Säämi |

Vuosmuuh kirjeh láá tääl almostum projektist, mast táváliih ulmuuh jurgâlii nuorâi kiirjijd – Henna Tervaniemi jurgâlij Ella já skipáreh -kiirjijd

Anarâškielâ seervi Tuhháát sijđod nuorâi kirjálâšvuođâ -proojeekt vuosmuuh puátuseh láá almostum. Projektist táváliih ulmuuh jurgâlii nuorâi kirjálâšvuođâ anarâškielân. Anarâškielâ seervist lii jo nommâ čuávuvâš čäällimprojektân.

Video: Henna Tervaniemi
Aanaarlâš enni Henna Tervaniemi lii jurgâlâm Ella já skipáreh -kiirjijd. Video: Sáárá Seipiharju / Yle

Kieskâd almostuvvii kyehti uđđâ kirje anarâškielân, Ella já skipáreh 1 já 2. Taah kirjeh láá vuosmuuh teddilum puátuseh anarâškielâ seervi Tuhháát sijđod nuorâi kirjálâšvuođâ -projektist.

Nuoráid ij lah lamaš masa ollágin luhâmuš anarâškielân já tondiet taggaar proojeekt lâi taarbâšlâš.

Kiirjijd láá jurgâlâm aaibâs táváliih ulmuuh. Aanaarlâš enni Henna Tervaniemi ij lah ovdil jurgâlâm kiirjijd.

Sun lâi jierestum ko kuulâi, ete suu jurgâlem kirjeh láá viijmâg-uv almostum. Tervaniemi lii tuđâvâš loppâpuátusân, veikkâ jurgâlem lâi-uv mielâttes vaigâd.

– Jiem ollágin smiettâm talle ko algim jurgâliđ, ete lii-uvks taat älkkee vâi vaigâd jurgâliđ. Talle hoksájim tom jurgâlemproosees ääigi, ete tobbeenhân láá ennuv säneh, moid iä lah sämikielân vastuuh ollágin. Talle tot kielâlávt sierâdem lâi čuolmâ.

Sun ij tiättám ovdil proojeekt ennuvgin jurgâlmist, mutâ proojeekt ääigi movtáskij jurgâlmân.

Aalgâst, ko sun smietâi mon kirje halijdičij jurgâliđ, sun hoksái, ete sii perrust ennuv luhhum Timo Parvela kirjeh liččii hiäivuliih. Suu mielâst tain lii taggaar huumor, ete mon peri ahasâš lohheid tot tuáimá pyereest.

Ella já skipáreh
Henna Tervaniemi mielâst Ella já skipáreh -kiirjijn lii huumor, mii heivee puoh ahasijd lohheid. Govva: Sáárá Seipiharju / Yle

Tervaniemi lii jo luuhâm párnáidis kiirjijd eehidmainâsin. Ohtâ suijâ, mondiet sun vuolgij projektân fáárun lâi tot, ete anarâškielâg párnááh já nuorah uážžuh lase luhâmuš jieijâs kielân.

– Ličij pyeri, ete puáđáččii meid kirjeh moh láá aalgâaalgâst anarâškielân. Muu mielâst lii hirmâd tehálâš, ete párnááh finnejeh meid eres kuávlui kiirjijd já puáhtá luuhâđ taid jieijâs kieláin.

Jurgâlemfáddá kiäsuttij suu loopâloopâst nuuvt ennuv, ete tast šoodâi suu pro gradu -tutkâmušfáddá.

Kuldâl maid Ella-kiirjij jurgâleijee Henna Tervaniemi muštâl jurgâlmist já tast mondiet sun vuolgij fáárun taan projektân. Jietna: Sáárá Seipiharju / Yle

Anarâškielâ seervi juurdân uážžuđ pisovâš kiirjij pyevtittem

Anarâškielâ seervi čäällimproojeekt, Čyeti čälled, juátkoo val puáttee ive. Tast lii ulmen ovdediđ kirjekielâ já kirjálâš kulttuur, mutâ uážžuđ meid lase čälleid anarâškielân. Nubbe čäällimproojeekt, Tuhháát siijđod nuorâi kirjálâšvuođâ, nuuvâi jo moonnâm ive loopâst. Tast lâi juurdân uážžuđ nuoráid kiirjijd.

Nuorâi kirjálâšvuođâ proojeekt ääigi jurgâlui lovmat nuorâi kirje, moin tääl kyehti láá jo almostum. Ella-kirjij lasseen teddilem láá vyerdimin meid Čuovâuáivi peivikirje -kirjeh já Liijkás stuorrâ rähisvuotâ. Tai jurgâlum kirjij lasseen lii almostuumin Marja-Liisa Olthuis čäällim scifi-roomaan Masa jo mánudáást.

Fabrizio Brecciaroli
Anarâškielâ seervi mediapargee Fabrizio Brecciaroli muštâl, et seervi uđđâ proojeekt nommâ lii čyeti kirjed. Govva: Anja Kaarret / Yle

Anarâškielâ seervi mediapargee Fabrizio Brecciaroli muštâl, ete tääl ko ohtâ proojeekt lii nuuhâm, te kalga vuáđudij uđđâ. Uđđâ proojeekt nommâ lii Čyeti kirjed. Tooss servi ij lah val uážžum ruttâdem. Juurdân lii uážžuđ kiirjijd almostuđ potkânhánnáá.

– Kiinii jurgâl, muáddi kirje láá tuáijimmuddoost, muáddi kirje láá kuástideijest. Liččii muádi kirje puátimin ubâ ääigi, iätá Brecciaroli.

Kiirjij lasseen servi lii uuccâm ruuđâ toos, ete pastaččij almostittiđ uđâsloostâ jyehi ohhoost.

Kuldâl Anarâškielâ seervi mediapargee Fabrizio Brecciaroli saavâid seervi čäällim projektijn.

Kuldâl lase anarâš saavâid tääbbin.

Varrasamosat: Säämi

Váldoođđasat

Varrasamosat

Muualla Yle.fi:ssä