Sápmi |

Vuosttaš duomut Davvi-Dakota oljobohcci vuostálastimis addojuvvon mannan vahkkus

Amerihkalaččat Alexander Simon ja Mary Redway leaba ožžon duomuid, go soai vuostálasttiiga diibmá golggománus Dakota Access Pipeline -oljobohcci Standing Rockas Davvi-Dakotas.

Yli 700 ihmistä kokoontui 7. joulukuuta 2016 vastustamaan öljy-putken rakentamista intiaanireservaatin vesilähteen alapuolelle Pohjois-Dakotassa.
Yli 700 ihmistä kokoontui 7. joulukuuta 2016 vastustamaan öljy-putken rakentamista intiaanireservaatin vesilähteen alapuolelle Pohjois-Dakotassa. Govva: Michael Nigro / AOP

Amerihkás Davvi-Dakotas álge diibmá hukset Dakota Access pipeline oljobohcci. Oljobohcci  huksema vuostálaste oallugat. Bolesat válde gitta máŋgasiid, geat válde oasi miellačájáhusaide, mat vuostálaste dán oljobohcci.

Dál Amerihkás leat vuosttaš olbmot ožžon duomuid vuostálastimis, muitala Freshet Collective . Oahpaheaddji Alexander Simon, 27, ja ealáhagas leahki birasbiologa Mary Redway ožžo duomu, danin go soai protesteriiga oljobohcci.

Simon dubmejuvvui earret eará ráđđehusa mearrádusa fysalaš easttadeamis ja heivetmeahttun láhttemis 18 beaivái giddagassii. Redway dubmejuvvui fas guđa beaivái giddagassii heivetmeahttun láhttemis, dasa lassin son gártá vel máksit 1750 dollára sturrosaš sáhku.  Áššis muitalit Freshet Collective ja -interneahttasiiddut.

Freshet Collective riektebargi ja Standing Sioux čearu lahttu Laura Grijalva, čuovui guokte beaivvi bistán dikki ja son lea hirpmahuvvan duomuin.

– Odne lei losses beaivi. Duođaštin dan, go duopmár gávnnahii sivalažžan 64-jahkásaš nissona, guhte lea dušše čuččodan Standing Rockas. Mun čirron, go sii bidje sutnje giehtaruvddiid, mun čirron go jurddašin buot mu Standing Rock bearrašiid. Ja dan, mot mii buohkat dušše háliideimmet buhtes čázi. Nubbi, nuorra dievdu maiddai dubmejuvvui giddagassii. Duopmostuollu ii heahpat dan, mot sii leat láhtten min vuostá. Rohkosat čázi bealušteddjiide, dadjá Grijalva.

Alaguoddi ii evttohan giddagasduomu – Duopmár gáibidii dan

Alaguoddi ii evttohan giddagasduomu Simonii ja Redwayai, muhto duopmár Merrick gáibidii dan, čállá Freshet collective.

Duopmár maid mearridii, ahte Simona ja Redwaya galget váldit dalán gitta, váikko lei evttohuvvon, ahte soai livččiiga boahtán dihto beaivve čohkkat duomu, vai soai livččiiga bastán ordnet áššiid ovddalgihtii.

Diggeáššit leat boađus das, go diibmá golggotmánu 22. beaivve lei Standing Rockas proteasta ja dalle boles válddii gitta birrasii 120 olbmo, go sii dolle šilttaid ja rohkadalle guohtuneatnamiid Standing Rockas.

Eatnaš gitta váldojuvvon olbmuid diggeáššiin ii šaddan mihkkige, go sin vuostá eai lean duođaštusat. Mannán vahkus duomu ožžon Simon ja Redway ledje dál nubbe háve áššáskuhtton, sudno vuosttaš sivahusat hilgojuvvojedje.

Simon ja Redway eai leat ovdal dubmehallan.

Ášši duogaš

Simon ja Redway leaba vuosttaš olbmot, geat leat ožžon duomu oljobohcci vuostálastimis. Golbma eará vuostálasti vurdet duomuideaset giddagasas.

Red Fawn Falls lea leamašan giddagasas sullii jagi ja vuordimis lea, ahte sutnje boahtá unnimustá 25 jagi fáŋgalduopmu, vejolaččat eallinagi fáŋgalduopmu.

Little Feather lea leamašan sullii čieža mánu giddagasas ja vuordimis lea, ahte sutnje boahtá unnimustá 15 jagi fáŋgalduopmu.

Dion Ortiz lea leamašan sullii guokte vahku giddagasas ja vuordimis lea, ahte sutnje boahtá unnimustá 15 jagi fáŋgalduopmu.

Eanet áššis sáhttát lohkat eaŋgalasgillii High plain readers -neahtasiidduin , Water protector legal -neahtasiidduin ja Freshet Collective -neahtasiidduin.

Varrasamosat: Sápmi

Váldoođđasat

Varrasamosat

Muualla Yle.fi:ssä