Sápmi |

Vuovdaguoikka luossagilvu lágiduvvo lávvardaga juo 40. geardde – boahtte vahkus luossagilvvut maid Ohcejogas ja Beskanjárggas

Jus it háhppet Vuovdaguikii gilvvohallat, de čuovvovaš vahkuloahpas lágiduvvojit earret eará Luossariemut Ohcejogas.

Fatnasat gárvát Vuovdaguoikka luossagilvvuide
Fatnasat gárvát Vuovdaguoikka luossagilvui Čulloveaijoga gáttis. Duogábealde oidno Vuovdaguoikka boares dearvvašvuođadállu. Govva: Pentti Pieski

Sámi geassái gullet guolásteami ja eará geassedoaimmaid lassin dávjá maiddái guolástangilvvut. Deanus álggaha Vuovdaguoikka luossagilvu. Dat lágiduvvo dál jo 40. geardde lávvardaga geassemánu 29. beaivve diibmu 10 rájes Čulloveaijotnjálmmis.

Luossagilvu čohkke Badje-Deanu olbmuid goappat beal rájá ja maid sin, geat leat fárren eret Deatnogáttis.

Ovdamearkka dihtii Piritta Laiti, guhte orru Oulus, láve fitnat Vuovdaguoikka luossagilvvuin juohke jagi go beare lea dán guovllus jođus. Dálge son lea geasseluomus mátkkoštan Gáregasnjárgii deaivvadit fulkkiid.

– Áiggun mannat Vuovdaguoikka gilvvuide, go mu viellja ja čeahci leaba doppe gilvvohallamen.

Laiti illuda, go beassá oaidnit oahpesolbmuid doppe ja sus leat maiddái buorit muittut gilvvuin.

– Mánnán ledjen njuollabálkungilvvuin, ja diibmá viellja ja čeahci vuittiiga, muitala Laiti.

Vuovdaguoikka luossagilvu álggii jagi 1980 Báršši gáttis, gos daid ordnejedje logemat jagi. Gilvvuin lei ovdal maiddái suhkan- ja goargŋungilvu. Dát gilvohápmi goittotge jávkagođii jahkeduháha molsašumis. Maŋimuš suhkan- ja goargŋungilvu lei 2001.

Eambo gilvvu historjjás sáhtát lohkat Ávvir- aviissas.

Lasi gilvvut boahtte vahkus

Jus it háhppet Vuovdaguikii gilvvohallat dahje jos doppe šaddáge garra gilvomiella, de čuovvovaš vahkuloahpas gal lea maid dilli gilvvohallat juoba guvttiin gilvvuin.

Oainnát bearjadaga suoidnemánu 5. beaivve lágiduvvo BeskánLuossaRock luossagilvu Kárášjoga Beskenjárgga šaldi vulobealde. Gilvu álgá diibmu 15 Norgga áigge ja álggaha guovttebeaivásaš festivála, gos loaiddastit earret eará Kajsa Balto, Ivan Buljo ja Sančuari.

Lávvardaga suoidnemánu 6. beaivve gánnehage dasto dollet Ohcejohkii Luossariemuide. Dát gilvuges lágiduvvo jo 38. geardde.

Varrasamosat: Sápmi

Váldoođđasat

Varrasamosat

Muualla Yle.fi:ssä