Sápmi |

Vuosttas buohkaide rabas sámegieldiibmui oassálaste goit beannotčuođi olbmo – loahppavahkus sáhttá vel oahpahallat nuortalaš- ja anárašgiela

Buohkaide rabas sámegieldiimmut neahtas álge maŋŋebárgga davvisámegiela diimmuin, masa oassálaste goit 140 olbmo.

Video: Buohkaide rabas davvisámegiela oahppodiibmu
Geahča video vuosttas buohkaide rabas sámegieldiimmuin. Doaimmaheaddji Sara Wesslin jearahallá anárašgiela oahpaheaddji Petra Kuuva. Video: Kirsti Länsman ja Sara Wesslin / Yle

Dán vahkus lea buohkain vejolaš oahpásmuvvat Suomas hállojuvvon sámegielaide gáiddusin. Sámegielaid gáiddusoahpahusfidnu, Sámediggi ja Sámi oahpahusguovddáš lágidišgohte odne maŋŋebárgga buohkaide rabas sámegielaid diimmuid.

Dárkkuhus lea fállat ovtta sámegiela diimmu buohkaide sihke davvisáme-, nuortalaš- ja anárašgielas, ja dainnaláhkai lasihit dieđu sápmelaččain ja sámegielain.

– Jurdda bohciidii das, go smiehtaimet, maid sáhtášeimmet fállat sámi giellavahku olis ja mo sáhtášeimmet loktet ovdan sámegielaid ja daid máŋggabealatvuođa, muitala Petra Kuuva, guhte oahpaha buohkaide rabas oahppodiimmus anárašgiela.

Maŋŋebárgga iđđes álggahedje davvisámegiela diimmuin. Oasseváldit ledje goit 140.

– Mielde ledje buoremus muttus badjel 70 dovddaldaga, muhto daid duohken ledje maid skuvlaluohkát, main sáhttet leat olles 30 oahppi. Danin lea veadjemeahttun árvvoštallat oasseváldiid ollislaš meari, muitala Johanna Laakso Sámi oahpahusguovddáža virtuálaskuvllas.

– Diimmu áigge lágiduvvui Kahoot!-mobiilagilvu ja das ledje 140 oasseváldi, ahte aŋkke nie olu ledje oasseváldit. Jáhkán goittotge, ahte ledje eanetge, árvala Laakso.

Gaskavahku nuortalašgiela diibmu, duorastaga anárašgiela

Sámegielaid oahppodiimmut lágiduvvojit gáiddusin ja daidda ii dárbbaš almmuhit iežas ovddalgihtii.

Gaskavahku 30.10. sáhttá vel oassálastit nuortalašgiela oahppodiibmui ja duorastaga 31.10. anárašgiela oahppodiibmui. Gáiddusoahpahusdiimmut lágiduvvojit iđđes diibmu 9–10.

– Das eai dárbbaš leat makkárge erenoamáš prográmmat. Diibmu boahtá Skype bokte. Sámi oahpahusguovddážis fállet doarjaga, nu ahte jos teknihkain šaddet čuolmmat, sidjiide sáhttá váldit oktavuođa, muitala Petra Kuuva.

Lassidieđuid Tunti saamea kaikille -fálaldagas sáhttá lohkat suomagillii Sámedikki neahttasiiddus. Rávvagiid ja liŋkka diibmui oassálastimii gávnnat dáppe.

Yle Sápmi muitalii sámegielaid oahppodiimmuin maiddái váldegotti Ylen aamu -iđitsáddagis. Oassi álgá áiggis 01:43:04.

Varrasamosat: Sápmi

Váldoođđasat

Varrasamosat

Muualla Yle.fi:ssä