Sápmi |

Vuosttaš ságastallandilálašvuohta soabadanproseassas ordnejuvvui Njuorggámis – Gullamat miehtá Suoma

Njuorggámis ságastalle gaskavahku soabadanproseassas. Njuorggáma skuvlii čoahkkanedje logemat olbmo juogadit oainnuidis dán proseassas.

Soabadallanproseassa ságastallandilalašvuohta Njuorggámis.
Govva: Ville-Riiko Fofonoff / Yle

Njuorggáma skuvlii čoahkkanedje oktiibuot logenár olbmo hupmat soabadanproseassas. Dilálašvuođa álggus Stáhtaráđi kansliija spesiálaáššedovdi Anne-Risten Juuso muitalii soabadanproseassas ja soabadanproseassain eará guovlluin máilmmis seammás go earát gáfestalle. Njuorggánlaš Máret Ingá Länsman lei okta, guhte lei boahtán báikki ala hupmat soabadanproseassas.

– Dat lei hui somá ja oadjebas dovdu bođii. Álggos lei veahá diekkár, ahte eat riekta diehtán, ahte mii dát lea ja mii dáppe dáhpáhuvvá. Muhto lei hui vuogas go lei min iežamet olmmoš, gii lei min gullamen, muitala Länsman.

Njuorggáma ságastallandilálašvuohta lei vuosttaš sullii 30 ságastallandilálašvuođas, mat leat miehtá Suoma. Länsman lei gal duđavaš dilálašvuhtii.

– Na eai mus lean riekta vuordámušat, muhto dat lei buoret go maid mun jáhkken. Mii beasaimet dáppe muitalit man miela mii leat, lohká Länsman.

Máret Ingá Länsman
Máret Ingá Länsman lei okta guhte lei boahtán Njuorggáma ságastallandilalašvuhtii. Govva: Ville-Riiko Fofonoff / Yle
Njuorggáma ságastallamis bohte ovdan áššit gitta soahteáiggiin ja rájiid giddemis, ásodatáiggiide ja dálá beaivái ja guolástanáššiide. Länsman oaidná, ahte lea stuorra ovddasvástádus muitalit maiddái ovddit sohkabuolvvaid gillámušain ja vásáhusain.

– Mii hálaimet hui viidát vaikko makkár áššiin gitta soahteáiggiiguin, skuvla ja ásodatáiggiide. Muhto seammás bođii maiddái ovdan dat, ahte dat sohkabuolvvat, geat leat eanemus gillán dan suomaiduhttima, dat eai beasa leat dáppe muitaleame. Dovdo, ahte mis lea hui stuorra ovddasvástádus muitalit daid ovddit sohkabuolvvaid gillámušaiguin ja vásáhusaiguin, muitala Länsman.

Länsman oaidná proseassa dehálažžan.

– Dat ii lean nu čielggas dáppege, ahte oassi veahá eahpidii, ahte mii dat lea dat áigumuš, muhto iežan mielas dat gal lea hui dehálaš. Das beassá ovdán dat historjá ja dat duođaštuvvo ja dat báhcá dohko gosa nu, muitala Länsman

Vel birrasii 30 ságastallandilálašvuođa ovddas

Stáhtaráđi kansliija spesiálaáššedovdái dát lei vuosttaš máŋgga ságastallandilálašvuođas. Olu diehtu goit bođii.

– Mun in diehtán ollenge gallis dat bohte ja guđas bohte ja mun lean duđavaš dainna. Olu mii oaččuimet dieđu stáhtii dán gullamis.

Anni-Kristiina Juuso
Stáhtaráđi spesiálaáššedovdi Anne-Risten Juuso. Govva: Ville-Riiko Fofonoff / YLE
Vel birrasii 30 ságastallandilálašvuođa leat ovddabealde ja son sávváge, ahte sámit bohtet muitalit oainnuidis soabadanproseassas.

– Dát lea sámiid ášši nu, ahte dieđusge dalle mun doaivvun, ahte nu oallugiid go vejolaš sámiid mii gávdnat daidda dilálašvuođaide. Dat lea sámiid gullan dat vuođđu ja eaktu olles prosessii. Ii beare dat, ahte dás lea virggálaš ásahus Sámediggi, mii lea sámiid bealis dán proseassas, muhto ahte sápmelaččat besset dál ieža muitalit, muitala Stáhtaráđi spesiálaáššedovdi Anne-Risten Juuso.

Jus ságastallandilálašvuođaide ii beasa báikki ala muitalit iežas jurdagiid, oaiviliid, baluid dahje vuordámušaid dán proseassa ektui, sáhttá sáddet daid šleađgaboastta bokte čujuhussii sapmi(at)vnk.fi

Varrasamosat: Sápmi

Váldoođđasat

Varrasamosat

Muualla Yle.fi:ssä