gerge ráđđádallamiid loahpas ságastallat.

– Turismma oktavuođas ságastallama vuolde ledje turismma ehtalaš njuolggadusaid duohtandahkan ja čađaheapmi Suomas, ja maid sámeturismafidnu boahtteáigi Sámedikkis, Tuomas Aslak Juuso muitala turismaságastallama sisdoalu birra.

Varrasamosat: Sápmi

Váldoođđasat

Varrasamosat

Muualla Yle.fi:ssä